لاویأن ۷
۷
جبرأنٚ قوربأنی قأنونأن
1 «جبرأنٚ قوربأنی قأنونأن کی ایتأ موقدس قوربأنی ایسٚه اَطؤیی ایسٚه: 2 قوربأنی حیوأن وأستی او جیگأ دورون کی سوجأنِئنی قوربأنییَ سٚر وأوینٚده، ذبح و قوربأنی بٚبه و اونٚ خون مذبحٚ چأر ورٚ رو بٚپأشأنِه بٚبه. 3 کأهین اون تومأمٚ پییَ پیشکش بوکونٚه، ینی شکمٚ میأنٚ پی و دونبه، 4 دؤنه قولوه و پی کی اوشأنٚ رو نٚهأ تهیگأه قیسمتٚ دورون و هطؤیم او سیفیدی کی جگرٚ رو نٚهأ. اَشأن وأستی قولوهیأنٚ اَمرأ سیوأ بٚبد. 5 بأزون کأهین اوشأنَ جبرأنٚ قوربأنی مأنستَن مذبحٚ آتشٚ رو خوداوندٚ رِه بوسوجأنه. 6 کأهینأنٚ پٚسرأن تأنٚده جٚه اَ گوشت بوخورٚد. اَ گوشت وأستی ایتأ موقدسٚ جیگأ دورون بوخورده بٚبه. اَ قوربأنی، خٚیلی موقدس ایسٚه.
7 «او قأنون کی وأستی دروأرهیٚ گونأ قوربأنی و جبرأنٚ قوربأنی بٚدأشته بٚبه اَن ایسٚه: قوربأنی گوشت او کأهینٚ شین ایسٚه کی کفأره مرأسیمَ انجأم دِهه. 8 هطؤیم سوجأنِئنی قوربأنی پوستٚم او کأهینٚ شین ایسٚه کی اونَ پیشکش بوکوده. 9 هرتأ آردی پیشکشی کی تنور یا خٚکأره رو بٚپخته بِه او کأهینٚ شین ایسٚه کی اونَ خوداوندٚ رِه پیشکش کونِه. 10 تومأمٚ البأقی آردی پیشکشأن، چی روغن زیتونٚ اَمرأ قأطی بوبوسته بٚبد چی خوشک، برأبرٚ سأم بِه و هارونٚ پٚسرأنٚ شین ایسٚه.»
سلأمتی قوربأنی قأنونأن
11 «سلأمتی قوربأنی قأنونأن کی خوداوندٚ رِه پیشکش بِه اَشأن ایسٚد: 12 اگه قوربأنی شوکرگوزأری شین بٚبه، اونٚ اَمرأیٚم وأستی اَ نأنأن کی خمیرمأیه نأرٚده پیشکش بٚبد؛ گردٚ نأنأن کی روغن زیتونٚ اَمرأ قأطی بوبوسته بٚبد، نأزٚکٚ نأنأن کی روغنٚ اَمرأ قأطی بوبوسته بٚبد، او نأنأن کی جٚه خورومٚ آرد و روغن زیتونٚ اَمرأ چأکوده بوبوسته بٚبد. 13 هطؤیم قوربأنی اَمرأ وأستی گردٚ نأنأن پیشکش بٚبد کی خمیرمأیه دأرٚده. 14 جٚه هرجور نأن وأستی ایتأ قیسمت مخصوصٚ هدیه مأنستَن خوداوندَ پیشکش بٚبه کی او کأهینَ فأدٚد کی حیوأنٚ خونَ مذبحٚ رو پأشأنِه. 15 سلأمتی قوربأنی حیوأنٚ گوشت وأستی شوکرگوزأری پیشکشی مأنستَن او روجٚ میأن کی تقدیم بِه، بوخورده بٚبه و هیچی جٚه اون فردأیی روجٚ رِه بأقی نٚمأنه.
16 «اگه قوربأنی، دیلبخأ یا نذر بٚبه، قوربأنی گوشت او روجٚ میأن کی اونَ پیشکش کونٚده، وأستی بوخورده بٚبه. اگه جٚه قوربأنی گوشت ایچی بأقی بٚمأنه شأ اونَ فردأیی روجٚم خوردن. 17 ولی هرچی سیومی روجٚ اَندر بأقی بٚمأنه، وأستی تومأم و کمأل بوسوجأنِه بٚبه. 18 اگه سیومی روجٚ میأن ایچی جٚه قوربأنی گوشت بوخورده بٚبه، خوداوند او قوربأنییَ قوبیل نوکونه و بٚحیسأب نأوٚره چونکی او گوشت نجسَ بوسته. اونم کی اونَ بوخورده گونأکأر ایسٚه.
