ኢያሳ 24
24
ሰኬማን ቃላ ጫቁዋ ኦራጹሳ
(24:1-33)
1ሄዋፐ ጉይያን ኢያሱ እስራኤልያ ዛራቱዋ ኡባ ሰኬማ ጌተትያ ካታማን ሺሼዳ። ጭማቱዋ፥ ካፓቱዋ፥ ዳናቱዋነ ኦላ ጋዳዋቱዋ ኡባ ጼስና ኡንቱንቱ ጾሳ ስንን ሺቄድኖ። 2ኢያሱ አሳዉ ኡባዉ ሀዋዳን ያጌዳ፤ “መና ጎዳይ እስራኤልያ ጾሳይ ሀዋዳን ያጌ፤ ‘በን ህንተንቱ አዎቱ ኤፍራጺሳ ሻፋፐ ሄፍንን ደኤድኖ፤ ኡንቱንቱ ሀራ ጾሳቶ ኦድኖ። ኡንቱንቱፐ እቱ አብራሃማነ ናኮራ አዉዋ ታራ።#ዶመ 11:27 3ሄዋፐ ጉይያን ህንተንቱ አዉዋ አብራሃማ፥ ሄ ሻፋፐ ሄፍንን ደእያ ጋድያፐ ጼሳደ፥ ካናነ ቢታ ኡባን ካለድ። አ ዛርያካ ጮራያድ፤ ይሳቃካ አዉ እማድ።#ዶመ 12:1-9፤ 21:1-3 4ይሳቃዉካ ያቆባነ ኤሳ እማድ። ኤሳዉ ኤዶማ ገዝያ ላታናዳን እማድ፤ ሽን ያቆብነ አ ናናይ ዱገ ግብጼ ቤድኖ።#ዶመ 25:24-26፤ 36:8፤ 46:1-7፤ ዛረ. 2:5
5“ ‘ጉየፐ ሙሳነ አሮና ኪታደ ታን ያን ኦዳዋን ግብጼ ጋድያ አሳ ቦሻን ሾጫድ፤ ሄዋፐ ጉይያን ህንተንታ ከሳድ።#ከሳ 3:1—12:42 6ታን ህንተንቱ አዎቱዋ ግብጼፐ ከስና፥ ዞኦ አባኮ ዬድታ፤ ግብጼቱ ህንተንቱ አዎቱዋ ፓራቱ ጎችያ ጋረቱዋንነ ፓራዋቱዋን የደርሴድኖ።#ከሳ 14:1-31 7ኡንቱንቱ መና ጎዳዉ ዋሴዳ ዎደ፥ ኡንቱንቱፐነ ግብጼቱዋፐ ግዱዋን ማ የጋድ፤ ያታደ፥ አባይ ኡንቱንቱ ቦላ ስማናዳንነ ኡንቱንቱ ሙካናዳን ኦድ። ታን ግብጼቱዋ ቦላ ኦዳዋ ህንተንቱ ህንተንቱ አይፍያን በኤድታ። ህንተካ ዎራን ዳሮ ዎድያ ደኤድታ።
8“ ‘ሄዋፐ ጉይያን ዮርዳኖሳ ሻፋፐ አዋይ ዶልያ ባጋና ደእያ አሞራዋናቱዋ ጋድያ ታን ህንተንታ አሃድ። ኡንቱንቱ ህንተናና ኦለትና፥ ታን ኡንቱንታ ህንተንቱ ኩሽያን አደ እማድ፤ ህንተንቱ ጋድያ ላቴድታ። ቃይ ታን ኡንቱንታ ህንተንቱ ስንፐ ይሳድ።#ፓይ. 21:21-35 9ሄዋፐ ጉይያን ጽፖራ ናአይ ባላቅ፥ ሞኣበ ጋድያ ካቲ ደንዲደ፥ እስራኤላቱዋና ኦለቴዳ። ባኦራ ናአይ ባላም ህንተንታ ሸቃናዳን፥ ኪቲደ ጼስሴዳ፤#ፓይ. 22:1—24:25 10ሽን ታን ባላመባ ስሳበይከ። ሄዋ ድራዉ እ ህንተንታ አንጄዳ፤ ያትና፥ ታን ህንተንታ ባላቃ ኩሽያፐ አሻድ።
