ማቶሳ ምሽራቹዋ 10

የሱስ ኪቴዳ ታማነ ላኡ አሳቱዋባ

(ማር. 3:13-19፤ ሉቃሳ 6:12-16)

1የሱስ ባረ ታማነ ላኡ ካልያዋንታ ጼሲደ፥ ኡንቱንቱ ኢታ አያና ከሳና ማላ፥ ቃይ ሀርግያ ኡባነ ሳኩዋ ኡባ ፓና ማላ፥ ኡንቱንቶ ማታ እሜዳ። 2የሱስ ኪቴዳ ታማነ ላአቱዋ ሱንይ፥ ኮይሮዌ ጰጽሮሳ ጌተትያ ስሞናነ አ እሻ እንድራሳ፥ ዛብድዮሳ ናና፥ ያቆባነ ዮሃንሳ፥ 3ፕልጶሳ፥ ባርታላሞሳ፥ ቶማሳ፥ ቃራጻ አክያ ማቶሳ፥ እልፕዮሳ ናኣ ያቆባነ ታዶሳ፤ 4ባረ ጋደዉ ቃረትያ ስሞናነ የሱሳ አ እሜዳ አስቆሮቱ ይሁዳ።

የሱስ ኪቴዳ ታማነ ላአቱ ታማርሳናዉ ኪተቴድኖ

(ማር. 6:7-13፤ ሉቃሳ 9:1-6)

5የሱስ ሀ ታማነ ላአቱዋ ሀዋዳን ያጊደ ኪቴዳ፤ “አይሁዳ ግደና አሳ ጋድያ ቦፕተ፤ ቃይ ሳማረቱዋ ካታማካ ገሎፕተ፤ 6ሄዋ ድራ ባዬዳ ዶርሳኮ፥ እስራኤልያ አሳኮ 7ቢደ፥ ‘ሳሉዋ ካዉተይ ማቴዳ’ ያጊደ ኦድተ።#ሉቃሳ 10:4-12 8ሀርጋንቻቱዋ ፓተ፤ አሃ ሀይቁዋፐ ደንተ፤ ኦሉ ኦይቄዳዋንታ ፓተ፤ ኢታ አያናቱዋካ ከስተ። ህንተንቱ ጮ አኬድታ፤ ጮ እምተ። 9ዎርቃ ዎይ ብራ ዎይ ሳንትምያ ህንተንቱ ኪስያን ኦይቆፕተ፤ 10ዎይ ኦገዉ ቃርጪትያ፥ ዎይ ላኤንያ ማዩዋ፥ ዎይ ጫማ ዎይ ጻምኣ ኦይቆፕተ። አያዉ ጎፐ፥ ኦሳንቻዉ ኮሽያባይ ቁማ።#1 ቆሮ. 9:14፤ 1 ጽሞ. 5:18

11“ህንተንቱ ገልያ ካታማን ዎይ ቄር ካታማ ኡባን ህንተና ሞካናዉ ናሸትያዌ ኦነንቶ አኬካን ጾሞስተ፤ ህንተንቱ ሄዋፐ ከሳና ጋካናዉ፥ ሄዋን ኡትተ። 12ቃይ ጎለ ገሊደ ሳሮትተ። 13ሄ ጎለን ደእያ አሳይ ህንተና ሞኮፐ፥ ህንተንቱ ሳሮቴዳ ሳሮታይ ኡንቱንታ ጋኮ። ሽን ኡንቱንቱ ህንተና ሞከናን እጾፐ፥ ህንተንቱ ሳሮቴዳ ሳሮታይ ህንተዉ ጉየ ስሞ። 14ቃይ እት እት ጎሊ ዎይ ካታማይ ህንተና ሞከናን ዎይ ህንተንቱ ኦድያዋ ስሰናን እጾፐ፥ ሄ ጎለፐ ዎይ ሄ ካታማፐ ከሲደ፥ ህንተንቱ ገድያፐ ባና ሾጭተ። 15ታን ህንተዉ ቱሙዋ ኦዳይ፤ ጾሳይ ፕርድያ ጋላስ ሄ ካታማ አሳፐ፥ ሶዶማ ካታማ አሳዉነ ጋሞራ ካታማ አሳዉ ፕርዳ ካዉሽሳና።#ማቶሳ 11:24፤ ዶመ 19:24-28

