ኢዩኤላ 2

1ጽዮነን ማላካታ ፑንተ፤ ታ ጌሻ ደርያንካ ማላካታ ስስተ! ይሁዳ ጋድያን ደእያ አሳይ ኡባይ ያሻዉ ኮኮሮ፤ አያዉ ጎፐ፥ መና ጎዳ ጋላሳይ ዬ፤ ማታቴዳ። 2ሄ ጋላሳይ ማነ ሻኖቻ ጋላሳ፤ ሻርያነ ባራ ማ ጋላሳ! ጮራነ ምኖ ኦላንቻቱ ደረቱዋ ቦላን ጻልቂ ከስያዋዳን ከስ ዎድኖ። ኡንቱንቱ ማላይ በንፐ ዶምና ደእቤና፤ ሀዋፐ ስንናዉ ዳሮ የለታ ጋካናዉካ ኡንቱንቱ ማላይ ደኤና።

3ኡንቱንቱ ባረፐ ስንና ደእያ ጫርሻ ኡባ ታማዳን ሚኖ፤ ቃይ ኡንቱንቱፐ ጉየና ደእያባ ላጩዋዳን ጹጊኖ፤ ኡንቱንቱፐ ስንና ደእያ ሳአይ ኤደነ ገነትያ ማላ፤ ሽን ኡንቱንቱፐ ጉዪ መላ ባዙዋ ማላ፤ ኡንቱንቱፐ አያይነ አተና። 4ኡንቱንቱ ማላይ ፓራ ማላ ማላ፤#ሳፃ 9:7-9 ኡንቱንቱ ኦላ ፓራቱዋዳን፥ ኤለካ ዎጺኖ። 5ፓራይ ጎችያ ጋረቱዋ ኮሻ ጊሪኖ፤ ኡንቱንቱ ደረቱዋ ጼራና ጉፒኖ፤ ዳላ ምያ ታማ ላጩዋዳን ጻራጊኖ፤ ኦላ ባናዉ ሳልፔዳ ዎልቃማ ኦላንቻቱዋዳን ማራን ሀመቲኖ። 6ኡንቱንቱፐ ስንና አሳይ ኮኮሬ፤ ኡንቱንቱ ያሻዉ ኡባ ሶምኢ ላመቴዳ። 7ኡንቱንቱ ኦላንቻቱዋዳን ዎጺኖ፤ ድርሳ ግምቢያካ ግኢኖ። ኡንቱንቱ ኡባይካ ባረ ማራን ሳልፒኖ፤ ባረንቱ ሳልፕያፐ ጋጻ ከስክኖ። 8ኡንቱንቱ እቱ እቱዋና ሱገትክኖ፤ ኡባይካ ባረ ሳልፕያን ሳልፕያን ስት ጊደ፥ ስንዉ ሀመቲኖ። ኡንቱንቱ ባረናና ኦለትያዋንቱ ግዱዋና ሲደ አኖ፤ ሄ ዎደ ኡንቱንታ ተእያባይ ባዋ። 9ኡንቱንቱ ካታማ ኤለካ ዎራጂኖ፤ ድርሳ ግምቢያ ቦላንካ ዎጺኖ። ኡንቱንቱ ጎልያ ቦላካ ከሲኖ፤ ቃይ ካይሱዋዳን፥ ማስኮትያና ገሊኖ። 10ኡንቱንቱፐ ስንና ጋዲ ቃጼ፤#ሳፃ 8:12 ሳሎቱካ ኮኮሪኖ። አዋይነ አግናይ ሚኖ፤ ቃይ ጾልንተቱካ ባረንቱ ፖኡዋ ገንኖ። 11መና ጎዳይ ባረ ኦላንቻቱዋ ስንን ጉሜ፤#ሳፃ 6:17 አዉ አዛዘትያ ኦላንቻቱ ጮራነ ዎልቃማ። መና ጎዳ ጋላሳይ ግታነ ዳሮፐ ያሽያዋ። ሄ ጋላሳ ዳንዳያናዌ ኦኔ?

