Luk 15
15
Funaareŋeŋo a nintiku h'animerne k'alabaŋaa budaŋun
1Angu, abári bísiba, ñanjutiŋo ingi ñankanku hójondoŋo índukoŋo andék anrumun tip ba bujantenku kawandhu Yensa. Agida nim gankaanahne. 2Angu ñanfarasiyaŋo ingi ñankeekihu Hañaañeno, anhunhunineh k'anyéjeh:
- Ingah! Ummu! Gucum gucum ummo na ingi ñanjóndoŋo. Alókiyeeniŋloki! Haani guyaahálaŋo faŋo, ingi immereŋ gayaahálahne.#15.2 Agida, ñanfarasiyaŋo ingi ñankeekihu Hañaañeno anlahlah, aji wúuro ambabay guyaahálaŋo ingi immereŋ mi rennireŋeŋne imbi Díino, wúuro úmár mees darenn imbi Díino.
3Angu, Yensa apájul h'anwosenehne k'afúndureeniŋ funaareŋo unfu ayéjeeniŋ:
4- Ingah! Aji ayiki údiigeen m'alah saahaŋaŋ n'apút keme bikooño, angu bísiba ayik amánduk n'apah k'abina, agida, saahaŋaŋo jamaŋireneko ingi butinkeno ingi arenekeŋo (99 - katrevant disnáf) inooŋ na, n'aŋŋay gufoolaŋo. Angu, ukooño úmár, neeraŋ gakankánehne? Eke abénnhineeniŋ na k'adék ba bútibhu adúko n'apahne? Atíbhinem f'adék adaŋunam. 5Angu adaŋunamdir, asúumhunom dáde k'adohunaram anink a kabandankánam k'adoorom ba a gúsiirhu saahaŋaŋo adínemeŋ. 6Kanda aji apúti a dígo k'aŋŋay buwooño ingi ñannoohaykinem ingi índinenkinem ayéjhineeniŋ: «Hey! Janteneŋ baŋ! Ayikyik h'asúumoom gub dáde. Ingah! Gub saaha apaheempah. Animeemnim met. Angu ítibemtib f'eyooh, f'ekir ídek ífegem k'ilaháram k'idoorom ídekitem ba a gúsiirhu saahaŋaŋo adínemeŋ. Angu, fo ínsewohoŋ!» Iyoo! Eke ukooño úmár, n'adaŋunne saahahánam, hómár asúumhunom deh?
7Balóbi nim, Yensa abocin ayéj:
- Angu inini, túyomuŋ baŋ k'íteekinoonuŋ. Ingah! Arjanna mees, maŋ nim gamíirne. Agida, Díino ingi maleekaŋaŋo nip anyikhineh básuum báde aji uraagof úmánduk újondoŋ akúbuli jamméejhinem imbi Díino. Básuumo bámár afaŋfaŋ fuf b'anyikunkunehne imbi ñanraagofoŋo jamaŋireneko ingi butinkeno ingi ireneko (99) m'anwúuhne.
8Yensa ayéjeeniŋ:
- Túyomuŋ baŋ k'íbocindoonuŋ funaareŋo unfu! Eke údoolhuneh bísibaŋo lum jandiŋ buyikum gukodihu kodiforo úngonduko. Angu, aji ininkaman udikaam adéki fo adék ayik hakodihu kodiforo hámár haala, angu úngonduk animem, udikaamo úmár, neeraŋ gadékehne ba bukaano? Eke afeero mara udikaamo úmár ajakálinkineh lampo, adooh bukaso, k'abuf gufaco nip, tonkoŋ ingi tonkoŋ, k'atíb f'adak afég gukodihu kodiforo. 9Aji afégi, adék ayéjhineh índinenkinem ingi ñannoohaykinem: «Ingah! Inramunoonuŋ Díino! Gukodihu kodiforo g'animeemerne ungongiye! Idaŋundaŋun.»
10Yensa abocin ayéjeeniŋ:
- Ingah! Maŋ nim gadékehne gúmiiro a gubaarhu uraagofoŋo úmánduko m'akúbulne jamméejhinem imbi Díino. Afeeroonuŋ mara Díino ingi maleekankánam nip asúumhuneeniŋ fanfaŋ a gubaarhu wúuro úmánduko m'akúbulne jamméejhinem imbi ámár Díino.
