ዛካራሳ 14

የሩሳላሞነ ካዉተቱዋ

1በእተ፥ መና ጎዳ ጋላሳይ ዬ፤ ሄ ዎደ ህንተፐ ቦንቄዳዋ ህንተ ጼልሽን፥ ኡንቱንቱ ሻክ አካና። 2ጾሳይ ካዉተቱዋ ኡባ የሩሳላመ ቦላን ኦላዉ ሺሻና፤ ካታማይ ኦይቀታና፤ ጎለቱካ ቦንቀታናዋ፤ ማጫ አሳናካ አሳይ ዎልቃን ጋከታና። ካታማ አሳፐ ባጋይ ኦሞደቲደ ባና፤ ሽን አቴዳ አሳይ ካታማፐ ከሰና። 3ሄዋፐ ጉይያን መና ጎዳይ ከሲደ፥ ካሰካ ኦላ ጋላስ ኦለትያዋዳን፥ ሄ ካዉተቱዋና ኦለታና። 4ሄ ጋላስ አ ገደቱ የሩሳላመፐ አዋይ ዉልያ ባጋና ደእያ ዳብረ ዛይተ ደርያ ቦላ ኤቃና። ዳብረ ዛይተ ደሪካ አዋይ ዉልያ ባጋፐ አዋይ ዶልያ ባጋ ጋካናዉ፥ ላኡ ከሲደ ጳልቀታና፤ ሎይ አኮ ዎምባይ መታና፤ ያቶፐ ደርያዉ ባጋይ ሁጲሳ ባጋ፥ ቃይ ባጋይካ ገድሳ ባጋ ሸርእ ጋና። 5ሄ ዎምባይ ቢደ አጼላ ጋካና፤ ህንተ ሄ ዎምባና አደ ባቃታና። በን ይሁዳ ካትያ ኦዝያና ላይ ቢታይ ቃጽና፥ ህንተ ማይዛ አዎቱ ባቃቴዳዋዳን፥ ህንተካ ባቃታና። ሄዋፐ ጉይያን፥ መና ጎዳይ ታ ጾሳይ ያና፤ ቃይ ጌሻቱ ኡባይካ አናና እትፐ ያና።

6ሄ ጋላስ ሜጉ፥ ሻቻይነ ማይ ደኤና፤ 7ሄ ጋላሳይ ቃምነ ጋላስ ባይና፥ መና ጎዳይ ኤርያ ዱማ ጋላሳ ግዳናዋ፤ ሄ ጋላስ ቃማይካ ፖኦ ግዳናዋ።

8ሄ ጋላስ ደኡዋ ሃይ የሩሳላመፐ ጎጋና፤ አፐ ባጋይ ማጽንያ አባን ገላና፤ ቃይ ባጋይ ሜድተራነ አባን ገላና። ሄ ሃይ ባልጉዋን ቦንያን ጎጊደ ደአና።#ህዝ. 47:1፤ ዮሃ. 7:38፤ ሳፃ 22:1 9ቃይ መና ጎዳይ ሳኣ ኡባ ቦላ ካተታና፤ ሄ ጋላስ እት መና ጎዳ ጻላላይ ደአና፤ አ ሱንይካ መጽ እቱዋ ግዳናዋ።

10ገባአፐ ዶሚደ፥ የሩሳላመፐ ገድሳ ባጋና ደእያ ርሞና ግያ ካታማ ጋካናዉ ደእያ ቢታይ ኡባይ ደምባታና። ሽን የሩሳላመ ቢንያማ ፐንግያፐ ቢደ፥ በን ፐንግያ ባጋና ዞዝያ ፐንግያ ጋካናዉነ፥ ቃይ ሀናንኤላ አዱሳ ግምቢያፐ ቢደ፥ ካትያ ዎይንያ ጉምኢያሳ ጋካናዉ፥ ባረ ሳኣን ቁ ጊደ ደአና። 11የሩሳላመ፥ አሳይ ደኢያሳ ግዳና፤ ሄዋፐ ጉይያን እዛ ዩኩ፤ እዝን ደእያ አሳይካ ህርግ ባይናን ሳሮ ደአና።#ሳፃ 22:3

