ዳናቱዋ 19
19
እት ሌዊያነ እ አኬዳ ቆማቶ
1እስራኤልያ ጋድያን ካቲ ባይና ዎደ፥ ኤፍሬማ ገዝያን፥ ሃኮ ሳኣን ሌዊያ ዛረ ግድያ እት ብታኒ ደኤ። ሄ ብታኒ ይሁዳ ጋድያን ቤተሌመ ካታማፐ እት ናቶ ቆማቶ አሄዳ። 2ሽን አዉ አማነተናን እጻደ፥ ይሁዳ ጋድያን ቤተሌመ ካታማን ደእያ ባረ አዉዋ ሶይ ባዱ፤ ያን ኦይዱ አገና ኡታዱ። 3እ ጎዳይ እዝዉ ኦድ አማንናዉነ፥ ሶይ ዛራናዉ ደንዲደ፥ ባረ ቆማነ ላኡ ሀረቱዋ አኪደ ቤዳ፤ አ ሞካ አካደ፥ ባረ አዉዋ ሶይ ገልሳዱ። እዝ አዉ አ በኤዳ ዎደ፥ ናሸቲደ ሞኬዳ። 4ናት አዉ ብታንያ የደናን ድግና፥ ያን አናና ሚድነ ኡሺደ ሄዙ ጋላሳ ታኬዳ። 5ኦይደን ጋላስ ዎንታ ጉራን ደንዲደ፥ ባናዉ ጊጌድኖ። ሽን ናት አዉ ባረ ናት ጎዳ፥ “ጉ ቁማ ማደ፥ ምኔዳዋፐ ጉይያን ባሳ” ያጌዳ።
6ሄዋፐ ጉየ ላኡ አቱማ አሳቱካ ኡቲደ፥ እትፐ ሜድኖነ ኡሼድኖነ። ሄዋፐ ጉይያን ናት አዉ አ፥ “ሀያና፥ ሀቼ ናሸታደ ሀዋን አቃ” ያጌዳ። 7ሌዊያ ዛሪ ባናዉ ደንድና፥ ቤናን አቃና ማላ ዎሴዳ፤ እ አኪያ ቆማት አዉ አ ዎስና፥ ቃይካ ያን አቄዳ።
8እቼሻን ጋላስ ባናዉ ዎንታ ጉራን ደንድና፥ ናት አዉ፥ “ሀያና፥ ምነታ ታካደ፥ ኦማርስ ባሳ” ያጌዳ። ሄዋፐ ጉየ ኡንቱንቱ ላአቱካ ቁማ እትፐ ሜድኖ።
9ብታኒ ባረ አኪያ ቆማትናነ ባረ ቆማና ባናዉ ከስና፥ ናት አዉ ሀዋዳን ያጌዳ፤ “በእተ፥ ሳአይ ቃም ድጌዳ! ናሸቲደ ሀዋን አቅ አግተ። ዎንታ ጉራና ደንዲደ፥ ህንተንቱ ሶይ ቢታ” ያጌዳ።
10ሽን እ ሄ ጋላስ ያን አቃናዉ ኮይቤና። ሄዋ ድራዉ፥ ደንዲደ ቤዳ፤ ያቡሳ ጌተትያ የሩሳላመ ካታማ ማታ ጋኬዳ፤ እ አኪያ ቆማታነ ላኡ ጫኔዳ ሀረቱ አናና ደኢኖ። 11ኡንቱንቱ ያቡሳ ማትና፥ ሳአይ ሎይ ኦማርሴዳ፤ ያትና፥ ቆማይ ባረ ጎዳ፥ “ብያዋ አጊደ አያዉ ሀ ያቡሳዋናቱዋ ካታማን አቆኮ?” ያጌዳ።
12ሄዋፐ ጉየ አ ጎዳይ አዉ ዛሪደ፥ “ሀዋ እስራኤልያ አሳይ ባይና አላጋ ካታማ ቦኮ። ግብኣ ካታማ ጋካናዉ ኑን ባና” ያጌዳ። 13ቃይ ዛረደ ባረ ቆማ፥ “ሃያ፥ ኑን ግብኣ ካታማን ዎይ ራማ ካታማን አቅያ ሳኣ ደማና” ያጌዳ። 14ያቲደ ባረንቱ ኦግያ ኦይቂደ ቤድኖ። ቢንያማ ጋድያን ደእያ ግብኣ ካታማ ማትና፥ አዋይ ኡንቱንቶ ዉሌዳ። 15ኡንቱንቱ ግብኣ ካታማ ገሊደ አቃናዉ፥ ያ ቤድኖ፤ ካታማ አሳይ ሽቁዋ ኡትያ ሳኣን ኡቴድኖ፤ ሽን ያፐ ኡንቱንታ ባረ ሶይ አፊደ አይስያ አሳይ ቤትቤና።
16ኡንቱንቱ ሄዋን ኡት ደእሽን፥ ጋደን ኦያ ሳፐ ሳአይ ኦማርስና፥ ባረ ሶይ ስምያ እት ጭማ ብታኒ ኡንቱንቱ ማታና አዳ። ሀ ብታኒ ካሰ ኤፍሬማ ገዝያፐ ዬዳ አሳ፤ ሽን ሀእ እ ደእያዌ ግብኣ ግያ ካታማና፤ ሄ ጋድያን ቢንያማ ዛርያፐ የለቴዳ አሳቱ ደኢኖ። 17ሄ ጭማ ብታኒ ካታማ አሳይ ሽቁዋ ኡትያ ሳኣን ኡቴዳ ብታንያ በኢደ፥ “ሀቃፐ ያድ? ሀቃ ባይ?” ያጊደ ኦቼዳ።
