2 Kor 6
6
1Thina esisebenza kanye laye siyalincenga ukuba lingawamukeli ngeze umusa kaNkulunkulu. 2Ngoba uthi:
Ngesikhathi esihle ngikuzwile,
langosuku lokusiliswa ngakusiza.
Khangelani, khathesi sekuyisikhathi esihle impela; sekulusuku lokusiliswa.#Isa 49:8 3Kasikhubekisi muntu, ukuze inkonzo yethu ingasoleki. 4Kodwa kukho konke sizibonakalisa siyizikhonzi zikaNkulunkulu ngokubekezela okukhulu, ezinhluphekweni, lasebunzimeni, lasekubandezekeni, 5lasekutshayweni, lasekubotshweni, laseziphithiphithini, lasekusebenzeni nzima, sihamba singalali singadli.#Seb 16:23 6Siyazibonakalisa langokuhlambuluka, langokwazi, langokubekezela, langobumnene, langoMoya oNgcwele, langothando oluqotho, 7langokukhuluma iqiniso, langamandla kaNkulunkulu, langokusebenzisa izikhali zokulunga ngesandla sokunene langesokhohlo; 8ngodumo langehlazo, ngokuthukwa langokudunyiswa. Siyaphathwa njengabakhohlisi, kanti singabeqiniso; 9njengabangaziwayo, kanti saziwa kakhulu; njengabafayo, kanti khangelani, sisekhona; njengabalaywa ngokuhlupheka, kanti kasibulawa; 10njengabalosizi, kanti siyathokoza njalonjalo; njengabayanga, kanti sinothisa abanengi; njengabangelalutho, kanti silakho konke.
11Lina baseKorinte, sikhuluma ngokusobala kini, silivulela inhliziyo zethu; 12uba livinjelwe, kalivinjelwanga yithi, livinjelwe zinhliziyo zenu. 13Linake, ukuze kube khona ukwenanana, sivuleleni inhliziyo zenu; ngikhuluma njengakubantwana.
UPawuli uxwayisa abakholwayo ukuba bangahlangani labangakholwayo
14Lingazihlanganisi labangakholwayo, ngoba kulokuhlanganyela ngaphi ukulunga lokungalungi na? Kulokuhlanganyela ngaphi ukukhanya lomnyana na? 15UKristu ulokuzwana ngaphi loBeliyali na? Ulesabelo bani okholwayo longakholwayo na? 16Livumelana ngaphi ithempeli likaNkulunkulu lezithombe na? Ngoba thina silithempeli likaNkulunkulu ophilayo, njengokutsho kwakhe ukuthi:
Ngizakuhlala labo, ngihambe phakathi kwabo;
ngizakuba nguNkulunkulu wabo, bona babe ngabantu bami.#Levi 26:12; Hez 37:27; 1 Kor 3:16; 6:19
17Ngakhoke phumani phakathi kwabo,
lahlukane labo, kutsho iNkosi;
lingathinti okungcolileyo;
ng’khonake ngizakulamukela.#Isa 52:11
18Ngizakuba nguYihlo wenu,
lina libe ngamadodana lamadodakazi ami,
kutsho iNkosi uSomandla.#2 Sam 7:14; 1 Lan 17:13; Isa 43:6; Jer 31:9
Currently Selected:
2 Kor 6: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
