پیدأیش ۳۷
۳۷
یوسفٚ خأبأن
1 یعقوب ایوأردِه کنعانٚ میأن ینی او سرزیمین کی اونٚ پِئر اونٚ دورون زٚندیگی بوکوده بو، سأکینَ بوسته.
2 اَن یعقوبٚ نتأجٚ تأریخچه ایسٚه: او وخت کی یوسف هیفده سأل دأشتی، خو نأتنی برأرأنٚ اَمرأ کی اونٚ پِئرٚ کنیزأن، بلهه و زلفه زأکأن بود، خو پِئرٚ گوسوٚندأنٚ چرأ دٚئنٚ رِه یاور دٚئی. یوسفٚ او نأجورٚ کأرأنَ کی اوشأن انجأم دٚئیدیَ خو پِئرَ خٚوٚر دٚئی.
3 یعقوب یوسفَ جٚه خو البأقی پٚسرأن ویشتر دوس دأشتی، چونکی یوسف اونٚ عُمر آخری سألأنٚ میأن بودونیأ بأمؤ بو، پٚس ایتأ الوأنٚ رخت یوسفَ فأدأ. 4 اونٚ برأرأن بٚفأمستٚده کی خوشأنٚ پِئر اونَ جٚه اوشأن ویشتر دوس دأره؛ هنٚ وأسی اوندر جٚه یوسف نیفرت اوسأدٚد کی نتأنستیدی نرمٚ نأزٚک اونٚ اَمرأ گب بٚزند. 5 ایتأ شب یوسف ایتأ خأب بیدِه و اونَ خو برأرأنٚ رِه وأگویا بوکوده. اَ موضو بأعیث بوبوسته اوشأنٚ کینه یوسفٚ رِه ویشتر بٚبه.
6 اون اَشأنَ بوگفته: «بٚشتأوید کی او خأب کی بیدِمَ شِمِره وأگویا بوکونٚم. 7 خأبٚ دورون بیدِم کی اَمأن کولوشٚ دسته‌یأنَ بیجأرٚ میأن دٚوٚستأندیبیم. نأخٚوٚرکی می کولوش دسته رأستَ بوسته و بٚپأ بِئیسأ و شیمی کولوش دسته‌یأن می کولوش دسته دؤر جمَ بوستٚد و اونَ تعظیم بوکودٚد.»
8 اونٚ برأرأن اونَ بوگفتٚده: «ینی خأیی پأدیشأ بیبی و اَمٚرَه پأدیشأیی بوکونی!» پٚس یوسفٚ خأب و گبأن اونٚ برأرأنٚ کینه‌یَ ایضأفَه کوده.
9 یوسف ایوأردِه ایتأ خأب بیدِه و اونَ اَطؤ خو برأرأنٚ رِه وأگویا بوکوده: «خأب بیدِم کی آفتأب، مأه و یأزده‌تأ ستأره مٚرَه تعظیم کودیدی.»
10 اَیدفأرِه خو خأبَ خو پِئرٚ رِه‌یٚم وأگویا بوکوده؛ ولی اونی پِئر اونَ شمأتت بوکوده، بوگفته: «اَن چی خأب ایسٚه کی بید‌ِیی؟ ینی رأس‌رأسِی من، تی مأر و تی برأرأن اَییم، تٚرَه تعظیم کونیمی؟» 11 اونٚ برأرأن اونَ حسودی کودیدی، ولی اونٚ پِئر فیکر کودی او خأبٚ دروأره کی یوسف بیدِه بو.
یوسفٚ بوفرؤخته بوستن
12 ایتأ روج کی یوسفٚ برأرأن خوشأنٚ پِئرٚ گله‌یأنَ چرستنٚ رِه بٚبرده بود شکیم 13 یعقوب یوسفَ بوگفته: «تی برأرأن شکیمٚ میأن گلّه‌یأنَ چرأ دٚئندریدی. بوشو و بیدین اوضأع احوأل چوطؤ ایسٚه و او وخت وأگرد و مٚرَه خٚوٚر بٚدٚن.» 14 یوسف ایطأعت بوکوده و حبرونٚ درّه جَا بوشؤ شکیم.
15 اویَه اینفر اونٚ اَمرأ کله بٚکله بوخورد و بیدِه کی اون بیأبأنٚ دورون سبیلٚ سرگردأن ایسٚه. اون یوسفٚ جَا وأوٚرسه: «چی دونبأل گردی؟»
16 یوسف بوگفته: «می برأرأن و اوشأنٚ گلّه‌یأنٚ دونبأل گردستأندرم. آیا تو اوشأنَ نیدِیی؟»
17 او مردأی جوأب بٚدأ: «هطؤیه، من اوشأنَ بیدِم کی جٚه اَیَه بوشؤده و بٚشتأوٚستٚم کی گفتیدی شٚده دوتأن.» پٚس یوسف بوشؤ دوتأن و اوشأنَ اویَه بیأفت. 18 هطؤ کی اونٚ برأرأن جٚه دور بیدِده یوسف اَمؤندره، تصمیم بیگیفتٚد اونَ بوکوشٚد.