ናጋራፐ ስማናዳን ጼሳ

12መና ጎዳይ ሀዋዳን ያጌ፤ “ሀእካ ጾሚደ፥ ዬኪድነ ካዮቲደ ፖሎ ዎዛናፐ ታኮ ስምተ። 13ህንተ ዎዛናፐ አትና፥ ህንተ ማዩዋ ፔፕተ” ያጌ።

መና ጎዳኮ፥ ህንተ ጾሳኮ፥ ስምተ፤ አያዉ ጎፐ፥ እ ቃረታይነ ማሮታይ ኩሜዳዋ፤ ሀንቆ ኤሌለናዋነ ሲቁ ዳሬዳዋ፤ እ ህንተና ሙራናዉ ኮየናዋ። 14ኦን ኤሪ፥ ጾሳይ ህንተ ጾሳይ፥ ባረ ሀንቁዋፐ ስሚደ፥ ህንተንቶ ዳሮ ካ አንጁዋ እማነንቶነ። ሄ ዎደ መና ጎዳዉ፥ ህንተ ጾሳዉ፥ ካ ያርሹዋነ ኡሻ ያርሹዋ ህንተ ያርሻና።

15ጽዮነን ማላካታ ፑንተ፤ ያአዉ አሳ ሺሽተ! ጾማ አዋይተ፤ 16ሺቁዋ ጌሽተ፤ ጭማቱዋ እትፐ አህተ፤ ጉ ናናቱዋነ ምያዋንታካ አሾፕተ። አክያዌ ቡላቻ ጎልያፐ ከሶ፤ ቡላቼትያናካ ባረ ሲርጻፐ ከሱ። 17መና ጎዳዉ ኦያ ቄሳቱ ጌሻ ጎልያ ባራንዳፐነ ያርሽያ ሳኣፐ ግዱዋን ኤቂደ ዬክኖ። ኡንቱንቱ ሀዋዳን ያጊደ ዎስኖ፤ “አቤት መና ጎዳዉ፥ ነ አሳዉ ቃረታ፤ ነ አሳ ካዉተቱዋ ግዶን ቦርያባነ ቅሊጭስያዋ ከሶፓ። አሳይ ባረ ግዶን አያዉ፥ ‘ኡንቱንቱ ጾሳይ ሀቃን ደኢ?’ ያጋኔ?” ያግኖ።

ጎዳ ጋላሳ

(2:18-32)

18ያትና፥ መና ጎዳይ ባረ ቢታዉ ሴለታና፤ ቃይ ባረ አሳዉካ ቃረታና። 19መና ጎዳይ ዛሪደ ባረ አሳ ሀዋዳን ያጌ፤ “በእተ፥ ታን ህንተንቶ ካ፥ ዎይንያ ኤሳነ ዛይትያ ህንተና አዳ ካልስያዋ የዳና፤ ታን ህንተና ሙለካ ካዉተቱዋ ግዶን ቦርያ ከስከ።

20“ሁጲሳ ባጋና ዬዳ ቦልያዳን ግዴዳ ሞርከቱዋ ታን የደርሳደ፥ ህንተፐ ሃሳና፤ ባዙዋነ መላ ቢታ ታን ኡንቱንታ የደርሳና። አዋይ ዶልያ ባጋና ደእያዋንታ ማጽነ አባዉ፥ አዋይ ዉልያ ባጋና ደእያዋንታ ቃይ ሜድተራነ አባዉ ዛራደ የዳና፤ ኡንቱንቱ አሃይ ጽንቁዋ ጾኡ ጋና። ሄዌ ኡባይ ኡንቱንቱ ህንተ ቦላ ዎልቃማ ኢታባ ኦዳ ግሻሳ” ያጌ።

