Kol 1
1
Isibingelelo
1Mina Pawuli umphostoli kaKristu Jesu ngentando kaNkulunkulu, loTimothi umzalwane, 2sithi kibo abangcwele labazalwane abakholwayo kuKristu abaseKolose: Kakube kini umusa lokuthula okuvela kuNkulunkulu uBaba.
UPawuli ubonga ukukholwa lothando lwabaseKolose
3Siyambonga njalo uNkulunkulu uYise weNkosi yethu uJesu Kristu nxa silikhulekela, 4lokhu sizwile ngokukholwa kwenu kuKristu Jesu langothando lwenu elibathanda ngalo bonke abangcwele. 5Lezizinto ezimbili zivela ethembeni elibekelwe lona ezulwini, elezwa ngalo ngaphambili ngelizwi leqiniso elilivangeli 6eselifikile kini, njengalokhu selikhona emhlabeni wonke. Lelivangeli liyanda lithela izithelo, njengoba kunjalo laphakathi kwenu, kusukela mhla wosuku elezwa ngalo, lawazi umusa kaNkulunkulu ngeqiniso. 7Lokhu lakufundiswa nguEpafra othandekayo oyinceku kanye lathi, oyisikhonzi esithembekileyo sikaKristu ngenxa yethu;#Kol 4:12; Filim 23 8nguye futhi ositshele ngothando lwenu olungaye uMoya.
UPawuli uyabakhulekela
9Ngakhoke lathi, kusukela mhla wosuku esezwa ngalo, kasiyekeli ukulikhulekela lokulicelela ukuba ligcwaliswe ngokwazi intando yakhe ngokuhlakanipha konke lokuqedisisa okungomoya, 10lihambe ngokufanele iNkosi, liyithokozise ngakho konke, lithele izithelo emisebenzini yonke elungileyo, likhule ekumazini uNkulunkulu. 11Aliqinise ngamandla wonke ngokwamandla obukhosi bakhe, kuze kube khona ukubekezela lesineke lokujabula ezintweni zonke, 12libonge uYise owalenza lafanela ukuhlanganyela ilifa labangcwele ekukhanyeni. 13Wasikhulula emandleni omnyama, wasisa embusweni weNdodana yakhe ethandekayo, 14esilokuhlengwa ngayo lokuthethelelwa izono.#Efe 1:7
Ubuntu lomsebenzi kaKristu
15Yona ifuze uNkulunkulu ongelakubonwa, elizibulo lezidalwa zonke. 16Ngoba konke kwadalelwa kiyo okusezulwini lokusemhlabeni, okubonwayo lokungabonwayo, loba kuyizihlalo zobukhosi loba kuyiziphathamandla loba kuyimibuso loba kungamandla; konke kwadalwa ngayo, kwadalelwa yona. 17Yona ingaphambi kwakho konke, lezinto zonke zimi ngayo. 18Yona yinhloko yomzimba olibandla; iyikuqala, izibulo kwabafileyo, ukuze yona ibe ngeyokuqala ezintweni zonke.#Efe 1:22, 23 19Ngoba kwaba kuhle kuNkulunkulu ukuba ukuphelela konke kukaNkulunkulu kuhlale kiyo; 20lokuba ngayo abuyisane lezinto zonke ezisemhlabeni loba ezisezulwini, enze ukuthula ngegazi lesiphambano sayo.#Efe 2:16 21Lani lalikade liphambene laye, liyizitha zakhe ngenhliziyo langemisebenzi emibi. 22Kodwa khathesi usebuyisene lani emzimbeni wayo ngokufa ukuba alimise phambi kwakhe lingcwele, lingelacala, lingasoleki, 23uba lihlala ekukholweni, lisekelwe liqinile, lingasuki ethembeni levangeli elalizwayo. Lona latshunyayelwa kukho konke okudaliweyo okungaphansi kwezulu, engenziwe isikhonzi salo mina Pawuli.
Ukuhlanganyela kukaPawuli emsebenzini kaKristu
24Khathesi ngiyathokoza ekulihluphekeleni kwami. Lokho okusileleyo enhluphekweni zikaKristu ngiyakugcwalisa emzimbeni wami ngenxa yomzimba wakhe olibandla. 25Ngenziwa isikhonzi salo ngokwesimiso sikaNkulunkulu enganikwa sona ngenxa yenu ukuze ngilazise ilizwi likaNkulunkulu ngokupheleleyo, 26ngitsho imfihlakalo ebifihlakele selokhu kwaqala izikhathi lezizukulwana, kodwa khathesi ibonakalisiwe kwabangcwele bakhe. 27Bona uNkulunkulu wathanda ukubazisa ukuthi ingakanani inotho lobukhosi baleyomfihlakalo phakathi kwabezizwe; leyomfihlakalo yilokhu ukuthi uKristu uphakathi kwenu, lilethemba lenkazimulo. 28Nguye esimtshumayelayo, seluleka wonke umuntu, sifundisa bonke abantu ngokuhlakanipha konke, ukuze sibalethe bonke kuKristu bephelele. 29Ngitshikatshikela khona lokho, ngizama ngamandla wonke kaKristu asebenza ngawo kimi.
Currently Selected:
Kol 1: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
