Roma 5
5
Jamǝkur Ənga Hyal Lagur Mbǝrsa
1Agabangau, ta a nǝ mǝnǝr nji tsapǝr dzǝ lagur mbǝrsa, mǝnu uya huɗǝ pǝrtǝu ǝnga Hyal lagur Thlagǝr mǝn Yesu Kǝrsiti. 2Lagu nyi nga mǝn uya gwu mayiwakur kǝra mǝna vǝr nggya a gwa gwa lagur mbǝrsar mǝn. Namǝn tsu, mǝna vǝr caguli ariya fǝrkǝr mǝn ca ngǝ mǝnu nda nggya njir daɓǝ kǝr wu kadakadarkur nǝ Hyal. 3Aˈyi kǝ waci mai, ama tsu mǝnu caguli wu ɓwaɓwatǝr mǝn, ara mǝnu sǝni, abǝr, ɓwaɓwatǝ wu shili ǝnga cinapi, 4cinapi, wu shili ǝnga nggyabiya mǝnahǝu, nggyabiya mǝnahǝ tsu wu shili ǝnga fǝrkǝr. 5Fǝrkǝr tsu wu hǝna sǝlir mǝn mai, ara Hyal a puwari yiwukur nyi wu ɗǝfuwa mǝn lagur Mambǝl Cici kǝra ji nǝ mǝn.
6Ara wu pǝci kǝra aˈyi mǝna sǝni dlǝwari kǝrmǝn mai, wu pǝci nyi, ngǝ Kǝrsiti tau ariya mǝn, namǝn njira gǝra hivǝr Hyal. 7Ənga dzau ngǝ vanyi ndǝ a sǝni tau ariya ndǝ tsapǝu. Ama vanyi pǝci ariya nggyabiya mǝnahǝ nǝ vanyi ndau, ba vanyi ndǝ a lǝr kǝrnyi aga ja tau ariya ja. 8Ama kǝ Hyal cabiya mǝn nǝnya yiwukur, ar pǝcira mǝn tsu njir bikau, ca ngǝ Kǝrsiti tǝ ariya mǝn.
9Ya, ta ɗa a uyar mǝn tsapǝr dzǝ lagur mashi Kǝrsiti, pakatǝu, abangǝ tsu mǝn wu nda uya mbǝɗau sara ara huɗǝ ndzǝndzǝ nǝ Hyal lagu nyi. 10Ma ar pǝcira mǝn dawa ǝnga Hyal nga nji ɓasǝwa mǝn ǝnga ja lagur tǝ Zǝr nyi, ma abangǝ, mǝn wu nda uya mbǝɗau lagu piya Zǝr nyi kǝra ɓasǝwa mǝn ǝkkǝˈyi ja. 11A ndiya kǝ ma, mǝna dumwa ǝnga caguli ariya sǝra Hyal mǝliya lagur Thlagǝr mǝn Yesu Kǝrsiti, ndǝra lagu nyi nga nji ɓasǝwa mǝn ǝnga Hyal.
Tau Lagu Adamu, Pi Lagu Kǝrsiti
12Bikǝ shili wu duniya lagu ndǝ zǝmǝu, kǝ tǝ shili tsu lagu bikau. Lagu kǝ ngǝ tǝ mbar patǝr ndapi, ara kalar ndǝ a mǝliyar bikau. 13Ara kadivira nja lǝri dlaɗau, bikau aˈyi ja wu duniya. Ama aˈyi nju jiga bikǝ mai, ar pǝcira dlaɗǝ aˈyi mai. 14Alaga abangǝ tǝ ngǝ a vǝr sǝm tǝlkur ar kǝra nggyabiya patǝr nji, mbari ar pǝcir Adamu baˈa shili ar pǝcir Musa, patǝ ǝkkǝˈyi njira aˈyi mǝliya bikǝ lagur ɓǝl dlaɗǝ ǝnggǝr kǝra Adamu mǝliya mai. Adamu, naja tsu ngǝ ǝnggǝr ndǝra a vǝr shili.
15Ama lǝ sǝ kurthlǝ kǝra Hyal lǝri lagu ndǝra wu shili kau, pamǝ nga nyi gagaɗǝ a ndiya bikǝ nǝ ɓǝl dlaɗǝ nǝ Adamu. Kǝja bikǝ nǝ ndǝ zǝmǝ kǝ a shiliri ǝnga tǝ anǝ nji gangǝu. Ama mayiwakur nǝ Hyal ǝnga lǝ sǝ kurthlǝ nyi a ndiya ǝnga gangǝu, kǝra shili lagu mayiwakur nǝ ndǝ zǝmǝu, naja ngǝ Yesu Kǝrsiti, a dlari ǝnga barka dǝgalǝ gagaɗau anǝ nji gangǝu. 16Jijiri, lǝ sǝ kurthlǝ nǝ Hyal pamǝ nga nyi ara bikǝ ndǝ zǝmǝ kau. Ariya numa kǝra shili ayukuɗa bikǝ ndǝ zǝmǝ kau, ca ngǝ shili ǝnga numa nǝ tau. Ama lǝ sǝ kurthlǝ kǝra Hyal lǝri ayukuɗa bikǝ nji gangǝu, ca ngǝ shili anǝ mǝn ǝnga tsapǝr dzau.
17Ara ma tǝ sǝm tǝlkur ar kǝra kalar ndǝ lagu bikǝ ndǝ zǝmǝu, abari ngǝ gangǝkura sǝm tǝlkur nǝ njira dlǝwuri gangǝkur nǝ mayiwakur nǝ Hyal ǝnga lǝ sǝ kurthlǝ nǝ tsapǝkur nyi wu nggyabiyar nda lagu ndǝ zǝmǝ ka, naja ngǝ Yesu Kǝrsiti.
18Agabangau, ǝnggǝr kǝra bikǝ nǝ ndǝ zǝmǝ shili ǝnga numa nǝ tau anǝ kalar ndau, abangǝ tsu ngǝ mǝl thlǝr tsapǝkur nǝ ndǝ zǝmǝ kǝ wu shili ǝnga uya tsapǝr dzǝ ǝnga pi mafǝliyangǝ anǝ nji patǝu. 19Ara ǝnggǝr kǝra lagur ɓǝl dlaɗǝ nǝ ndǝ zǝmǝu ngǝ nji patǝ ɗa njir bikau, abangǝ tsu ngǝ ɓǝlar dlaɗǝ nǝ ndǝ zǝmǝu, wu nda mǝliya patǝr nji nda ɗa nji tsapǝu.
20Hyal lǝr dlaɗau aga bika cakǝr dzau. Ama ar vira bikǝ cakǝr dzau, ǝna ngǝ mayiwakur nǝ Hyal wu cakǝr dzǝ gagaɗau. 21Aga ǝnggǝr kǝra bikǝ sǝm tǝlkur nyi lagu tau, abangǝ tsu ngǝ mayiwakur nǝ Hyal wu nda sǝm tǝlkur nyi lagu tsapǝkur, aga ja shili ǝnga pi gǝra kuɗau lagu Yesu Kǝrsiti Thlagǝr mǝn.
©2024 Initiative for the Translation and Development of African Languages and Margi Tiwi Nga Təm