Luk 9

Ka Yensa abúuñne ñantaalibehinem k'andék ampasun Kúmbuuñaamo Kúnsuuminno ingi k'anjébun ñanjébireŋo

1Angu afúrumi na, ayikyik bísiba, Yensa ahuyor ñantaalibehinem m'ayéjuhne Haalaŋo ingi Inako. Agida immereŋ angune índiigeeno mi Yensa acaabenne fam imbi ñantaalibehinem ki k'anguy ñambúuñuraaŋo. Angu, Haalaŋo ingi Inako bampútri ayéjeeniŋ:

- Ingah! Ísiibáásiib k'údek úteekineŋ jamaŋo Kúmbuuñaamo Kúnsuuminno. Inini, me ba búnekinan sembeŋo ba búfunnhu fáguhoŋo f'anruurne jamaŋo, ingi mees ba búnekinan sembeŋo k'újebineŋ jamaŋo mi jébireŋeŋne.

2Angu, banéereeniŋ sembeŋo nómár mees, abúuñeeniŋ ba búteekinku jamaŋo gu maasayahu Díino n'amíirne. Afak abúuñeeniŋ ba bújebunku ñanjébireŋo. 3Kanda jandiŋ bandékumne, Yensa adoya ñambúuñuraaŋo ayéjeeniŋ:

- Inini ninkinan, guŋayeŋ hadéko, dahu udoohoŋ haani honj iniman gujunk, iniman boore, iniman guyaahála, iniman gukodi. Dahu udoohoŋ hogurumaareŋ. Moŋon moŋon údek maŋ ni uwonnáne inini ingi bayaaho imba b'okaanane. Maŋ bámár ba bareŋ gúdekehne ba budooŋo.

4Aŋoolin ayéjeeniŋ:

- Inini, aji úputeŋ a saari, moŋon moŋon a dígo n'okucunaane, unooh maŋ na baman d'okenghinehne a saariŋo nómár. 5Ingi faka, aji úputeŋ a saari ki m'angune na anfoy bukucunkánan, uwusunahaŋ ba a saari adínem. Kanda aji uŋayeŋ hadéko, ufahaŋ sapatankánan arenn fet. Nim aguyhunehne tamaseer no bujellihinku jamaŋo maro ñammi saariŋo nómár anyúulenyuulen ingi Díino maro anfoyfoy bujantenku gúlokunom.

Yensa, nim gadoyane ñantaalibehinem.

6Angu, ñantaalibeŋo andék a saari saari ankaan maŋ ni Yensa adoyaheeniŋne. A saari noŋon noŋon gampútne ankawandah Kúmbuuñaamo Kúnsuuminno. Anfak anjébineh ñanjébireŋo. Nim gankaanahne.

Ka úgufánááro Herod asíibane búpájihu wúuro m'akaanahne honjoroŋo hódenneŋo a didiirahánam

7Angu a waato nómár, údiigeeno m'aretuhne Herod, úmár agune úgufánááro a didiirahu Galile. Angu, fo Herod ayennehinne gu Yensa, ingi h'ayikehne nip a binaanam, pájiireŋ n'awosenkinehne. Alah a jamméejhinem ayéj: «Úmár agune hantaŋ?» Nim Herod gamiihorahne. Agida a waato nómár, jamaŋo nip gaññopunayeñopunay a gubaarhu Yensa. Ganyéjeyej Yensa agune wúur m'akenger a biniirohánom. Angu, immi ganyéji: «Údiigeeno úmár, úmár aguyhuneh Yaya M'ayicimehne! Ambujembuj kanda inini karo akengerikeng a biniirohánom k'ahuyaa Yensa!» 8Immi ganyéji: «Wówo! Úmár Yaya gireŋ! Úmár ii, taala Anabila Eli#9.8 Jamaanihu Anabila Eli awusunawusuna ayik díineŋ kemeŋ amikilaŋ jandiŋ Yensa babosumaa. Ñanyahudo anlahlah mara, jandiŋ Umaasaŋo mu Díino Acaabenne bapútumor, Anabila Eli aŋoolinekineh a duniyaŋo. Aji úfeg anlahi nim fo ukaraŋ ho Anabila Malaki añaañne a líibárhinem, (Malaki 4:5–6.) Úpájuli Anabila Eli nirooroŋ. Aññaañaañ mara Díino afúnnemfunn a duniyaŋo adékirem ba arjanna a saareto. Nim gaññaañne a Hañaañeno. (Ninger Líibárhu Ñammaasaŋo Anakiinno, a Sawurato 2). Gúmár akanne Luk, buru k'añaañ ayéj «Eli akengunaakengun a biniiroŋo» añaañ «tala Eli aŋoolintne.» afak afútne.» Immi anyéj: «Úmár ii, aguyhuneh anabiyoŋ adúk m'aniiro k'akenger a biniirohánom.» Nim jamaŋo gaññopunayehne.

