Luk 1

H'akanne Luk añaañi líibáro inno

1-3"Teyofil,#1.1-3 Wúur pájiireŋ m'agune Teyofil. Immi ganyéji akankaan ininkaman úmár agune wúur m'ayik nááful m'abúuñne Luk k'atíb ki nim apiren añaañ líibáro inno fi mu jamaŋo antúyne nip, me mo bim n'iramuruho dáde. Me Luk me mo bim n'iñaañutuho líibáro inno. Aji úfegi iŋay buñaañhu líibáro inno, ki nim úpájul marigeno a nintiku údiigeeno m'ayéjuhne Yensa, Umaasaŋo mu Díino Acaabenne. Gúmár akanne iñaañi líibáro inno.

Agida, jamaŋo anrumunrumun guñaañhu gu Yensa. Angu, imbi immereŋ ayikyik m'anséediya duniyahu Yensa káriman a kankirumo.#1.1-3 Ganyéjeyej nunku Yensa ingi ñantaalibehu Yensa ingi índukoŋo m'ansorne duniyahu Yensa, immereŋ nip antéekinne Luk ho Yensa akanne ingi h'alóbne k'añaañ. Angu, immereŋ m'anséediyane duniyahu Yensa káriman a kankirumo, immereŋ andék anguy ñandóolhu Díino a nintiku búteekinku jamaŋo kúmbuuñanku Díino. Angu, me Luk mees íyej: «Túyor k'ikaana sapatankum k'ídek ídoorla bim nip, ki nim ipiren ídek imiihul a gubaarhu duniyahu Yensa imbi m'anfaŋunumne n'antéejaham.» Angu, bílobi nim, ídek ikaan maŋ nim k'ípájul arenn h'ayikne nip, káriman a kankirumo. Angu, f'eŋoolintne gumiihulaŋo, fam gikir inoone k'iñaañáto líibáro inno. Angu, fi Teyofil, 4aji ukaraŋi líibáro inno, úpájihineh mara h'ankawandinenne guliiho a nintiku Yensa, Umaasaŋo mu Díino Acaabenne, marigen guyennehinne deh! Maŋ marigeno guyennehinne káriman fam. Gúmár akanne iñaañi líibáro inno.

Fo maleekaŋo alóbne a gubaarhu Yaya M'ayicehne jamaŋo

5Iyoo. Inini túyor k'íteekino h'ayikne a didiirahu Israyel fam. Inini, fo h'édekehne balóbo ayikne, a waato nómár Herod agune umaasaŋo a didiirahu Júde.#1.5 Ni Luk añaañorumne, akankaan iniman Herod, didiirahu Júde bareŋ gamarahne. Agida maŋ nim mi guyroŋoŋne Ñanyahudo anyéjne a waato nómár. Kama imbi Ñanyahudo, Herod amaramara didiirahu Israyel nip. Angu, fo Herod agune umaasaŋo, ayik alimaam mees m'aguy na. Alimaamo, gurethinem Sakariya. Sakariya, a muhenku Haruna gafúruntne. Agida alimaamaŋo anlabalaba a didiirahu Israyel. Te meŋen meŋen ingi ulaamekinin. Angu ulaameku Sakariya, gurethinem Abiya. Angu Sakariya, udikankánam gurethinem Elisabet. Agida Elisabet, a muhenku Haruna gafúruntne, maŋ ni údiigenkinem Sakariya. 6Inini, Sakariya ingi udikankánam, jamaŋ m'anwúuh imbi Díino. Gambúuñabuuña Luwaŋanku Umuyhintor ingi ho Díino amiihulne nip. Wúur dapiren k'anéereeniŋ kayúulen.#1.6 Guyroŋ mara Sakariya ingi Elisabet, immereŋ yikireŋeŋ júnub. Yikireŋ mu yikireŋ júnub, fo Yensa ba bareŋ. Kanda immereŋ inako anfiyumfiyum Díino, k'andóolukom, ingi faka gambúuñabuuña Luwaŋankánam. 7Kanda immereŋ, Díino harijendeeniŋ wol mara Elisabet búyekinem awonnwonn. Faka, a waato nómár, immereŋ inako nip n'anlaamer.