11“ ‘ዮርዳኖሳ ሻፋ ፕኒደ፥ ያርኮ ዬድታ፤ ያርኮ አሳይነ አሞራዋናቱ፥ ፓርዛዋናቱ፥ ካናነቱ፥ ሂተቱ፥ ገርጌሰቱ፥ ሂዌቱነ ያቡሳዋናቱ ህንተናና ኦለትና፥ ታን ኡንቱንታ ህንተንቱ ኩሽያን አደ እማድ።#ኢያሳ 3:14-17፤ 6:1-21 12ካጅያ ህንተፐ ስንዉ ኪታደ፥ አሞራዋናቱዋ ካተቱዋ ላአቱዋ ህንተንቱ ስንፐ ከሳድ። ሀዌ ኡባይ ሀናናዉ ዳንዳዬዳዌ፥ ህንተንቱ ማሻንነ ህንተንቱ ዎንዳፍያን ግደና።#ከሳ 23:28፤ ዛረ. 7:20 13ህንተንቱ ጎሺደ ከስቤና ጋድያነ ህንተንቱ ኬጽቤና ካታማቱዋ ታን ህንተንቶ እምና፥ አን ደኢታ። ሀእ ህንተንቱ ቶክቤና ዎይንያ ቱራ አይፍያነ ዎጋራ አይፍያ ሚታ’ ያጌ።#ዛረ. 6:10-11
14“ሄዋ ድራዉ ሀእካ መና ጎዳዉ ያይተ፤ ቱሙ ዎዛናፐ አማነቲደ አዉ ጎይንተ። ህንተንቱ ማይዛ አዎቱ ኤፍራጺሳ ሻፋፐ ሄፍንንነ ግብጼን ጎይኔዳ አላጋ ጾሳቱዋ ዎራ ኦሊደ፥ መና ጎዳዉ ጎይንተ። 15መና ጎዳዉ ጎይንያዌ ህንተንታ ኢቶፐ፥ ህንተንቱ አዎቱ ሻፋፐ ሄፍንን ደኢደ ጎይኔዳ ጾሳቱዋ ግድና፥ ዎይ ሀእ ህንተንቱ ደእያ አሞረ ጋድያ አሳ ጾሳቱዋ ግድና፥ ህንተንቱ ጎይንያዋ ሀቼ ዶርተ። ሽን ታናነ ታ ጎልያ አሳ ግዶፐ፥ ኑን መና ጎዳዉ ጎይናና” ያጌዳ።
16አሳይ ዛሪደ፥ “መና ጎዳ አግ ባሺደ፥ ሀራ ጾሳቶ ጎይናናዌ ኑፐ ሃኮ! 17ግብጼ ጋድያፐ፥ አይለተ ጎልያፐ፥ ኑናነ ኑ አዎቱዋ ከሲደ አሄዳዌ፥ ሄ ዎልቃማ ማላታቱዋ ኑ ጼልሽን ኦዳዌ፥ ኑን ቤዳ ኦግያ ኡባንነ አዳ ቢታቱዋ ኡባ ግዱዋን ኑና ናጌዳዌ፥ መና ጎዳ ኑ ጾሳተነ። 18ቃይ መና ጎዳይ አሳ ኡባ፥ ሄ ጋድያን ደእያ አሞረ አሳቱዋናካ ኑ ስንፐ ላጊደ ከሴዳ። ሄዋ ድራዉ ኑንካ መና ጎዳዉ ጎይናና፤ አያዉ ጎፐ፥ እ ኑ ጾሳ” ያጌዳ።
19ሽን ኢያሱ አሳ ሀዋዳን ያጌዳ፤ “ህንተንቱ መና ጎዳዉ ጎይናናዉ ዳንዳይክታ። አያዉ ጎፐ፥ እ ጌሻ ጾሳ፤ እ ቃናትያ ጾሳ፤ እ ህንተንቱ ናቁዋ ዎይ ህንተንቱ ናጋራ አቶ ጌና። 20ህንተንቱ መና ጎዳ አጊደ፥ አላጋ ጾሳቶ ጎይኖፐ፥ እ ህንተንቶ ሎኦባ ኦዳዋፐ ጉይያን፥ ስሚደ ህንተንታ ቆሀናነ ይሳና” ያጌዳ።
