ዳናቱዋ 4
4
ድቦሮነ ባራቃ
1ኤሁድ ሀይቄዳዋፐ ጉይያን፥ እስራኤልያ አሳይ መና ጎዳ ስንን ዛረደካ ኢታባ ኦዳ። 2ሄዋ ድራዉ፥ መና ጎዳይ ሀጾራ ጌተትያ ካታማን ካተቴዳ ካናነ ካትያ ያብናያዉ ኡንቱንታ አደ እሜዳ፤ አ ኦላንቻቱዋ ጋዳዉ ስሳር ደርያ-ሀሮሼታ-ሀጎዪማ ጌተትያ ካታማን ደኤ። 3ያብናያ ብራታፐ ኦሰቴዳ ኡዱፑን ጼቱ ፓራ ጋረቱ ደእያ ድራዉነ እ እስራኤልያ አሳ ቃረት ባይናን ላታሙ ላይ ኡቁኔዳ ድራዉ፥ ኡንቱንቱ ማዱዋ ደማናዉ መና ጎዳኮ ዋሴድኖ።
4ሄ ዎደ ላፕዶታ ማቻታ ድቦራ፥ ትምቢትያ ኦድያና እስራኤልያ ቢታን ፕርድያ ዳናቶ። 5ድቦራ ኤፍሬማ ገዝያን፥ ራማ ካታማፐነ ቤቴለ ካታማፐ ግዱዋን ደእያ ድቦር ዛምባ ጋርሳን ኡታደ ፕርዳዉ፤ እስራኤልያ አሳይ ባረ የዉዋ ፕርድሳናዉ ኢኮ ዬ። 6እት ጋላስ ደቦራ አብኖኣማ ናኣ ባራቃ ንፍታሌማ ጋድያን ደእያ ቀዴሻ ካታማፐ ኪታደ ጼስሳዱ፤ “መና ጎዳይ እስራኤልያ ጾሳይ ኔና ሀዋዳን ያጊደ አዛዜ፤ ‘ንፍታሌማ ዛርያፐነ ዛብሎና ዛርያፐ ታሙ ሻአ አሳ አካደ፥ ታቦራ ደርያ ባ። 7ታን ያብና ኦላንቻቱዋ ጋዳዋይ ስሳር ፓራ ጋረቱዋነ ኦላንቻቱዋ አኪደ፥ ቂሾና ሻፋን ኔናና ኦላ ጋከታናዉ ያናዳን ኦና፤ ታን ነዉ አ አደ እማና’ ያጌ” ያጋዱ።
8ያትና፥ ባራቅ፥ “ኔን ታናና ቦፐ፥ ታን ባና፤ ሽን ኔን ታናና ባና ዮፐ፥ ታንካ ቢከ” ያጌዳ።
9አ፥ “ኤኖ፥ ታን ኔናና ባና፤ ሽን መና ጎዳይ ስሳራ ማጫ አሳ ኩሽያን አደ እምያ ድራዉ፥ ሄ ቡሳይ ነዉ ቦንቾ ግደና” ያጋዱ። ደቦራ ደንዳደ፥ ባራቃና ቀዴሻ ባዱ። 10ባራቅ ንፍታሌማነ ዛብሎና ዘረ ቀዴሻ ጼስና፥ ታሙ ሻአ አሳይ አ ካሊደ ከሴዳ፤ ድቦራካ አናና ባዱ።
11ሄ ዎደ ሄቤራ ጌተትያ እት ብታኒ ደኤ፤ እ ቄና አሳ፤ እ ሙሴ ቦሉዋ ሆባባ ያራ። እ ሀራ ቄናቱዋፐ ሻከቲደ፥ ቀዴሻኮ ሺቂደ፥ ዛእናኒማን ደእያ ዎላ ማታን ባረ ዱንካንያ ጌዳ።
12አብኖኣማ ናአይ ባራቅ ታቦራ ደርያ ቤዳዋ ስሳር ስሴዳ ዎደ፥ 13ብራታፐ ኦሰቴዳ ባረ ኡዱፑን ጼቱ ፓራ ጋረቱዋነ ባረናና ደእያ አሳ ኡባ ጼስሲደ፥ ሀሮሼታ-ሀጎዪማፐ ቂሾና ሻፋ ሺሼዳ።
