Luk 3

Fo Díino abúuñne Yaya M'ayicimehne

1-2Angu, afúrumi na, Díino alóblob ingi Yaya, úbáku Sakariya. Angu, a waato nómár údiigeeno m'aretuhne Tiber agune umaasaŋo údenno bim Itali a bukoku Rom. Agida Tiber n'anooh a bunoohumo búmár buruhu díineŋ haala ingi arenekeŋ. Inini, a waato no Tiber ayikne díineŋ butinken a bunoohumo, a waato maŋ nómár, Ponsa Pilat agune gúfánááro a didiirahu Júde. Ki a didiirahu Galile, Herod ganik amarahne didiiraŋo dímár. K'angu Filip,#3.1-2 Herod ingi Filip bokuroŋoŋ nunk. údonku Herod gamarahne didiiraŋo d'ayéjuhne Itura ingi d'ayéjuhne Turakonitid. Angu, a didiirahu Abilen, Lisaniyas gamarahne. Immereŋ annooherne a banoohumo bámár a waato nómár. Te faka, a waato nómár, Hann ingi Kayif, immereŋ angune alimaamaŋo adénneŋo a didiirahu Israyel.

Iyoo! Angu a waato no umaasaŋo údenno m'aretuhne Tiber ayikne díineŋ bútinken a bunoohumo, maŋ díino nómár Umuyhintor ajellihinne Yaya kúmbuuñaamo k'añantane adék akawandin jamaŋo. Angu, fo Díino ayéjne Yaya adék akawandin jamaŋo, agida a waato nómár Yaya n'aguy a kanaŋaŋo kalaalinno. 3Angu, f'ayennehinne kúmbuuñaamo kúmár, atoŋ gudoorulahu didiiraŋo d'atéejane jakaamo n'aretuhne Joodan. Angu beŋen beŋen b'adékne a didiiraŋo dímár, adék akawandin jamaŋo kúmbuuñaamo kúmár, ayéjeheeniŋ:

- Ninkinan! Uñantaheŋ úbenneŋ hójondoŋo h'okankaŋne k'úkubuloŋ jamméejenkinan imbi Díino. Uñantaheŋ uyicahaŋ a gurethu Díino.#3.3 Agida, a waato nómár, biyicaŋo a gurethu Díino guyroŋ honj howunkul imbi Ñanyahudo. Fégeŋ baŋ, aji mu guyroŋ Uyahud ayéji, «Me ísiibáásiib butifhu binaahu Ñanyahudo,» wúuro úmár añantay ayicaa a sígihu Ñanyahudo. Maŋ nim gankaanahne. Kanda ho Yaya akaanahne mídeŋ. Yaya gatéekineteekin índinenkinem Ñanyahudo maro immereŋ mees aññantay ankúbul jamméejenkinin imbi Díino k'anyica. Hómár anuyeeniŋnuy maro immereŋ anlahlah karo kunwonnhánin ingi Díino ajónjoon, maro immereŋ angune siyo no Díino acaabenne ba búdoolukunom a duniyaŋo inno. Anlahlah karo immereŋ haajaaraŋaŋ búkibihu jamméejekinin imbi Díino k'anyicahaa, agida anhajahaja hómár. Aji uyicaheŋ, biyicaŋo bímár akankáneh iniman tamaseer n'úkuubuleŋne jamméejenkinan imbi Díino. Nim guñantaheŋne ukaanaŋ ki nim Díino akafari jínubonkánan.

Yaya nim gakawandinehne jamaŋo a bakaranku jakanku Joodan.

4Agida Yaya, a bukaano nim, hómár apútulinne ho Anabila Esay añaañne fam.#3.4 Inho ho Yaya akanne, Anabila Esay alóblob aji uŋoolini mángáar buruhu díineŋ kemeŋ amákilaŋ ingi anakaŋ . Inini Esay añaañne ayéj:

Ingah ! Ayikhineh údiigeen m'aguyhunehne a kanaŋaŋo kalaalinno. Úmár ii, alóbhuneh wolaŋ k'ayéjeh jamaŋo:

«Ninkinan! Ingah! Umuyhintor ummo bim n'adékireh deh! Inini, jóoninditemeŋ binaal! Jóoninditemeŋ binaal biwúuhi ki k’apiren adékum na!

