پیدأیش ۲۴
۲۴
ایسحأق و ربکا
1 هسأ ایبرأهیم ایتأ پیرٚ مردأی بو و خوداوند اونَ همه جوره برکت بٚدأ بو. 2 ایتأ روج ایبرأهیم خو خیدمتگوزأرَ کی اونی غولأمأنٚ رییس بو، بوگفته: «تی دٚسَ می پأ رأن جیر بٚنه 3 و خوداوندَ، آسمأن و زیمینٚ خودایَ قسم بوخور کی ولأنی می پٚسر ایتأ جٚه اَیَه کنعانٚ دؤخترأنٚ اَمرأ عروسی بوکونه. 4 پٚس بوشو اویَه کی من بودونیأ بأمؤم می فکٚ فأمیل ورجأ و اویَه ایسحأقٚ رِه ایتأ زن اینتخأب بوکون.»
5 او خأدیم وأوٚرسه: «اگه هیتأ جٚه اَ دؤخترأن نخأستٚد خوشأنٚ وطنَ بٚند، و بأیٚد اَ ولأیتٚ میأن، او زمأت چی بِه؟ اوطؤیی ینی ایسحأقَ بٚبرم اویَه؟»
6 ایبرأهیم جوأبٚ بٚدأ و بوگفته: «نه، اَطؤ نوأکودن! 7 خوداوند، آسمأنٚ خودا، مٚرَه بٚفرمأسته کی می ولأیت و می پِئرٚ خأنه‌یَ بٚنم و بٚشٚم و وعده بٚدأ کی اَ سرزیمینٚ مألکیتَ مٚرَه و می زأکأنَ بٚخشِه. پٚس خوداوند خودش خو فٚرٚشته‌یَ پیشتر اوسِه کونِه و هطؤ جورَ کونِه کی اویَه ایتأ زن می پٚسر ایسحأقٚ رِه بیأفی و تی اَمرأ بأوٚری. 8 ولی اگه او دؤختر نخأسته کی تی اَمرأ بأیٚه، اَ قسم دِه تی گردن نٚنأ. ولی نوأستی اصلن می پٚسرَ بٚبری اویَه.»
9 پٚس خأدیم خو دٚسَ خو آقأ ایبرأهیمٚ رأنٚ جیر بٚنأ و قسم بوخورده کی اونٚ فرمأنٚ موطأبق کأر بوکونه.
10 اون ده‌تأ شوتورٚ اَمرأ جٚه ایبرأهیمٚ شوتورأن و ایپچه پیشکش جٚه اونٚ مأل و مینأل بوشؤ بین‌النهرینٚ شومألٚ ور، او شهر کی ناحور اونٚ دورون زٚندیگی کودی. 11 او وخت کی فأرٚسه اویَه، شوتورأنَ ایتأ چأه آبٚ ورجأ کی بیرون جٚه شهر نٚهأ بو بوخوسأنِه. غروب دٚمٚ کی زنأکأن آب فأکشئنٚ رِه چأه سٚر اَمؤییدی، 12 اون اَطؤ دوعأ بوکوده: «اَی خوداوند، می آقأ ایبرأهیمٚ خودا، ایلتمأس کونٚم می آقأ رِه لوطف بوکونی، مٚرَه یاور بٚدی کی اونٚ خأسته‌یَ بٚجأ بأوٚرم. 13 هسأ من اَ چأه ورجأ ایسأم و شهرٚ دؤخترأن آب بٚردنٚ رِه اَیٚده. 14 من ایتأ جٚه اوشأنَ گم کی: "تی کوزه‌یَ بیجیر بأوٚر کی آب وأخورم" اگه او کؤر بٚگه: "وأخور و من تی شوتورأنٚم جٚه آب سِئرَ کونٚم،" او وخت دأنٚم کی اون هو کؤر ایسٚه کی تو ایسحأقٚ رِه اینتخأب بوکودی و می آقأیَ تی لوطف جیر بٚدأشتی.»
