ፓይዱዋ 18

ቄሳቱዋነ ሌዋቱዋ ኦሱዋ

1መና ጎዳይ አሮና፥ “ኔን፥ ነ አቱማ ናናቱነ ሌዋቱ ጌሻ ሳኣ ኦሱዋን ፖለትያ ናጋራ ቶካና፤ ኔንነ ነ አቱማ ናናቱ ጻላላይ ህንተ ቄሰተ ኦሱዋን ፖለትያ ናጋራ ቶካና። 2ኔንነ ነ አቱማ ናናይ ማርካተ ዱንካንያ ስንን ኦያ ዎደ፥ ኔናና ግዲደ ማዳና ማላ፥ ሌዊያ ዛረ ግድያ ነ ዳቦቱዋ አሀ። 3ኡንቱንቱ ህንተፐ ጋርሳና ዱንካንያ ኦሶ ኡባ ኦኖ፤ ሽን ኡንቱንቱካ ህንተካ እትፐ ሀይቀናዳን፥ ኡንቱንቱ ጌሻ ሳኣ ሚሻኮነ ያርሽያ ሳኮ ሺቆፕኖ። 4ኡንቱንቱ ህንተናና እትፐ ግድኖ፤ ጋከትያ ዱንካንያን ደእያ ኦሶ ኡባ ኦኖ። ሌዋቱዋፐ አትና፥ ሀራ ኡራይ ኦንነ ህንተኮ ሺቆፖ። 5ላኤንዋ እስራኤላቱዋ ቦላ ሀንቁ ዎና ማላ፥ ጌሻ ሳኣነ ያርሽያ ሳኣ ኦሱዋ ኦተ። 6ሌዋቱዋ ህንተ ዳቦቱዋ እስራኤላቱዋ ግዶፐ ታን ታ ሁጲያዉ ዶራድ። ኡንቱንቱ ጋከትያ ዱንካንያ ኦሱዋ ኦናዉ ህንተንቶ እሙዋዳን እማደ፥ መና ጎዳዉ ዱማያድ። 7ሽን ኔንነ ነ አቱማ ናናቱ ጻላላይ ያርሽያ ሳኣ ኦሱዋ ኡባነ ጋርዱዋ ግዶን ደእያ ቄሰተ ኦሶ ኡባ ኦተ። ቄሰተ ኦሱዋ ታን ህንተንቶ እሙዋዳን ኦደ እማይ፤ ሀራ ኡራይ ኦንነ ጌሻ ሳኣኮ ሺቅያዌ ሀይቆ” ያጌዳ።

ቄሳቱዋ ግሹዋ

8ሄዋፐ ጉይያን መና ጎዳይ አሮና፥ “እስራኤላቱ ታዉ እምያ ጌሻ እሞታ ኡባ ታን ነዉ እማድ። ታን ነዉ ነ ድራውነ ነ አቱማ ናናዉ ኡንቱንቱ ድራዉ መናዉ ግሻ ኦደ እማድ። 9ታዉ እምያ አዳ ጌሻ እሙዋፐ ታማን ጹገተና ባጋይ ህንተሳ ግዳናዋ: ኡንቱንቱ ታዉ እምያ ጌሻ እሙዋ ኡባፐ ካ ያርሹ፥ ዎይ ናጋራ ድራዉ ያርሽያ ያርሹ፥ ዎይ ናቁዋ ድራዉ ያርሽያ ያርሹ ኔሳነ ነ አቱማ ናናቱዋሳ ግዳናዋ። 10ህንተ ሄዋ ጌሻ ሳኣን ሚተ፤ አቱማዌ ኡባይ ሄዋ ሞ፤ ሄዌ ህንተዉ ጌሻ ግዳናዋ።

11“ሀዌ ቃይ ኔሳ። እስራኤላቱዋ ቃ ያርሹዋ ኡባ ነዉ፥ ነ አቱማ ናናቶነ ነ ማጫ ናናዉ መናዉ ግሻ ኦደ እማይ፤ ህንተ ጎልያ አሳ ግዶን ዎጋዳን ጌሻ ግድያ ኡባይ ሄዋ ሞ።

12“ኡንቱንቱ ታዉ እምያ ኮይሮ አይፍያፐ ሎኦ ዎጋራ ዛይትያ ኡባ፥ ያላጋ ዎይንያ ኤሳ ኡባነ ሙሩታ ካ ኡባ መና ጎዳዉ እማይ። 13ኡንቱንቱ መና ጎዳዉ አህያ ኡንቱንቱ ጋድያን ደእያ ኮይሮ ጋኬዳ አይፊ ህንተሳ፤ ህንተ ጎልያ አሳ ግዶን ዎጋዳን ጌሻ ግድያ ኡባይ ሄዋ ሞ።

