Thlǝr 1
1
Alkawal Nǝ Mambǝl Cicau
1Ənga barka ngau, Tiyafulusu, wu lǝkakaɗǝ ɗa nǝ tanggǝrma, yi tsǝfǝri ar kǝra sǝra Yesu dzǝguya mǝl ǝnga highiɓau. 2Yesu dzǝguya mǝl ǝnga highiɓau, kǝl ta Hyal hǝr nyi a dǝmǝlmau, ayukuɗa ji nar nyi sǝr mǝl anǝ cama sǝsǝ ˈyar kǝra ji ɗǝmbiya lagu Mambǝl Cicau.
3Ayukuɗa ɓwaɓwatǝ nyi, ji cabiya kǝrnyi anǝ nji kau ǝnga ji canǝ nda sǝ pampamǝˈyar kǝra cabiya abǝr aˈyi ja ǝnga pi. Ji cabiya kǝr anǝ nji nǝ pida foɗǝ kumunyi ar kǝr ar kǝr ǝnga ji ndǝr anǝ nda ar kǝra tǝlkur Hyal. 4Vanyi pǝci ja vǝr sǝm sǝr sǝm ǝnga nda, kǝ ji nar nda ndǝr kau, “Hya sara piyari Urshalima kwatahǝ mai, ama hya sǝkǝ kǝl ma Dǝɗa sǝwa hyi sǝra ji hǝr alkawal, ǝnggǝra yi saya nar hyi ta. 5Yahwana mǝliya anǝ nji baɓǝtizǝma ǝnga ˈyimi, ama ayukuɗa pǝci kushu nju nda mǝliya hyi baɓǝtizǝma ǝnga Mambǝl Cicau.”
Maˈyir Yesu A Dǝmǝlmau
6Kǝ zǝmbǝlma nyi ˈyar kaɓiya dzǝ shila gya ja, ndu yiwa nyi, “Thlagǝu, pǝci kǝra gu shabiya nyi tǝlkur anǝ njir Izirayila a ɗar ya?” 7Kǝ Yesu shaɗǝwa nda, ji na, “Aˈyi ɗa tsaˈa anǝ hyi, hya sǝnibiya pǝci kǝra Tada fuwa sǝˈyar kǝ wu lagu ǝnga dǝnama tǝlkur nyi mai. 8Ama hyu nda uya dǝnama, ma Mambǝl Cici shida ar kǝra hyi, ǝnga hyu nda ɗa sakida ɗa wu Urshalima, ǝnga wu patǝr ˈyiˈyir Yahudi, ǝnga Samariya, baˈa ndu ndǝla duniya.”
9Ayukuɗa ji nana abangau, kǝ nji hǝr nyi a dǝmǝlmǝ wu liya nda, ba ji sanakǝr wu dlama tsu ndu lari nyi mai. 10Ma tsu nda vǝr tsatsamǝ dǝ wu dlama tara ba nda lari nyi, kukuthlǝ kǝja nji mǝthlǝ wu kar pǝrtǝ tataˈyi wu dzǝr nda. 11Ndǝ na, “Kariya, nahyi shili njir Galili, ara mi nga hyu taˈyi ǝnggau hyu tsamǝ dǝmǝlma? Hyal a hǝri Yesu a dǝmǝlmau sara ara hyi, ama pǝci wu ɓǝra shili ju nda sha shida sara dǝmǝlmǝ ǝnggǝr kǝra hyi lar nyi ja vǝr maˈyi a dǝmǝlmǝ kau.”
Matayasu Hǝri Vir Nggya Yahuda
12Kǝ ndǝ sha shida wu Urshalima sara dǝ wu madzigam nǝ Mǝ Wur Zayitunu, ɓǝ kǝra gǝra kari miyal pathlǝu. 13Ar pǝci kǝra ndǝ sha shili, kǝ ndǝ sa maˈyi a dar umbwa kǝra a dar kǝra umbwa ar vira nda vǝr nggya ari. Njira a ndǝna, nanda ngǝ Biturusu, ǝnga Yahwana, ǝnga Yakubu, ba Andǝrawusu, ǝnga Fǝlipǝu, ba Toma, ǝnga Bathlalomiyu, ba Matiwu, ǝnga Yakubu zǝr Alfawusu, ba Simanu ndǝr Ziloti, ba ǝnga Yahuda zǝr Yakubu. 14Ndu daɓǝ dzǝ parangǝ, ǝnga ndu dumwa ǝnga kǝdi Hyal ǝnga huɗǝ zǝmǝu. Mathlǝkǝˈyi aˈyi nda ǝkkǝˈyi nda, patǝ ǝkkǝˈyi Maryamu mǝya Yesu ǝnga zamǝ nyi ˈyar.