21ቢታዉ፥ ስም ያዮፓ፤ መና ጎዳይ ግታባ ኦዳ ድራዉ፥ ናሸታነ ሀሹ ጋ! 22ህንተኖ ሳኣ መሄቶ፥ ያዮፕተ፤ አያዉ ጎፐ፥ ባዙዋን ደእያ ሄን ጋዲ አጬዳ፤ ምይካ ባረ አይፍያ አይፌ፤ ኤ ምይነ ዎይንያ ቱራይካ አይፍያ ዶርጾጼ።

23ህንተኖ ጽዮነ አሳቶ፥ ናሸትተ፤ መና ጎዳን፥ ህንተ ጾሳን፥ ሀሹ ጊተ! አያዉ ጎፐ፥ እ ባልጉዋ እራ ህንተንቶ ዳርሲደ እሜዳ፤ ቃይ እ ካሰዋዳን፥ ህንተንቶ ባልጉዋ እራነ አድልያ እራ ግድሲደ እሜዳ። 24ካ ቡክያ ኡዱማቱዋን ካይ ኩማና፤ ዎይንያ ኤሳይነ ዎጋራ ዛይቲ ጉምእያ ኦላቱዋ ኩሚደ ፓላሀና።

25መና ጎዳይ ህንተ ጾሳይ ሀዋዳን ያጌ፤ “ካሰ ታን ህንተ ግዶ የዴዳ፥ ታ ዎልቃማ ኦላንቻቱዋ፥ ጎንዶቱ፥ ቦለቱ፥ ቡምቡሮቱነ ኩኩቦቱ ሜዳ ላይቱዋ አጩዋ ታን ህንተንቶ ጭጋና። 26ማናዉ ህንተንቶ ዳሮ ቁማይ ደአና። ሄዋ ድራዉ፥ ህንተ ካላናነ ማላልስያባ ህንተንቶ ኦዳ ታና መና ጎዳ ህንተ ጾሳ ሱን ጋላታና። ቃይ ታ አሳይ ላኤን ሙለካ ዬላተና። 27ሄ ዎደ ታን እስራኤልያ ግዶን ደእያዋ፥ ታን መና ጎዳይ ህንተ ጾሳ ግድያዋነ ታፐ አትና፥ ሀራ ጾስ ባይናዋ ህንተ ኤራና። ቃይ ታ አሳይ ላኤን ሙለካ ዬላተና።

28“ሄዋፐ ጉይያን ሀዋዳን ሀናና፤ ታን አሳ ኡባ ቦላ ታ አያና ጉሳና።#ኪታ 2:17-21 ህንተ አቱማ ናናቱነ ህንተ ማጫ ናናይ ትምቢትያ ኦዳና፤ ህንተ ጭማቱካ አኩሙዋ አኩመታና፤ ህንተ ዎዳላ ናናይካ ሳፃ በአና። 29ሄ ጋላሳቱዋን ታ አቱማ ቆማቱ ቦላነ ታ ማጫ ቆማቱ ቦላ ታን ታ አያና ጉሳና።

30“ቃይ ታን ቦላ ሳሉዋን ማላልስያባ፥ ጋርሳ ሳንካ ሱ፥ ታማነ ስት ጊደ ፑደ ደንድያ ጩዋ በሳና። 31ግታነ ዳሮፐ ያሽያ መና ጎዳ ጋላሳይ ጋካናፐ ካሰ አዋይ ማና፤#ማቶሳ 24:29፤ ማር. 13:24-25፤ ሉቃሳ 21:25፤ ሳፃ 6:12-13 አግናይካ ሱ ማላታና። 32ሄ ዎደ ሀዋዳን ሀናና፤ መና ጎዳ ሱን ጼስያ ኡባይ አታና።#ሮመ 10:13 መና ጎዳይ ጌዳዋዳን፥ ጽዮነ ደርያንነ የሩሳላመን አትያዋንቱ ደአና። ሄዋንቱፐካ መና ጎዳይ ጼሴዳዋንቱ ፓጻ ደአና።”

Currently Selected:

ኢዩኤላ 2: DFBE

Highlight

Copy

Compare