ሮመ 15

አሳ ናሸቻናዉ በስያ ኦግያ

1ኑን አማኑዋን ምኔዳዋንቱ ዳቡራንቻቱዋ ቶኩዋ ቶካናዉ በሴ፤ ኑን ኑ ጻላላ ናሸቻናዉ በሰና። 2ኑን ሁጲያን ሁጲያን ኑ እሻ ማዳናዉ፥ አማኑዋን አ ምንሳናዉነ ናሸቻናዉ በሴ። 3አያዉ ጎፐ፥ ሀራይ አቶ ክርስቶስካ ባረና ናሸችቤና። ሽን ጾሳ ማጻፋይ፥ “ኔና ቦሬዳዋንቱ ቦሬዳ ቦሪ ታ ቦላ ዎዳ” ጌዳዋዳን ሀኔዳ።#ማዝ. 69:9 4ጾሳ ማጻፋይ ኑዉ እምያ ገንጫንነ ምኖታን ኑን ደማና ጊደ ናሸቻን ናግ ኡቴዳዌ ደአና ማላ፥ ጾሳ ማጻፋን ጻፈቴዳ ኡባባይ ኑና ታማርሳናዉ ጻፈቴዳ።

5-6ህንተንቱ ኡባይ እት ዎዛና ግዲደ፥ እት ቃላን ጾሳ፥ ኑ ጎዳ የሱስ ክርስቶሳ አዉዋ፥ ቦንቻና ማላ፥ ገንጩዋነ ምኖተ እምያ ጾሳይ፥ ህንተንቶ ክርስቶስ የሱስ ኦዳዋዳን፥ እቱ እቱዋና እትፐ ደእያ እት ቆፋ እሞ።

ጳዉሎሳ ኦሱዋነ አማነና አሳዉ ጋኬዳ ምሽራቹዋ ቃላ

7ሄዋ ድራዉ፥ ክርስቶስ ህንተንታ ሞኬዳዋዳን፥ ጾሳ ቦንቾ እቱ እቱዋ ሞክተ። 8-9አያዉ ጎፐ፥ ጾሳይ አማነቴዳዋ ግድያዋ ኤርሳናዉ፥ ጾሳይ አዋቶ እማና ጌዳዋ ቱማያናዉነ አይሁዳ ግደና አሳይ ጾሳ አ ማሮተ ድራዉ ቦንቻናዉ ክርስቶስ አይሁዳቶ ቆማ ግዴዳዋ ህንተንቶ ኦዳይ። ሄዋ ጾሳ ማጻፋይ፥

“ሄዋ ድራዉ፥ ታን ኔና፥

አይሁዳ ግደና አሳ ግዶን ጋላታና፤

ነ ሱንካ ሳባና”

ያጌ።#2 ሳሜላ 22:50፤ ማዝ. 18:49

10ቃይካ፥

“አይሁዳ ግደና አሳቶ፥

ጾሳ አሳቱዋና ናሸትተ”

ያጌ።#ዛረ. 32:43

11ቃይካ ጉጂደ፥

“ህንተንቶ፥ አይሁዳ ግደና አሳቶ ኡባቶ፥

ጎዳ ጋላትተ፤ አሳዉ ኡባዉ፥ አ ጋላትተ”

ያጌ።#ማዝ. 117:1

12ቃይካ እስያስ፥

“እሰይ ዘረይ ዪደ፥

አይሁዳ ግደና አሳ ሞዳናዉ ደንዳና።

ቃይ ኡንቱንቱ አ ባጋና ደማና ጊደ፥

ናሸቻን ናጋና”

ያጌ።#ኢሳ. 11:10

13ህንተንቱ አካና ጊደ ናሸቻን ናግያዌ ጌሻ አያና ዎልቃን ድጫናዳን፥ ህንተንቶ እማና ጌዳ ጾሳይ፥ ህንተ አ አማንያ ድራዉ፥ ህንተንቶ ናሸቻነ ሳሮተ ኩንደ እሞ።

ጳዉሎስ ጻሊደ ጻፌዳ ጋሱዋ

14ታናዳን አማንያዋንቶ፥ ህንተንቱን ሎኦተይነ ኤራተይ ኡባይ ኩሜዳዋነ ቃይ እቱ እቱዋ ዞራናዉ ዳንዳይያዋ ታን ታ ሁጰዉ ኤራድ። 15-16ሽን ታን ህንተንታ እትባ እትባ ጉጃ ቆፍሳናዉ፥ ሀ ዳብዳቢያ ግዶን አይነ ያየናን ህንተንቶ ጻፋድ። ታን ክርስቶሳ የሱሳ ቆማ ግዳደ፥ አይሁዳ ግደና አሳዉ ኦናዳን፥ ጾሳይ ታዉ አ ኬካተ እሜዳ ድራዉ፥ ታን አይነ ያያበይከ፤ አይሁዳ ግደና አሳይ ጌሻ አያና ባጋና ጾሳዉ ጌሻ ግዲደ፥ አ ናሸችያ ያርሹዋ ግዳናዳን፥ ጾሳ ዎንጋላ ምሽራቹዋ ኦድያዋን ጌሻተን ኦይ።