11Yensa aŋoolin ayéj:
- Túyomuŋ baŋ k'ikeekiroonuŋ honj: Ayikyik údiigeen úduk m'ayik hambaaneŋ anakaŋ. 12Angu, hambaanihinem n'abiyaamne buyiko, bísiba adék ayéj báábám: «Abó! Eke aji uniirohi, mint ba sinkibayhu kunyikhen?#15.12 Úpájuleŋ, imbi immereŋ Ñanyahudo, a sinkibayhu kunyiko, hambaaniŋo n'afaŋumune n'alaamer ajakáneh afaŋ índoonenenkinem f'abár hanak hakibhu hambaaneŋo índukoŋo.. Báábám ayéjem: «Oo!» Ayéjem: «Angu inini, ísiibáásiib k'úneereem gukibhum manini.» Bááho ayéjem: «Hom?!» Ayéjem: «Oo!» Iyoo. Angu bááho adék atéb kunyikihinem nip. Babollay akib akaan habíd hanak. Angu, kódonko ajahjah gukibhinem gu bandór. 13Bááho banéerem gukibhinem, hambaanihinem n'abiyaamne, anooh ásibaŋ k'akir ayéj: «Me ba mandéka!» Angu, adooh kunyikhinem nip k'adék, adék adék fo aŋantin. Angu, adooh bakodiŋo k'aŋay bunungaamo, k'aŋan a baaraŋo k'aruuhoh, atifilineh ñannungaaŋo fo gukodiŋo adék akasári bim nip.
14Angu, fo gukodihinem adétne, yikireŋ haani honj h'añantane afoola. Agida, a waato nómár, kúugo alabalaba a didiiraŋo dímár. Guyaahála yikireŋ. 15Baningiining ayéj: «Túyor k'ídek ítibila doho!» K'adék bútibilahu dohoŋo. Angu, ayik údiigeen úduk m'adoohom k'adohokom. Údiigeeno badoohem abúuñom a kanaŋaŋo ki k'atopotorkom jifekeŋo bim.#15.15 Agida jifekeŋo abón n'anoori imbi Ñanyahudo. Díino adiigumdiigum búkábhu aharhánin. Gúmár akanne Ñanyahudo gansebeseb jifekeŋo ingi m'antopotokeeniŋne mees. 16Agida ni kúugo adasam yem. Angu, ganéerem gufoolaŋo ba búdekuduku jifekeŋo, akaan iniman adokuneh gufoolaŋo gúmár k'afoola. Agida ñammi saariŋo dandék annéerem haani honj k'afoola, k'ambénnem maŋ ineeŋ.
17Angu, ganoohiinooh, akomb gumiihoraŋo ingi jamméejhinem a gubaarhu k'agune. Ayéji: «Me! K'egune inini, kúugo ba bubujhum gadékehne, te a dígo ñandóolhu bááhum nip ganyaahálayaahála f'anhay k'afak afalla. Karo iŋoolin ba imbi bááhum? 18Inini, túyor k'iŋuñ ki íputdir íyej bááhum: «Abó! Bonkerer, yaafuŋaam! Íyuulenyuulen. Me ipuñpuñ ingi Díino. Ingi h'ekaanenne mees jóndoŋ fanfaŋ. 19Ingah! Me bádi buguyhu úbákán. Kanda ísiibáásiib k'uyaafuŋaam k'iguy údoolhon bareŋ. Bonkerer!» Nim gíyejhinehne bááhum.
20Angu, bayéji nim, fam gakengne k'aŋayar guŋoolino ba a díku báábám. Adék f'adék aŋanden dígo. Batéejari dígo, báábám aŋandenem n'adékirehne. Báábám baŋandenem n'adékirehne, arino akab dáde k'agír adék arahálinem. Barahálinem, agoobom f'amiñ. 21Angu, úbárám ayéjem:
- Abó! Bonkerer, yaafuŋaam! Íyuulenyuulen. Me ipuñpuñ ingi Díino. Ingi h'ekaanenne mees jóndoŋ fanfaŋ. Ingah! Me bádi buguyhu úbákán.
