ዳናቱዋ 2

መና ጎዳ ኪታንቻይ ቦክማ ቤዳ

1መና ጎዳ ኪታንቻይ ገልገላፐ ቦክማ ቢደ፥ እስራኤልያ አሳ ሀዋዳን ያጌዳ፤ “ታን ህንተንታ ግብጼፐ ከሳድ፤ በን ህንተንቱ ማይዛ አዋቶ እማና ጋደ ጫቄዳ ጋድያ ህንተንታ ገልሳድ። ህንተንታ ሀዋዳን ያጋድ፤ ‘ታን ህንተናና ጫቀቴዳ ጫቁዋ ኡባካ መንከ፥ 2ህንተንቱ ሀ ጋድያን ደእያ አሳቱዋና ቃላ ጫቁዋ ገሎፕተ፤ ኡንቱንቱ ያርሽያ ሳኣ ኮልተ’ ያጋድ፤ ሽን ህንተንቱ ታዉ አዛዘትበይክታ። አያዉ ሄዋዳን ሀኔድቴ?#ከሳ 34:12-13፤ ዛረ. 7:2-5 3ሄዋ ድራዉ፥ ታን ኡንቱንታ፥ ህንተንቱ ስንፐ የደርስከ፤ ኡንቱንቱ ህንተንቶ ሞርከ ግዳና፤ ኡንቱንቱ ጾሳቱካ ህንተንቶ ጲረ ግዳና ያጋይ” ያጌዳ። 4መና ጎዳ ኪታንቻይ ሄዋ እስራኤልያ አሳዉ ኡባዉ ሃሳዬዳ ዎደ፥ አሳይ ባረ ቃላ ቁ ኦደ ዬኬዳ። 5ያቲደ ሄ ሳኣ ቦክማ#2:5 ቦክማ፦ ሀ ሱን ብለይ እብራዌዋን፥ “ዬክያዋንታ” ግያዋ። ያጊደ ሱንዳ፤ ሄዋን መና ጎዳዉ ያርሹዋ ያርሼዳ።

ኢያሱ ሀይቁዋ

6ኢያሱ እስራኤልያ አሳ የዴዳዋፐ ጉይያን፥ አሳይ እቱ እቱ ባረና ሻክና ጋክያ ጋድያ አካናዉ ቤዳ። 7ኢያሱ ደኡዋን ደኤዳ ላይ ኡባን አሳይ መና ጎዳዉ ኦዳ፤ እ ሀይቄዳዋፐ ጉይያን፥ መና ጎዳይ እስራኤልያ አሳዉ ኦዳ ዎልቃማ ኦሱዋ ኡባ በኤዳ ጭማቱዋ ዎደ ኡባን መና ጎዳዉ ኦያዋ አግቤና።

8መና ጎዳ ቆማይ፥ ነዌ ናኣ ኢያሱ፥ ላይይ ጼታነ ታሙዋ ግድና ሀይቄዳ፤ 9ጋኣሻ ደርያፐ ሁጲሳ ባጋን፥ ኤፍሬማ ገዝያን፥ ትምናት-ሰራሀ ግያ ሳን ደእያ አ ላታ ጋድያን ሞጌድኖ።#ኢያሳ 19:49-50 10ሄ የለታ ኡባይ ሀይቂ ባረ ማይዛን ጋከቴዳዋፐ ጉይያን፥ መና ጎዳ ዎይ እስራኤልያ አሳዉ እ ኦዳዋ ኡባ ኤረና ሀራ የለታይ ደንዴዳ።

እስራኤልያ ዳናቱዋ

(2:11—16:31)

