ሶፎናሳ 2

ናጋራ ፓጹሳ

(2:1-3)

1ህንተኖ፥ ዬላይ ባይና አሳቶ፥ አነ እትፐ ሺቅተ፤ 2ጫርኩ ፑኒደ አፍያ ሱላዳን ቤናን ደኢደ፥ ያሽያ መና ጎዳ ሀንቁ ህንተ ቦላ ዎናን ደእሽን፥ መና ጎዳ ሀንቁዋ ሱሉዋ ጋላሳይካ ህንተ ቦላን ጋከናን ደእሽን፥ መና ጎዳኮ ስምተ። 3ህንተኖ፥ ጋድያን ደእያ አሽከቶነ አ አዛዙዋ ኦያ ኡባ ገደ፥ መና ጎዳ ኮይተ፤ ጽሎተ ኮይተ፤ ቃይ አሽከተካ ኮይተ። ያቶፐ፥ ኦን ኤሪ፥ መና ጎዳ ሀንቁዋ ጋላስ ህንተና ቆሲደ አሻነንቶነ።

እስራኤልያ ዩሹዋን ደእያ ካዉተቱዋ ኩንደ

(2:4-15)

4ጋዛ ካታማይ ኦናና፤ አስቃሎና ካታማይካ መላ ግዳናዋ፤ አሽዶዳ ካታማ አሳይ ሴታ ጋላስ ጎደታና፤ ኤቅሮና ካታማይካ ቆለታናዋ።#ኢሳ. 14:29-31፤ ኤር. 47:1-7፤ ህዝ. 25:15-17፤ ኢዩ. 3:4-8፤ አሞጻ 1:6-8፤ ዛካ. 9:5-7 5ህንተኖ፥ አባ ዶናን ደእያ ፕልስጼማ አሳቶ፥ ህንተንቶ አየ አና! ኔኖ፥ ፕልስጼማቱ ደእያ ካናነ ቢታዉ፥ መና ጎዳ ፕርዳይ ነ ቦላን ዬ። ታን ኔና ይሳና፤ ኔናን እት አሳይነ አተና። 6አባ ዶናን ደእያ ህንተ ቢታይ መህያ ሄምያ ሳ፥ ሄንንቻቱ ደኢያሳነ መህያ ዉድያ ባሉዋ ግዳናዋ። 7አባ ዶናይ ይሁዳ አሳፐ አቴዳዋንቶ ላታ ግዳናዋ፤ ሄዋን ኡንቱንቱ ሄመታና። ሳአይ ቃምያ ዎደ ኡንቱንቱ አስቃሎና ካታማን ደእያ ጎለቱዋን አቃና፤ አያዉ ጎፐ፥ መና ጎዳይ ኡንቱንቱ ጾሳይ ኡንቱንቱዋ ቆፓና፤ እ ኡንቱንታ ዛሪደ እሻልሳና።

8ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ “ታን ሞኣባ አሳ ቅሊጩዋነ አሞና አሳ ቦርያ ስሳድ። ኡንቱንቱ ታ አሳ ቅሊጬድኖ፤ ኡንቱንቱ ቢታ ቦላንካ ኦቶረቴድኖ።#ኢሳ. 15:1—16:14፤ 25:10-12፤ ኤር. 48:1—49:6፤ ህዝ. 21:28-32፤ 25:1-11፤ አሞጻ 1:13-15 9ሄዋ ድራዉ፥ ታ ደኡዋ ሱንን ጫቃይ፥ ሞኣበ ሶዶማዳን ሀናና፤ አሞና አሳይካ ጋሞራ አሳዳን ሀናና። ኡንቱንቱ መናዉ ማጽንያ ቦክያ ኦላነ አጉንይ ማዬዳ ባዙዋ ግዳናዋ። ታ አሳፐ አቴዳዋንቱ ኡንቱንቱ ዱሬታ ቦንቃናዋንታ፤ ኡንቱንቱ ቢታካ ላታናዋንታ” ያጌ።#ዶመ 19:24

10አሞናነ ሞኣበ አሳይ ኡባፐ ዎልቃማ መና ጎዳ አሳ ቦላ ቅሊጪድነ ኦቶረቲደ ሃሳዬዳ ድራዉ፥ ኡንቱንቱ ቦላ ሀ መቱ ጋካናዋ። 11መና ጎዳይ ኡንቱንቱን ያየቴዳዋ ግዳናዋ፤ ቢታን ደእያ ጾሳቱዋ ኡባ እ ይሳና፤ ቃይ ሳኣን ደእያ ካዉተቱዋን ደእያ አሳይ ኡባይ ባረ ደእያ ሳን ደእያ ሳን አዉ ጎይናና።

12ህንተኖ፥ ቶጵያ አሳቶ፥ ህንተካ ታ ማሻን ሀይቃና።#ኢሳ. 18:1-7

13መና ጎዳይ ባረ ኩሽያ ሁጲሳ ባጋ ዛሪደ የዳና፤ አሶረ ቢታ ይሳና። ቃይ ናናዌ ካታማካ መላ ባዙዋዳን፥ መላ ሳኣ ኦና።#ኢሳ. 10:5-34፤ 14:24-27፤ ናህ. 1:1—3:19 14ዉዲነ ዶአቱ ኡባይ አ ግዶን አላጻና፤ ጉቱነ ቁጻርሳይ አ ኮለቴዳ ግምበቱዋ ግዶን ደአና፤ ኡንቱንቱ ኮሻይ ማስኮትያናነ ፐንግያና ስሰታና። ጎለቱ ኬጸቴዳ ዝጋይ ካሎታና። 15ሀ ካታማይ፥ “ታና! ታፐ አትና፥ ሀራይ ባዋ” ያጊደ ኦቶረቲደ ደኤዳዋ፤ ሽን እ ሀእ ዶአቱ ጌሱ መላ ሳኣ ግዴዳ። አ ምይያና አያ ኡባይ ዳሮፐ ማላለቲደ፥ ባረንቱ ኩሽያ ጾርሲደ፥ “ባርቼ!” ጋና።

Currently Selected:

ሶፎናሳ 2: DFBE

Highlight

Copy

Compare