ማርቆሳ ምሽራቹዋ 7

የሱስ አሳ ዎጋፐ ኮሸናዋ ጳልቄዳ

(ማቶሳ 15:1-9)

1ፓርሳዋቱነ የሩሳላመፐ ዪደ፥ ሙሴ ህግያ ታማርስያ አማሬዳ አሳቱ የሱሳኮ ሺቄድኖ። 2የሱሳ ካልያዋንቱፐ እቱ እቱ ቱና ኩሽያን፥ ሄዋ ግያዌ ሜጨተናን ቁማ ምያዋንታ#7:2 ሜጨተናን ቁማ ምያዋንታ፦ አይሁደ አሳቱዋ ዎጋን ሜጨተና ኩሽያን ቁማ ሙሳይ ቱናዳን ፓይደቴ። ሄዎ ቁማ ማናፐ ካሰና ኩሽያ ሜቻ ሎይ ምንሲኖ። በኤድኖ።

3አያዉ ጎፐ፥ ፓርሳዋቱነ አይሁዳ አሳይ ኡባይ ባረንቱ አዎቱዋ ዎጋ ናጊደ፥ ባረንቱ ኩሽያ ሎይ ሜጨተናን ሚክኖ። 4ቃይ ገያፐ ዪደካ ሜጨተናን ደኢደ ሚክኖ። ቃይ ኡንቱንቱ ባረንቱ አዎቱዋፐ አኬዳ ሀራ ጮራ ዎጋይ ደኤ፤ ሄዌካ ዋንጫ፥ ከርያ፥ ብራታፐ መዳ ሚሻነ አርሳ ሜጭያ ዎጋ።

5ፓርሳዋቱነ ሙሴ ህግያ ታማርስያዋንቱ የሱሳ፥ “ኔና ካልያዋንቱ አያዉ ኑ አዎቱዋ ዎጋ ካለናን እጺደ፥ ባረንቱ ኩሽያ ሜጨተናን ቁማ ሚኖ?” ያጊደ ኦቼድኖ።

6-7የሱስ ኡንቱንታ ሀዋዳን ያጌዳ፤ “እስያስ ትምቢትያ ኦዴዳ ዎደ፥ ህንተንቱባ፥ ሎአ ማላትያ ኢታቱባ ጻፌዳዋዳንካ፥

“ ‘ጾሳይ፥ “ሀዌ አሳይ ታና፥

ባረ ቦላ ዶናን ቦንቼ።

ሽን ኡንቱንቱ ዎዛናይ ታፐ ሃኩዋን ደኤ፤

አሳይ ታዉ መላ ጎይኔ።

አያዉ ጎፐ፥ አሳይ ኦዳ አዛዙዋ፥

ጾሳ ህግያ ማላትሲደ ታማርሴ” ጌዳ’

ያጊደ ትምቢትያ ቱሙዋ ኦዴዳ።#ኢሳ. 29:13

8“ጾሳ አዛዙዋ ህንተ አጊደ፥ አሳ ዎጋ ምንሲደ ናጊታ” ያጌዳ።

9ቃይካ የሱስ፥ “ህንተንቱ ህንተ ዎጋ ናጋናዉ ጾሳ አዛዙዋ አጊታ። 10አያዉ ጎፐ ሙሴ፥ ‘ነ አባነ ነ ዳዮ ቦንቻ’ ቃይ፥ ‘ባረ አባነ ባረ አቶ ቦርያዌ ሀይቁዋን ሙረቶ’ ያጌዳ።#ከሳ 20:12፤ 21:17፤ ዎጋ 20:9፤ ዛረ. 5:16 11ሽን እት ኡራዉ ባረ አዉዋ ዎይ ባረ አቶ ማድያባይ ደእሽን እ፥ ‘ሀዌ ቁርባንያ፤ ሀዋ ጉሳይ ጾሳባ ግያዋ’ ጎፐ፥ 12እ ባረ አዉዋ ዎይ ባረ አቶ ዎደፐ ማዳናዋ አይነ ኮይክታ። 13ሀ ሀኖታን ህንተ ህንተንቱ ዎጋ ናጋናዉ፥ ጾሳ ቃላ ኮሊደ፥ ሄዋ ማላ ዳሮባ ኦታ” ያጌዳ።

አሳ ቱንስያዋንታ

(ማቶሳ 15:10-20)

14የሱስ ጮራ አሳ ቃይካ ባረኮ ጼሲደ፥ “ኡባይ ታን ግያዋ ስስተነ አኬክተ። 15አሳፐ ከስያዌ አሳ ቱንስያዋፐ አትን፥ ካረፐ አሳ ግዶ ገሊደ፥ አሳ ቱንስያባይ አይነ ባዋ፤ 16ስሳናዉ ሀይይ ደእያ ኡራይ ኦንነ ስሶ” ያጌዳ።

17የሱስ ጮራ አሳ አጊደ ሶይ ገሌዳ ዎደ፥ አ ካልያዋንቱ ሄ ሌምሱዋባ አ ኦቼድኖ። 18እ ኡንቱንታ፥ “ህንተንቶካ ቃይ ገልቤኔ? ካረፐ አሳ ዎዛናን ገልያባይ አይነ አሳ ቱንሳናዉ ዳንዳየናዋ አኬኪቴ? 19አያዉ ጎፐ፥ ቁማይ አሳ ኡሉዋ ግዶ ገሊደ፥ ካረዉ ከስያዋፐ አትን፥ አሳ ዎዛና ግዶ ገለና” ያጌዳ። ሀዋዳንካ የሱስ ቁማ ኡባይ ቱና ግደናዋ ኤርሴዳ።