8Angu, ayik bísiba Sakariya aŋay búdooluku Díino a dohohunom no alimaamiyaŋo a Jaameŋo Adénno no immereŋ Ñanyahudo. Agida dam, úmár ingi índinenkinem alimaamaŋo mi Abiya anohulinne, immereŋ aŋŋane dohoŋo a Jaameŋo Adénno. 9Fégeŋ baŋ, a Jaameŋo Adénno ayikyik kantíg k'ayéjuh kantígo k'arennáne. Angu, a kantígo kámár, na ganjakálinehne cuurayo. Inini, aji ba bujakálinku cuurayo, alimaamaŋo fo úmánduk bareŋ añantane aŋan ba bujakálinku cuurayo a kantígo kámár.#1.9 Agida, imbi immereŋ Ñanyahudo, alimaamo ajakálinkineh cuurayo jandiŋ batooŋum saliŋo a jaameŋo adénno. Buhoorhunom agune tamaseer maro saliŋo gaŋane. Guyroŋ karo cuurayo ajakálinaajakálin ba búbááhuhu wola bútibaku fáguhoŋo. Angu, andooh jalihano k'anning wúuro m'añantane aŋan na bísibaŋo bímár.#1.9 Úpájuli, budoku ñolihano k'úpájul wúuro m'añantane aŋan na, hómár amburayburay ingi kajuubero. Eke, a kajuubero, wúuro fáguhoŋo ganjellihinkemne h'añantane akaan? Kanda, ho Ñanyahudo ankaanahne aji andoohi ñolihano amburayburay. Immereŋ mingu, gandoohi ñolihano ankiinahánah Díino k'ajellihineeniŋ n'aññantane ankaan. Angu, maŋ nim gankanne dam ki k'ampájul wúuro m'añantane aŋan a kantígo k'arennáne ba bujakálinku cuurayo. Nim gankaanahne káriman fam. Angu, dam, bandoohi ñolihano, ampájul mara Sakariya añantane aŋan a kantígo k'arennáne ba bujakálinku cuurayo. 10Gúmár akanne dam, a waathu bujakálinku cuurayo, Sakariya aŋan na. Agida a bílido jamaŋo anrumunrumun tip k'aŋŋay saliŋo. Angu, f'aŋanne na k'aŋay bujakálinku cuurayo, 11maleeka no Umuyhintor afúror. Maleekaŋo nómár, a jiyaku kanjakálinku cuurayo gawonnáne. 12Angu, bafégem, Sakariya ajuhula, abenuh dáde. 13Maleekaŋo ahuyom ayéjem:

- Sakariya! Ingah! Dahu ubenuh!

Ayéjem;

- Ingah! Díino akandukuno h'okiinahemne. Udikankan Elisabet ayikhineh wol údiigeen. Inini, wolo úmár, gurethinem aguyhuneh Yaya. Gureto gúmár guñantane ukandur wolo. 14Wolo úmár, asúumhuno dáde. Useewoháneh fanfaŋ gu úmár. Ingah! Ñanlabahi, aji anyennehini gu wolo mu udikankan aboshánehne, moŋon moŋon asúumhunom dáde 15mara adék aguyhuneh wúur úde a gúbidhu Umuyhintor. Úmár ii, daruuh kunnohu reseŋo#1.15 Kunnohu reseŋo ayehyeh. Mídeŋ ingi kunnohu sibekelo. Te faka gúduk ungo na angaasahin ingi baaruku koloŋo ki nim alikolo n'agune na abuj tañoŋo. Gúduk ungo na gandoohodooh kunnohu reseŋo ba busaajhu baniyoŋo. dafak aruuh kunnoŋ kugurumaareŋ. Díino awakirikinem jamméejhinem Jarenninno arumun tip káriman a búyeku nunom.

16Maleekaŋo abocin ayéjem:

- Ingah! A gubaarhu kawandhánam, úbákán aŋoyinkineh jamanku Israyel jup a binaahu Umuyhintor Díino. 17Ingah! Úbákan anohukuneh Umuyhintor a binaalo bi úmár Umuyhintor adékunkunehne. Eke fam, Jamméejhu Díino Jarenninno annohulinne Annabila Eli k'ayik sembe a kawandhánam? Inini Jamméejhu Díino Jarenninno ínjanduko, maŋ jámár gadékehne bunohálinku úbákán Yaya mees k'ayik sembe a kawandhánam. Angu, bááháŋo ingi jarakánin anyennehindir kawandhu úbákán, immereŋ damankánin anyennehinayhineh k'ankaan gúlokunin kantíg ínkánduk. Te kawandhánam faka akankáneh ki mi búuñaaraŋaŋne Díino ankúbul jamméejenkinin.