ጎዳይ ያናፐ ካሰቲደ፥ የደርሱነ መቱ ሀናና

(ማር. 13:9-13፤ ሉቃሳ 21:12-17)

16“በእተ! ታን ህንተና ዶርሳ ዋላቱዋ ግዶ የድያዋዳን የዳይ። ሄዋ ድራዉ፥ ሾሻዳን ጭንጫ ግድተ፤ ቃይ ሀራጵያዳን፥ አሽከ ግድተ። 17ሽን አሳፐ ናገትተ። አያዉ ጎፐ፥ አሳይ ህንተና ፕርዳ ጎለዉ አደ እማና፤ ቃይ ባረ አይሁዳ ዎሳ ጎለቱዋንካ ህንተና ልሱዋን ፔዳና።#ማር. 13:9-11፤ ሉቃሳ 12:11-12፤ 21:12-15 18ጋድያ አይስያዋንቱ ስንንነ ካታቱዋ ስንን ታ ድራዉ ህንተንቱ ኤቂደ፥ ኡንቱንቶነ አይሁዳ ግደና አሳ ስንን ታዉ ማርካ ግዳንታ። 19ሽን ኡንቱንቱ ህንተና ፕርዳዉ አያ ዎደ፥ ህንተንቱ ሃሳያናባ ሄ ሳትያን ጾሳይ ህንተዉ እምያ ድራዉ፥ ህንተንቱ ጋናባዉነ ዎይ ዋጊደ ሃሳያነንቶነ ህርጎፕተ። 20አያዉ ጎፐ፥ ህንተንቱን አቂደ ሃሳይያዌ ህንተንቱ አዉዋ ጌሻ አያናፐ አትን፥ ሃሳይያዋንቱ ህንተንታ ግድክታ።

21“እሻይ ባረ እሻ፥ አዉ ባረ ናኣ ቦላ ደንዳና፤ ናናይ ባረንቱ አትነ አዉዋ ቦላ ደንዲደ፥ ኡንቱንታ ዎሳና። 22ቃይ አሳይ ኡባይ ህንተንታ ታ ሱን ድራዉ እጻና፤ ሽን ዉርሰይ ጋካናዉ ገንጭያዌ አታናዋ። 23ኡንቱንቱ ህንተና እት ካታማፐ የደርሶፐ፥ ሀራ ካታማ ቢተ። አያዉ ጎፐ፥ ታን ህንተዉ ቱሙዋ ጋይ፤ ታን፥ አሳ ናአይ፥ ያና ጋካናዉ፥ ህንተንቱ ህንተ ኦሱዋ እስራኤልያ ካታማ ኡባን ኦደ ዉርስክታ።

24“ታማርያዌ ባረና ታማርስያዋፐ ዳረና፤ ቆማይካ ባረ ጎዳፐ ዳረና። 25ታማርያዌ ባረና ታማርስያዋ ኬና ግድያዌ፥ ቆማይካ ባረ ጎዳ ኬና ግድያዌ አዉ ግዳና፤ ኡንቱንቱ ጎለ ጎዳ ብኤል-ዘቡላ ጊደ ጼሶፐ፥ አ ጎለ አሳ ዋግ ጼሳኔሻ!