እስራኤልያ አሳይ ጾሳዉ ጎይንያዋ አግ ባሼዳ

11ሄዋፐ ጉይያን፥ እስራኤልያ አሳይ መና ጎዳ ስንን ኢታባ ኦዳ፤ ባኣላ ጌተትያ ኤቃቶ ጎይኔድኖ። 12ግብጼ ጋድያፐ ኡንቱንታ ከሴዳ መና ጎዳ፥ ባረንቱ ማይዛ አዎቱዋ ጾሳ አግ ባሼድኖ፤ ባረንቱ ዩሹዋን ደእያ አሳቱዋ ኤቃቱዋኮ ስሚደ፥ ኡንቱንቶ ጎይኔድኖ፤ ሄዋን መና ጎዳ ሀንቀድኖ። 13ቃይ አ አግ ባሺደ፥ ባኣላዉነ አስታሮታዉ ጎይኔድኖ። 14ያትና፥ መና ጎዳ ሀንቁ እስራኤልያ አሳ ቦላ ኤጽ ከሴዳ፤ ቦንቂያዋንቱ ቦንቃናዳን ኡንቱንታ በስ ባሼዳ፤ ኡንቱንቱ ዩሹዋን ደእያ ሞርከቶ ኡንቱንታ አደ እሜዳ። ያትና፥ ኡንቱንቱ ባረንቱ ሞርከቱዋና ኤቀታናዉ ዳንዳይበይክኖ። 15ኡንቱንቱ ኦለታናዉ ከሴዳ ዎደ ኡባን፥ መና ጎዳይ ካሰ ኡንቱንቶ ጫቄዳዋዳን ኡንቱንቱ ጾነታና ማላ፥ እ ኡንቱንቱ ቦላ ደንዴዳ። ያትና፥ ኡንቱንቱ ሎይ ዋየድኖ።

16ያትና፥ መና ጎዳይ ዳናቱዋ ኡንቱንቶ ደንዳ፤ ኡንቱንቱ እስራኤልያ አሳ ቦንቄዳዋንቱ ኩሽያፐ አሼድኖ። 17ሽን እስራኤልያ አሳይ ፕርድያ ዳናቶ አዛዘትቤና፤ ኡንቱንቱ መና ጎዳዉ አማነተናን እጼድኖ፤ ሀራ ጾሳቱዋኮ ስሚደ፥ ኡንቱንቶ ጎይኔድኖ። ኡንቱንቱ አዎቱ ሀመቴዳ ኦግያፐ ኤለካ ጉየ ስሜድኖ፤ ኡንቱንቱ ማይዛ አዎቱ ጾሳዉ አዛዘቴዳዋዳን፥ ኡንቱንቱ አዛዘትበይክኖ። 18መና ጎዳይ ኡንቱንቶ ፕርድያ ዳናቱዋ ደንዳ ዎደ አዉደነ እ ሄ ፕርድያ ዳናቱዋና እትፐ ግዴዳ፤ ሄ ዳናይ ደኡዋን ደኤዳ ላይ ኡባን ኡንቱንቱ ሞርከቱዋ ኩሽያፐ ኡንቱንታ አሼዳ። አያዉ ጎፐ፥ ኡቁናይነ ቱጋይ ዳርና፥ ኡንቱንቱ ዋስያዋ ስሲደ፥ መና ጎዳይ ኡንቱንቶ ቃረቴዳ። 19ሽን ፕርድያ ዳናይ ሀይቄዳዋፐ ጉይያን፥ አሳይ ጉየ ስሚደ፥ ካሰ ኡንቱንቱ አዎቱ ኦዳ ኢታፐ አዳ ኢታ ኦድኖ፤ ኡንቱንቱ ሀራ ጾሳቱዋኮ ስሚደ፥ ኡንቱንቶ ጎይኔድኖ፤ ባረንቱ ኢታ ኦሱዋነ ደሻ ኦግያ አገናን እጼድኖ። 20መና ጎዳ ሀንቁ እስራኤልያ አሳ ቦላ ኤጽ ከሴዳ፤ ያትና፥ መና ጎዳይ ሀዋዳን ያጌዳ፤ “ሀ አሳይ ታን ኡንቱንቱ ማይዛ አዋቶ ገሌዳ ጫቁዋ መንዳ ድራዉነ ታዉ አዛዘተናን እጼዳ ድራዉ፥ 21ሀቼፐ ዶምና፥ ኢያሱ ሀይቄዳ ዎደ ቢታ ቦላን አቴዳ ጋደ አሳቱዋፐ እቱዋነ ታን ኡንቱንቱ ስንፐ የደርሳደ ከስከ። 22ሀ እስራኤልያ አሳይ ካሰ ባረንቱ ማይዛ አዎቱዋዳን ታ ኦግያ ካልንቶ፥ ዎይ ካለነንቶ ፓጫናዉ፥ መና ጎዳይ ሄ አቴዳ ጋደ አሳቱዋን ጎኤታና” ያጌዳ። 23ሄዋ ድራዉ፥ መና ጎዳይ ሄ ጋደ አሳቱ ከሰናን ጋምአናዳን ኦዳ። እ ኡንቱንታ ኤለካ የደርሲደ ከስቤና፤ ኢያሱዉካ ኡንቱንታ አደ እምቤና።

Currently Selected:

ዳናቱዋ 2: DFBE

Highlight

Copy

Compare