15 هطؤ کی خأدیم هنو خوداوندٚ عیبأدت کودأندوبو، ایتأ قشنگٚ کؤر ربکا نأم بأمؤ کی ایتأ کوزه خو کؤلٚ رو دأشتی. اون بتوئیلٚ دؤختر، بتوئیل مِلکه پٚسر بو و مِلکه ناحور، ایبرأهیمٚ برأرٚ زن بو. 16 ربکا ایتأ قشنگٚ کؤر بو کی اونٚ عروسی زمأت فأرٚسه بو و هیتأ مردأی اونٚ اَمرأ همخأب نوبوسته بو. اون بوشؤ بیجیرٚ چشمه و خو کوزه‌یَ پورَ کوده و بأمؤ بوجؤر. 17 خأدیم بودؤوٚسته اونٚ ورجأ و جٚه اون آب بٚخأسته. 18 دؤختره بوگفته: «می آقأ، وأخور!» و دفأتن خو کوزه‌یَ بیجیر بأوٚرده و اون وأخورده. 19 هنم بوگفته: «تی شوتورأنَ جٚه آب سِئرَ کونٚم.» 20 او وخت آبَ آبشخؤرٚ میأن دوکود و ایوأردِه بودؤوٚسته چأه ور و تومأمٚ شوتورأنٚ رِه آب فأکشه. 21 خأدیم اونٚ رو خو چومَ بودؤخته، هیچی نوگفتی کی بیدینه خوداوند اونَ اَ سٚفرٚ میأن پیروز چأکونِه یا نه.
22 جٚه اَنٚ پٚسی کی ربکا شوتورأنَ آبٚ جَا سِئرَ کوده، خأدیم ایتأ حلقه جٚه طلأ کی نیم میثقأل اونٚ وزن بو و ایتأ جوفت النگو جٚه طلأ کی دٚه میثقأل وزن دأشتی اونَ فأدأ، بوگفته: 23 «مٚرَه بوگو کی دؤختر ایسی؟ ینی تی پِئرٚ خأنه میأن ایتأ جأجیگأ اَمِرِه نٚهأ کی شب اویَه بِئیسیم؟»
24 اون جوأبٚ بٚدأ و بوگفته: «من ناحور و مِلکه نوه و بتوئیلٚ دؤختر ایسٚم. 25 دوروسته، اَمأن شِمِره و شیمی شوتورأنٚ رِه جأ و غذأ اوندر کخ وٚست بٚبه دأریم.»
26 او وخت او مردأی، خوداوندَ سوجده بوکوده، بوگفته: 27 «اَی خوداوند، می آقأ ایبرأهیمَ خودا، تی جَا تشکور کونٚم کی اونی رِه اَمین و مهرٚوأن بی و مٚرَه اَ سٚفرٚ میأن هیدأیت بوکودی، می آقأ فکٚ فأمیلٚ ورجأ بأوٚردی.»
28 پٚس او دؤختر توندأتوند بوشؤ، خو خأنه آدم نفرأنَ خٚوٚر بٚدأ. 29 ربکا ایتأ برأر دأشتی کی اونی نأم لابان بو. اون توندأتوند بودؤوٚسته بیرون کی او مردأکَ کی چأه سٚر ایسأ بویَ بیدینه، 30 چونکی حلقه و النگویأنَ خو خأخورٚ دٚسٚ میأن بیدِه بو و او مردأکٚ گبأنَ جٚه خو خأخور بٚشتأوٚسته بو. پٚس دفأتن بوشؤ چأه سٚر و بیدِه او مردأی هنو خو شوتورأنٚ ورجأ ایسأ. 31 لابان اونَ بوگفته: «اَی کی خوداوندٚ برکت تی رو نٚهأ، چٚره اَیَه ایسأیی؟ بیأ اَمی خأنه. اَمأن تِرِه و تی شوتورأنٚ رِه جأجیگأ آمأدَه کودیم.»
32 پٚس او مردأی لابانٚ اَمرأ بوشؤ بٚخأنه و لابان شوتورأنٚ بأرَ وأکود، اوشأنَ کأه و کولوش فأدأ. بأزون ایبرأهیمٚ خأدیم و اونی آدم نفرأنٚ رِه آب بأوٚرد کی خوشأنٚ پأیَ بوشؤرٚد. 33 او وخت کی غذأیَ بأوٚردٚد، ایبرأهیمٚ خأدیم بوگفته: «تأ می قصدَ جٚه اَیَه اَمؤن نٚگم غذأیَ لب نٚزٚنم.»
لابان بوگفته: «خٚیله خُب، بوگو.»