20ቃይካ የሱስ ሀዋዳን ያጌዳ፤ “አሳ ቱንስያባይ አሳ ዎዛና ግዶፐ ከስያባ። 21አያዉ ጎፐ፥ አሳ ዎዛና ግዶፐ ከስያዌ ኢታ ቆፋ፤ ዎሹምያዋ፤ ዉእያዋ፤ ዎያዋ፤ ጫራተ፤ 22ዮራተ፤ ኡዝያ ዎይ ባረና ዶስያዋ፤ ኢታተ ዎይ ጭምያዋ፤ ገንያ፤ ማጫዋ አሞትያዋ፤ ቃናትያዋ፤ ቦርያዋ ዎይ ዝግርያዋ፤ አዩዋ፤ ኤያተ። 23ሀ ኢታባይ ኡባይ አሳ ዎዛና ግዶፐ ከሲደ፥ አሳ ቱንሴ” ያጌዳ።

እት ግሪከ ምሽራት አማኑዋ

(ማቶሳ 15:21-28)

24የሱስ ሄዋፐ አጊደ፥ ጺሮሳነ ሲዶና ግያ ካታማቱዋ ማታን ደእያ ጋድያ ቢደ፥ እት ጎልያ ገሌዳ፤ ቃይ እ ያን ደእያዋ ኦንነ ኤራናዋ ኮይቤና፤ ሽን ቆሰቲደ ጋምአናዉ ዳንዳይቤና። 25ሽን ባረ ጉ ናት ቦላ ኢታ አያናይ ደእያ እት ምሽራታ የሱሳባ ስሳደ፥ ኤለካ አኮ ያነ አ ገድያን ጉፋና አጋዱ። 26ሄ ምሽራታ አይሁዳ አሳ ግዱኩ፤ አ የለቴዳዌካ ሶርያ ግያ ጋድያና፤ አ ባረ ናትፐ ጻላህያ ከሳና ማላ፥ የሱሳ ዎሳዱ።

27ሽን የሱስ ዛሪደ፥ “ናናይ ካሰቲደ ቁማ ካልኖ፤ አያዉ ጎፐ፥ ናና ቁማ አኪደ፥ ካናቶ#7:27 ካናቶ፦ ሀ ቃላ እት እት አይሁደ አሳይ፥ አይሁደ ግደና አሳቶ ጎኤትያዋ። ኦልያዌ ሎአ ግደና” ያጌዳ።

28ምሽራታ ዛራደ፥ “ቱማካ ታ ጎዳዉ፥ ሀራይ አቶ ሳምፓ ምይያን ደእያ ካናቱካ ናናቱዋፐ አቴዳ ሱፓ ሚኖ” ያጋዱ።

29የሱስ ቃይ እዞ፥ “ሀ ኔን ሃሳዬዳ ቃላ ድራዉ፥ ጻላሂ ነ ናትፐ ከሴዳ፤ ስም ነ ሶይ ባ” ያጌዳ።

30ምሽራታ ባረ ሶይ ብያ ዎደ፥ እዝ ናትፐ ጻላሂ ከስና፥ ሂጻን ግሴዳዉኖ ደማዱ።

የሱስ ቱለነ ዱደ ግዴዳ እት ብታንያ ፓዳ

31የሱስ ጺሮሳ ጋድያፐ ከሲደ፥ ሲዶናናነ ታሙ ካታማ ግያ ጋድያና ካንደ፥ ጋሊላ አባኮ ቤዳ። 32አሳይ ቱለነ ዱደ ግዴዳ ብታንያ የሱሳኮ አሂደ፥ ባረ ኩሽያ አ ቦላን ዎና ማላ፥ የሱሳ ዎሴድኖ። 33የሱስ ባረካ ሄ ብታንያ ጮራ አሳፐ ጋጻ ከሲደ፥ ባረ ብራያ አ ሀይን የዴዳ፤ ቃይ ጩቻ ጩቺደ፥ አ እንጻርሳ ቦቼዳ። 34ሳሉዋ ፑደ ጼሊደ፥ ቶክ ሸምፒደ፥ “ኤፍታህ”#7:34 ኤፍታህ፦ ሀ ቃላይ የሱስ ሀ አላምያን ደኢደ ታማርስያ ዎደ፥ ጎኤትያ አራማይከ ያገትያ ቃላን ሃሳዬዳዋ። ያጌዳ፤ ሄዋ ግያዌ ዶየታ ግያዋ። 35ብታንያ ሀይይ ኤለካ ዶየት አጌዳ፤ ቃይ አ ሃሳየና እንጻርሳይካ ብለት አጌዳ፤ ብታኒ አይነ ዋየተናን ሃሳዪ አጌዳ።

36የሱስ አሳዉ፥ “ሀዋ ኦስነ ኦዶፕተ” ያጊደ ኦዴዳ፤ ሽን እ ዳርስ ምንስ ኦድና፥ አሳይ ቃይ ኦዱዋ ያ ዳርሴዳ። 37ሄዋ ስሴዳ አሳይ ኡባይ ዳሮ ማላለቲደ፥ “ኡባባካ እ ሎይ ኦ። ሀራይ አቶ ቱልያካ ስሴ፤ ቃይ ዱድያካ ሃሳይሴ” ያጌድኖ።

Currently Selected:

ማርቆሳ ምሽራቹዋ 7: DFBE

Highlight

Copy

Compare