14ያትና፥ ድቦራ ባራቃ፥ “ደንዳ! ሀቼ መና ጎዳይ ነ ኩሽያን ስሳራ አደ እምያ ጋላሳ። በአ፥ መና ጎዳይ ኔፐ ስንቲደ ቤዳ” ያጋዱ። ሄዋፐ ጉየ ባራቅ ታሙ ሻአ አሳ ካለደ፥ ታቦራ ደርያፐ ዎዳ። 15መና ጎዳይ ስሳራ፥ አ ፓራ ጋረቱዋ ኡባነ አ ኦላንቻቱዋ ኡባ ቃራ ማሻን ባራቃ ስንፐ ባቃትሴዳ። ያትና፥ ስሳር ባረ ፓራ ጋርያፐ ዎደ፥ ገድያን ባቃቴዳ። 16ባራቅ ሄ ፓራ ጋረቱዋነ ኦላንቻቱዋ ሀሮሼታ-ሀጎዪማ ጋካናዉ የደርሴዳ። ስሳራ ኦላንቻቱ ኡባይ ቃራ ማሻን ሀይቄድኖ፤ እት አሳይነ አትቤና።
17ሄ ዎደ ሀጾራ ካትያ ያብን ቄና ሄቤራ ጎለ አሳና ሳሮ ደኤ። ሄዋ ድራዉ፥ ስሳር ገድያን ባቃቲደ፥ ቄና ሄቤራ ማቻት ያኤል ዱንካንያ ጋኬዳ። 18ያኤላ ስሳራ ሞካናዉ ከሳደ፥ “ታ ጎዳዉ፥ ገላ፤ ሃ ገላ፤ ያዮፓ” ያጋዱ። ዱንካንያ ኢኮ ገልና፥ አ ባረ ቡሉኩዋን ካማዱ።
19ስሳር፥ “ታና ሳሜ፤ ኡሽያ ጉ ሃ እማርኪ” ያጌዳ። ማ ትግያ ሚሻ ፖካደ ኡሻዱ፤ ያታደ ዛራደ ካማዱ። 20ሄዋፐ ጉይያን እ እዞ፥ “ዱንካንያ ፐንግያን ኤአ። አይ አሳይ ዪደ፥ ‘ሀዋን አሳይ ደኢ?’ ያጊደ ኦቾፐ፥ ‘ባዋ’ ጋ” ያጌዳ።
21ስሳር ሎይ ዳቡሬዳ ድራዉ፥ ገምእሹዋ ፓኑሬዳ። ሄቤራ ማቻታ ያኤላ ማዶሻነ ዱንካንያ ግያ ሽካሊያ አካደ፥ ሎዳን አኮ ሺቃዱ፤ ሺቃደ ግያ ሽካልያ ሀይ ካርያን ኤሳደ፥ ማርቴሉዋን ሻደ፥ ቢታና ስክና፥ ስሳር ሀይቄዳ።
22ባራቅ ስሳራ ኮዪደ ዪና፥ ያኤላ አ ሞካናዉ ካረ ከሳደ፥ “ሃያ፤ ኔን ኮይያ ብታንያ ታን ኔና በሳና” ያጋዱ። እዝና ዱንካንያ ግዶ ገሊደ፥ ስሳራ ሀይ ካርያን ጉ ገልና፥ አ አሃይ ሳኣን ግሴዳዋ በኤዳ።
23ሄ ጋላስ ጾሳይ እስራኤልያ አሳይ ካናነ ካትያ ያብና ጾናናዳን ኦዳ። 24እስራኤልያ አሳይ ካናነ ካትያ ያብና ቦላ ምን ምኒደ ቢደ፥ ዉርሰን አ ይሴዳ።
Currently Selected:
ዳናቱዋ 4: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia