Dute 27
27
Ukulotshwa kwemithetho ematsheni entabeni yaseEbali
1UMose labalisa bakoIsrayeli balaya abantu bathi: Gcinani yonke imithetho esililaya yona lamuhla. 2Kuzakuthi mhla liwela iJordani lisiya elizweni iNkosi uNkulunkulu wenu elinika lona, limise amatshe amakhulu, liwabhade ngodaka,#Josh 8:30–32 3lilobe kuwo wonke amazwi alumlayo nxa selichaphile ukuze lingene elizweni iNkosi uNkulunkulu wenu elinika lona eligcwele uchago lenyosi, njengalokhu iNkosi uNkulunkulu wabokhokho benu ilithembisile. 4Lapho selichaphile iJordani, limise lamatshe engililaya ngawo lamhla, entabeni yaseEbali, liwabhade ngodaka. 5Lakhele khona iNkosi uNkulunkulu wenu ialtare lamatshe angabazwanga ngento yensimbi.#Eks 20:25 6Lakhele iNkosi uNkulunkulu wenu ialtare ngamatshe angabazwanga, linikele phezu kwalo iminikelo yokutshiswa eNkosini uNkulunkulu wenu, 7linikele iminikelo yokuthula, lidle lapho, lithokoze phambi kweNkosi uNkulunkulu wenu. 8Futhi lilobe ematsheni wonke amazwi alumlayo, liwagwale kuhle.
9UMose labapristi abangamaLevi bathi kuIsrayeli: Thula, Israyeli, ulalele; lamhla selingabantu beNkosi uNkulunkulu wenu. 10Ngakhoke lalela ilizwi leNkosi uNkulunkulu wakho, ugcine imilayo yayo lezimiso zayo engikulaya zona lamuhla.
Iziqalekiso entabeni yaseEbali
11UMose wabalaya abantu ngalolosuku wathi: 12Nxa selichaphile iJordani, lezizizwe zizakuma entabeni yaseGerizimi ukuba zibusise abantu: esakoSimeyoni, lesakoLevi, lesakoJuda, lesakoIsakari, lesakoJosefa, lesakoBenjamini.#Dute 11:29; Josh 8:33–35 13Lezizizwe zizakuma entabeni yaseEbali ukuba ziqalekise: esakoRubeni, lesakoGadi, lesakoAsheri, lesakoZebuluni, lesakoDani, lesakoNafitali. 14AmaLevi azamemezela ngelizwi elikhulu athi kuwo wonke uIsrayeli:
15Kaqalekiswe umuntu owenza isithombe esibaziweyo lesibunjiweyo, into eyisinengiso eNkosini, umsebenzi wezandla zomuntu oyingcitshi, asimise ensitha. Bonke abantu bazakuthi: Ameni.#Eks 20:4; 34:17; Levi 19:4; 26:1; Dute 4:15–18; 5:8
16Kaqalekiswe odumaza uyise lonina. Bonke abantu bazakuthi: Ameni.#Eks 20:12; Dute 5:16
17Kaqalekiswe osusa isikhonkwane sensimu yomakhelwane wakhe. Bonke abantu bazakuthi: Ameni.#Dute 19:14
18Kaqalekiswe oduhisa isiphofu endleleni. Bonke abantu bazakuthi: Ameni.#Levi 19:14
19Kaqalekiswe owonakalisa ukwahlulelwa kowemzini lentandane lomfelwakazi. Bonke abantu bazakuthi: Ameni.#Eks 22:21; 23:9; Levi 19:33, 34; Dute 24:17, 18
20Kaqalekiswe olala lomkayise, ngoba embule umkayise. Bonke abantu bazakuthi: Ameni.#Levi 18:8; 20:11; Dute 22:30
21Kaqalekiswe olala lenyamazana. Bonke abantu bazakuthi: Ameni.#Eks 22:19; Levi 18:23; 20:15
22Kaqalekiswe olala lodadewabo, loba eyindodakazi kayise loba eyindodakazi kanina. Bonke abantu bazakuthi: Ameni.#Levi 18:9; 20:17
23Kaqalekiswe olala loninazala. Bonke abantu bazakuthi: Ameni.#Levi 18:17; 20:14
24Kaqalekiswe obulala umakhelwana wakhe ensitha. Bonke abantu bazakuthi: Ameni.
25Kaqalekiswe owamukela umvuzo wokuthengwa ukuba abulale umuntu ongelacala. Bonke abantu bazakuthi: Ameni.
26Kaqalekiswe ongalaleli amazwi alumlayo ngokuwagcina. Bonke abantu bazakuthi: Ameni.#Gal 3:10
Currently Selected:
Dute 27: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
