ዛካራሳ 2

ዛካራስ ሳጻን ልክያ ዎዶሩዋ በኤዳ

1ቃይካ ሀራ ሳጻን ባረ ኩሽያን ልክያ ዎዶሩዋ ኦይቄዳ እት ብታንያ በኣድ። 2ታን፥ “ኔን ሀቃ ባይ?” ያጋደ አ ኦቻድ።

እ፥ “ታን የሩሳላመ ጎምፓይነ ጌሳይ አይ ኬሸንቶ በአናዉ፥ ልካናዉ ባይ” ያጌዳ።

3ሄዋፐ ጉይያን፥ ታናና ሃሳይያ ኪታንቻይ ከሲደ ቤዳ፤ ቃይ አናና ጋከታናዉ ሀራ ኪታንቻይካ ዬዳ። 4አ ሀዋዳን ያጌዳ፤ “ዎጻ፤ ባደ ሄ ያላጋ ብታንያ፥ መና ጎዳይ ሀዋዳን ያጌ፤ ‘አሳነ መህያ ዳሮተፐ ደንዴዳዋን የሩሳላመ ካታማ ዩሹ ድርሳ ግምቢ ባይና ካታማዳን ደአና። 5ታን አ ዩሹዋን ታማ ድርሳ ግዳና፤ ታን አ ግዶን ቦንቹዋ ግዳና ያጌ’ ያጋ” ያጌዳ መና ጎዳይ።

መና ጎዳይ ባረ አሳ ባረንቱ ቢታ ስማናዳን ጼሴዳ

6መና ጎዳይ ባረ አሳ ሀዋዳን ያጌ፤ “ታን ህንተና ኡባ ሳን ላላድ። ሽን ሀእ ሁጲሳ ባጋ ጋድያፐ ባቃቲደ ክችተ!” ያጌ መና ጎዳይ።

7ቃይካ ጾሳይ፥ “ኔኖ፥ ጽዮኔ፥ ባብሎነ ማጫ ናናቱዋና ደእያነ ከሳ አካደ ሃያ!” ያጌ። 8አያዉ ጎፐ፥ ኡባፐ ዎልቃማ መና ጎዳይ ባረ ቦንቹዋ ቆንጭሳና ማላ፥ ባረ አሳ ቦንቄዳ ካዉተቱዋኮ ታና ኪቲደ፥ ሀዋዳን ያጌዳ፤ “ህንተና ቦችያዌ ታ አይፍያ ቡሉዋ ቦቼ። 9በእተ፥ ታን ታ ኩሽያ ኡንቱንቱ ቦላን ደንና፤ ቃይ ኡንቱንቱካ ካሰ ባረንቱ ቆማቱዋን ኦሞደታና” ያጌዳ።

ሄ ዎደ ህንተ ኡባፐ ዎልቃማ መና ጎዳይ ታና ኪቴዳዋ ኤራና።

10መና ጎዳይ ሀዋዳን ያጌ፤ “ጽዮነ አሳዉ፥ የጽተነ ናሸትተ! አያዉ ጎፐ፥ ታን ያደ ህንተ ግዶን ደአና” ያጌ።

11ሄ ዎደ ዳሮ አይሁዳ ግደና ካዉተቱ መና ጎዳና ጋከቲደ፥ አ አሳ ግዳና፤ እካ ኡንቱንቱ ግዶን ደአና። ቃይ ህንተካ ኡባፐ ዎልቃማ መና ጎዳይ ታና ህንተኮ ኪቴዳዋ ሄ ዎደ ኤራና። 12ጌሻ ቢታን መና ጎዳይ ይሁዳ ባረና ጋኬዳ ግሹዋ ኦደ ላታና፤ የሩሳላመካ እ ዛረደ ዶራና።

13መና ጎዳይ ባረ ደእያ ጌሻ ሳኣን ደንዴዳ፤ ሄዋ ድራዉ፥ አሹዋ ማዬዳ ኡባይ አ ስንን ጮኡ ጎ!

Currently Selected:

ዛካራሳ 2: DFBE

Highlight

Copy

Compare