14“እስራኤልያን መና ጎዳዉ ዱማቴዳባይ ኡባይ ህንተሳ።#ዎጋ 27:28 15ባይራ የለቴዳ አሳይ ዎይ መሂ፥ እስራኤላቱ መና ጎዳዉ እሜዳዌ ህንተሳ። ሽን ባይራ የለቴዳ አሳነ ባይራ የለቴዳ ጌሻ ግደና መህያ ህንተ ዎዛናዉ በሰ። 16እት አግና ናናቱዋ ዎዛናዉ ዱንካንያን ኤርቲያ ሚዛንያ (20 ጌራ) ልክያን እቼሹ ጻጋራ ብራ ዎዞ ጋትያ ቃንጽተ። 17ሽን ሚዛ ባይራ፥ ዎይ ዶርሳ ባይራ፥ ዎይ ዴሻ ባይራ ህንተ ዎዛናዉ ኮሸና፤ ኡንቱንቱ ጌሻ። ኔን ኡንቱንቱ ሱ ያርሽያ ሳኣ ቦላን ጫጫፋ፤ መና ጎዳ ቶሹኩ ጊደ ሳዋና ማላ፥ ኡንቱንቱ ሞዋ ታማን ጹጋ። 18ኡንቱንቱፐ ቤትያ አሹ ዉጻኬዳ አንጎሱዋዳንነ ኡሸቻ ገድያዳን ህንተሳ። 19እስራኤላቱ መና ጎዳዉ እምያ ጌሻ ያርሹዋ ኡባ ነዉ፥ ነ አቱማ ናናቶነ ነ ማጫ ናናቶ መናዉ ግሻ ኦደ እማይ። ሀዌካ መና ጎዳይ ኔናናነ ነ ዘረቱዋና ጫቀትያ ማጽንያ ጫቁዋ” ያጌዳ።

20ቃይካ መና ጎዳይ አሮና፥ “ኡንቱንቱ ጋድያን ኔን አይነ ላታካ፤ ኡንቱንቱ ግዶን ኔና ጋክያ ሻኩ አያይካ ባዋ፤ እስራኤላቱዋ ግዶን ነ ላታይነ ኔና ጋክያ ሻኩ ታና” ያጌዳ።

ሌዋቱዋ ጋክያ ግሹዋ

21ጾሳይ፥ “ሌዋቱ ጋከትያ ዱንካንያን ኦያ ኦሱዋ ድራዉ፥ እስራኤላቱዋ አስራታ ኡባ ኡንቱንቶ እማድ።#ዎጋ 27:30-33፤ ዛረ. 14:22-29 22ሀቼፐ ዶሚደ፥ እስራኤልያ አሳቱ ባረንቱ ናጋራን ሀይቀና ማላ፥ ጋከትያ ዱንካንያኮ ሺቆፕኖ። 23ጋከትያ ዱንካንያ ኦሱዋ ኦያዋንቱነ ሄዋን ፖለትያ ናጋራ ቶክያዋንቱ ሌዋቱዋ። ሀዌ የለታ ኡባዉ መና ዎጋ። ሌዋቱ እስራኤልያ አሳ ግዱዋን አይነ ላትክኖ። 24ሄዋ ድራዉ፥ እስራኤላቱ መና ጎዳዉ እሙዋዳን እምያ አስራታ፥ ታን ሌዋቶ ኡንቱንታ ላታዳን እማድ። ታን ኡንቱንቱባ፥ ‘ኡንቱንቱ እስራኤልያ አሳ ግዱዋን አይነ ላትክኖ’ ያጌዳዌ ሄዋሳ” ያጌዳ።

25ቃይ መና ጎዳይ ሙሳ፥ 26“ኔን ሌዋቱዋ ሀዋዳን ያጋ፤ ‘ታን ህንተንቶ ላታዳን እሜዳ አስራታ ህንተ እስራኤልያ አሳፐ አክያ ዎደ፥ ህንተ ሄ አስራታፐ አስራታ መና ጎዳዉ እምተ። 27ህንተ እሙ ህንተንቶ ካ ቡክያ ኡዱማ ካዳንነ ጉምእያ ዎይንያ አይፍያዳን ፓይደቴ። 28ቃይ ሀዋዳን እስራኤልያ አሳፐ ህንተ አክያ አስራታ ኡባፐ እሙዋ መና ጎዳዉ እምተ፤ ሀ አስራታፐ መና ጎዳ ድራዉ ቄስያ አሮናዉ ህንተ እማናዉ በሰ። 29ህንተ አክያ እሞታ ኡባፐ፥ ሎእያዋነ ጌሻ መና ጎዳዉ ግሹዋ ኦደ፥ ህንተ እማናዉ በሴ’ ያጋ።

30“ቃይ ኔን ሌዋቱዋ፥ ‘ኡባፐ ሎኦ እሙዋ ህንተ እሜዳዋፐ ጉይያን፥ አቴዳዌ ህንተንቶ ካ ቡክያ ኡዱማ ካዳንነ ጉምእያ ዎይንያ አይፍያዳን ፓይደታና። 31ህንተነ ህንተ ጎልያ አሳይ ሄዋፐ አቴዳዋ ሀቃንነ ሚተ፤ አያዉ ጎፐ፥ ሄዌ ጋከትያ ዱንካንያን ህንተ ኦያ ኦሶ ህንተ ድርጉዋ። 32ሎኦ ባጋ ጾሳዉ እም ድጌዳዋፐ ጉይያን ህንተ ምያ ዎደ፥ ባይዛንቻ ግድክታ። ሽን ሎኦ ባጋ ሄ እሞታፐ ከሰናን ደኢደ፥ ህንተ እስራኤልያ አሳ እሞታ ቱንሰናዳን ናገትተ። ሄዋዳን ኦና ዮፐ፥ ህንተ ሀይቃና’ ያጋ” ያጌዳ።

Currently Selected:

ፓይዱዋ 18: DFBE

Highlight

Copy

Compare