پیدأیش ۲۷
۲۷
یعقوب برکتَ جٚه ایسحأق فأگیره
1 ایسحأق پیرَ بوسته و اونٚ چومأن تأرَ بوسته بو. ایتأ روج اون خو پیله پٚسر عیسویَ دؤخأده و اونَ بوگفته: «می جأنٚ پٚسر.» عیسو جوأب بٚدأ: «بله، پِئر جأن.» 2 ایسحأق بوگفته: «من دِه پیرَ بوستم و می زٚندیگی تومأنَ بوستأندره. 3 پٚس تی تیر و کمأنَ اوسأن، بوشو بیأبأن و ایتأ حیوأن مِرِه شیکأر بوکون 4 و جٚه اون، ایتأ غذأ می دیلٚ بأب چأکون کی بوخورٚم و پیشتر جٚه اَنکی بیمیرم تٚرَه برکت بٚدم.»
5 ولی ربکا اوشأنٚ گبأنَ بٚشتأوٚسته. او وخت کی عیسو شیکأرٚ رِه بوشؤ بیأبأن، 6 ربکا، یعقوبَ خو ورجأ دؤخأده، بوگفته: «بٚشتأوٚستم کی تی پِئر عیسویَ اَطؤ گفتی: 7 "ایپچه شیکأرٚ گوشت مِرِه بأوٚر و اونٚ جَا ایتأ غذأ مِرِه بٚپچ کی بوخورٚم. منم پیشتر جٚه می مٚردن خوداوندٚ حوضورٚ میأن تٚرَه برکت دٚهٚم." 8 اَسه اَی می پٚسر، هر چی تٚرَه گم انجأم بٚدٚن. 9 بوشو گلّه ورجأ و دوتأ سٚرحألٚ بوزٚ کوته سیوأ بوکون و بأوٚر می ورجأ کی من جٚه اوشأنٚ گوشت او غذأیَ کی تی پِئر دوس دأره اونٚ رِه چأکونم. 10 بأزون تو اونَ تی پِئرٚ ورجأ بٚبر کی بوخوره و پیشتر جٚه خو مٚردن تٚرَه برکت بٚده.»
11 یعقوب جوأب بٚدأ: «عیسو ایتأ پور مو مردأی ایسٚه، ولی می جأن مو نأرِه. 12 اگه می پِئر مٚرَه دٚس بٚزٚنه و بفأمه کی من عیسو نییٚم، چی؟ بأزون اون فأمه کی من خأستیم اونَ گول بٚزٚنم و برکتٚ عوض، مٚرَه لعنت کونِه!»
13 ربکا بوگفته: «می جأنٚ پٚسر، اونٚ لعنت می رو بٚبه. تو فقد اونچی کی من تٚرَه گم انجأم بٚدٚن. بوشو و بوزٚ کوته‌یأنَ بأوٚر.»
14 یعقوب خو مأرٚ دستورَ ایطأعت بوکوده و بوز کوته‌یأنَ بأوٚرد و ربکا او غذأیَ کی ایسحأق دوس دأشتی چأکود. 15 او وخت عیسو بِیترین رختَ کی خأنه دورون نٚهأ بو یعقوبَ فأدأ کی دوکونه. 16 بأزون بوزٚ کوته پوستَ اونٚ دٚس و گردنٚ رو دٚوٚست 17 و او خوشمزه غذأ کی چأکوده بویَ ایتأ نأنٚ اَمرأ کی بٚپخته بو یعقوبٚ دٚس فأدأ. 18 یعقوب او غذأیَ خو پِئرٚ ورجأ بٚبرده و بوگفته: «می جأنٚ پِئر!» ایسحأق جوأب بٚدأ: «بله، تو کیسی؟»
19 یعقوب بوگفته: «من عیسو تی پیله پٚسر ایسٚم. هوطؤ کی بوگفتی بوشؤم شیکأر و او غذأیَ کی دوس دأری تِرِه بٚپختم. بینیش، اونَ بوخور و مٚرَه برکت بٚدٚن.»
20 ایسحأق وأوٚرسِه: «می جأنٚ پٚسر، چوطؤ بتأنستی اَندر زود ایتأ شیکأر بیأفی؟» یعقوب جوأب بٚدأ: «یهوه، تی خودا اونَ می رأ سٚر بٚنأ.»
21 ایسحأق بوگفته: «نیزدیک بیأ کی تٚرَه دٚس بٚزٚنم و ایطمینأن بیأفٚم کی رأس‌رأسِی عیسو ایسی.»
22 یعقوب بوشؤ خو پِئرٚ ورجأ و اونی پِئر اونٚ دٚسأن و گردن رو دٚس فأکشه و بوگفته: «صدا، یعقوبٚ صدا، ولی دسأن، عیسو دٚسأن ایسٚه!» 23 ایسحأق اونَ نشنأخته، چونکی اونٚ دٚسأن عیسو دٚسأنٚ مأنستَن پور مو بو. پٚس یعقوبَ برکت بٚدأ، 24 وأوٚرسِه: «ینی تو رأس‌رأسِی عیسو ایسی؟» یعقوب جوأب بٚدأ: «دوروسته، پِئر جأن.»