21አሳይ ኢያሳ፥ “ቱይት፥ ግደና! ኑን መና ጎዳዉ ጎይናና” ያጌዳ።
22ኢያሱ አሳ፥ “ህንተንቱ መና ጎዳዉ ጎይንያዋ ዶሬዳዎ ህንተንቱ ሁጲያዉ ህንተንቱ ማርካ” ያጌዳ።
ኡንቱንቱ፥ “ኤ ኑን ማርካ!” ያጌድኖ።
23ኢያሱ፥ “ያቶፐ፥ ህንተንቱ ግዱዋን ደእያ አላጋ ጾሳቱዋ ድግተ፤ ህንተንቱ ዎዛና መና ጎዳኮ፥ እስራኤልያ ጾሳኮ ዛርተ” ያጌዳ።
24ኡንቱንቱ፥ “ኑን መና ጎዳዉ፥ ኑ ጾሳዉ፥ ጎይናና፤ አ አዛዙዋካ ፖላና” ያጌድኖ።
25ሄ ጋላስ ኢያሱ አሳና ቃላ ጫቁዋ ጫቀቴዳ፤ ሰኬማን ህግያነ ዎጋ ኡንቱንቶ ከሴዳ። 26ኢያሱ ሄ ቃላቱዋ ጾሳ ህግያ ማጻፋን ጻፌዳ። ሄዋፐ ጉይያን፥ እት ዎልቃማ ሹቻ አኪደ፥ መና ጎዳ ዱንካንያ ማታን ደእያ ዎላ ጋርሳን ኤሴዳ። 27ኢያሱ አሳዉ ኡባዉ፥ “በእተ፥ መና ጎዳይ ኑዉ ሃሳዬዳ ቃላ ኡባ ሀ ሹቻይ ስሴዳ ድራዉ፥ እ ኑ ቦላ ማርካ ግዳናዋ። ህንተንቱ ጾሳ ቦላን ማካሎፐ፥ ሀ ሹቻይ ህንተንቱ ቦላ ማርካ ግዳናዋ” ያጌዳ። 28ሄዋፐ ጉይያን፥ ኢያሱ አሳ ኡባ የድና፥ ኡባይካ ባረ ላታ ጋድያ ጋድያ ስሚደ ቤዳ።
ኢያሱ ሀይቁዋነ ኤልኣዛራ ሀይቁዋ
29ሄዋፐ ጉይያን መና ጎዳ ቆማይ፥ ነዌ ናአ ኢያሱ፥ ላይይ ጼታነ ታሙዋ ግድና ሀይቄዳ። 30አሳይ ጋኣሻ ደርያፐ ሁጲሳ ባጋን፥ ኤፍሬማ ገዝያን ደእያ አ ላታ ጋድያን፥ ትምናት-ሴራን ሞጌድኖ።#ኢያሳ 19:49-50
31ኢያሱ ፓጻ ደኤዳ ዎደ ኡባንነ ኢያሱፐ ስምና ደኢደ፥ መና ጎዳይ እስራኤላቶ ኦዳ ኦሱዋ ኡባ ኤሬዳ ጭማቱዋ ዎደ ኡባን እስራኤላቱ መና ጎዳዉ ጎይኔድኖ።
32እስራኤልያ አሳይ ግብጼ ጋድያፐ አሄዳ ዮሴፎ መቀ ሰኬማን ሞጌድኖ። ሄ ሳኣ ያቆብ ሸኬማ አዉዋ ሀሞራ ናናቱዋፐ ጼቱ ጻጋራ ብራን ሻሜዳ፤ ጉየፐ ዮሴፎ ዛራቱ ላቴድኖ።#ዶመ 33:19፤ 50:24-25፤ ከሳ 13:19፤ ዮሃ. 4:5፤ ኪታ 7:16
33አሮና ናአይ ኤልኣዛረ ሀይቄዳ፤ አ ናኣ ፒንሃሳዉ እመቴዳ ኤፍሬማ ገዝያን ደእያ ግብኣ ጌተትያ ካታማን ሞጌድኖ።
Currently Selected:
ኢያሳ 24: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