17ሄዋ ድራዉ፥ ታን ክርስቶሳ የሱሳን ግዳደ ጾሳዉ ኦያባን ጬቀታናዉ ዳንዳያይ። 18-19አይሁዳ ግደና አሳይ ጾሳዉ አዛዘታናዳን፥ ክርስቶስ ታ ባጋና ቃላን፥ ኦሱዋን፥ ማላን፥ ማላታ ዎልቃንነ ጌሻ አያና ዎልቃን ኦዳዋ ጻላላ ታን ኦዳናፐ አትን፥ ሀራባ ኦዳናዉ ጻልከ። ሄዋ ድራዉ፥ የሩሳላመፐ ዶማደ፥ እልዋርቆና ጌተትያ ጋድያ ጋካናዉ ዩያደ፥ ክርስቶሳ ዎንጋላ ምሽራቹዋ ዉርሳ ኦዳድ። 20ሀዋዳንካ፥ ታን ሀራ አሳይ ዶሜዳዋ ቦላን ዶመናዳን፥ ክርስቶሳ ሱንይ ጼሰትቤናሳን ዎንጋላ ምሽራቹዋ ኦዳናዉ አሞታድ። 21ሽን ጾሳ ማጻፋይ፥

“አባይ ሀዋ ጋካናዉ ኦደትቤናዋንቱ አ በአናዋንታ፤

ቃይ አባ ስስቤናዋንቱ አኬካናዋንታ”

ያጌ።#ኢሳ. 52:15

ጳዉሎስ ሮመ ባናዉ ቆፔዳ

22ሄዋ ድራዉ፥ ታን ጮራ ዎደ ህንተንቱኮ ያናዉ ኮያይ፤ ሽን ያናዉ ዳንዳያበይከ። 23ሽን ታን ሀእ ሀ ሄራን ታ ኦሱዋ ዉርሴዳ ድራዉነ ጮራ ላይፐ ዶማደ ህንተንታ ባደ በአናዉ ላሞቴዳ ድራዉ 24ሀእካ ህንተንቱኮ ባና ጋደ ቆፓይ፤ ታን እስፔነ ጌተትያ ጋድያ ባደ ህንተንታ በአናዉ ኮያይ፤ ቃይ አማሬዳ ዎድያ ህንተንታ በኣደ ናሸቶዋፐ ጉይያን፥ እስፔነ ቢሽን፥ ህንተ ታና ማዳና ማላ ኮያይ።

25ሽን ሀእ ታን ጾሳ አሳቱዋ ማዳናዉ፥ የሩሳላመባይ። 26አያዉ ጎፐ፥ ማቅዶንያነ አካይያ ጌተትያ ጋድያን ደእያ ዎሳ ጎለ አሳቱ የሩሳላመን ደእያ ህዬሳቶ ሚሻ እማናዉ ኮዬድኖ። 27ኡንቱንቱ ባረንቱ ሁጰዉ ሀዋ ኦናዉ ቆፋ ቃቼድኖ። ኡንቱንቱ ሄ ህዬሳቱዋ ማዳናዌ ኡንቱንቶ አጩ ደኤ፤ አያዉ ጎፐ፥ አይሁዳቱ ባረንቱ አያና አንጁዋ አይሁዳ ግደና አሳቱዋና ሻኬዳዋ ግዶፐ፥ አይሁዳ ግደና አሳቱካ ቃይ ባረንቶ ደኤዳባን አይሁዳቱዋ ማዳናዉ በሴ። 28ሄዋ ድራዉ፥ ታን ሀ ኦሱዋ ዉርሴዳዋፐ ጉይያንነ ኡንቱንቶ ሺቄዳ ሚሻ ኡባ እሜዳዋፐ ጉይያን፥ እስፔነ ባደ ህንተ ማታና አና። 29ታን ህንተንቱኮ ብያ ዎደ፥ ክርስቶሳ አንጁ ታናን ኩምና ባናዋ ኤራይ።

30ታናዳን አማንያዋንቶ፥ ታዉ ጾሳ ህንተ ዎሲደ፥ ዎሳን ህንተ ታናና ምናናዳን፥ ጎዳ የሱስ ክርስቶሳ ባጋናነ ጌሻ አያናይ እምያ ሲቆተን ታን ህንተንታ ዎሳይ። 31ታን ይሁዳን ደእያ አማነናዋንቱፐ አታናዳንነ ቃይ ታን የሩሳላመን ኦያ ኦሱ ያን ደእያ ጾሳ አሳቱዋ ናሸችያዋ ግዳናዳን፥ ጾሳ ዎስተ። 32ቃይ ጾሳይ ጎፐ፥ ታን ህንተንቱኮ ናሸቻን ባደ፥ ህንተ ማታን ሸምፓና። 33ሳሮተ ጾሳይ ህንተንቱና ኡባና ግዶ። አመንእ።

Currently Selected:

ሮመ 15: DFBE

Highlight

Compare

Copy