Maleekaŋo abocin ayéjem:

Hómáráŋ nip, úbákán gadékehne bukaano, te a bukaano nim ba bújooninku jamméejenkinin gadékehne ki nim jamaŋo ampare búputhu Umuyhintor.

Nim maleekaŋo ayéjne Sakariya dam.

18Angu, fo maleekaŋo atéekinemne hómár nip, Sakariya akerker ayéjem:

- Inini, me neeraŋ gídekehne bukaano k'ifiyum h'ólobeemne? Agida, me ilaamerlaamer dáde. Udikankum mees alaamerlaamer.

19Maleekaŋo aŋoyindem ayéjem:

- Ingah! Me gurethum Jibril. Me, Díino fankánam gítuyohne. Ámár faŋo abúuñureemne k'ídek íteekino hómár.

20Jibril abocin ayéj:

- Inini, ni fiyindone h'élobenne, Díino alakuneh buruhon ki dupiren k'úlob. Uguyhuneh umumune baman a waato no wolo abosuhunuhne. Nim gúpájuloorunkunehne mara maŋ marigeno gílobenne. Ingah! K'afeero mara h'élobne adék apúthuneh a bísibaŋo bi Díino aworne. Te, bísibaŋo bímár, Díino abénnhineh buruhon k'úlob.

Nim Jibril ayéjne Sakariya. 21Agida fo Jibril aŋane balóbo ingi Sakariya a kantígo k'arennáne, jamaŋo imme na a bílido n'anrumun tip bútuyhunom. Antúyom f'amiñ, fúturoŋ. Angu, aŋŋay gumiihora:

- Angu mintoroŋ! Sakariya amiñrimiñ baman maŋ inini! Horaŋ ayikemne?

22Angu, bamiñilay Sakariya afúror. Bafúti asíibáá balób ingi immereŋ, kanda pirendeŋ. Angu, akaanah bamumuneŋo ingi halaho. Angu, na jamaŋo anyéjeh karo ayikyik bífegeren b'afég a kantígo k'arennáne, te gúmár akanne pirendeŋ k'alób.

23Angu, afúrumi na, fo Sakariya abollane dohohunom a Jaameŋo Adénno, aŋúñ ba a dígo. 24Angu, na amiñaadimiñ Elisabet udikankánam adooh badooh. Elisabet f'apájulne mara ingi badooh gagune, akúba buruhu júunoŋ amákilaŋ. Fúdoŋ bítig. 25Ayéjeh:

- Heh me me! Afeereemfeer mara Umuyhintor bareŋ apirenne akaan inho! Umuyhintor ayikyik bankabaŋ a binaam. Te afak afúnneemfunn a jaroh. Inini m'anyeefihumne dampiren k'anyeefileem angu.#1.25 Imbi immereŋ Ñanyahudo, aji udikaam yikireŋ wol, jamaŋo ganyéjeyej a júnubonkunom gaguyuntne, wola hakaanankánam súumuroŋne Díino.

Nim Elisabet alóbne f'afégne maro adoodooh badooh.

Fo maleekaŋo m'ayéjuhne Jibril adékne imbi Mariyama

26-27Angu, afúrumi na, a waato no Elisabet ayikne júunoŋ amákilaŋ ingi amánduk a badokánom, ayik na bágid b’aretuh Mariyama. Angu Mariyama, úmár anébaanéb bareŋ ki fanti bapájul údiigeen. Agida údiigeen m'aretuh Isuf anébemne. Isuf a muhenku umaasaŋo Dawuda gafúruntne. Kanda maŋ ni anébaane, Isuf fanti bapájulám udikaam.#1.26-27 A cosaankánin, nim gankaanahne fo baman da bísibahu bajaho. Angu, a júuno nómár, no Elisabet ayikne a badokánom júunoŋ amákilaŋ ingi amánduk, Umuyhintor abúuñor maleeka ba imbi Mariyama. Maleekaŋo, gurethinem Jibril. Agida Mariyama a saariŋo n’aretuhne Nasaret gagune. Angu Nasaret atohtoh a didiirahu Galile. Na Umuyhintor abúuñurne Jibril.

28Angu balahunti Mariyama a díkinem ayéjem:

- Mariyama, básuumo! Umuyhintor abúuñureemne a binankan. Ingah! Fi nuko uyikyik barakehu Díino. Ingah! Kídeero, Díino bénnuro! Fi! Umuyhintor ummo na a binankan.