12መና ጎዳይ የሩሳላመና ኦለቴዳ አሳ ኡባ ሾጫና ቦሻይ ሀዋ: ኡንቱንቱ ኤቁዋን ደእሽን፥ ኡንቱንቱ አሹ ዎቃና፤ ኡንቱንቱ አይፊ ጮጭያን፥ ኡንቱንቱ እንጻርሳይካ ኡንቱንቱ ኮክያን ዎቃና። 13ሄ ጋላስ መና ጎዳይ ኡንቱንቱ ዎልቃማ ዳጋማ ዳጋንና፤ አሳይ ኡባይ እቱ እቱዋ ኩሽያ ኦይቂደ፥ እቱ እቱዋና ኦለታና። 14ይሁዳ አሳይ የሩሳላመ ባጋ ግዲደ ኦለታና። ቃይ ዩሹዋን ደእያ ካዉተቱዋ ኡባቱዋ አቁዋ፥ ዎርቃ፥ ብራነ ማዩዋ ፓይዱ ባይናዋ ኦሞዲደ ሺሻና። 15ሀ ቦሻ ማላ ቦሻይ ፓራቱዋ ቦላ፥ ባቁሎቱዋ ቦላ፥ ጋሎቱዋ ቦላ፥ ሀረቱዋ ቦላነ ሞርከቱ ዱንካኔዳሳን ደእያ መህያ ኡባ ቦላ ያና።

16ሄዋፐ ጉይያን፥ የሩሳላመና ኦለቴዳ ካዉተቱዋ ኡባፐ ፓጻ አቴዳ ኡባይ ካትያዉ፥ ኡባፐ ዎልቃማ መና ጎዳዉ ጎይናናዉነ ዳስያ ባኣላ ቦንቻናዉ ላይን ላይን የሩሳላመ ባና።#ዎጋ 23:39-43 17ቃይ ሀ ሳኣን ደእያ አሳፐ ኦንነ ካትያዉ፥ ኡባፐ ዎልቃማ መና ጎዳዉ ጎይናናዉ የሩሳላመ ቤናን ዮፐ፥ ሄ አሳዉ እራይ ቡከና። 18ግብጼ ቢታ አሳይካ ቢደ ጎይነናን እጾፐ እራይ ቡከና፥ ዳስያ ባላ ቦንቻናዉ ቤናን እጽያ አሳ መና ጎዳይ ሾጭያ ቦሻይ ኡንቱንቱ ቦላንካ ያና። 19ዳስያ ባላ ቦንቻናዉ ቤናን እጽያ ግብጼነ ሀራ ካዉተቱ ኡባይ ሙረታና ሙሩ ሀዋ ግዳናዋ።

20ሄ ጋላስ ፓራቱዋ ቆያን አያ ዳላቱዋ ቦላንካ፥ “መና ጎዳዉ ጌዬዳዋ” ጌተቲደ ጻፈታና። መና ጎዳ ጌሻ ጎልያን ደእያ ካያ ኦቶቱካ ያርሽያ ሳኣ ስንን ደእያ ጌሻ ከረቱዋ ማላ ግዳናዋ። 21የሩሳላመንነ ይሁዳን ደእያ ኦቶ ኡባይ ኡባፐ ዎልቃማ መና ጎዳዉ ጌሻ ግዳናዋ፤ ያቶፐ ያርሹዋ ያርሽያ አሳይ ኡባይ ዪደ፥ ሄ ኦቶቱዋ አኪደ፥ ያርሹዋ አሹዋ ኡንቱንቱን ካና። ሄ ጋላስ ኡባፐ ዎልቃማ መና ጎዳ ጌሻ ጎልያ ግዶን አይ ዛልአንቻይነ ደኤና።

Currently Selected:

ዛካራሳ 14: DFBE

Highlight

Copy

Compare