Eks 28
28
Izambatho zabapristi
1Sondeza kuwe uAroni lamadodana akhe abaphakathi kwabakoIsrayeli, ukuba babe ngabapristi bokuphatha umsebenzi wami, ngitsho uAroni lamadodana akhe uNadabi loAbihu loEleyazare loIthamari.#Eks 39:1–31 2Umenzele uAroni umfowenu izambatho ezingcwele, ezobukhosi lezokucecisa. 3Khuluma labo bonke abahlakaniphileyo engibagcwalise ngomoya wokuhlakanipha, ukuba benze izambatho zikaAroni zokumahlukanisela ubupristi ukuba angikhonze. 4Yilezi izambatho abazakuzenza; ingubo yesifuba lengubo yamahlombe, lesigqoko, lebhatshi elilamabala, leqhiye, lebhanti; bamenzele uAroni umfowenu lamadodana akhe izambatho ezingcwele ukuba babe ngabapristi bokuphatha umsebenzi wami. 5Kabathathe ilembu legolide leliluhlaza leliyibubende lelibomvu, ilembu elihle, 6bayenze ingubo yamahlombe ngelembu elihle lentambo ephothiweyo yegolide leluhlaza leyibubende lebomvu, kube ngumsebenzi wengcitshi. 7Izakuba lezichibi ezimbili zasemahlombe, zihlangane emaceleni ayo womabili, ukuba ihlanganiswe. 8Ibhanti elalukiweyo elikuyo, elokuyibopha okhalweni, kalenziwe lifanane layo, ngelembu elihle lentambo ephothiweyo yegolide leluhlaza leyibubende lebomvu. 9Uzakuthatha amatshe amabili athiwa ngamaonikse, ubhale kuwo amabizo amadodana kaIsrayeli, 10amabizo awo ayisithupha abe kwelinye ilitshe, lamabizo ayisithupha aseleyo abe kwelinye njengokuzalwa kwabo. 11Njengokubhala komkhandi wendandatho lawe uzawabhala amabizo amadodana kaIsrayeli ematsheni womabili, uwazingelezele ngezinto ezitshiliweyo zegolide. 12Uzathungela amatshe womabili ezichibini zengubo yamahlombe, ukuba abe ngamatshe esikhumbuzo ebantwaneni bakoIsrayeli; uAroni uzakuthwala amabizo abo emahlombe akhe phambi kweNkosi ukuba abe yisikhumbuzo. 13Wenze izinto ezitshiliweyo zegolide, 14lamaketane amabili egolide elihle, uwenze ukuba abe njengamagoda aphothiweyo, amaketane uwabophele ezintweni ezitshiliweyo zegolide.
15Wenze ingubo yesifuba yokwahlulela, kube ngumsebenzi wengcitshi, uyenze njengengubo yamahlombe, ngelembu elihle lentambo ephothiweyo yegolide leluhlaza leyibubende lebomvu. 16Kayilingane inxa zonke, iphindwe kabili, ubude bayo bube ngangengxenye yengalo, ububanzi bayo bube ngangengxenye yengalo. 17Ufake kuyo imizila emine yamatshe amahle; umzila wokuqala ube lesardikisi letopazi lerubi, 18umzila wesibili ube le‐emeraldi lesafire lendayimana, 19umzila wesithathu ube lejasinte leagate leametiste, 20umzila wesine ube leberila leonikse lejaspi; amatshe la azingelezelwe ngezinto ezitshiliweyo zegolide. 21Kuzakuba khona amatshe alitshumi lambili, abe lamabizo amadodana kaIsrayeli; yilelo lalelo ilitshe libe lebizo lesinye sezizwe ezilitshumi lambili, kubhalwe kulo njengokubhalwa kwendandatho. 22Wenze engutsheni yesifuba amaketane egolide elihle anjengamagoda aphothiweyo, 23wenze futhi kuyo lamasongo amabili egolide, uwathungele womabili emaceleni womabili engubo yesifuba. 