29Angu Mariyama, f'ayennehinne hómár, ajuhula dáde k'amiihorah h’akanne alóbem nim. 30Angu na maleekaŋo ayéjem:

- Mariyama ingah! Dahu ubenuh! Fi, Díino acaabenencaaben ba buduwakan duwa adé. 31Fi udokuneh badooh. Uyikhineh wol údiigeen. Kanda wolo úmár, uretihinem Yensa. Gureto gúmár gúdekehne bukanduku wolo. 32Ingah! Úbákán adék aguyhuneh wúur úde mu jamaŋo ambúunahánehne fanfaŋ. Ahuyhunuh Úbáku Díino, Díino N'afaŋunumne N'ayik Sembe. Féger baŋ, Umuyhintor Díino akankánam umaasa ininkaman ni maamankánam Dawuda aguyerne fam umaasa. 33Kanda úmár mungu, aguyhuneh umaasahu jamaŋo m'anfúruntne a muhenku Yankuba #1.33 Jamanku Yankuba : Hómár ingine jamanku Israyel ingi jamaŋo m'anfiyumne Díino nip. baman dagurumaareŋ. Maasayahánam dakoomahar.

Nim maleekaŋo ayéjne dam Mariyama. 34Angu, Mariyama, aŋoyindem ayéjem:

- Iyennennehin h’ólobne, kanda hómár, neeraŋ gapirenkinehne aguyoorum, agida me pájiiri údiigeen?

35Maleekaŋo aŋoyindem ayéjem:

- Mariyama! Údiigeen danéero badooŋo bámár! Ingah! Jamméejhu Díino Jarenninno akucokuneh a binankan ki sembehu Díino N'afaŋunumne N'ayik Sembe agoogeno. Agoogenodir, uguyhuneh ingi badooh. Ingah! Uraagofo dakandár badooŋo bámár. Gúmár akanne wolo úmár arennhineh fet k'ahuyaa Úbáku Díino.

36Maleekaŋo abocin ayéjem:

- Ninger baŋ! Elisabet m'agune baarinken, ummo na ingi badooh. Adefdef, kanda haani maŋ nim abosháneh kowol kódiigeen. Fam ganyéjeyéj dapiren k’ayik wol, kanda inini a júuno amákilinno ingi amánduko gagune! 37Féger baŋ! Díino yikireŋ ho pirendeŋ k'akaan. Díino apirenpiren akaan hogurumaareŋ.

38Angu, Mariyama aŋoyindem ayéjem:

- Angu, me faŋo úsoku Umuyhintor! Neŋen neŋen gasíibane k'akaanaam, me ílokiloki.

Balóbi nim mees, maleekaŋo aŋoolin.

Da Mariyama adékne búfeku Elisabet

39-40Angu maleekaŋo baŋoolini, miñireŋ Mariyama akaana sapatankánam k'adék ba imbi Elisabet, udikanku Sakariya. Agida immereŋ k'angune araafunaaraafunaa a didiirahu Júde. Angu Mariyama añufa ba a saarihinin. Bapúti a saariŋo, adék a díku Sakariya. Bapúti a dígo, alahun na Elisabet, adék aramam. 41Angu, maŋ ni Mariyama aramemne, angu wolo m'agune a búyeku Elisabet anaŋina. Agida Jamméejhu Díino Jarenninno inja na n'arumun imbi Elisabet. Angu, Jamméejhu Díino, jámár ganohálinkemne a balókunom. 42Angu alób wolaŋ ingi basewohánom, ayéj Mariyama:

- Mariyama! Asúumeemsuum n'údekirne ba búfekum! Ingah! Isewosewo gunankan mara Umuyhintor akandurenkandur barake b'ópájul kandárhadaŋ haani udikaam. Fi bareŋ gakandurne.

Abocin ayéjem:

- Ingah! Wolo mees, n'agune a búyeken, ayikyik barakehu Umuyhintor. 43Inini me ingine nuko hantaŋ fo nunku Díino n'efuuhurinehne#1.43 'Díino n'efuuhurinehne': Na akankaan iniman Elisabet apápájul mara, káriman fam Yensa, Upahunkintor, ummo bim ingi báábám Díino. adéker ba búfekum? 44Ingah! Biyennehini n'urameemne, kóbákum arica ingi basewohánom na a búyekum.

