خروج ۱۸
۱۸
یترون اَیِه موسا دِئنٚ رِه
1 یترون، موسا زن پِئر و مدیانٚ کأهین بٚشتأوٚسته کی خودا موسا و ایسرأییلٚ مردومٚ رِه چی کأر بوکوده و موهیم اَنکی خودا چوطؤ اوشأنَ مصرٚ جَا جیویزأنه. 2 پیشتر جٚه اَن، موسا خو زنأی صفوره‌یَ خو دوتأ پٚسرٚ اَمرأ اوسه کوده بو یترونٚ ورجأ. 3موسا اوّلی پٚسر جرشوم نأم دأشتی چونکی اونی بودونیأ اَمؤنٚ زمأت، موسا بوگفته بو: «من بیگأنه سرزیمینٚ میأن، غریب ایسٚم.» 4 اونی دویُمی پٚسر اِلعازار نأم دأشتی، چونکی اونی بودونیأ اَمؤنٚ زمأت، موسا بوگفته بو: «می پِئرٚ خودا می یاور بو و مٚرَه فرعونٚ شمشیرٚ جَا نیجأت بٚدأ.»
5 پٚس یترون، موسا زن پِئر موسا دِئنٚ رِه بأمؤ صأرأیی میأن. اون موسا زن و پٚسرأنم بأوٚرده خو اَمرأ. اَ زمأتٚ میأن موسا و مردوم خودا کوهٚ ورجأ چأدر بٚزِه بود. 6 یترون موسا رِه پیغأم اوسه کوده بو کی: «من، یترون، تی زن پِئر تی زنأکٚ اَمرأ و تی دوتأ پٚسرٚ اَمرأ اَیٚم کی تٚرَه بیدینیم.» 7 پٚس موسا بوشؤ یترونٚ پیشوأز، اونَ تعظیم بوکوده و اونی دیمَ مأچی بٚدأ. حأل وأوٚرسِئنٚ پٚسی، اوشأن بوشؤده موسا چأدرٚ میأن 8 و موسا خو زن پِئرٚ رِه وأگویا بوکوده کی خوداوند بنی‌ایسرأییلٚ آزأدَ کودنٚ رِه چی بلأیأنی فرعون و مصریأنٚ سٚر بأوٚرده و اَ سفرٚ میأن چی سختی‌یَ تحمول بوکودٚد کی فأرٚسِده اویَه و خوداوند چوطؤ خو مردومَ خطرأن و سختی‌یأنٚ جَا نیجأت بٚدأ. 9 یترون خوداوندٚ محبت وأسی بنی‌ایسرأییلٚ رِه و اوشأنٚ مصرٚ جَا آزأدَ بوستنٚ وأسی خوشألَ بوسته 10 و بوگفته: «موتٚوأرک بٚبه خوداوند کی خو مردومَ فرعون و مصریأنٚ دٚسٚ جَا نیجأت بٚدأ. 11 اَسه دأنٚم کی خوداوند جٚه تومأمٚ خودایأن پیله‌تر ایسٚه، چونکی اون خو مردومَ او مصریأنٚ دٚسٚ جَا نیجأت بٚدأ کی خوشأنَ گولأز کونٚده و رحم نأرٚده.»
12 یترون سوجأنِئنی قوربأنی و البأقی قوربأنیأنَ خودا رِه پیشکش بوکوده، و هارون و ایسرأییلٚ مردومٚ تومأمٚ ریش‌سیفیدأن بأمؤده اونی دِئنٚ رِه و خودا حوضور قوربأنی گوشتٚ خوردنٚ رِه کس‌کسٚ دؤر بینیشتد.
13 فردأیی، موسا مردومٚ شیکأیتأنَ فأرٚس فوروس کودنٚ وأسی خو جیگأ سٚر بینیشته و مردوم جٚه صُب تأ آفتأبٚ بیجیر شؤئؤنٚ زمأت اونی حوضور بِئیسأده.
14 یترون کی بیدِه مردومٚ شیکأیتأنَ فأرٚس فوروس کودن، چندر وخت گیره، موسایَ بوگفته: «چٚره اَ کأرَ تنأ انجأم دِئندری؟ چٚره تومأمٚ روج مردومَ بٚپأ دأری؟»
15 موسا جوأب بٚدأ: «من اَ کأرَ وأستی بوکونٚم، چونکی مردوم خوشأنٚ موشکلأنٚ حل کودنٚ وأسی اَیٚده می ورجأ کی خودا گبَ بدأند. 16 دو نفرٚ میأن کی ایختلأف پیش دکفه، اَیٚده می ورجأ و من فأمٚم کی کویتأ حق دأره و خودا شریعت و دستورأنَ اوشأنَ آموجم.»
17 موسا زن پِئر بوگفته: «اَ کأر تی شین دوروست نییٚه. 18 تو اَ کأرٚ اَمرأ، تٚرَه جٚه پأ تأوٚدی و مردومٚم خستَه کونی. تو اَ پیله کأرَ تنأ انجأم دٚئن نتأنی. 19 می گبَ بٚشتأو و می اَندرزَ قوبیل بوکون و خودا تٚرَه برکت دِهه. تو خودا حوضورٚ میأن اَ مردومٚ اوسه کوده کس بوبو و اَشأنٚ سؤال و موشکیلأنَ اونَ بوگو. 20 تو وأستی خودا قأنونأن و شریعتَ اوشأنَ بأموجی و بیگی کی چوطؤ زٚندیگی بوکوند و چی کردٚکأر بٚدأرٚد. 21 هطؤیم تومأمٚ مردومٚ جَا چنتأ مردأکأنَ اینتخأب بوکون کی خودا جَا بٚترسٚد و دوروستکأر بٚبد و رشوه فأگیفتنٚ جَا تنفر بٚدأرٚد کی هیزأر نفره، صد نفره، پنجأ نفره و ده نفره دسته‌یأنٚ میأن دأور و رهبر بٚبد. 22 اوشأن وأستی همیشٚک آمأده بٚبد کی مردومٚ کوجه سوألأنَ فأرٚسٚد ولی پیله سوألأنَ بأوٚرد تی ورجأ. وئأل کوجه سوألأنَ رهبرأن خوشأنٚ رِه حل بوکوند. اَطؤیی اوشأن تی بأرَ سوبوکترَ کونٚده. 23 اگه اَ رأیَ پیش بیگیری و خودا خأستم هطؤ بٚبه، بأزون خستَه نیبی و مردومٚم هوطؤ کی اَشأن ایختلأف حل بوبوسته، رأضی وأگردٚده خوشأنٚ خأنه‌یأنٚ میأن.»
24 موسا خو زن پِئرٚ اَندرزَ قوبیل بوکوده و اونی پیشنهأدَ انجأم بٚدأ. 25 اون چنتأ مردأکأنَ اوسأده کی کأرَ دأنستید و جٚه اوشأنٚ میأن چنتأ قأضی هر هیزأر نفر، صد نفر، پنجأ نفر و ده نفر رِه اینتخأب بوکود. 26 اوشأن قیضأوت کودنَ دأل بٚدأل موشغول بود و کوجه ایختلأفأن و موشکیلأنَ فأرٚسِییدی، ولی سخت و پیله سوألأنَ حل کودنٚ وأسی اَمؤیید موسا ورجأ.
27 چن روجٚ پٚسی، موسا خو زن پِئرَ اوسه کوده و اون وأگردسته خو سرزیمینٚ میأن.
Currently Selected:
خروج ۱۸: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org