9Angu, Herod ayennehinyennehin n'anlóbohne k'awosen a jamméejhinem anik ayéj:

- Hóge úmár Yaya? Wówo! Dapiren k'aguy Yaya maro me faŋ íbuuñbuuñ k'anlek bigokunom! Angu, údiigeeno úmár m'akaanahne honjoŋo hódenneŋo hómáráŋ, úmár agune hantaŋ?

Nim Herod gawosenehne a jamméejhinem. Angu, atíbeh ba búfeku Yensa.

Ni Yensa afoolenne barumuno ingi ñómbuuro ñómekilaŋo ingi ñokato ñonako

10Angu afúrumi na, ñantaalibehu Yensa, f'aŋŋoolintne b'andékne kawando, andék anlahunar Yensa. F'anlahuntne Yensa, antífirem h'ankantne nip. Angu, bantéekinem h'ankantne nip, andék ingi Yensa ba a kantíg k'ayeerer a kanaŋaŋo. Bi gúbidhu saariŋo n'aretuhne Betsayida gandékne, ki nim immereŋ ampiren anguy na immereŋ immerahánin. 11Kanda f'andékne na, jamaŋo anyennehin b'ankokne k'angu antifeeniŋ bim anrumun tip. Angu, f'anlahunne Yensa, Yensa akucuneeniŋ hóbun k'atéekineeniŋ gu maasayahu Díino. Afak ajébun ñanjébireŋo.

12Angu, Yensa akawandkawand baman fo bísibaŋo adék aŋay búñuun. Angu, ñambúuñurahánam Haalaŋo ingi Inako, banfégi maro fítiro adasridas, andék anyéjem:

- Arafaŋ! Ingah! K'enguyoŋne inini, bísibaŋo anaman añuñuun! Inini yéjer jamaŋo anfisay a saariyeŋo k'andék antíbila h'anfoolahánehne ingi k'antíb k'anwaanahánehne! Ingah! Nanka k'enguyoŋne, a kanaŋaŋo ginguyoŋne. Honj yikireŋ imbi.

13Angu, na Yensa ayéjeeniŋ:

- Wówo! Ninkinan néteeniŋ k'anfoola!

Immereŋ anyéjem:

- Kanda arafaŋ, hóge ipirenkinemiŋ n'anrumunne? Ingah! Mintor nanka, ñómbuur ñómekila ginlahoŋne ingi ñokat ñonak. Karo úsiibáásiib k'ídek igilateeniŋ immi nip h'anfoolahánehne?

14Agida, jamaŋo m'ansorne na dam, anrumunrumun dáde. Índiigeeno ba bareŋ ampútput agofoŋ wuuliyeŋ amákilaŋ. Te indikaamo ingi jaraaho tébiiraahaŋ. Angu, Yensa ayéj ñantaalibehinem:

- Inini, tógunteŋ jamaŋo, k'unoohulineeniŋ bújog bújog ñanraagofo jamaŋinak ingi haala.

15K'angu, andék ankaan maŋ nim k'antógun jamaŋo, kaŋan kaŋan ñanraagofo jamaŋinak ingi haala.

Angu, jamaŋo bannoohi nip, 16Yensa adooh ñómbuuro ñómekilaŋo ingi ñokato ñonako k'aning a raafo k'aramun Díino. Baramuni Díino mees, afacálahin ñómbuuro ingi ñokato k'anéer ñantaalibeŋo, ayéjeeniŋ:

- Kibereeniŋ k'anfoola!

K'andék ankib barumuno nip 17ki moŋon moŋon ufoola uhay. Angu, f'anfoolane anhay, ñantaalibeŋo andooh hofallaheno antógun f’adék apút hatehel haala ingi hanak.

Ka Yensa ayéjne ñantaalibehinem, «Me inik igune hantaŋ?»