5 Ka binaalo adooŋne, újoonineŋ k'amur. Ki k'alóbane, umurunahineŋ mees k'amur kerker. Ki ka wuuhuroŋne, uwuuhunoŋ, ki bi bawaalo alabane, umurunahineŋ bawaalo. Ingah! Maŋ ni jamaŋo anjóoninehne binaalo ba bujaku umaasaŋo, maŋ nim guñantaheŋne újoonineŋ níndekoorunkánan ingi hafitenkinan ba bujaku Umuyhintor. 6Ingah! Aji ukaaneŋ nim, jamaŋo nip anfékineh upahunumo mu Díino abúuñutokunehne mintor ba bupahunkintor a kunyoku jínubonkintor.»

Hómár Esay alóbne fam a gubaarhu Yaya. Angu, ho Esay añaañne a Hañaañeno gu Yaya, maŋ hómár Yaya akanne.

7Angu, fo Yaya atoŋne kawando, jamaŋo antoŋ hadéko ba a binaanam. Andékeh anrumun tip ba biyicaŋo a gurethu Umuyhintor. Kanda gampútri ayéjeheeniŋ:

- Hey! Ninkinan ñanjóndoŋ! Úmiireŋmiir ingi puduhoŋo deh!

Ayéjeeniŋ:

- Hey ninkinan, hantaŋ ayéjoonuŋne aji uyicaheŋ bareŋ upakánaŋ a kunyoho ku Díino adékehne ba buyehenkinan? Nim gireŋ deh! Ingah! Biyicaŋo bareŋ bádáŋ!

Abocin ayéj:

- Ninkinan! Ingah! Aji kúbiiroŋ jamméejenkánan imbi Díino, dupireneŋ k’upahaŋ a kunyokánan. 8Ingah! Maŋ ni sinoŋo síjooninno adímehne bídimeren bíjooni, maŋ nim ninkinan mees, moŋon moŋon uñantay údim bídimeren b'úpájul akankáneh k'afégaa mara úkubulkubul jamméejhen imbi Díino.

Biki wúur ayéjoora a jamméejhinem, «Me, Díino dayeheneem maro a muhenku Ibrahiima gífuruntne!» Hómár gireŋ deh! Ingah! Díino, aji asíibay buyikhu jamaŋ m’anfúrumor a muhenku Ibrahiima, apiren adooh bawaalo imba inini faŋo k'akuulun akaaneeniŋ ñanraagof m'anfúrumor a muhenku Ibrahiima. 9Ningeŋ baŋ! Gutakumo ungo na a burupihu sinoŋo ba buciku munnoŋo. Munnoŋo mu gara adímehne bídimeren bíjooni, ba bulek gadékehne nip. Acigdir, adooh k'awor a kuulo nip, ki munnoŋo m'adímehne hójooni afalla. Inini, ninkinan, uñantaheŋ úkubuloŋ jamméejenkánan imbi Díino.

10Yaya balóbi nim, babollay, jamaŋo immereŋ aŋŋoyindem anyéjem;

- Inini, mint iyennehinmiŋyennehin n'ukawandne mint, angu dúteekin mint neeraŋ giñantaminne ikaanmiŋ k'ipahmiŋ?

11Yaya ayéjeeniŋ:

- Ningeŋ baŋ! Aji uyiki hasol hanak, ki údinhen yikireŋ fereŋ, doohor gusolhon gúduko, úneerem! Ingi mees, aji uyiki jafoola ki údinhen yikireŋ, taahiritem k'úneerem k'afoola!

Yaya nim gatéekineeniŋne.

12Angu dam imbi jamaŋo m'andékirne ba biyicaŋo, ayikyik ñanjuti. Angu, ñanjutiŋo ammiih Yaya anyéj:

- Arafaŋ! Angu mint neeraŋ gídekeminne ba bupahorumo a kunyoku Díino?

13Ayéjeeniŋ:

- Ninkinan! Aji wúur adékiri ba bacanku bahataŋo, dahu ucaamálinemeŋ h'afaŋ ni luwaŋo ayéjne. Umukoŋ maŋ na.

