پیدأیش ۲۲
۲۲
ایبرأهیمٚ ایمأنٚ ایمتحأن
1 ایتأ مودت بوگذشته و خودا بٚخأسته کی ایبرأهیمٚ ایمأنَ ایمتحأن بوکونه. پٚس اونَ دؤخأده: «اَی ایبرأهیم» ایبرأهیم جوأب بٚدأ: «بله، اَی خوداوند!»
2 خودا بٚفرمأسته: «تی پٚسر، تی ایتأ پٚسر کی خٚیلی اونَ دوس دأری ینی ایسحأقَ اوسأن، بوشو موریا سرزیمینٚ میأن و اویَه اونَ ایتأ جٚه کوهأنٚ جؤر کی تٚرَه نیشأن دٚهٚم ایتأ سوجأنِئنی پیشکشٚ مأنستَن، قوربأنی بوکون!»
3 ایبرأهیم صُبٚ زوترِی ویریشته و ایپچه هیمه قوربأنی آتشٚ رِه جمَ کوده، خو اولأغَ پألأن بوکوده و خو پٚسر ایسحأق و دوتأ جٚه خو غولأمأنَ اوسأده، بوشؤ او جیگأ ور کی خودا اونَ بٚفرمأسته بو. 4 سه روجٚ رأ شؤئؤنٚ پٚسی، ایبرأهیم او جأیَ جٚه دور بیدِه. 5 پٚس خو غولأمأنَ بوگفته: «شومأن اَیَه اولأغأنٚ ورجأ بِئیسید کی من و می پٚسر بیشیم او جأجیگأ میأن، عیبأدت بوکونیم و شیمی ورجأ وأگردیم.»
6 ایبرأهیم او همیه‌یَ کی سوجأنِئنی قوربأنی وأسی بأوٚرده بو، ایسحأقٚ کؤلٚ سٚر بٚنأ و خودش چأقو و آتش روشن کودنٚ افزأرَ اوسأده و کس‌کسٚ اَمرأ بوشؤده.
7 ایسحأق وأوٚرسِه: «پِئر، اَمأن هیمه و آتش اَمی اَمرأ دأریم، ولی قوربأنی بٚرّه کویَه نٚهأ؟»
8 ایبرأهیم اونی جوأبٚ رِه بوگفته: «می جأنٚ پٚسر، خودا قوربأنی بٚرّه‌یَ فرأهم کونه.» و هر دوتأن خوشأنٚ رأیَ بیگیفتٚده بوشؤده.
9 او وخت کی او جأجیگأیَ کی خودا ایبرأهیمَ بٚفرمأسته بو فأرٚسِئده، ایبرأهیم ایتأ مذبح بٚپأ بوکوده، هیمه‌یَ بٚنأ اونٚ سٚر و ایسحأقَ دٚوٚسته و اونَ هیمه رو بٚنأ. 10 بأزون اون چأقویَ بوجؤر بٚبرده کی ایسحأقَ قوربأنی بوکونه. 11 هو دٚمٚ میأن، خوداوندٚ فٚرٚشته جٚه آسمأن ایبرأهیمَ دؤخأده بوگفته: «ایبرأهیم! ایبرأهیم!» اون جوأب بٚدأ: «بله اَی خوداوند!»
12 فٚرٚشته بوگفته: «چأقویَ زیمینٚ سٚر بٚنه و تی پٚسرَ ضرر نوأزِئن. هسأ بفأمٚستٚم کی تو خٚیلی خوداترس ایسی، چونکی تی ایتأدأنه پٚسرَ جٚه اون دریغ نوکودی.»
13 بأزون ایبرأهیم ایتأ قوچَ بیدِه کی اونٚ شأخأن ایتأ گومأرٚ میأن گیر بوکوده. پٚس بوشؤ قوچَ بیگیفته و اونَ خو پٚسرٚ عوض سوجأنِئنی پیشکشٚ مأنستَن قوربأنی بوکوده. 14 ایبرأهیم او جأجیگأیَ «یهوه یرا» (ینی «خوداوند فرأهم کونِه») نأم بٚنأ کی تأ ایمرو هه نأمٚ اَمرأ معروف ایسٚه.
15 ایوأردِه خوداوندٚ فٚرٚشته جٚه آسمأن ایبرأهیمَ دؤخأده، اونَ بوگفته: 16 «خوداوند فرمأیه: می ذأتَ قسم بوخوردم چونکی می جَا ایطأعت بوکودی و حتّا تی ایتأ پٚسرَ خأستی مِرِه فأدی 17 حتم کی تٚرَه برکت دٚهٚم و تی نتأجَ آسمأنٚ ستأره‌یأن و دریأ فورشأنٚ مأنستَن زیأدَ کونٚم. اوشأن خوشأنٚ دوشمنأنٚ رو پیروز بٚده، 18 دونیأ همٚتأ قومأنٚ برکتَ بأعیث بٚده، چونکی تو می جَا ایطأعت بوکودی.» 19 پٚس اَشأن وأگردستٚده غولأمأنٚ ورجأ، رأ دکفتٚده خوشأنٚ خأنه ور بئرشبعٚ میأن.
ناحورٚ نتأج
20 اَ مأجیرأ پٚسی، ایبرأهیمَ خٚوٚر فأرٚسه کی مِلْکَه ناحورٚ زن ایبرأهیمٚ برأر، هشت‌تأ پٚسر بودونیأ بأوٚرده. 21 اوشأنٚ نأمأن اَطؤیی بو: پیله پٚسر عوص و اونٚ پٚسی بوز، قموئیل (ارامیأنٚ پیله‌بابا)، 22 کاسد، حزو، فلداش، یدلاف و بتوئیل. 23 (بتوئیل ربکا پِئر بو). جغرز اَ هشت‌تأ پٚسر کی جٚه مِلْکَه بودونیأ بأمؤ بود، 24 هطؤیم ناحور جٚه خو کنیز کی اونٚ نأم رئومه بو، چأرتأ دِه زأی دأشتی اوشأنٚ نأمأن طابح، جاحم، تاحش و معکه بو.
Currently Selected:
پیدأیش ۲۲: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org