18ሌዊያ ዛሪ ዛሪድ፥ “ኑን ይሁዳ ጋድያን ደእያ ቤተሌመ ካታማፐ ዬዶ። ሀእ ኤፍሬማ ገዝያፐ ሄፍን ባጋን ደእያ ኑ ሶይ ቦይተ፤ ቃይ መና ጎዳ ጎለካ ቦይተ። ያኔዳዋንቱ ኑና ባረ ሶይ አፊደ አይስያ አሳ ደምበይኮ። 19ኑ ሀረቶ ኡቱላይነ ዳላይ ደኤ፤ ታዉ፥ ታ አኪያ ቆማትዉነ ታ ቆማዉ ግድያ ኡክይነ ዎይንያ ኤሳይ ደኤ፤ ኑ ኮሽያዋ ኡባ ኦይቄዶ” ያጌዳ።
20ሄዋፐ ጉየ ጭማ ብታኒ፥ “ሳሩ ህንተንቶ ግዶ፤ ህንተንቱ ኮይያዋ ኡባ ታን ህንተንቶ እማና፤ አያ ግዶፐነ፥ ሀ ካታማ አሳይ ሽቁዋ ኡትያ ሳኣን አቃናዉ ኮሸና” ያጌዳ። 21ኡንቱንታ ባረ ሶይ አፌዳ፤ ኡንቱንቱ ሀረቶካ ምያባ የጌዳ። ሄዋፐ ጉይያን፥ እማቱ ባረንቱ ገድያ ሜጨቲድ፥ ካዉዋ ሜድኖ።
22ኡንቱንቱ ናሸትሽን፥ ካታማፐ ሹፉሮ አሳቱ ዪደ፥ ጎልያ ዩሹዋን ዶዲደ፥ ፐንግያ ቆጸ ዶሜድኖ፤ ኡንቱንቱ ሄ ጎልያ ጎዳ፥ ሄ ጭማ ብታንያ፥ “ሄ ነ ሶ ገሌዳ ብታንያ ሃ ኬሳ፤ ኑን አናና ግሳናዉ ኮዬቶ!” ያጌድኖ።#ዶመ 19:5-8
23ሄዋፐ ጉየ ጎልያ ጎዳይ ካረ ከሲደ ኡንቱንታ፥ “ሀይ ታ እሻቶ፥ ሄዋ ማላ ፓላባ ኦፕተ፤ ሀ ብታኒ ታ እማ። 24በእተ፥ ታ ዎዶሮ ናታነ እ አኪያ ቆማታ ሀዋን ደኢኖ። ታን ኡንቱንታ ህንተንቶ ካረ ኬሳና፤ ያቶፐ ኡንቱንታ ህንተንቱ ኮዬዳዋ ኦተ፤ ሽን ሀ ብታንያ ቦላ ሄዋ ማላ ኢታባ ኦፕተ” ያጌዳ።
25ሽን አሳቱ እ ጌዳዋ ስሰናን እጼድኖ። ያትና፥ ቢታኒ ባረ አኪያ ቆማቶ ካረ ኬሲደ፥ ኡንቱንቶ እሜዳ፤ ሳአይ ዎንታና ጋካናዉ፥ ቃማ ኡባ ካላን ካላን እዝና ዎልቃን ግሲደ፥ እዞ ፓጻ ካኢዴ አቄድኖ፤ ያቲደ ሳአይ ዎንታና ሀንሽን፥ እዞ የዴድኖ። 26ሳአይ ዎንታናዉ ሆልጆጅ ዞእያ ዎደ ሄ ምሽራታ ያደ፥ እዝ ጎዳይ አቄዳ ጭማ ብታንያ ጎልያ ፐንግያን ኩንዳዱ፤ ጻልቂ ዶላና ጋካናዉ ሄዋን ግሳዱ።
27ሄ ጋላስ ጉራ እ ጎዳይ ደንዲደ፥ ባረ ኦግያ ባናዉ ጎልያ ፐንግያ ዶዪደ ከሴዳ ዎደ፥ እ ማችያ ቆማታ ጎልያ ፐንግያን ባረ ኩሽያ ፐንገ ጎጭላ ቦላ ምጫደ፥ ግሴዳውኖ በኤዳ። 28እዞ፥ “አነ ደንዳ፤ ቦይተ” ያጌዳ፤ ሽን እዛ አዉ አይነ ዛራበይኩ። ሄዋፐ ጉይያን፥ እዚ አሃ ሀርያን ጫኒደ፥ ባረ ሶይ ቤዳ። 29ሶይ ጋኪደ፥ ማሻ አኪደ፥ ባረ አኪያ ቆማት አሃ ታማነ ላኡዋ ከሲደ ቃንጸሬዳ። እት እት ግሹዋ እት ዛረዉ፥ ኡባና ታማነ ላኡ እስራኤልያ ዛረቶ የደዳ።#1 ሳሜላ 11:7
30ሄዋ በኤዳ ኡባይ፥ “እስራኤልያ አሳይ ግብጼ ጋድያፔ ከሰዳሳፐ ሀቼ ጋካናዉ፥ ሀዋ ማላትያባይ ኡባካ ሀንቤና፤ ኑንካ በእበይኮ። አነ ሀዋ እትፐ አኬክ ዞረቶይቴ፥ እትባ ኦይተ” ያጌድኖ።
Currently Selected:
ዳናቱዋ 19: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