34 اون بوگفته: «من ایبرأهیمٚ خأدیم ایسٚم. 35 خوداوند اونَ خٚیلی برکت بٚدأ و اون ایتأ پیله مردأی و نأمدأرٚ آدم ایسٚه. خوداوند اونَ فرأوأن گلّه‌یأن و رمه‌یأن، طلأ و نوقره، فرأوأن غولأمأن و کنیزأن، شوتورأن و اولأغأنٚ فأدأ.
36 «سارا می آقأ زن او وخت کی پیر بو ایتأ پٚسر بٚزأ و می آقأ تومأمٚ خو مأل و مینألَ خو پٚسرَ بٚبخشه. 37 می آقأ مٚرَه قسم بٚدأ کی جٚه کنعانٚ دؤخترأن خو پٚسرٚ رِه زن فأنگیرم، 38 بلکی اَیَه اونٚ پِئری قوم و قبیله ورجأ بأیٚم، ایتأ زن اونٚ رِه اینتخأب بوکونٚم.
39 «من می آقأیَ بوگفتم: "بلکی نتأنم ایتأ کؤر بیأفٚم کی حأضیر بٚبه بأیٚه اَیَه؟" 40 اون مٚرَه بوگفته: "او خوداوند کی اونٚ جَا ایطأعت کونٚم، خو فٚرٚشته‌یَ تی اَمرأ اوسِه کونِه کی اَ سٚفرٚ میأن موفق بیبی و ایتأ دؤختر جٚه می پِئری قوم و قبیله بیأفی. 41 تی وظیفه‌یٚ کی بیشی اویَه، وأوٚرس وُورس بوکونی. اگه اوشأن جٚه اوسه کودنٚ خوشأنٚ دؤختر دٚس بٚدأشتٚد، اگه اوشأن خوشأنٚ دؤختر اوسه نوکودٚد او وخت او قسمٚ کی بوخوردی تی گردن نٚنأ."
42 «ایمرو کی فأرٚسِئم چأه سٚر اَطؤ دوعأ بوکودم: "اَی خوداوند، می آقأ ایبرأهیمَ خودا، ایلتمأس کونٚم کی مٚرَه اَ سٚفرٚ میأن موفق چأکونی. 43 هسأ اَ چأه ورجأ ایسٚم و ایتأ جٚه اَ کؤرأنَ کی شهرٚ جَا آب بٚردنٚ رِه اَیٚده گم: «جٚه تی اَ کوزه ایپچه آب مٚرَه فأدٚه کی وأخورم.» 44 اگه او کؤر جوأب بٚده: «وأخور و من تی شوتورأنٚم جٚه آب سِئرَ کونٚم»، او وخت دأنٚم کی اون هو دؤختر ایسٚه کی تو می آقأ پٚسر، ایسحأقٚ رِه اینتخأب بوکودی."
45 «هنو می دوعأ تومأنَ نوبوسته بو کی بیدِم ربکا ایتأ کوزه اَمرأ خو کؤلٚ رو فأرٚسه و بوشؤ چأه سٚر، آب فأکشه و کوزه‌یَ جٚه آب پورَ کوده. اونَ بوگفتم: "ایپچه آب مٚرَه فأدن کی وأخورم." 46 اون خٚیلی توندأتوند کوزه‌یَ بیجیر بأوٚرده کی وأخورم و بوگفته: "تی شوتورأنٚم جٚه آب سِئرَ کونٚم" و هطؤیم بوکوده.
47 «او وخت اونٚ جَا وأوٚرسِم: "تو کی دؤختر ایسی؟"
«اون مٚرَه بوگفته: "بتوئیلٚ دؤختر، ناحور و مِلکه نوه ایسٚم."
«منم حلقه‌یَ اونٚ دومأغٚ میأن و النگویأنَ اونٚ دٚس تأوٚدأم. 48 بأزون سوجده بوکودم، خوداوند، می آقأ ایبرأهیمٚ خودایَ پرستٚش بوکودم، چونکی مٚرَه رأستٚ رأ ور هیدأیت بوکوده کی ایتأ دؤختر جٚه می آقأ برأرٚ خأنوأر اونٚ پٚسرٚ رِه بیأفٚم. 49 هسأ مٚرَه جوأب بٚدید؛ ینی اَجور لوطف می آقأ رِه کونیدی و اونچی دوروست ایسٚه انجأم دیهیدی؟ مٚرَه جوأب بٚدید کی می تکلیفَ بٚدأنم.»
