Dute 22
22
Imilayo ngezinye izinto
1Uba ubona inkabi loba imvu yomuntu wakini iduha, ungayiyekeli, kodwa ibuyisele kuye.#Eks 23:4, 5 2Uba umniniyo engekho eduze, loba ungamazi, ilethe emzini wakho, uyilondoloze, aze ayidinge umniniyo, ubusuyibuyisela kuye. 3Wenze njalo langobabhemi wakhe, langengubo yakhe, langazo zonke izinto alahlekelwe yizo ozifumeneyo wena; ungali ukusiza.
4Uba ubona ubabhemi womuntu wakini loba inkabi yakhe kuwele endleleni, ungakuyekeli; msize lowomuntu ukukuvusa.
5Owesifazana angagqoki okwendoda, lendoda ingagqoki isigqoko sowesifazana. Ngoba owenza lokhu uyisinengiso eNkosini uNkulunkulu wakho.
6Uba ufumana endleleni isidleke senyoni loba sisesihlahleni loba siphansi, silamatsiyane ingabe silamaqanda, unina efukamele amatsiyane loba amaqanda, ungathathi unina kanye lamatsiyane; 7kodwa yekela unina ukuba ahambe, uzithathele amatsiyane. Ngalokho kuzakukulungela, uhlale insuku ezinengi.
8Nxa usakha indlu entsha, uzakwenza umduli ophahleni lwayo, ukuba umuntu angawi khona, kungabi lecala legazi endlini yakho.
9Ungahlanyeli inhlobo ezimbili zenhlanyelo esivinini sakho, funa zonke izithelo zibe ngcwele, kulahlekelwe inhlanyelo oyihlanyeleyo lezithelo zesivini.#Levi 19:19
10Ungalimi ngenkabi uyibophele lobabhemi.
11Ungambathi ingubo eyenziwe ngoboya bezimvu langelembu elihle.
12Ubokwenza intshaka emiphethweni yomine yengubo yakho oyambathayo.#Nani 15:37–41
Imilayo emayelana lokuthatha umfazi
13Uba umuntu ethatha umfazi, angene laye engutsheni, abesemala, 14ambeke icala elilehlazo, amgcone athi: Ngathatha lowesifazana; lapho ngingena laye engutsheni ngafumana ukuthi kaseyiyo intombi emsulwa. 15Uyise lonina bentombi bazakuyisa kubalisa bomuzi enkundleni, babatshengise ubufakazi bobuntombi bayo, 16uyise wentombi athi kubalisa: Ngendisela indodakazi yami kulumuntu; useyala khathesi; 17futhi yena uyibeke icala elilehlazo wathi: Kangifumananga ubufakazi bobuntombi endodakazini yakho. Kanti nampu ubufakazi bobuntombi bayo. Besebesendlala ingubo phambi kwabalisa bomuzi. 18Abalisa bomuzi besebethatha lowomuntu, bemtshaya; 19bamhlawulise amashekeli eseliva alikhulu, bawanike uyise wentombi, ngoba eyigconile intombi emsulwa yakoIsrayeli. Yona izakuba ngumkakhe, angayilahli zonke insuku zakhe. 20Kodwa uba kuliqiniso ukuthi intombi ingebuveze ubufakazi bobuntombi, 21bazayisa ngasemnyango wendlu kayise, amadoda omuzi wakibo ayikhande ngamatshe ayibulale; ngoba yenzile okubi koIsrayeli ngokwenza ubuwule endlini kayise. Ngalokhu lizakuqeda ububi phakathi kwenu.
22Uba indoda ifunyanwa ilele lomfazi wenye indoda, bobabili bazabulawa, indoda ebilele lomfazi kanye lomfazi. Ngalokhu lizaqeda ububi koIsrayeli.
23Uba umuntu ehlangana lentombi ekhombileyo phakathi komuzi, alale layo, 24lizakubakhuphela ngasesangweni lalowomuzi bobabili, libakhande ngamatshe libabulale; likhande ngamatshe intombi ngoba ingahlabanga umkhosi lanxa ibiphakathi komuzi, lendoda ngoba imonile umkamakhelwana wakhe. Ngalokhu lizaqeda ububi phakathi kwenu.
25Kodwa uba umuntu ehlangana lentombi ekhombileyo egangeni, ayibambe, alale layo, kakubulawe lowomuntu kuphela olele layo. 26Kodwa lingenzi lutho entombini, ngoba kayilacala elifanele ukufa; lindaba ifanana leyomuntu ovukela umakhelwana wakhe ambulale; 27ngoba ehlangene layo egangeni. Lanxa intombi ekhombileyo ibihlabe umkhosi, bekungelamuntu wokuyilamulela.
28Uba umuntu ehlangana lentombi engakhombanga, ayibambe, alale layo, baficwe,#Eks 22:16, 17 29lowomuntu obelele layo uzakunika uyise wentombi amashekeli esiliva angamatshumi amahlanu, yona ibe ngumkakhe, ngoba eyingcolisile; angeyilahle zonke insuku zakhe.
30Umuntu angathathi umkayise, angamambuli umkayise.#Levi 18:8; 20:11; Dute 27:20
Currently Selected:
Dute 22: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