ኦስ ያያናዉ በስንቶ

(ሉቃሳ 12:2-7)

26“ስም አሳዉ ያዮፕተ፤ አያዉ ጎፐ፥ ገን ዎዳባይ ቆንጭያ ከሰናን አተና፤ ቆሴዳባይካ ኤረተናን አተና። 27ታን ህንተንቶ ማን ኦድያባ ፖኡዋን ሃሳይተ፤ ህንተዉ ሀይን ሳሱኪደ ኦዴዳዋ፥ ቃሳን አዋይተ። 28አሹዋ ዎያዋንቶ ያዮፕተ፤ ኡንቱንቱ፥ ሸምፑዋ ዎናዉ ዳንዳይክኖ። ሽን ሸምፑዋነ አሹዋ ጋናምያን ይሳናዉ ዳንዳይያ ጾሳዉ ያይተ። 29ላኡ ሱንያ ካፋቱ ሳንትምያን ዛልኤትክኖ? ህንተንቱ አዉዋ ሸንያ ግዳና ዮፐ፥ ሄ ሱንያ ካፋቱዋፐ እትናካ ሳኣን ዎደ ባዩኩ። 30ሽን ሀራይ አቶ፥ ህንተንቱ ሁጲያን ደእያ ብናናይ ኡባይካ ፓይዱዋን ደኤ። 31ስም ያዮፕተ፤ ዳሮ ሱንያ ካፋቱዋፐ ህንተንቱ አታ።

ክርስቶሳባ ማርካታናዉ በሴ

(ሉቃሳ 12:8-9)

32“ሄዋ ድራዉ፥ አሳ ስንን ታባ ማርካትያ ኦስ ግዶፐነ፥ ታንካ ሳሉዋን ደእያ ታ አቡ ስንን ማርካታና፤ 33ሽን አሳ ስንን ታና ካድያ ኦናነ ታንካ ቃይ ሳሉዋን ደእያ ታ አቡ ስንን አ ካዳና።#2 ጽሞ. 2:12

34“ታን ሳአዉ ሳሮተ አሀናዉ ዬዳዋ ህንተዉ ማላቶፖ፤ ታን ቶራ አሀናዉ ዬዳዋፐ አትን፥ ሳሮተ አሀናዉ ያበይከ። 35አያዉ ጎፐ፥ ታን ናኣ አ አቡፐ፥ ናቶ እዝ ዳይፐ፥ ናኣ ማቻቶካ እዝ ቦሎታትፐ ሻካናዉ ያድ፤#ሚክ. 7:6 36አሳዉ ሞርከቱ አ ጎለ አሳቱዋ ግዳናዋንታ።

37“ባረ አባ ዎይ ባረ ዳዮ ታፐ አደ ሲቅያዌ ታዋ ግዳናዉ በሰና፤ ባረ አቱማ ናኣ ዎይ ባረ ማጫ ናቶ ታፐ አደ ሲቅያዌ ታዋ ግዳናዉ በሰና። 38ባረ ማስቃልያ ቶኪደ፥ ታ ጌዱዋ ካለናዌ ታዋ ግዳናዉ በሰና። 39ባረ ሸምፑዋ አሽያዌ ባይዛናዋ፤ ሽን ታ ድራዉ ባረ ሸምፑዋ ባይዝያዌ አሻናዋ።

40“ህንተንታ ሞክያዌ ታና ሞኬ፤ ቃይ ታና ሞክያዌ ታና ኪቴዳዋ ሞኬ። 41ናብያ፥ ናብያ ሱንን ሞክያዌ፥ ናብያ ጋትያ አናና ግሸታናዋ፤ ቃይ ጽሉዋ፥ ጽሉዋ ሱንን ሞክያዌ፥ ጽሉዋ ጋትያ አናና ግሸታናዋ። 42ኦንነ ሀ ታና ካልያዋንቱፐ ጉጽያ እቶ፥ ሀራይ አቶ ቡልያ ሃ ጻላላ ኡሻናዉ እሞፐካ፥ ታን ህንተንቶ ቱሙዋ ጋይ፤ እ ባረ ጋትያ አካና” ያጌዳ።

Currently Selected:

ማቶሳ ምሽራቹዋ 10: DFBE

Highlight

Copy

Compare