18Angu afúrumi na, ayikyik bísiba, Yensa abááhála ingi ñantaalibehinem k'abénn na jamaŋo índukoŋo. Angu bambááhulay, Yensa atoŋ saliŋo. Asali f'adék adét. Yensa, babollay saliŋo, amiih ñantaalibehinem ayéjeeniŋ:

- Ninkinan, inini nuko, neeraŋ guyennehineŋne n'anlóbohne gu me? Neeraŋ ganyéjehne? Ganyéjeyej me igune hantaŋ?

19Angu na, ñantaalibehinem aŋŋoyindemne anyéjem:

- Ah! Immereŋ anlahlah fi wúur m'akeng a biniirohánom. Immi anyéjeh karo fi ugune tala Yaya M'ayicimehne. Índukoŋo anyéj karo fi ugune tala Anabila Eli. Índukoŋo faka anyéj fi ugune anabiyoŋ amiñi adúk no fam n'akenger a biniirohánom. Nim jamaŋo ganlóbohne gu fi.

20Angu, na Yensa amiiheeniŋne ayéjeeniŋ:

- Inini ninkinan nuko, neeraŋ gunuk ulahemuŋne? Me inik igune hantaŋ?

Angu, na Simon Piyer ajaabiyemne ayéjem:

- Me ii, n'ilahne, fi ugune Umaasaŋo Mu Díino Acaabenne, mu Díino abúuñurne ba bupahunkint.

21Angu, Piyer balóbi nim, Yensa amincin ayéjem:

- Oo! Maŋ ni uwosenne, maŋ nim gagune.

Ayéj ñantaalibehinem angu:

Kanda dahu úduk úteekineŋ wúur manini. Ufant útuyoŋ.

22Aŋoolin ayéj:

- Ingah! Údiigeeno M'acaabenaane ayokuneh dáde. Agida hómár aññantañanta ayik. Úfegeŋ, ñanlaamero ingi ñanlaameku alimaamaŋo ingi ñankeekihu Hañaañeno, ba bucucunkum gandékehne. Immereŋ danlóki mara me igune Umaasaŋo mu Díino Acaabenne. Angu, anyehenkunum f'andék ambujoom. Kanda aji ambujeem, iyikhineh ásibaŋ alallaŋ a búyindo, Díino akengunkunum a biniirohum k'íjeb ingi bumburunku arinkum nip. Hómár gadékehne ba buyiko. Agida hómár nip añantay ayik mara nim Díino alefne.

Nim Yensa atéekinne ñantaalibehinem dam a gubaarhu h'adékehne buyikhinem.

Aji úsiibay butifilinku Yensa fo úloki kunyoho

23Angu, afúrumi na, barumuno b'antifne Yensa ampútor ka Yensa angune ingi ñantaalibehinem. Bampútri, Yensa akomb bukawandinkinin, immereŋ ingi ñantaalibehinem mees. Ayéjeeniŋ:

- Ninkinan, ingah! Moŋon moŋon úsiibane buguyhu utaalibehum, uñantay úbenn básunku bigokon. Te faka, bísiba bísiba uñantay ubayun ho fi fankan úsiibane bukaano, mara duniyahan no fam adétdet. Ba bútifilinkum bareŋ gúdekehne angu. Ingi mees, uñantay úloki ki jamaŋo anyehenoonuŋ, uñantay uŋan ñankindenken a butifilinkum, haani antibuho ba bubujhon. Ingah! Uñantay uguy iniman wúur m'adoohuna dinlihano d'ankilenne k'ajonna ba a kantígo k'andékehne bubujhunom. Nim utifilinkum añantane alóki bísiba bísiba.

24Yensa abocin ayéjeeniŋ:

- Ingah! Moŋon moŋon gútibehne bupahálinku bigokon, fi ufootahuneh. Kanda m'alókine k'abénn básunku bigokunom k'alóki k'aniiro a gubaarhu n'atifilineemne, úmár ayikhineh na kanjébo ka bandór. 25Ingah! Aji wúur adóoli f'adék ayik kunyiko jup k'aniiro, agida a buyikunku kunyikhinem kúmár apuñpuñ duniyahánam, te faka wúuro úmár yikireŋ kanjébo ka bandór, hóge kunyiko kúmár anafahánam baŋ? Wówo! Danafaham haani hotir.