Elisabet abocin ayéjem:

45- Mariyama ingah! Umuyhintor Díino atéekinenteekin h'adékehne ba bukandákan. Angu f'ofiyumne h'alóbenne, fam gakandárenne barakeŋo imba.

Nim Jamméejhu Díino Jarenninno anohálinne Elisabet a balókunom dam f'afégne Mariyama.

46Angu, Elisabet balóbi nim mees, Mariyama akir alób ayéj:

- Ingah! Umuyhintor afufuuh dáde! Giwoseni h'akanne a binaam, me mo bim n'ifuuhurinkem baman a cokonku arinkum nip! 47Me ii, giwoseni gu Díino Upahunkum, iyik básuum báde a hafithum.

48Abocin ayéj:

Angu m'egune nuko hantaŋ ki Díino adék acaaben me me? Agida me faŋ, me údoolhánom utiiri bareŋ. Inini jamaŋo anyéjhineh : «Mariyama ayikyik barake deh!» Maŋ nim jamaŋo gandékehne ba búyejo baman dagurumaareŋ. 49Fég baŋ, Díino N'alahne Sembeŋo Nip akandureemkandur hóde.

Nim Mariyama alóbne. Ki afúrumi na Mariyama aŋoolinkineh h'añaañaane a Hañaañeno ayéj:

- Kanda ámár Díino arennrenn fet.#1.49 Imbi inini Mariyama aŋoolinkinŋoolinkin h'añaañaane a Líibárhu Aliiho no Samuwel 2.2

50 Gakandurakandur hójoonineŋo jup jamaŋo m'antúyuhomne. Bankabankánam imbi m'antúyuhomne afufuuh dáde, te maŋ nim gamíirhinehne baman dagurumaareŋ.#1.50 Imbi inini Mariyama aŋoolinkinŋoolinkin h'añaañaane a Líibárhu Bákimo 103.13,17

51 Akankaan honjoŋo h'afuuhineŋo a gubaarhu sembehinem no yikireŋne k'amuk. Kanda jamaŋo m'anfuuhurinoorane, immereŋ mingu, adokuneh sembehinem k'afisfisineeniŋ.

52 Ñammaasaŋo índenno gúduk acigeeniŋ k'ayoofun m'antirilinoorane k'aninkeeniŋ a bunoohumo.

53 Mi kúugo alahne, immereŋ annékineeniŋ k'anfoola f'anhay, ki m'anyikne nááfulo mingu atíbakáneeniŋ k'andék ingi halakánin hademo bareŋ.#1.53 Imbi inini Mariyama aŋoolinkinŋoolinkin h'añaañaane a Líibárhu Annabila Samuel Aliiho 2.1-10

54-55 Ingah! Umuyhintor adékridek ba búlahinkintor, mintor ñandóolhánom, jamanku Israyel.#1.54-55 Imbi inini Mariyama aŋoolinkinŋoolinkin h'añaañaane a Líibárhu Esay 41.8,9 ingi Líibárhu Bákimo 98:3 Umuyhintor musahadaŋ abayun kabonkerihem imbi mintor, te dabayunahar baman dagurumaareŋ. Agida ajíkirindjikirind maamankintor Ibrahiima ingi m'anfúrumokunehne a muhenkinem maro dabayunahar kabonkerihem a binanin baman dagurumaareŋ.

Inini Mariyama aŋoolinkinne Hañaañeno k' afuuhurin Umuyhintor d'anrahne ingi Elisabet.

56Angu afúrumi na, anooh maŋ na imbi Elisabet buruhu anaman júunoŋ alallaŋ k'akir aŋúñ.

Fo Yaya M'ayicimehne abosaane

57Angu, Elisabet mungu, waathu guŋankánam babáári, aŋan wol údiigeen. 58Angu, ñannoohaykinem ingi jamankánam, banfégi mara Elisabet ayikyik wol údiigeen, angu anfég mara Umuyhintor ayikne bankabaŋ báde a binaanam. Angu, immereŋ mees anseewo dáde. 59Angu da wolo ayikne ásibaŋ amikilaŋ ingi alallaŋ, andék anjóg a díku Sakariya. Agida dam gandékehne ba busunnhu wolo k'ankandáram guret. Angu índukoŋo m'antógne na dam, anlahlah bukanduku wolo gurethu báábám, Sakariya. 60Kanda Elisabet, f'ayennehinne hómár ayéjeeniŋ:

- Wówo! Gureto ba bukandukánam, Yaya.

