Dute 7
7
AbakoIsrayeli bangabantu abangcwele eNkosini
1Kuzakuthi lapho iNkosi uNkulunkulu wakho isikungenisa elizweni oya kulo ukulithumba ixotshe izizwe ezinengi phambi kwakho, amaHethi lamaGirigashi lamaAmori lamaKanani lamaPerizi lamaHivi lamaJebusi, izizwe eziyisikhombisa ezinkulu lezilamandla kulawe,#Seb 13:19 2lalapho iNkosi uNkulunkulu wakho izinikela zona kuwe ukuba uzinqobe, uziqede nya. Ungenzi isivumelwano lazo, ungabi lasihawu kuzo. 3Ungathathani lazo, ungendiseli amadodana azo amadodakazi akho; futhi ungawathatheli amadodana akho amadodakazi azo. 4Ngoba amadodana akho azakuphanjulwa yizo ekuyilandeleni iNkosi, ukuze akhonze abanye onkulunkulu, INkosi ikuthukuthelele, ikubhubhise masinyane. 5Kodwake uzakwenza lokhu kuzo; uzadiliza ama‐altare azo, ubulale insika zazo zokukhonzela, ugamule insika zazo ezimiselwe unkulunkulukazi uAshera, utshise ngomlilo izithombe zazo ezibaziweyo.#Dute 12:3 6Ngoba lingabantu abangcwele eNkosini uNkulunkulu wenu; ilikhethile ukuba libe ligugu kuyo phakathi kwazo zonke izizwe ezisemhlabeni.#Eks 19:5; Dute 4:20; 14:2; 26:18; Tit 2:14; 1 Pet 2:9
7INkosi kayilithandanga, kayilikhethanga ngoba lalibanengi kulazo zonke ezinye izizwe; ngoba lalibalutshwana kulazo zonke; 8kodwa kungenxa yokulithanda kwayo langenxa yokusigcina kwayo isifungo eyasifunga kubokhokho benu, iNkosi yalikhupha ngesandla esilamandla, yalihlenga endaweni yobugqili lesandleni sikaFaro inkosi yaseGibithe. 9Ngakhoke yazini ukuthi iNkosi uNkulunkulu wenu inguNkulunkulu, uNkulunkulu othembekileyo, ogcina isivumelwano sakhe, olothando olungapheliyo kubo abamthandayo abagcina isivumelwano sakhe, kuze kube sezizukulwaneni eziyinkulungwane,#Eks 20:5, 6; 34:6, 7 10ophindisela labo abamzondayo, ababhubhise. Kayikuphuza ukumphindisela omzondayo. 11Ngakho lizakugcina imilayo lezimiso lezahlulelo engililaya zona lamuhla.
Izibusiso zokulalela
12Kuzakuthi uba lilalela lezizimiso, lizigcine, lizenze, iNkosi uNkulunkulu izagcina isivumelwano eyasifunga kubokhokho benu, ibe lothando olungapheliyo kini.#Levi 26:1–13; Dute 28:1–14; Nani 14:18; Dute 5:9, 10 #Dute 11:1–17 13Izakulithanda, ilibusise, ilandise. Futhi izakubusisa inzalo yenu, lezithelo zomhlabathi wenu, lamabele enu, lewayini lenu, lamafutha enu, lenzalo yenkomo zenu lenzalo yezimvu zenu, elizweni eyafunga kubokhokho benu ukuiinika lona. 14Lizakubusiswa kakhulu kulazo zonke izizwe; kakuyikuba khona phakathi kwenu owesilisa lowesifazana oyinyumba, loba inyumbakazi phakathi kwenkomo zenu. 15INkosi izakuqeda phakathi kwenu zonke izifo; kayiyikulehlisela izifo ezimbi zaseGibithe elizaziyo, kodwa izakuzehlisela phezu kwabo bonke abantu abalizondayo. 16Lizakubachitha bonke abantu ezakubanikela kini iNkosi uNkulunkulu wenu; lingabahawukeli, lingakhonzi onkulunkulu babo, ngoba lokhu kuzakuba ngumjibila kini.
17Mhlawumbe lizakuthi enhliziyweni zenu: Izizwe lezi zinengi kulathi; singazinqoba kanjani na? 18Lingazesabi, kodwa khumbulani lokho iNkosi uNkulunkulu wenu eyakwenza kuFaro lakulo lonke iGibithe, 19lenhlupheko ezinkulu elazibona ngamehlo enu, lezibonakaliso lezimangaliso, lesandla esilamandla, lengalo elamandla, iNkosi uNkulunkulu wenu eyalikhupha ngazo. INkosi uNkulunkulu wenu izakwenza njalo kubo bonke abantu elibesabayo. 20Futhi iNkosi uNkulunkulu wenu izakuthumela olonyovu phakathi kwabo, baze babhujiswe lalabo abaseleyo abalicatshelayo. 21Kaliyikubesaba, ngoba iNkosi uNkulunkulu wenu iphakathi kwenu, inguNkulunkulu omkhulu lowesabekayo. 22INkosi uNkulunkulu wenu izazixotsha lezizizwe phambi kwenu kancinyane kancinyane; kaliyikuziqeda masinyane, funa izilo zande zibe zinengi. 23Kodwa iNkosi uNkulunkulu wenu izakuzinikela kini, izihluphe kakhulu, zize zichitheke ziphele. 24Izakunikela ezandleni zenu amakhosi azo, licitshe amabizo awo emhlabeni; kakulamuntu ozakumelana lani lize lizichithe ziphele. 25Izithombe ezibaziweyo zabonkulunkulu bazo lizakuzitshisa ngomlilo. Lingahawukeli isiliva legolide elikuzo, lingazithatheli lona, libe ngumjibila kini, lezizinto ziyisinengiso eNkosini uNkulunkulu wenu. 26Lingalethi isithombe ezindlini zenu, funa ube yinto eqalekisiweyo njengaso; kodwa lisizonde kakhulu, lisenyanye, ngoba siyinto eqalekisiweyo.
Currently Selected:
Dute 7: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