Yensa abocin ayéj:

26- Ingah! Me Údiigeeno M'acaabenaane ba gúfur a duniyaŋo inno gídekehne, kanda adékidirdek iŋoolinekineh. Angu, d'eŋoolinekinehne, aguyhuneh ingi bafuku Bááhum Díino. Bísibaŋo bímár ikokayekinemiŋ ingi maleekaŋaŋo. Angu dam, gilahunti wúur m'aroh butifilinkum a gubaarhu h'élobohne, me mees irokuneh gúyejo úmár unaam.

27Afak abocin ayéjeeniŋ:

- Túyomuŋ baŋ k'íteekinoonuŋ marigeno! Ingah! Imbi ninkinan m'uguyeŋne nanka bujantendukum, ayikhineh índukoŋ m'anfékineh maasayahu Díino jandiŋ baniirom.#9.27 Wúur pájiireŋ ho Yensa asíibane balóbo na. Apirenpiren aguy mara na galóbumohne a nintiku ni Piyer ingi Jak ingi Saŋ andék anfékineh bafúku Díino a montaaño. Apirenpiren afak aguy mara na Yensa galóbolob a gubaarhu ni índukoŋo anfékinem n'akengunaa a biniirohunom ingi bumburunku arinkinem.

Nim Yensa atéekinne jamaŋo.

Fo Yensa anwooñne ingi Anabila Musa ingi Anabila Eli a montaaño

28Yensa, balóbi nim mees, bayiki lóokum, ayéj ba saliŋo gadékehne a montaaño. Angu, adooh Piyer ingi Saŋ ingi Jak k'andék ba a montaaño ba saliŋo. 29Bampúti a raafo, Yensa aŋay saliŋo. Baŋay saliŋo, ñantaalibeŋo anfég mara Yensa, bígikinem akúbulakubula. Bayakánam b'akaanane mees akúbula, afer fañ k'areñeh. 30Angu, ñantaalibeŋo anfég índiigeen inak, anabiyoŋoŋo mi famo. Anabila Musa ummo na ingi Anabila Eli, te immereŋ n'aŋŋay buwooñ ingi Yensa. 31Immereŋ mees leerhinin afufuuh dáde. Angu, ñantaalibeŋo anyennehin buwooñhinin. Anabila Musa ingi Anabila Eli anlóboh ingi Yensa a gubaarhu ho Yensa adékehne bukaano. Angu, ñantaalibeŋo anyennehin mara Yensa ba biniiro gadékehne a saarihu Jerusalem, mara nim Díino ayéjne hómár añantane ayik. Hómár Yensa aŋŋane balóbo ingi Anabila Musa ingi Anabila Eli dam.

32Agida Piyer ingi índinemeŋ ñantaalibeŋo m'ankokayerne ingi Yensa a montaaño n'anduufer f'anhuunin. Angu, banjuufuli, fam gankir anfégne Yensa ingi leerhinem ingi índiigeeno inako, Anabila Musa ingi Anabila Eli.

33Angu, immereŋ banwooñiiwooñ f'andék andétun, Musa ingi Eli ankeng hadéko k'ambénn na Yensa. Piyer, bafégi n'aŋŋane hadéko ayéj:

- Arafaŋ! Ingah! Buguyhint nanka ingi ninkinan asúsuum deh! Túyor k'íjooninmiŋ maŋ nanka íkás ilall; umbu fi, umbu Musa, ingi umbu Eli.

Agida fo Piyer alóbne nim, úmár fankánam, Piyer, pájiireŋ h'alóbohne. 34Angu, fo Piyer aŋane balóbo, hakubo agoobeeniŋ k'atákám a balókunom. Angu fo hakubo agoobeeniŋne na, ñantaalibeŋo anjahali fanfaŋ. 35Angu, anyennehin síngiir s'afúrumor a hakubo, k'ayéjeeniŋ a gubaarhu Yensa:

- Ingah! Ummu Úbákum. Úmár gicaabenne. Angu ku k’uyennehindemeŋ!

36Angu banyennehini síngiiro, anningilin. Fégireŋeŋ wúur, Yensa bareŋ ganfégne. Angu, hómár ayikne dam a montaaño. Kanda ñantaalibeŋo ilallo mungu téekindeŋeŋ wúur h'anfégne. Waato nómár ansuturasutura h'ayikne dam a montaaño.

Ka Yensa ajébunne wolo mu fáguho aruurne

37Angu afúrumi na, gucunkunom, Yensa ingi ñantaalibeŋo ilallo ankucor a montaaño b'anguyerne. Bankucri, anlahun ni jamaŋo anrumunne tip bútuyhu Yensa. 38Angu, ayikyik na údiigeen m'aguy maŋ na a bájegenenku jamaŋo. Ahuy Yensa ayéjem:

- Arafaŋ!