50 لابان و بتوئیل اونَ بوگفتٚده: «خوداوند تٚرَه اَیَه هیدأیت بوکوده، پٚس اَمأن چی تأنیم بیگیم؟ 51 هسأ ربکایَ اوسأن و بوشو تأ اوطؤ کی خوداوند ایرأده بوکوده، تی آقأ، پٚسرٚ زن بٚبه.»
52 هطؤ کی اَ گبَ ایبرأهیمٚ خأدیم بٚشتأوٚسته، خوداوندٚ حوضورٚ دورون خأکٚ رو بٚکفته و اونَ سوجده بوکود. 53 بأزون رخت و طلأ و نوقره و جوأهیرأن ربکایَ فأدأ و گیرأنٚ پیشکشأنٚم اونٚ مأر و برأرأنَ پیشکش بوکود. 54 جٚه اونٚ پٚسی اون و اونی آدم نفرأن شأم بوخوردٚد و شبَ بتوئیلٚ خأنه میأن بِئیسأده. ایبرأهیمٚ خأدیم صُب دٚم ویریشته، اوشأنَ بوگفته: «هسأ وئألید بیشیم.»
55 ولی ربکا مأر و برأر بوگفتٚده: «ربکا وأستی دٚسٚ کم دٚه روج دِه اَمی ورجأ بِئیسه و اونٚ پٚسی بٚشه.»
56 ولی اون بوگفته: «خأهیش کونٚم مٚرَه معطلَ نوکونید. خوداوند مٚرَه اَ سٚفرٚ میأن موفق بوکوده. وئألید بٚشٚم و اَ خورومٚ خٚوٚرَ می آقأیَ فأرٚسأنم.»
57 اَشأن بوگفتٚده: «خٚیله خُب. اَمأن جٚه دؤختر وأوٚرسیم کی بیدینیم اونٚ نظر چیسه.» 58 پٚس ربکایَ دؤخأدٚد اونٚ جَا وأوٚرسِئده: «خأیی اَ مردأکٚ اَمرأ بیشی؟» اون جوأب بٚدأ: «بله، شم.»
59 او وخت اونٚ اَمرأ خوداحافظی بوکودٚد، اونٚ دأیه‌یَ اونٚ اَمرأ اوسه کودٚد. 60 شؤئؤنٚ وخت، ربکایَ برکت بٚدأد، اَطؤ بوگفتٚده: «خأخور، اومید دأریم کی خٚیلی زأکأنٚ مأر بیبی! اومید دأریم تی نتأج تومأمٚ تی دوشمنأن رو بأش بٚبد.»
61 پٚس ربکا و اونٚ کنیزأن شوتورأنٚ رو سوأرَ بوستد و ایبرأهیمٚ خأدیمٚ اَمرأ بوشؤده.
62 هو وخت ایسحأق کی نِگِبٚ سرزیمینٚ دورون زٚندیگی کودی، وأگردسته بو بئرلحی رُئی ور. 63 ایتأ روج غروب دٚم او وخت کی بیأبأنٚ میأن رأ شؤئؤندوبو و فیکر کودی، خو سٚرَ بوجؤر بأوٚرده، بیدِه کی هسأ شوتورأن اَمؤندرٚده. 64 ربکا ایسحأقَ کی بیدِه توندأتوند شوتورٚ جَا بیجیر بأمؤ 65 و خأدیمٚ جَا وأوٚرسه: «او مردأی کی بیأبأنٚ جَا اَمی پیشوأز اَیِه کیسه؟» اون جوأب بٚدأ: «ایسحأق، می آقأ پٚسر ایسٚه.» اَ گبٚ ایشتأوٚستٚنٚ اَمرأ، ربکا خو روبنده اَمرأ خو دیمَ بوپوشأنِه.
66 او وخت خأدیم تومأمٚ خو سفرٚ مأجیرأیَ ایسحأقٚ رِه بوگفته. 67 ایسحأق ربکایَ بأوٚرده خو مأر، ینی سارا چأدرٚ دورون، اونٚ اَمرأ عروسی بوکوده، اونَ دیل دٚوٚسته و خو مأرٚ مٚردنٚ غورصه جَا تسلی بیأفته.
Currently Selected:
پیدأیش ۲۴: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org