15Ar pǝci kau, ǝnggǝra njir nu kǝra gangǝkura nda lǝha dzǝr gharu ǝnga mǝthlǝ kumunyi kaɓau ar vi zǝmǝu, kǝ Biturusu hyaˈari ji ndǝr. 16Ji ndǝr, ji na, “Zamǝˈyar, kǝl ndǝr Hyal tsǝtsǝfǝ a nyabiya dzǝ ǝnggǝr kǝra Mambǝl Cici nana ɗǝɗǝmǝ lagu miya Dawuda ar kǝra Yahuda, ndǝra cabiya lagu kǝra nji mbar Yesu ari. 17Yahuda, pathlǝ ja wu pama mǝn ǝnga nji nǝ nyi bamiyar nǝnyi wu thlǝrǝr mǝn.”
18(Yahuda ɗǝlbiya babal ǝnga gǝnna kǝra ji uya sara wu thlǝ hiya Yesu. Ar vi ta ba ji tǝɗǝ lagu kǝr a gyi wu ˈyi, ba ta ja gya pǝthlau, kǝl ta haliya ja biyanakǝr. 19Naja ka huɗa sau, a ɗar ar babal anǝ njir mǝlmǝ Urshalima patǝu. Agabangǝ kǝ ndǝ ngga viya nyi ǝnga miya njir Yahudiya, “Akaldama” ca ngǝ vir mashi.)
20Biturusu dumwa, ji na, “Tsǝtsǝfǝ nga nyi wu lǝkakaɗǝ Zabura.
“ ‘Taˈyi ki nyi
a nggya huɗǝfi.
Taˈyi ja ɗa vi kǝra
ndǝ gǝra a gwa.’
Ənga tsu,
‘Taˈyi vanyi ndǝ
a hǝr vir nggya nyi,’#1:20 Tsamiya wu Zab 69:25; 109:8.
21Agabangau, a ɗar tsaˈa nja caɗǝbiya vanyi ndǝ zǝmǝ wu pama nji kau, kǝra mǝna vǝr nggya ǝkkǝˈyi nda ar pǝci kǝra Thlagǝ Yesu a vǝr ɓǝ ǝkkǝˈyi mǝn. 22Ja vǝr nggya ǝkkǝˈyi mǝn dzǝguya ar pǝci kǝra Yahwana ndǝr Baɓǝtizǝma hǝr nyi baɓǝtizǝma anǝ Yesu shili ar pǝci kǝra Hyal hǝna Yesu a dǝmǝlmǝ sara ara mǝn. A ɗar tsaˈa zǝma nda a ɗa sakida ǝkkǝˈyi mǝn ar kǝra hyaˈari nyi sara vir tau.”
23Nji mǝthlǝ nga nji hǝbiya, Yusufu kǝra nja ngga ǝnga Barsabasu, kǝra vanyi thlǝmǝ nyi ca ngǝ Jastusu, ǝnga Matayasu. 24Kǝ ndǝ kǝdi Hyal, ndǝ na, “Thlagǝu gu sǝni ɗǝfuwa nji patǝu. Cabiya ˈya tara wa nga gǝ hǝbiya wu pama nji mǝthlǝ kau, 25kǝra wu hǝri vir nggya Yahuda kǝra tana lagu nǝ nggya cama sǝsǝkur, ji nu lagu kǝra ɗa tsaˈa anǝ nyi.” 26Kǝ ndǝ tǝɗǝ shiˈwu, kǝ ndǝ hǝbiya Matayasu aga ja ɗa pathlǝ wu pama cama sǝsǝ ˈyar kumo a sǝrtangǝu.
©2024 Initiative for the Translation and Development of African Languages and Margi Tiwi Nga Təm