ማቶሳ ምሽራቹዋ 6

ህዬሳዉ እምያ ማራ ታማርሱዋ

1“ህንተ ሎኦ ኦሱዋ አሳ በሳናዉ አሳ ስንን ኦና ማላ ናገትተ፤ ሄዌ ዮፐ፥ ሳሉዋን ደእያ ህንተ አዉ ህንተዉ ጋትያ እመና።

2“ሄዋ ድራዉ፥ ህንተ አዉደነ ህዬሳዉ እምያ ዎደ፥ ሎአ ማላትያ ኢታቱ ባረንታ ቦንችሳናዉ፥ አይሁዳ ዎሳ ጎለንነ ኦግያን ሀራን በኤታናዉ ኦያዋዳን ኦፕተ፤ ታን ህንተዉ ቱሙዋ ኦዳይ፤ ኡንቱንቱ ባረንቱ ጋትያ አክ ድጌድኖ። 3-4ሽን ኔን ህዬሳዉ እምያ ዎደ፥ ጌማን እማናዳን፥ ነ ኡሸቻ ኩሺ ኦያዋ ሀድርሳ ኩሺ ኤሮፖ።#6:3-4 ኡሸቻ ኩሺ ኦዳዋ ሀድርሳ ኩሺካ ኤሮፖ፥ ጉሳይ ጾሳፐ አትን፥ ኦንነ ኤሮፖ ጉሳ። ጌማን ኦዳዋ በእያ ነ አቡ፥ ነ ሎኦ ኦሱዋ ጋትያ ዛራናዋ።

ዎሳባ

(ሉቃሳ 11:2-4)

5“ጾሳ ዎሲደ፥ ሎአ ማላትያ ኢታቱዋዳን ሀኖፕተ፤ አያዉ ጎፐ፥ ባረንታ አሳይ በአና ማላ፥ አይሁዳ ዎሳ ጎለንነ ኦግያ ዶናን ኤቂደ፥ ጾሳ ዎስያዋ ዶሲኖ፤ ታን ህንተዉ ቱሙዋ ኦዳይ፤ ኡንቱንቱ ባረንቱ ጋትያ ኡባካ አኬድኖ። 6ሽን ኔን ጾሳ ዎስያ ዎደ፥ ነ ጎለ ገላ፤ እፍ ቃቻደ፥ ቤተና ነ አዉዋ ዎሳ፤ ጌማን ኦሰቶዋ በእያ ነ አቡ ነዉ እማናዋ።

7“ጾሳ ህንተ ዎስያ ዎደ፥ ጾሳ አማነና አሳዳን፥ ጮ መላ ዛረዋ ዳርሶፕተ፤ ኡንቱንቱ ሃሳያ ዳሩዋን ስሰቴ ጊደ ቆፒኖ። 8ሄዋ ድራዉ፥ ሄ አሳዳን ሀኖፕተ፤ አያዉ ጎፐ፥ ህንተ አቡ ህንተና ኮሽያዋ ህንተንቱ ዎሳናፐ ካሰቲደ ኤሬ።

9“ስም ህንተንቱ ሀዋ ማላ ዎሳ ዎስተ፤

“ ‘ሳሉዋን ደእያ ኑ አቦ፥

ነ ጌሻ ሱንይ አንጀቶ።

10ነ ካዉተይ ዮ፤

ነ ሸኒ ሳሉዋን ሀኔዳዋዳን፥

ሳንካ ሀኖ።

11ጋላሳን ጋላሳን ኮሽያ ቁማ

ኑዉ ሀቼ እማ።

12ኑን ኑና ናቆዋንቶ

አቶ ያግያዋዳን፥

ኔንካ ኑ ናቁዋ አቶ ጋ።

13ኑና ኢታባፐ አሻፐ አትን፥

ፓጭያን ገልሶፓ።

ካዉተይ፥ ዎልቃይነ ቦንቹ

መናዉካ ኔሳ።

አመንእ።’

14“ህንተንቱ ህንተና ናቄዳ ሀራ አሳ ናቁዋ አቶ ጎፐ፥ ሳሉዋን ደእያ ህንተንቱ አዉካ ህንተዉ አቶ ጋና።

15“ሽን ህንተንቱ ህንተና ናቄዳ ሀራ አሳ ናቁዋ አቶ ጋና ዮፐ፥ ህንተንቱ አዉካ ህንተ ናቁዋ አቶ ጌና።#ማር. 11:25-26

ጾማባ

16“ቃይ ህንተንቱ ጾምያ ዎደ፥ ሎአ ማላትያ ኢታቱዋዳን፥ ካዮትያዋ ማላቶፕተ፤ አያዉ ጎፐ፥ ኡንቱንቱ ጾምያዋ አሳይ በአና ማላ፥ ባረንቱ ሶምእያ ቡላልሲኖ፤ ታን ህንተንቶ ቱሙዋ ኦዳይ፤ ኡንቱንቱ ባረንቱ ጋትያ አኬድኖ።