61Angu f'alóbne nim, immereŋ anyéjeh:

- Kanda imbi jamankánan yikireŋ m'aretaa Yaya!

62K'andék ammiih báábám Sakariya. Agida Sakariya, buruhunom alahalaha a waato nómár. Angu, andooh halakánin k'anlóboh maŋ ni anlóbumohne ingi mumuneŋeŋo, anyéjem:

- Wolo, ba bukandákánam guret gooraŋ?

63Sakariya akaan ingi halakánam ajellihineeniŋ mara arduwaaso gahaajane, k'andék andootom. Angu, f'andootemne arduwaaso añaañ na: «Wolo gurethinem Yaya.»

Angu jamaŋo, banfégi n'añaañne «Yaya» abineeniŋ dáde. 64Kanda Sakariya bañaañi «Yaya» atoŋ balóbo, alób, síngirhinem akeng k'aramunah Díino. 65Angu na, ñannoohaykinem, banfégi mara Sakariya apiren alób angu, ingi f'ankorosne mees maro Sakariya ingi Elisabet anyikyik wol a sidefhinin, anfaŋunum n'ambúuña Díino. Angu fo jamaŋo anfisayne dam, andék antéekinay beŋen beŋen a didiiraŋo d'alóbaane di Júde. H'ayikne dam nip imbi Sakariya gantéekineeniŋne. 66Angu, jamaŋo banyennehini hómár, alaaleeniŋ dáde. Angu moŋon moŋon amiihora ayéjeh:

- Angu wolo úmár, aji adéki alaamer ba buguyhu hantaŋ gadékirehne ?

Agida afeereeniŋfeer mara Umuyhintor ummo na imbi wolo.

Gúloku Sakariya g’alóbne a h’adékirehne buyiko

67Agida dam, d'ansunnáne Yaya, Sakariya bááhu wolo alóboh ingi jamaŋo, te Jamméejhu Díino Jarenninno inja na n'arumun tip a binaanam. Angu jámár ganohálinkemne a balókunom dam. Angu a gubaarhu wolo mu Mariyama adék aboshánehne galóbohne aruko. Ayéjeh jamaŋo:

68- Mintoroŋ, iñantay inramunoonuŋ Umuyhintor, Díino Amánduko no mintor jamanku Israyel íntuyohoŋne.

Ingah! Ámár Díino ii, abúuñutokuneh mintor jamankánam, wúuro m'adékehne ba bupahunkintor a kunyoho k'enguyoŋne.

69Upahunumo m'ayikne sembe dáde gadékehne búbuuñukintor.

Úmár afúrumokuneh a muhenku úsokánom m'aretuhne Dawuda.

70Agida káriman fam, Díino ajíkirindjikirind mintor mara abúunutokuneh mintor Upahunumo úmár. Nim gajíkirindne mintor a buruhu anabiyoŋoŋo m'anrennáne.

71Káriman fam Díino ayéjyej mara abúuñutokuneh mintor Upahunumo m'ayikne sembeŋo dáde k'adék apahun mintoroŋ a halaku m'aññaamálinne mintor ingi a halaku m'anfoyne mintoroŋ mees.

72-75Agida hómár gambénnayne ingi maamankintor Ibrahiima,#1.72-75 Upiren ukaraŋ a nintiku gúlobo gu Díino ambénnayne ingi Ibrahiima. (Aji údeki ba Jenes 12.1–3, 22.15–18 úfekineh hómár). Díino afak ambénnaybennay ingi Siyaka h'amíir . (Aji údeki ba Jenes 26.2–4 úfekineh hómár), ingi Yankuba. (Aji údeki ba Jenes 28.13–15; Bákimo 105.8–10 úfekineh hómár.) ingi Musa. (Aji údeki ba Gúfuro 3.6–10, 6.2–8 úfekineh hómár). Angu, adékiidek Yensa adéker k'adék apútulin ho Díino ajíkirindne a símbennayo símár. te Díino bayunahadaŋ hómár. Ayéjyej maamaamankintor mara akandukuneeniŋ bajóon, ingi faka dabayun h'ajíkirindeeniŋne. Angu aliŋunliŋun gúlobo gurenninno gúmár.