Ayéjem:

- Ísiibáásiib k'újebindeem úbákum! Úmár bareŋ giyikne. 39Fáguho aŋanŋan arinkinem, ki gakengilini ayililin, arino nip añaŋunah, buruŋo agufoh. Gayehenkemyehen fanfaŋ jandiŋ babénnumem.

40Údiigeeno abocin ayéj:

- Angu, me gub, bíputri ilahun na ñantaalibehen k'ikiinaheeniŋ anfúndurom fáguho imbi úbákum. Immereŋ anrifrif búfunnhu fáguho, kanda pirendeŋeŋ. Inini bonkerer, k'úduk úfundárom fáguho.

41Angu fo bááhu wolo alóbne nim, Yensa ayéj:

- Ha! Kanda bareŋ! Ninkinan mi jamaano inno, guru ufiyinkeŋ Díino. Ukiilaheŋkiila a binaahánam. Angu, imuñaroonuŋ baman daaraŋ?

Balóbi nim, Yensa ayéj bááhu wolo:

- Inini, dootoom wolo!

42Angu, údiigeeno adooh wolo k'afúr a bájegeneku barumuno k'aŋay búdekekinem ba imbi Yensa. Badasi Yensa, fáguho afak acig wolo maŋ na ki wolo añaŋunah maŋ na a réeŋo. Angu, na Yensa asekurne fáguho ingi sembe ayéjem:

- Fi! Fút imbi wolo!

Angu fáguho afúr imbi wolo, wolo ajéb ki Yensa ayoofom k'aŋoyind báábám. 43Angu, jamaŋo nip, f'anfégne sembehu Díino, alaaleeniŋ fanfaŋ.

Fo Yensa alóbne a gubaarhu biniiirohánom

Angu, fo jamaŋo angune na buwooño k'andankah honjoroŋo nip ho Yensa akaanahne, Yensa ayéj ñantaalibehinem:

44- Ingah! Ninkinan! Jantenemuŋ hóbun! Moŋon moŋon ujanteneem hóbun k'ukaan na bulaahan a h'édekehne búteekinkinan.

Ayéjeeniŋ

Ingah! Ayikhineh bísiba b'andékehne bujuliyahu bigoku Údiigeeno M'acaabenaane imbi jamaŋo m'anfoyemne.

45Angu Yensa balóbi nim, ñantaalibehinem nip wuturoŋoŋ nimbun ho Yensa alóbne. Agida, a waato nómár, ho Yensa alóbohne anímuneeniŋnimun. Angu, immereŋ bollendeŋeŋ búyejhu Yensa akékireeniŋ h'alóbne.

Ufiyunku Díino n'añantane atiirilinoora

46Angu afúrumi na, ayikyik bísiba, ñantaalibehu Yensa immereŋ immerahánin aŋŋay na siññopunayo a gubaarhu m'afaŋunumne n'afuuh a binanin. 47Agida Yensa apápájul nip h'agune a jamméejenkinin. Angu na, ayikyik wol. Yensa alah wolo a silakánam k'awonnálinem a gúbidhinem 48k'ayéjeeniŋ:

- Ingah! Moŋon moŋon ukucunne wolo ummu, a gubaarhu n'ugune utaalibehum, akankaan iniman me gukucunne. Te faka, moŋon moŋon ukucuneemne, me me Yensa, akankaan ininkaman Bááhum m'abúuñureemne gunuk ukucunne. Fégeŋ baŋ, imbi Díino, wúuro mu gara afuuhurinoorane k'alah úmár afaŋunumne n'atíir, wúuro úmár, imbi Díino, úmár afaŋunumne n'afuuh.

Nim Yensa alóbne. 49Balóbi nim Saŋ ayéjem:

- Arafaŋ! Ayikyik údiigeen m'aŋay gúfunnduku jamaŋo fáguhoŋo a gurethen, te úmár tohároŋ a binentor. Angu íyejemmiŋ abénn h'akaanahne.

50Angu na Yensa ayéjeeniŋ:

- Aa! Béntemeŋ! Dahu údiigimemeŋ!

Ayéjeeniŋ:

- Wúuro mu foyuroŋne mintor, a binentor gatohne.