25 ایسحأق بوگفته: «پٚس غذأیَ بأوٚر می ورجأ کی بوخورٚم و اونٚ پٚسی تٚرَه برکت بٚدم.» یعقوب غذأیَ بٚنأ اونٚ ورجأ و ایسحأق اونَ بوخورد و ایتأ شرأبٚم کی یعقوب اونٚ رِه بأوٚرده بو، وأخورد. 26 بأزون بوگفته: «می جأنٚ پٚسر، نیزدیک بیأ و مٚرَه مأچی بٚدٚن.» 27 یعقوب بوشؤ جولو و اونٚ دیمَ مأچی بٚدأ. او وخت کی ایسحأق اونٚ رختأنَ بو بٚکشه اونَ برکت بٚدأ، بوگفته: «می پٚسرٚ بو بیأبأنٚ عطرٚ مأنستَن کی خوداوند اونَ برکت بٚدأبی خوشبو ایسٚه. 28 خودا وأرٚش تی زیمینٚ رو بوأرأنِه کی تی مأصول فرأوأن بٚبه و تی غله و شرأب ایضأفَه به. 29 خٚیلی قومأن تٚرَه بٚندگی بوکونٚد، تی برأرأنٚ رو آقأیی بوکونی و همٚتأ تی فکٚ فأمیلأن تٚرَه تعظیم بوکونٚد. لعنت اوشأنٚ رو کی تٚرَه لعنت بوکونٚد و برکت اوشأنٚ رو کی تٚرَه برکت بٚدد.»
30 اَنٚ پٚسی بو کی ایسحأق یعقوبَ برکت بٚدأ، یعقوب جٚه اوتأق بوشؤ بیرون. هطؤ کی بوشؤ بیرون، عیسو جٚه شیکأر وأگردسته. 31 اونم ایتأ غذأ کی اونٚ پِئر دوس دأشتی، چأکوده و اونٚ رِه بأوٚرد و بوگفته: «هسأ او غذأیَ کی دوس دأری شیکأرٚ گوشتٚ اَمرأ تِرِه بٚپختم و بأوٚردم. ویریز؛ اونَ بوخور و مٚرَه برکت بٚدٚن.»
32 ایسحأق بوگفته: «تو کیسی؟» عیسو جوأب بٚدأ: «من تی پیله پٚسر عیسو ایسٚم.»
33 ایسحأق هطؤ کی جٚه خو پیله غورصه پرکستی بوگفته: «پٚس اونی کی پیشتر جٚه تو مِرِه غذأ بأوٚرد و من اونَ بوخوردم، اونَ برکت بٚدأم کی بو؟ هر کی بو برکتَ خوشین بوکوده.»
34 او وخت کی عیسو خو پِئرٚ گبأنَ بٚشتأوٚسته، ایتأ پورسوج و بولندٚ دأد بٚزِه و بوگفته: «پِئر، مٚرَه برکت بٚدٚن! خأهیش کونٚم می برکتٚم مٚرَه فأدن!»
35 ایسحأق جوأب بٚدأ: «تی برأر بأمؤ اَیَه، مٚرَه گول بٚزِه و تی برکتَ فأگیفت.»
36 عیسو بوگفته: «بودونٚ عیلّت نییٚه کی اونَ نأمَ یعقوب بٚنأده، چونکی دو مرتوه مٚرَه گول بٚزِه. اوّل می اوّلی زأکی حقَ فأگیفت و هسأیٚم می برکتَ. اَی پِئر، ینی حتّا ایتأ برکتٚم مِرِه کنأر نٚنأیی؟»
37 ایسحأق عیسویَ جوأب بٚدأ: «من اونَ تی آقأ چأکودم و اونٚ همٚتأ فکٚ فأمیلأنَ اونی غولأمأن بوکودم. غله و شرأبٚ مأصولم اونَ فأدأم. دِه هیچی بأقی نمأنسته کی تٚرَه فأدم.»
38 عیسو بوگفته: «ینی فقد هه برکتَ دأشتی؟ اَی پِئر، مٚرَه برکت بٚده!» و زأر زأر گریه بوکود.
39 ایسحأق بوگفته: «وأرٚش تی زیمینٚ رو نوأره و زیأد مأصول نأری. 40 تی شٚمشیر اَمرأ زٚندیگی کونی و تی برأرَ غولأم بی، ولی آخرپٚسی تٚرَه جٚه اونٚ اسیری بیرون اَوٚری و آزأدَ بی.»
یعقوب جیویزه لابانٚ ورجأ
41 عیسو جٚه یعقوب خو دیلٚ میأن کینه اوسأده، چونکی اونٚ پِئر اونَ برکت بٚدأ بو. اون خو اَمرأ بوگفته: «می پِئر اَندر زمأت نیبه کی میره؛ او وخت یعقوبَ کوشٚم.» 42 ولی ربکا جٚه نقشه‌یٚ خو پیله پٚسر عیسو وأخٚوٚرَ بوسته، پٚس خو کوجه پٚسرٚ یعقوبٚ دونبأل اوسه کوده و اونَ بوگفته کی عیسو اونٚ جأنٚ قصدَ دأرِه.
43 ربکا یعقوبَ بوگفته: «ایتأ کأر کی وأستی بوکونی اَن ایسٚه: جیویز تی دأیی لابانٚ ورجأ حرأنٚ میأن. 44 چن وخت اونٚ ورجأ بِئیس کی تی برأرٚ غیظ بینیشینه. 45 و او کأر کی اونی اَمرأ بوکودی جٚه خأطرَ ده؛ بأزون تِرِه پیغأم اوسه کونٚم کی وأگردی. چٚره شومأن هر دوتأنَ ایتأ روجٚ میأن جٚه دٚس بٚدم؟»
46 بأزون ربکا بوشؤ ایسحأقٚ ورجأ اونَ بوگفته: «عیسو حیتّی زنأکأنٚ دٚس جَا می جأن بٚلب بأمؤ. حأضیر ایسٚم بیمیرم و نیدینٚم کی می پٚسر یعقوب ایتأ حیتّی کؤرَ اَمرأ عروسی بوکونه.»
Currently Selected:
پیدأیش ۲۷: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org