22Angu, f'aŋane balóbo ingi báábám, báábám atákám k'adoorom ba a dígo. Bapútri ayéj ñandóolo: «Ingah! Dékereŋ doohutulomoŋ gusol g'afaŋunumne n'ajóon, k'ukandáramaŋ.#15.22 Imbi Ñanyahudo, aji ukanduri wúur gusool, na úbuuñahembuuña. Ingi ukandaramaŋ gujaaroŋo, ingi sapataŋo mees k'ukandáramaŋ. Majaareŋ deh!» Angu ñandóolo andék k'andék ankaan maŋ nim. 23Angu, bááho afak ayéj ñandóol índukoŋ: «Inini ku k'údekeŋ ba a kooreŋo, úduk ulaháraŋ na ahayo adóono n'afaŋumne n'afuuh k'ubujomoŋ, k'inkandáromoŋ gújuŋ. 24Ingah! Akankaan iniman úbákum ummu aniironiiroyer k'afak afúror aŋooliner. Ingah! Ummomiye n'ajéb angu! Aniimemniimer met, kanda umomiye n'aŋooliner! Aŋúncŋunc angu!»
Angu, aŋŋay bukandukánam gújuŋo.
25Agida, fo úmár aŋoolintinne a dígo, ni úbárám ulaamero n'adék dohoŋo a kanaŋaŋo. Angu, baŋayri gúŋuño, badasri dígo, ayennehin jinanku musiko ingi ni jamaŋo aññaŋahne. 26Angu, bapúturi, ahuy údool úduk ayéjem: «Horaŋ ayikne nanka ki jamaŋo aŋŋay bukanku misiko ingi aññaŋah faka?» 27Ayéjem, «Uh! Údonkon utinno, úmár aŋúncne. Bááhán bafégi ni kódonkon aŋoolintne básuum, asúumom dáde k'ayéj andék anlah ahayo adóono n'afaŋunumne n'afuuh k'ambujom ba búbuuñahánam. Gúmár akanne aŋŋay bukanku gújuŋo ungu.»
28Angu, údonko ulaamero, f'amiihne nim údoolo, údoolo batéekinem, úmár añuumul k'awonn na a burukumbanku kordaŋo. Lókiireŋ guŋan. Bawonni maŋ na, bááho afúror adék alahuhuntam. Ayéjem: «Úbákum! Bonkerer! Ŋantulo!» 29Úmár ayéjem: «Wówo! Nanka diŋan na!» Ayéjem: «Horaŋ?» Ayéjem: « Memomiye nanka ingi fi k'ídooluko buruhu díineŋ jelijeli, ikanduko neŋen neŋen h'ósiibaane. Foyahadi bukandákan h'ósiibane. Kanda musahado ubuj haani kojaamen ba imbi me k'ifoolamiŋ ingi índinenkum. 30Kanda úbákán m'ukucunne inini, adoodooh bakodihen, k'adék apuñpuñin imbi indikaamo m'anjuliyahne agofonkánin f'adétun. Úmár apútor úduk udooh ahayo adóono n'afaŋunumne n'afuuh k'ukandáram gújuŋ!» 31Angu na, báábám ayéjem: «Hee! Úbákum! Ingah! Fi f'ummomiye nanka ingi me káriman fam. Fi dékuro mandéka. Faka h'eyikne nanka nip, f'umune. 32Kanda ingah! Údonkon ummu anímerinim met. Fégirem. Inini n'apúturne, ummu akankaan ininkaman wúur m'aniiroyer k'aŋooliner a biniiroŋo. Ummomiye n'ajéb! Aŋúncŋunc angu! Gúmár akanne f'aŋoolintne íyej: «Túyor k'ibujurom ahayo adóono n'afaŋunumne n'afuuh k'inkandáromoŋ gújuŋ.»
Nim bááho aŋoyindne úbárám ulaamero.
Currently Selected:
Luk 15: GD
Highlight
Copy
Compare
Share
Want to have your highlights saved across all your devices? Sign up or sign in
Copyright Vision Intégrale, Senegal