Sakariya abocin ayéjeh jamaŋo:

Agida, fam ajíkirindjikirind Ibrahiima mara apahunkuneh mintor imbi ñanfoyhintor

ki nim impirenoonuŋ índooluroŋ ámár Díino ni benuhuroŋoŋ.

Nim inguyhunoŋ ñansókunom ñanwúuhi#1.72-75 Agida Díino ba bareŋ apirenne anéer wúur sembe ki níndokorunkánom arenn k'akaan ho ámár Díino asíibane a duniyaŋo inno. Aji údeki ba Filip 2.13, 2 Piyer 1.3 úfekineh hómár.) k'inkaanoŋ h'asúumhunomne, baman dagurumaareŋ.

Agida, nim Díino ambénnayne ingi maamankintor Ibrahiima. Angu aliŋunliŋun gúlobo gúmár.#1.72-75 Upiren ukaraŋ a nintiku gúlobo gu Díino ambénnayne ingi Ibrahiima. (Aji údeki ba Jenes 12.1–3, 22.15–18 úfekineh hómár). Díino afak ambénnaybennay ingi Siyaka h'amíir . (Aji údeki ba Jenes 26.2–4 úfekineh hómár), ingi Yankuba. (Aji údeki ba Jenes 28.13–15; Bákimo 105.8–10 úfekineh hómár.) ingi Musa. (Aji údeki ba Gúfuro 3.6–10, 6.2–8 úfekineh hómár). Angu, adékiidek Yensa adéker k'adék apútulin ho Díino ajíkirindne a símbennayo símár.

Nim Sakariya alóbne dam a gubaarhu wúuro m'adékirne ba bupahunkintor a kunyoku júnubonkintor. Angu, Sakariya balóbi nim mees, ayéj kóbárám k'aretuhne Yaya:

76-77- Kanda fi kóbákum uguyhuneh anabiyo. Ingah! Jamaŋo anyéjhineh Díino N'afaŋunumne N'ayik Sembe, ámár abúuñurenne. Nim ganyéjhinehne maro fi unohokuneh Umuyhintor a binaalo. Fi gúdekehne ba buwurikinem binaalo a duniyaŋo inno.

Sakariya abocin ayéj úbárám:

- Fi gúdekehne ba búteekinku jamaŋo m'angune ingi Umuyhintor mara Upahunumo ummo bim n'adékireh. Úmár gapútri, ba bupahunkánin a kunyoku júnubonkinin gadékehne. Nim gúteekinkinehne jamaŋo. Ingah! Wúuro úmár abonkerhineeniŋ a jínubonkánin k'apahuneeniŋ. Angu fi úbákum, hómár gúdekehne ba búteekinku jamaŋo.

Abocin ayéj úbárám:

78- Agida, Díino n'enfuuhurinkoŋne ayikyik bankabaŋ dáde. Angu, afeero mara Upahunumo mu Díino ajíkirindne mintor adékekineh. Úmár aguyhuneh ininkaman jiyaaŋ j'afúrumor a raafo, j'amíir iniman gúhuurhu harennaamo. 79Jiyaaŋo #1.79 Agida na, f'aretne «jiyaaŋo» a gubaarhu Umaasaŋo mu Díino Acaabenne galóbumohne. jímár ayaaŋárinkineh jamaŋo m'angune a bumurulo#1.79 A Gúloku Díino «bumurulo» apirenpiren aguy bapájiiriŋo gu Díino, wola, badómáriŋo gu Díino wola siŋaantinayo ingi Díino wola aguy a bukanku hójondoŋo. Hómáráŋ nip atohtoh a bumurulo. ingi m'ambenuhne biniiroŋo. Maŋ ni ingine bísibaŋo garenni atibar bumurulo, maŋ nim nuko, úmár afúnnokunehne mintor a bumurulo k'aŋan mintor a binaal b'ayaaŋ. Úmár ii, anohálinkineh mintor a binaahu básuumo.

Nim Sakariya ayéjne úbárám Yaya d'ansunnemne, ankandáram guret.

80Angu, adékiidek, Yaya alaamer. Maŋ ni alaamerehne, maŋ nim mees jamméejhinem gabocinahne k'ayik sembe f'adék atijen. Angu balaameti, adék aguy a kanaŋaŋo kalaalinno. Na gagune fo waato n'añantane atoŋ bukawandinku jamanku Israyel apút.

Currently Selected:

Luk 1: GD

Highlight

Copy

Compare