Dute 10
10
Amatshe esibili awemithetho elitshumi
1Ngalesosikhathi iNkosi yathi kimi: Baza amatshe anjengawokuqala, wenze lomtshokotsho wezigodo, ubusukhwela uze kimi entabeni. 2Ngizakuloba ematsheni amazwi ayelotshwe ematsheni akuqala owabuleleyo, uwabeke emtshokotshweni. 3Ngasengisenza umtshokotsho ngesihlahla somvagazi, ngabaza amatshe amabili anjengawokuqala, ngakhwela entabeni ngiphethe lawomatshe womabili. 4INkosi yaloba ematsheni njengokuloba kwayo kwakuqala, yabhala imithetho elitshumi eyayikhuluma kini entabeni iphakathi komlilo ngosuku lokuhlangana; yanginika wona. 5Ngasengiphenduka ngisehla entabeni, ngawafaka amatshe emtshokotshweni engangiwenzile; akhona lapho njengokungilaya kwayo iNkosi.
6— AbakoIsrayeli basuka emithonjeni yaseBenejakani, bahamba bayafika eMosera; uAroni wafela lapho, wangcwatshwa khona; indodana yakhe uEleyazare waba ngumpristi esikhundleni sakhe.#Nani 20:28; 33:38 7Basuka lapho, baya eGudigoda; basuka eGudigoda, baya eJotibatha, ilizwe lezifula zamanzi. 8Ngalesosikhathi iNkosi yazahlukanisela isizwe sakoLevi ukuba sithwale umtshokotsho wesivumelwano seNkosi, lokuba sime phambi kweNkosi, siyikhonze, sibusise ngebizo layo, kuze kube lamuhla.#Nani 3:5–8 9Ngalokhu amaLevi kawalasabelo selizwe kanye labafowabo; iNkosi iyisabelo sawo, njengokutsho kweNkosi uNkulunkulu wenu kuwo. —
10Ngahlala entabeni njengakuqala insuku ezingamatshumi amane lobusuku obungamatshumi amane; iNkosi yangilalela langalesosikhathi, kayithandanga ukulibhubhisa.#Eks 34:28
11INkosi yathi kimi: Suka, uhambe phambi kwabantu, bangene balithumbe ilizwe engafunga ukubanika lona okhokho babo.
Lokho iNkosi ekucela kuIsrayeli
12Khathesike, Israyeli, iNkosi uNkulunkulu wakho ifunani kuwe ngaphandle kokuba uyesabe iNkosi uNkulunkulu wakho, uhambe ngendlela zayo zonke, uyithande, uyikhonze ngenhliziyo yakho yonke langomphefumulo wakho wonke, 13ugcine imilayo yayo lezimiso zayo engikulaya zona lamuhla, ukuba kukulungele na? 14Iphezulu, lezulu eliphezulu kakhulu ngeleNkosi uNkulunkulu wakho, lomhlaba lakho konke okukuwo. 15Kodwa iNkosi yabambelela kubokhokho benu, yabathanda, yakhetha inzalo yabo emva kwabo, ngitsho lina phakathi kwabo bonke abantu, njengalamhla. 16Ukusoka kwenu kakube ngokwenhliziyo, lingabe lisaba lenhliziyo ezilukhuni. 17Ngoba iNkosi uNkulunkulu wenu inguNkulunkulu wabonkulunkulu, leNkosi yamakhosi, uNkulunkulu omkhulu, olamandla, owesabekayo, ongakhethi muntu, ongamukeli umvuzo wokuthengwa.#1 Tim 6:15; Isam 17:14; 19:16; Seb 10:34; Roma 2:11; Gal 2:6; Efe 6:9 18Iyenzela ukwahlulela izintandane labafelwakazi, iyathanda abezizweni abahlala phakathi kwenu ibanike ukudla lezambatho. 19Ngakhoke bathandeni abezizweni, ngoba lalingabezizweni eGibithe. 20Lizakuyesaba iNkosi uNkulunkulu wenu, liyikhonze, libambelele kuyo, lifunge ngebizo layo. 21Yiyo eliyidumisayo, inguNkulunkulu wenu olenzele lezizinto ezinkulu lezesabekayo elizibonileyo. 22Okhokho benu baya eGibithe bengabantu abangamatshumi ayisikhombisa; khathesi iNkosi uNkulunkulu wenu ilenzile laba ngangezinkanyezi zaphezulu.#Gen 46:27; 15:5; 22:17
Currently Selected:
Dute 10: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