19 اوشأن کس‌کسَ بوگفتٚده: «پیله خأب بین اَمؤندره! 20 بأیید اونَ بوکوشیم و ایتأ جٚه اَ چأهأنٚ میأن تأوٚدیم و اَمی پِئرَ بیگیم ایتأ وأشی جأنور اونَ بوخورده. او وخت بیدینیم چی بِه اونٚ خأبأن.»
21 ولی رئوبین چونکی اَنَ بٚشتأوٚسته، اَ اومیدٚ اَمرأ کی اونٚ جأنَ نیجأت بٚده، بوگفته: «اونَ نوکوشیم. 22 اونی خونَ فونکونیم، بلکی اونَ تأوٚدیم اَ چألکأ میأن. اَ کأرٚ اَمرأ خوره میره بودونٚ اَنکی اَمی دٚسأنَ اونٚ خونَ وأسینیم.» رئوبین خأستی دونبألتر اونَ جٚه چأه دورون بأوٚره بیرون و وأگردأنه خو پِئرٚ ورجأ.
23 هطؤ کی یوسف فأرٚسه خو برأرأنٚ ورجأ، اوشأن فوتورکستٚد اونٚ سٚر، او الوأنٚ رختَ کی اوشأنٚ پِئر اونَ فأدأ بو، اونٚ جأنٚ جَا بیرون بأوٚردٚد. 24 بأزون اونَ تأوٚدأده ایتأ چأه میأن کی آب نأشتی. 25 و خودشأن غذأ خوردنَ سٚر بیگیفتٚد. نأخٚوٚرکی ایتأ شوتورٚ کأروأنَ بیدِده کی جٚه دور اَمؤندره اوشأنٚ ور. اوشأن ایسمأعیلی تأجیرأن بید کی کتیرأ و ادویه جٚه جلعاد بٚردیدی مصر.
26 یوهودأ خو برأرأنَ بوگفته: «اَمی برأرٚ کوشتنٚ جَا و اَ قتلَ جیگأ دٚئن اَمِرِه چی فأیده دأرِه؟ 27 بأیید اونَ اَ ایسمأعیلی تأجیرأنَ بوفروشیم. هرچی نٚبه اون اَمی برأر ایسٚه؛ نوأستی اَمی دٚسٚ اَمرأ بوکوشته بٚبه.» اونٚ برأرأن اونٚ پیشنهأدٚ اَمرأ موأفقت بوکودٚد.
28 او وخت کی تأجیرأن فأرٚسِده، یوسفٚ برأرأن اونَ چأهٚ جَا بیرون بأوٚردٚد، بیست‌تأ نوقره سکه اَمرأ اوشأنَ بوفرؤختد. اوشأنٚم یوسفَ خوشأنٚ اَمرأ بٚبردٚد مصر. 29 رئوبین کی کأروأنٚ اَمؤنٚ وخت اویَه نئیسأبو، او وخت کی بأمؤ چأه سٚر و بیدِه کی یوسف چأه میأن نئیسأ، اوندر کی غورصه دأشتی خو رختَ چأک بٚزِه. 30 بأزون بأمؤ خو برأرأنٚ ورجأ، اوشأنَ بوگفته: «یوسفَ بٚبردٚد! هسأ من چی بوکونٚم؟»
31 پٚس اونٚ برأرأن ایتأ بوزٚ سٚرَ وأوِده یوسفٚ قشنگٚ رختَ وأسِئده بوزٚ خونٚ دورون. 32 بأزون او رختَ کی خونٚ دورون وأسِه بود بٚبردٚد یعقوبٚ ورجأ، بوگفتٚده: «آیا اَن تی پٚسرٚ هو رخت نییٚه؟ اونَ بیأبأنٚ دورون بیأفتیم.»
33 یعقوب اونَ بشنأخته و ایجگره بٚزِه: «هطؤیه، اَن می پٚسرٚ رخت ایسٚه. رأس‌رأسِی ایتأ وأشی جأنور اونَ وأچأرٚده.»
34 او وخت یعقوب خو رختَ چأک بٚزِه، ژندره رخت دوکوده و خٚیلی روجأنٚ رِه خو پٚسرٚ رِه عزأ بیگیفته. 35 تومأمٚ اونٚ خأنوأرٚ آدم نفرأن حقٚ سعی بٚزِده اونَ دیلتسلأیی بٚدد، ولی فأیده نأشتی. اون گفتی: «غورصه اَمرأ شم قبرٚ دورون می پٚسرٚ ورجأ.» اَنَ گفتی و گریه کودی.
36 ولی مدیأنٚ تأجیرأن کی فأرٚسِده مصرٚ میأن، یوسفَ بوفرؤختده فوطیفارَ، کی ایتأ جٚه فرعونٚ افسرأن بو. فوطیفار دربأرٚ نیگهبأنأنٚ رییس بو.
Currently Selected:
پیدأیش ۳۷: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org