19 «او گوشت کی ایتأ نجسٚ چییَ وأسِه بٚبه نوأستی خوردن، بلکی وأستی اونَ سوجأنِئن. قوربأنی گوشتَ فقد اوشأنی تأنٚده بوخورٚد کی پأک ایسٚد. 20 هرکی پأک نٚبه و سلأمتی قوربأنی گوشت کی خوداوندٚ شین ایسهیَ بوخوره وأستی جٚه قومٚ میأن سیوأ بٚبه. 21 اگه اینفر ایچی کی نجس بٚبهیَ دٚس بٚزنه، چی نجأست آدم بٚبه، چی نجسٚ حیوأن و یا هرتأ دِه نجسٚ چی، اونٚ پٚسی سلأمتی قوربأنی گوشت کی خوداوندٚ شین ایسهیَ بوخوره وأستی جٚه خودا قومٚ میأن سیوأ بٚبه.»
22 خوداوند موسایَ بٚفرمأسته: 23 «اَ دستورأنَ فأدٚن ایسرأییلٚ دودمأنَ. هیوخت گأب و گوسوٚند و بوزٚ پییَ نوخورید. 24 او حیوأنٚ پی کی بٚمٚرده یا ایتأ دِه جأنور اونَ وأچأرٚده بٚبه هیوخت بوخورده نٚبه بلکی جٚه اون البأقی کأرأنٚ رِه ایستفأده بٚبه. 25 هرکی او حیوأنٚ پییَ کی آتشٚ رو خوداوندٚ رِه پیشکش به بوخوره وأستی جٚه قومٚ میأن سیوأ بٚبه. 26 هرتأ جیگأ کی زٚندیگی کونیدی، هیوخت خون نوأخوردنید، نه پرنده خونَ و نه چأرپأ خونَ. 27 هر کی، هرتأ جیگأ، خون بوخوره، وأستی جٚه خودا قومٚ میأن سیوأ بٚبه.»
کأهینٚ سأم جٚه قوربأنی
28 بأزون خوداوند موسایَ بٚفرمأسته: 29 «اَ دستورأنَ فأدٚن ایسرأییلٚ قومَ: هرکی بٚخأیه سلأمتی قوربأنی خوداوندَ پیشکش بوکونٚه وأستی ایتأ قیسمت جٚه او قوربأنییَ پیشکشی مأنستَن بأوٚره خوداوندٚ ورجأ. 30 اون وأستی خو دٚسٚ اَمرأ اونَ ایتأ مخصوصٚ پیشکشی مأنستَن خوداوندَ تقدیم بوکونه. حیوأنٚ پییَ اونٚ سینه اَمرأ تقدیم بوکونه و قوربأنی سینهیَ ایتأ مخصوصٚ پیشکشی مأنستَن، خوداوندٚ حوضورٚ میأن تکأن بٚده. 31 کأهین پییَ مذبح رو بوسوجأنه، ولی قوربأنی سینه هارون و اونٚ پٚسرأنٚ شین بٚبه. 32 سلأمتی قوربأنی رأستٚ رأنَ، ایتأ بوجؤر گیفتنی پیشکشی مأنستَن، فأدأ بٚبه کأهینَ. 33 رأستٚ رأن هارونٚ اویتأ پٚسرأنٚ شین بِه کی قوربأنی پی و خونَ پیشکش کونِه، 34 چونکی خوداوند سلأمتی قوربأنی سینه و رأنَ جٚه ایسرأییلٚ قوم فأگیفته و اوشأنَ ایتأ مخصوصٚ پیشکشی مأنستَن فأدأ کأهینأنَ و همیشٚک اَشأنٚ شین ایسٚه.» 35 اَ قیسمت جٚه او پیشکشأن کی آتشٚ رو خوداوندَ پیشکش بِه او روجٚ میأن کی هارون و اونٚ پٚسرأن خیدمتٚ رِه مَسح بوستأندوبود، اَشأنَ فأدأ بوبوسته. 36 او روجٚ میأن کی اَشأن مَسح بوبوستٚد، خوداوند دستور بٚدأ کی، «ایسرأییلٚ قوم اَ قیسمتَ فأدٚد اَشأنَ. اَن ایتأ قأنون اَشأنٚ تومأمٚ نتأجأنٚ شین ایسٚه.»
37 اَ قأنونأن دروأرهیٚ سوجأنِئنی قوربأنی، آردی پیشکشی، گونأ قوربأنی، جبرأنٚ قوربأنی، گومأشتگی قوربأنی و سلأمتی قوربأنی بو 38 کی خوداوند بیأبأنٚ دورون، سینأ کوهٚ میأن فأدأ موسایَ کی ایسرأییلٚ قوم بدأند چوطؤ خوشأنٚ قوربأنیأنَ خوداوندٚ رِه پیشکش بوکونٚد.
Currently Selected:
لاویأن ۷: GCB
Highlight
Copy
Compare
Share
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org