14Angu, ñammi básedeŋo, immereŋ mees andak ammiihem anyéjem:

- Angu mint nuko, neeraŋ gídekeminne ba bupahorumo a kunyoku Díino ?

Ayéjeeniŋ:

- Ninkinan, dahu ubenkilineŋ wúur, dahu ujodamaŋ wúur ki k'ucaamálinemeŋ. Dahu úyejemeŋ, «Aji caamáro ilakunomiŋ!» Agida ni ñantaaraŋ acaam faŋo. Ingah! Ingi mees, ho ñanlaamekinan ancaamhoonuŋne, añantay abárámoonuŋ. Dahu uhunhunineŋ a gubaarhu bacankánan.

Nim gayéjeeniŋne.

15Angu a waato nómár, índukoŋo f'anfégne ni Yaya akawandinehne jamaŋo, ammiihorah k'anyéjeh karo úmár agune Umaasaŋo mu Díino Acaabenne. Agida immereŋ n'anheka ba búfeku umaasaŋo úmár, angu anjíkiyeh karo Yaya agune maŋ úmár. 16Yaya, bayennehini hómár ayéjeeniŋ nip:

- Wówo! Me me gireŋ deh! Úmár aroŋári. Ummo bim n'adékireh. Ingah! Me, baaruŋo bareŋ giyicunkoonuŋne. Kanda m'apútokunehne ayicunkunoonuŋ ingi Jamméejhu Díino Jarenninno ingi kuul.#3.16 Na Yaya ŋayraŋ balóbo a gubaarhu jahanama. Maŋ ni kuulo arennilinehne guraho, maŋ nim Jamméejhu Díino Jarenninno gadékehne burennilinku jamaŋo m'anfiyumemne. Úmár wúur úde, afaŋfaŋ me fuf. Ingah! Me, bádi sah buguyhu úsokánom ba búkeekirikinem sapatankánam. Ititiir fanfaŋ! 17Ingah! Wúuro m'adékikinehne, aficilahinkineh jamaŋo maŋ ni anficilahinehne bajubeelo#3.17 A funaareŋo unfu fu Yaya anéerne, bajubeelo ingine jamaŋo m'anfoyne búkubihu jamméejenkinin imbi Díino. ingi dítiro. Ummo na n'alah gúfekinem. Aféehineh dítiiro arenn fet. Inini, bajubeelo bámár ba jineno a réeŋo, ki dítiiro, dímár gadékehne ba burun a booreŋo k'anink a búguro. Inini, bajubeelo, adokuneh k’adék ajakálin a kuul k'ópájul dayímahar.

Nim Yaya gakawandinehne jamaŋo. 18Kanda guyroŋ karo hómár bareŋ gatéekinkeeniŋne. Gatéekinkeeniŋteekin holabayeŋ. Gadoyaheeniŋdoya holabayeŋ. Gafak atéekinkeeniŋteekin Kúmbuuñaamo Kúnsuuminno.

Fo Yensa ayicaane

19-22Angu, a waato no jamaŋo nip andékehne imbi Yaya ba biyicaŋo, Yensa mees adékdek na ki Yaya ayicem. Angu dam, bayicay mees, akiina Umuyhintor. Baŋay gukiinahu Umuyhintor, hakubo akimbula. Maŋ ni hakubo akimbulane, Jamméejhu Díino Jarenninno afégaa n'aŋayar jankuco biriman a raafo k'adéker adék anot imbi Yensa. Agida, h'afégaane aŋayŋay gúmiir ingi bumburunku baláábán. Angu, fo Jamméejhu Díino Jarenninno anotne imbi Yensa, jamaŋo anyennehin síngiir s'afúrumor a raafo, k'alóboh ingi úmár ayéjihem:

- Fi úbákum. Me ipokunenpokun dáde. Úsuumeemsuum dáde.

Nim síngiiro símár alóbne dam Yensa.