24Ufake amaketane womabili egolide emasongweni amabili asemaceleni engubo yesifuba; 25izihloko zamaketane womabili uzihlanganise lezinto ezimbili ezitshiliweyo zegolide, uzibeke ngaphambili ezichibini zengubo yamahlombe. 26Uzakwenza amasongo amabili egolide, uwathungele emaceleni womabili engubo yesifuba, emphethweni wayo oseduze lengubo yamahlombe. 27Wenze amasongo amabili egolide, uwathungele ngaphambili ngaphansi kwezichibi zengubo yamahlombe, ekuhlanganeni kwazo, phezu kwebhanti elalukiweyo lengubo yamahlombe. 28Bazakubophela amasongo engubo yesifuba emasongweni engubo yamahlombe ngentambo eluhlaza, ukuba ingubo yesifuba ibe phezu kwebhanti elalukiweyo, ingakhumuki engutsheni yamahlombe. 29UAroni uzakuthwala amabizo abantu bakoIsrayeli engutsheni yesifuba yokwahlulela phezu kwenhliziyo yakhe nxa engena endaweni engcwele, kube yisikhumbuzo phambi kweNkosi njalonjalo. 30Uzakufaka engutsheni yesifuba yokwahlulela inkatho iUrimi leThumimi, kube phezu kwenhliziyo kaAroni nxa engena phambi kweNkosi; ngakhoke uAroni uzakuthwala ukwahlulelwa kwabakoIsrayeli phezu kwenhliziyo yakhe phambi kweNkosi njalonjalo.#Nani 27:21; Ezra 2:63; Neh 7:65
31Uzakwenza isambatho esiyingubo yamahlombe ngelembu eliluhlaza; 32sibe lesikhala sekhanda ngaphakathi kwaso, isikhala sibe lomphetho owalukiweyo osizungelezeyo njengesikhala sesigqoko, ukuba singadabuki. 33Emiphethweni yaso wenze umfanekiso wezithelo zamapomegranati ngelembu eliluhlaza leliyibubende lelibomvu, lezinto ezikhencezayo zegolide phakathi kwazo, 34esinye lesinye isithelo silandelwe yinto ekhencezayo yegolide, kube njalo lasemiphethweni yonke yesambatho. 35UAroni kasambathe lapho ekhonzayo; ukukhenceza kwaso kuzakuzwakala lapho engena endaweni engcwele phambi kweNkosi, lalapho ephuma khona, ukuba angafi. 36Uzakwenza incence ngegolide elihle, ubhale kuyo njengokubhalwa kwendandatho ukuthi: Wahlukaniselwe iNkosi. 37Uyibophele eqhiyeni ngentambo eluhlaza, ibe ngaphambili kweqhiye. 38Izakuba sebunzini likaAroni ukuba athwale icala eliqondene lezinto ezingcwele, abantu bakoIsrayeli abazakuzenza zibe yiziphiwo zabo ezingcwele; izahlala isebunzini lakhe ukuba bamukeleke eNkosini.
39Uzakwaluka ibhatshi ngelembu elihle elilamabala, wenze iqhiye ngelembu elihle lebhanti, umsebenzi womthungi. 40Wenzele amadodana kaAroni amabhatshi lamabhanti lezingowane, izinto zobukhosi lezokuceca. 41Umambathise zona uAroni umfowenu lamadodana akhe, ubagcobe, ubahlukanisele ukuba babe ngabapristi bokuphatha umsebenzi wami. 42Ubenzele amabhulugwe okufihla ubunqunu babo, aqale okhalweni afinyelele emathangazini; 43uAroni lamadodana akhe bawagqoke lapho bengena ethenteni lokuhlangana lalapho besondela ealtareni ukuba bakhonze endaweni engcwele, funa babe lecala, bafe. Kuzakuba yisimiso esingapheliyo kuye lakuyo inzalo yakhe emva kwakhe.
Currently Selected:
Eks 28: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
