HADUI DAHA' SIHU TUHAN 24
24
Paulus ha' unan Feliks
1Lima' dau men'uh atih, ngiléh nah Ananias imam aya' dahin kuri-kuri la'ung daha' aleng dekaya' dahin ji kelunan aleng haman duan aleng aran na' Tertulus, lim daha' atih bara men gabnur ngema' Paulus. 2Tegu daha' uh muvui Paulus, matoh nah Tertulus ngema' iha', ken na',
“U Sepui Feliks aleng kelalau sayu, avin kenan asi ka' lim kamé' dena', dahin kenan nyemugen ka' daléh anih uh nei temei. 3#HST 23:26; 26:25 Kamé' hino'-hino' pah ala lim na' atih dahin sayu kenep. 4Meng nah akui pehungo' ika', akui akei asi té' ika' ja si' ika' kelenghi ji li'ap dahun amé', 5#HST 17:6 avin uh kitan amé' kelunan anih kelalau lalé' nyelalang, ji kelunan aleng na lim daha' Yahudi té' lim usun tana anih ngenep nyudung lawan perintah, dahin jadi' ji kepala' adet daha' Nazaret, 6#HST 21:28 iha' pah lahuh hu'uh ngenep na Uma Allah masep dih, bi kamé' anih mapuh iha', dahin seng mukum iha' ngioh tebara amé'. 7Bi Lisias kepala' seladu atih nei nyilé' iha' men usu amé', dahin nyihu kamé' aleng ngema' iha' nei ha' unan ka'. 8#HST 23:30 Awi batung ka' meteng iha' adang ika' jam marung lim tuk anih ngavan amé' leput iha' anih.” 9Lim daha' Yahudi atih pah peji dahin kema' atih dahin menglan dahun na'.
Paulus nyu'ei Feliks
10Tegu gabnur anan nuek ngatah nyihu iha' nyu'ei, pelalau Paulus nyu'ei, ken na',
“Avin akui jam ika' uh kuri-kuri duman uh hakim alem daléh anih, iha' nah akui sayu kenep bara marung akui. 11#HST 21:17 Awi ika' kaséh meteng daha', adang ika' jam nusi' ha' huwi pulu-dua' dau men'uh akui tei ma'un ha' Yerusalem, ngenep sebayang. 12Nusi' nah daha' pesuk akui pehu'ei-pehu'ei dahin daha' nurei pah nusi' kui pebisau kenep daha' kahum, alem Uma Allah pah nusi', nurei pah alem uma sebayang nun-nun pah nusi', nurei pah alem daléh. 13Nusi' nah daha' deng menglan taka' aleng en daha' na marung akui nih ha' unan ka' kerei inih. 14#HST 24:5 Bi anih nah aleng ek akun té' ika', avin akui menangen lan sebayang té' Allah daha' sepun amé' menuna', dahin ngioh Alan atih lahuh aleng en daha' kuma' adet aleng nyelet. Akui pah nginah té' lim tebara aleng uh kalung alem surat tebara Musa dahin té' lim surat daha' nabi lahuh. 15#Dan 12:2; Yoh 5:28-29 Akui nginah té' Allah, awi jam tuk daha' anih pah lahuh nginah, kelunan matei seng nei peju murip, iha' tih kelunan aleng teneng nurei pah kelunan aleng em teneng. 16#HST 23:1 Avin anan nah akui atek menangen lan murip ja kenep kui ma'ang men Allah dahin men kelunan lahuh.
17 #
Rom 15:25; Gal 2:10; HST 22:3 “Hu'uh kuri-kuri duman dara na' nei nah akui ha' Yerusalem geri ket aleng en daha' uk men daha' bengsa' kui, dahin ket aleng en uk men Tuhan. 18#HST 21:17-28 Alem akui na tuk anan nah daha' aleng naka' akui anan pesuk akui alem Uma Allah, tegu akui uh ngem'ang batung kui. Nusi' pah té' kelunan dahik, nusi' pah akui na nun-nun aleng petusah kelunan. 19Bi té' kah kuri-kuri la'ung kelunan Yahudi men Asia tinan, tekep dalo' anan té' hinih lahuh iha' awi té' nun-nun kema' daha' té' akui. 20Avin kelunan atih em té', bei nah kelunan anih bara hadui kui aleng sala aleng uh kitan daha' marung akui ha' unan daha' kemiti atih. 21#HST 23:6 Mina ha' ji daho' anih tua aleng ek medéng tegu akui nekring ha' unan daha' atih, iha' tih, ‘Marung tuk kelunan matei nei peju murip akui en daha' leput ha' unan kam dau anih.’ ”
22 #
HST 23:26
Bi Feliks aleng kelalau jam marung Alan atih, nyihu pa'eng daho' anih, ken na', “Em tuken Lisias, kepala' seladu nei ateng hinih, uréh kui mutet dahun kam anih.” 23#HST 27:3 En na' nyihu nah ji kopral ma'eng Paulus alem jin, bi en daha' uk tua nah awang men iha' dahin ngavan daha' bakéh na' pah lahuh tei jam iha'.
Paulus en daha' eng alem jin
24Kuri-kuri dau men'uh anan nei nah Feliks dahin Drusila aleng hawan na', iha' tih ji doh Yahudi, pelalau iha' nyihu muvui Paulus, seng kelenghi marung kinah na' té' Yesus Kristus. 25Bi alem Paulus na'lung marung teneng, dahin pa'eng kenep, dahin ukum aleng seng ateng, takut nah Feliks, iha' ha' kuma', “Uh nah anan arin, tei nah im. Tegu kui havah iha' nah akui muvui ika' la'an.” 26Ji pah la'an iha' nginah Paulus seng ma'uk iha' ligit, avin anan iha' tutek nyihu iha' nei pala ha' unan na', dahin tengaran dahin na'. 27#HST 25:9 Bi hu'uh dua' duman dara na' Feliks atih pekalui dahin Perkius Festus. Avin Feliks atih ngenep nyala kenep daha' Yahudi, iha' ha' melek Paulus alem jin.
Currently Selected:
HADUI DAHA' SIHU TUHAN 24: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