Fo Herod alahne Yaya k'akimbenem

Angu afúrumi na, Yaya ayennehin a gubaarhu hójondoŋo ho úgufánááro Herod aŋane bukaano. Agida, Herod awatwater udikanku údoonom#3.19-22 Immereŋ babáraŋaŋ nunk. k'ajaham. Udikaamo gurethinem Herodiyad. Herod afak akaan hójondoŋ hódukoŋ holabayeŋ. Angu Yaya, f'ayennehinne hómár, adék atéekinem kayúulenkinem k'aŋane bukaano. Angu, Herod alaham k'akimbenem. Angu, a bukimbeno b'akimbenne Yaya, na Herod afak abocinbocin a bukanku hójondoŋo h'akaanahne.

Bádinku Yensa

23Angu, Yensa f'adékne adék ayik bi díineŋ buruhur ingi haala (30 turant), fam gatoŋne bukawandinku jamaŋo. Angu, jamaŋo anlahlah karo úmár agune úbáku Isuf.#3.23 Nim jamaŋo anlahne, kanda Isuf, údiigenku Mariyama bosároŋ Yensa. Akuunemkuun. Nunku Yensa abosbos Yensa a gubaarhu Jamméjhu Díino Jarenninno. Agida Isuf bosároŋ Yensa. Inini, túyomuŋ baŋ k'íteekinoonuŋ bádiimhu Yensa:

Bááhu Isuf agune Heli. 24Bááhu Heli, Matat. Bááhu Matat, Lefi. Bááhu Lefi, Melaki. Bááhu Melaki, Yanay. Bááhu Yanay, Isuf. 25Bááhu Isuf, Matatiyas. Bááhu Matatiyas, Amos. Bááhu Amos, Nahum. Bááhu Nahum, Esili. Bááhu Esili, Nagayi. 26Bááhu Nagay, Mat. Bááhu Mat, Matatiyas. Bááhu Matatiyas, Semeyin. Bááhu Semeyin, Yosek. Bááhu Yosek, Yoda. 27Bááhu Yoda, Yowanan. Bááhu Yowanan, Resa. Bááhu Resa, Sorobabel. Bááhu Sorobabel, Salatiyel. Bááhu Salatiyel, Neri. 28Bááhu Neri, Melaki. Bááhu Melaki, Adi. Bááhu Adi, Kosam. Bááhu Kosam, Elmadam. Bááhu Elmadam, Elwa. 29Bááhu Elwa, Josuwe. Bááhu Josuwe, Eliyeser. Bááhu Eliyeser, Yorim. Bááhu Yorim, Matat. Bááhu Matat, Lefi. 30Bááhu Lefi, Simeyon. Bááhu Simeyon, Juda. Bááhu Juda, Isuf. Bááhu Isuf, Yonam. Bááhu Yonam, Eliyakim. 31Bááhu Eliyakim, Meleya. Bááhu Meleya, Minna. Bááhu Minna, Matata. Bááhu Matata, Natam. Bááhu Natam, Dawuda. 32Bááhu Dawuda, Jesi. Bááhu Jesi, Obed. Bááhu Obed, Bos. Bááhu Bos, Salama. Bááhu Salama, Nason. 33Bááhu Nason, Aminadab. Bááhu Aminadab, Admin. Bááhu Admin, Hesarom. Bááhu Hesarom, Fares. Bááhu Fares, Juda. 34Bááhu Juda, Yankuba. Bááhu Yankuba, Siyaka. Bááhu Siyaka, Ibrahiima. Bááhu Ibrahiima, Tera. Bááhu Tera, Nahor. 35Bááhu Nahor, Seruk. Bááhu Seruk, Reyu. Bááhu Reyu, Peleg. Bááhu Peleg, Heber. Bááhu Heber, Sala. 36Bááhu Sala, Kayinam. Bááhu Kayinam, Arafaksad. Bááhu Arafaksad, Sem. Bááhu Sem, Nuuha. Bááhu Nuuha, Lemek. 37Bááhu Lemek, Matusalem. Bááhu Matusalem, Henok. Bááhu Henok, Yaret. Bááhu Yaret, Malelel. Bááhu Malelel, Kenan. 38Bááhu Kenan, Enos. Bááhu Enos, Set. Bááhu Set, Adama. Ki bááhu Adama, Díino. Inini bádimhu Yensa ambosayne. Úpájuleŋ, Adama agune údiigeeno mu Díino ayabne gúliih.

Currently Selected:

Luk 3: GD

Highlight

Copy

Compare