2 Kor 8
8
Ngeminikelo yokusiza amaKristu angabayanga
1Siyalazisa, bazalwane, ngomusa kaNkulunkulu awuphiweyo amabandla aseMakedoniya,#Roma 15:26 2ukuthi ekulingweni okukhulu ngezinhlupheko ezingaka ukuthokoza kwawo kube kukhulu, aze aphana ngokupheleleyo ebuyangeni bawo obukhulu. 3Ngoba ngokwawo anikela ngamandla awo, yebo, ngingafakaza ngithi langaphezu kwamandla awo; 4asicela kakhulu ukuba anikwe ithuba lokuhlanganyela lathi ekusizeni abangcwele. 5Kakubanga njengokuthemba kwethu kuphela, kodwa bazinikela bona uqobo kuqala eNkosini, lakithi futhi ngentando kaNkulunkulu. 6Ngakhoke sacela uTitosi ukuthi, njengalokhu wayeseqalile ngaphambili lumsebenzi womusa, kaqhubeke awuqede. 7Njengalokhu likhuthele kakhulu kukho konke, ukukholwa lokukhuluma, lokwazi, lokutshisekela konke, lothando elisithanda ngalo, khuthalani lakulumsebenzi womusa.
8Kangililawuli ngokutsho lokhu, kodwa ukuze ukukhuthala kwabanye kuhlole ubuqotho bothando lwenu. 9Ngoba liyawazi umusa weNkosi yethu uJesu Kristu ukuthi, lanxa wayenothile, waba ngumyanga ngenxa yenu, ukuze ngobuyanga bakhe linothe lina. 10Nanku ukubona kwami ngalindaba; ngithi kulilungele ukuba liwuqede lowomsebenzi elawuqalisa nyakenye, lalingabokuqala ukuwenza lokuthanda ukuwenza. 11Ngakhoke qhubekani liwuqede; njengoba lakhuthalela ukuwuqalisa, khuthalelani lokuwuqeda ngalokho elilakho. 12Ngoba uba uthando lokupha lukhona, uNkulunkulu uyamukela lokho umuntu alakho, angakudingi lokho umuntu angelakho. 13Kangitsho lokhu ukuze kusizakale abanye lina lisale lihlupheka, kodwa ukuze kube khona ukulingana. 14Okwakhathesi inala yenu iyasiza ukuswela kwabo, kodwa ngolunye usuku inala yabo izakusiza ukuswela kwenu, kube khona ukulingana, 15njengokulotshiweyo okokuthi: Owabutha okunengi kabanga lokusalayo, lowabutha okuncinyane kaswelanga.#Eks 16:18
16Kabongwe uNkulunkulu ofaka enhliziyweni kaTitosi inkuthalo ngani. 17Ngoba kavumanga isicelo sethu kuphela, kodwa lokhu ekhuthele usukile ukuza kini ngokuzithandela kwakhe. 18Sithumela kanye laye umzalwane olodumo ngokutshumayela ivangeli emabandleni wonke, 19kungesikho lokhu kuphela, kodwa ukhethiwe futhi yiwo amabandla ukuba asiphelekezele lokusisiza emsebenzini womusa esiwenzela ukuba kudunyiswe iNkosi, lokuba kubonakaliswe ukukhuthala kwethu. 20Senzela ukuba kungabi khona osisolayo ngokuphatha kwethu lesisphiwo esikhulu; 21ngoba sinanzelela okuhle, kungasemehlweni eNkosi kuphela, kodwa lasemehlweni abantu.#Zaga 3:4 (LXX) 22Sithumela kanye labo umzalwane wethu esimfumene kanengi ekhuthele ezintweni ezinengi, khathesi ukhuthele kakhulu ngenxa yokulithemba kwakhe okukhulu. 23UTitosi yena engumhlanganyeli lesisebenzi kanye lami kini, abazalwaneke bona bayizithunywa zamabandla, bangababongekayo bakaKristu. 24Ngakhoke bonakalisani kubo phambi kwamabandla ubufakazi bothando lwenu lokuzincoma kwethu ngani.
Currently Selected:
2 Kor 8: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