17-18“ሽን ህንተንቱ ጾምያ ዎደ፥ ህንተንቱ አቡ ህንተ ጾምያዋ ኤሮፐ አትን፥ አሳይ ኤረና ማላ፥ ህንተ ሶምእያ ሜጨትተ፤ ህንተ ሁጲያካ ኦከትተ፤ ያቶፐ፥ ቤተና ህንተ አዉ ህንተንቱ ኦያዋ ጌማን በኢደ፥ ህንተ ጋትያ እማናዋ።

ሳሉዋን ደእያ ሚሻባ

(ሉቃሳ 12:33-34)

19“ሚሻ ብልአይ ምያሳንነ ብራታይ ሽኢደ ባይዝያሳን፥ ካይሱካ ቦኪደ ዉኢያሳን፥ ሀ ሳኣን ህንተንቱ ሁጲያዉ ዳጋዮፕተ።#ኢያሳ 5:2-3 20ሽን ብልአይ ሜናሳንነ ሽኤና ሳን፥ ካይሱካ ቦኪደ ዉኤና ሳን ህንተንቱ ሁጲያዉ ሳሉዋን ሚሻ ዳጋይተ። 21አያዉ ጎፐ፥ ነ ዎዛናይ ነ ሚሻይ ደእያ ሳን ደአና።

ቦላ ፖኡዋባ

(ሉቃሳ 11:34-36)

22“ቦላ ፖኡ አይፍያ፤ ሄዋ ድራዉ፥ ነ አይፊ ፓጻ ግዶፐ፥ ነ ቦላ ኡባይ ፖኦ ግዳና። 23ሽን ነ አይፊ ፓጻ ግዳና ዮፐ፥ ነ ቦላ ኡባይ ማና፤ ስም ኔናን ደእያ ፖኡ ሞፐ፥ ማይ አይ ኬና ዳራኔ!

ደኦ ህርጋናዉ በሰና

(ሉቃሳ 16:13፤ 12:22-31)

24“ላኡ ጎዳቶ ሞደታናዉ ዳንዳይያዌ ኦንነ ባዋ፤ አያዉ ጎፐ፥ እቱዋ እጺደ፥ የኩዋ ሲቄ፤ ዎይ እቱዋ ቦንቺደ፥ የኩዋ ካ፤ እት አሳይ ጾሳዉነ ሻሎ ሞደታናዉ ዳንዳየና።

25“ሄዋ ድራዉ፥ ታን ህንተንቶ ኦዳይ፤ ህንተ ደኦ ማናባዉነ ኡሻናባዉ፥ ዎይ ህንተ ቦላዉ ማያናባዉ ህርጎፕተ፤ ሸምፑ ቁማፐ አኔ? ቃይ ቦላይ ማዩዋፐ አኔ? 26ፓልያ ካፋቱዋ ጼልተ፤ ኡንቱንቱ ዘርክኖ፤ ጫክክኖ፤ ድይያንካ ቆልክኖ፤ ሽን ሳሉዋን ደእያ ህንተንቱ አዉ ኡንቱንታ ምዜ፤ ህንተንቱ ኡንቱንቱፐ ሎይ ዳርክቴ? 27ህንተንቱ ግዶን ዳርስ ህርጊደ፥ ባረ ጌሳ ቦላ እት ዋ ጉጃናዉ ዳንዳይያዌ ኦኔ?

28“አያዉ ማዮ ህርጊቴ? ደምባን ደእያ ጪሻቱ ዎት ድጪኖንቶ፥ አኬክ ጼልተ፤ ኡንቱንቱ ዳቡርክኖ ዎይ ፑቱዋ ሱቂክኖ።#1 ካታ. 10:4-7፤ 2 ኦዱዋ 9:3-6 29ሽን ታን ህንተንቶ ኦዳይ፤ ሀራይ አቶ፥ ሶሎሞነ ሄዋ ኬና ቦንቼቴዳዋ ግዲደ፥ ሄ ጪሻቱዋፐ እቱዋ ማላካ ማይቤና። 30ሽን ላፋ አማኑ ደእያዋንቶ፥ ጾሳይ፥ ሀቼ ደኢደ፥ ዎንት ታማን ኤጽያ ደምባ ማታ ማይዝያዌ፥ ህንተና ኡንቱዋፐ አደ ዎት ማይዘኔ? 31ስም፥ ‘ኑን አያ ማኔ? ዎይ አያ ኡሻኔ? ዎይ አያ ማያኔ?’ ያጊደ ህርጎፕተ። 32አያዉ ጎፐ፥ ሄ ኡባባ ጾሳ አማነናዋንቱ ዳርሲደ ኮዪኖ፤ ሄ ኡባይ ህንተና ኮሽያዋ ሳሉዋን ደእያ ህንተንቱ አዉ ኤሬ። 33ሽን ካሰቲደ፥ ጾሳ ካዉተነ አ ጽሎተ ኮይተ፤ እ ህንተንቶ ሄ ኡባባ እማና። 34ሄዋ ድራዉ፥ ዎንትባዉ ህርጎፕተ፤ አያዉ ጎፐ፥ ዎንት ጋላሳይ ባረዉ ህርጋና፤ ጋላሳ ኡባዉካ አ ሁጰዉ ግድያ ዋዪ ደኤ።

Currently Selected:

ማቶሳ ምሽራቹዋ 6: DFBE

Highlight

Copy

Compare