Eks 1
1
Ukuhlupheka kwabakoIsrayeli eGibithe
1La ngamabizo amadodana kaIsrayeli afika eGibithe; yileyo laleyo yafika lomuzi wayo,#Gen 46:8–27 2ayengoRubeni loSimeyoni loLevi loJuda 3loIsakari loZebuluni loBenjamini 4loDani loNafitali loGadi loAsheri. 5Bonke abazalwa nguJakobe babengamatshumi ayisikhombisa. UJosefa wayeseseGibithe. 6UJosefa wafa labo bonke abafowabo, laso sonke lesosizukulwana. 7Abantu bakoIsrayeli bazalana, banda kakhulu baze baba banengi, baba lamandla; ilizwe lagcwala bona.#Seb 7:17
8Kwasekuvela inkosi entsha eGibithe eyayingamazi uJosefa.#Seb 7:18 9Yathi ebantwini bayo: Khangelani, abantu bakoIsrayeli banengi kakhulu, futhi balamandla kulathi. 10Asibahlakanipheleni funa bande kakhulu, kuze kuthi lapho sihlaselwa yimpi, bahlangane lezitha zethu, balwe lathi, babaleke elizweni.#Seb 7:19 11Ngakhoke basebebabekela izinduna zokubasebenzisa ezabahlupha ngemithwalo enzima. Bamakhela uFaro imizi leziphala, iPithoma leRamesesi. 12Kodwa kwathi ekubahlupheni kwabo kwang’khona besanda ngamandla, basabalala, bagcwala indawo zonke. AmaGibithe abesaba abakoIsrayeli; 13abasebenzisa nzima ekusebenzeni kwabo, 14akwenza ukuphila kwabo kwaba buhlungu ngomsebenzi onzima wokwenza udaka lezitina, langemisebenzi yonke yasemasimini; abahlupha kakhulu, abasebenzisa nzima.
15Inkosi yaseGibithe yakhuluma lababelethisi bamaHeberu, ibizo lomunye wabo linguShifira, elomunye linguPuwa, 16yathi: Nxa libelethisa amaHeberu, lapho libona ebeletha indodana, liyibulale; kodwa uba kuyindodakazi, lingayibulali. 17Kodwa ababelethisi babemesaba uNkulunkulu, kabenzanga njengokutsho kwenkosi yaseGibithe, kodwa babayekela abafana, baphila. 18Inkosi yaseGibithe yasibiza ababelethisi, yathi kubo: Likwenzeleni lokhu ukuba liyekele abafana baphile na? 19Ababelethisi bathi kuFaro: Kungoba amaHeberu engenjengamaGibithe; wona alamandla, abeletha engakafiki kuwo umbelethisi. 20Ngalokhu uNkulunkulu wenzela ababelethisi okuhle, abantu banda, baba lamandla. 21Ngenxa yokuthi ababelethisi babemesaba uNkulunkulu, wabanika abantwana. 22UFaro wabalaya bonke abantu bakhe wathi: Wonke amadodana azalwayo koIsrayeli alibowaphosela emfuleni, kodwa wonke amadodakazi alibowayekela aphile. #Seb 7:19
Currently Selected:
Eks 1: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