Fo ñammi Samareya anfoyne bukucunku Yensa

51Afúrumi na, Yensa bapájuli mara hadékhinem ba arjanna adasridas, ayéjoora:

- Inini me, k'egune inini anafanafa dáde k'iŋoolin maŋ fam ba Jerusalem.

Angu balóbi nim, antuŋul hadéko, úmár ingi ñantaalibehinem.

52Bandékiidek, ampút a didiiraŋo d'ayéjuhne Samareya. Angu bampúti na, Yensa abúuñ índukoŋ k'annoh ba butopotoku k'anwaanahánehne aji ampúti.

53Angu andék f'andék ampút a saariŋo. Kanda jamanku Samareya m'angune na, f'ampájulne maro Yensa ingi ñantaalibehinem ba guwusuna ba Jerusalem gandékehne, anfoy bukucunkinin.#9.53 Agida, jamanku Samareya ingi Ñanyahudo yennehinayreŋeŋ. Te faka ñammi Samareya gara andékeh ba Jerusalem ba búfuuhurinku Díino. 54Angu na, banfégi maro anfoyfoy bukucunkinin, ñantaalibeŋo m'anyéjuhne Jak ingi Saŋ anyéj Yensa:

- Arafaŋ! Immi! Inini mintor, karo inkiinahoŋ Díino k'aworor kuulo a binanin k'ajakálineeniŋ f'ankaan budoor?

55Banlóbi nim, Yensa anuurula k'asekureeniŋ ingi sembe, ayéjeeniŋ:

- [Hey ninkinan! Balóbo imba b'úfunnureŋne, kuul! Jóndoŋ! Ñantaaroŋ úloboŋ ineeŋ! 56Ingah! Ninkinan, Údiigeeno M'acaabenaane dékintireŋ ba bukoomunku jamaŋo. Adékridek ba bupahunku jamaŋo a kunyoku júnubonkánin.]#9.56 H'agoobaane ñaañiiraa a kayereŋo kandúko.

Angu, anwusuna k'andék ba a saari adúk.

Ka Yensa afak alóbne a gubaarhu ni buguyhu utaalibehinem amiihulne

57Angu, Yensa ingi ñantaalibehinem, baŋŋay hadéko, údiigeen úduk adéker adak awaliŋ Yensa ayéjem:

- Arafaŋ! Me ísiibáásiib k'iguy utaalibehen, ki beŋen beŋen b’uŋane hadéko inkokayoŋ.

58Angu na, Yensa ayéjemne:

- Túyor baŋ k'íteekino. Ingah! Údiigeeno M’acaabenaane, úmár faŋo yikireŋ k'anooh. Haani jihenku kanaŋaŋo faŋo anyikyik k’angooghunehne. Kotonoŋo mees ayikyik bulepun b’agooghunehne. Kanda me díyejo: «Díkum inooŋe!»

Nim Yensa ajaabine údiigeeno.

59Angu, Yensa bafégi údiigeen úduk ayéjem:

- Fi! Dókulo k'utifilineem k'uguy utaalibehum!

Angu, údiigeeno aŋoyindem ayéjem:

- Arafaŋ! Ingah! Túyor k’ídek ilahin bááhum. Bááhum ganiiroy mees ídeker ídek itifilino.

60Yensa aŋoyindem ayéjem:

- Dahu útuy! Ingah! Jamaŋo m'anhunamne Díino, akankaan iniman immereŋ anniironiiro maro immereŋ yikireŋeŋ kanjébo ka bandór. Angu inini, jamaŋo immereŋ aññantane anwúb índinenkinin m'anniirone. Kanda, fi mungu, déker k'úteekin jamaŋo gu maasayahu Díino.

61Angu, ayik faka úduk m'adéker ayéjem:

- Arafaŋ! Me ísiibáásiib bútifilinken, kanda túyor fanta k'ídek isara jamankum.

62Yensa aŋoyindem ayéjem:

- Ingah! Aji ulahi gúlááfulunku saareto, uñantay uning a jannoho bareŋ. Ñantaaro unoorula, mara aji ukaani nim, úbennhineh sinwalo s'uŋane gúlááfulo. Moŋon moŋon ulahne gúlááfulunku saareto k'unoorula, dohohon dajóon. Maŋ nim ganik agune a bútifilinkum. Aji utooŋi bútifilinkum k'ukila ba bukanku hóduk, fi mungu, buguyhon údoolhu maasayahu Díino aroŋroŋ.

Currently Selected:

Luk 9: GD

Highlight

Copy

Compare