ሃገ 2

ጎዳይ ባረ አሳዉ እሜዳ ምንዋነ አንጁዋ ህዶታ

(2:1-19)

1ሄ ላይን ላፑን አግናን ላታማነ እተን ጋላሳን መና ጎዳ ቃላይ ትምቢትያ ኦድያ ሃገ ባጋና ሀዋዳን ያጊድ ዬዳ፤ 2“ሳላትያላ ናኣ፥ ይሁዳ ሞድያ ዛሩባቤላዉ፥ እዮጸዴቃ ናኣ፥ ቄስያ ኡባቱ ካፑዋ ኢያሱዉነ ሀራ አሳዉ ሀዋዳን ያጋደ ኦዳ፤ 3‘ሀ ጌሻ ጎልያ ቦንቹ ካሰ አያ ማለንቶ በኤዳ አሳፐ አቴዳዌ ህንተ ግዶን ደኢ? ሀቼ ህንተ አ ጼልያ ዎደ፥ ዋን ኡቴዴ? ህንተ አይፍያን እ ባይናዋ ማላቴ ግደኔ?#እዝራ 3:12

4“ ‘ዛሩባቤላ፥ ሀእ ምና! ታን መና ጎዳይ ሀዋ ኦዳይ። እዮጸዴቃ ናአዉ፥ ቄስያ ኡባቱ ካፖ ኢያሱ፥ ኔንካ ምና! ቢታን ደእያ አሳ ኡባዉ፥ ህንተካ ምንተ! ምኒደ ኦተ፤ አያዉ ጎፐ፥ ታን ህንተናና ደአይ። ታን ኡባፐ ዎልቃማ መና ጎዳይ ሀዋ ኦዳይ። 5ህንተ ግብጼፐ ከስያ ዎደ፥ ታን ህንተናና ጫቀቴዳ ጫቁዋዳን፥ ታ አያናይ ህንተናና ደእያ ድራዉ ያዮፕተ!#ከሳ 29:45-46

6“ ‘ቃይካ ታን ኡባፐ ዎልቃማ መና ጎዳይ ሀዋ ኦዳይ። ታን ማታ ዎድያን እት ገደ ጉጃደ፥ ሳሎቱዋነ ሳኣ፥ አባነ መላ ቢታካ ቃና።#እብራ. 12:26 7ካዉተቱዋ ኡባካ ቃና፤ ካዉተቱዋ ኡባን ደእያ ዱረታይ ሃ ያናዳን ኦና። ታን ኡባፐ ዎልቃማ መና ጎዳይ ሀ ጌሻ ጎልያ ቦንቹዋን ኩንና። 8ብራይ ታዋ፤ ዎርቃይካ ታዋ። 9ኮይሮዋ ቦንቹዋፐ ሀ ላኤን ጌሻ ጎልያ ቦንቹ ዳራና፤ ታን ኡባፐ ዎልቃማ መና ጎዳይ ሀ ሳኣን ሳሮተካ እማና’ ያጋደ ኦዳ” ያጌዳ መና ጎዳይ።

10ዳርዮሰ ካተቴዳ ላኤን ላይን፥ ኡዱፑን አግናን ላታማነ ኦይደን ጋላሳን መና ጎዳ ቃላይ ትምቢትያ ኦድያ ሃገ ባጋና ሀዋዳን ያጊድ ዬዳ፤ 11“ኡባፐ ዎልቃማ መና ጎዳይ ሀዋዳን ያጌ፤ ‘ህጊ ዋግንቶ ኤራናዉ አነ ቄሳቱ ዋ ሀዋ ኦቻ: 12እት ኡራይ ያርሾ ጌሽ ዎዳ አሹዋ ባረ አፍላ ጼራን ጻጽ አኪደ አፍሽን፥ ሄ አፍላ ጼራይ ኡክ፥ ዎይ ዎጽያ፥ ዎይ ዎይንያ ኤሳነ ዛይትያ፥ ዎይ ሀራ አያ ቆሞ ቁማነ ቦቾፐ፥ ሄ ቦሸቴዳ ቁማይ ቱሙ ጌሻ ግዳናዉ ዳንዳዪ?’ ያጋ” ያጌዳ።

ቄሳቱ፥ “ግዳናዉ ዳንዳየና” ያጊደ ዛሬድኖ።

13ሀጊ ቃይካ፥ “አሃ ቦቺደ ቱኔዳ እት ኡራይ ሀዋንቱፐ እት ቆሞ ቁማነ ቦቾፐ፥ ሄ ቁማይ ቱሙ ቱናኔ?” ያጊደ ኦቼዳ።#ፓይ. 19:11-22

ቄሳቱ፥ “ኤ ቱናና” ያጊደ ዛሬድኖ።

14ያትና፥ ሀጊ ዛረደ፥ “መና ጎዳይ ሀዋዳን ያጌ፤ ‘ሀ አሳይነ ሀ ካዉተይ ታ ስንን ሄዋካ ማላ፤ ኡንቱንቱ ኦያ ኦሱነ ኡንቱንቱ ሺሽያ ያርሹ ኡባይካ ሄዋካ ማላ ቱና’ ያጌ” ያጌዳ።

ጾሳይ ባረ አሳ አንጃና

15ጾሳይ፥ “ሀቼፐ ዶሚደ፥ ህንተ ቦላን ጋኬዳዋአ አኬክተ! መና ጎዳ ጌሻ ጎልያ ግምበቱዋ ዶማናፐ ካሰ፥ 16ህንተ ላኡ ኩንታለ ካ አካና ጊደ፥ ካ ዎሳ ቤድታ፤ ሽን እት ኩንታለ ጻላላ ደሜድታ። ቃይ እት ጼቱ ሊትሮ ዎይንያ ኤሳ አካናዉ ዎይንያ ጉምእያ ኦላኮ ቤድታ፤ ሽን ህንተ መጽ ኦይታሙ ሊትሮ ጻላላ ዎይንያ ኤሳ ደሜድታ። 17ታን ህንተ ኩሺ ኦዳ ኦሱዋ ኡባ ቦላን መልስያ ጫርኩዋ፥ ካ ሀርግያነ ሻቻ የዳደ ይሳድ። ሽን ህንተ ሀ ኡባንካ ታኮ ስምበይክታ” ያጌ መና ጎዳይ።

18“ሀቼ ጋላሳፐ፥ ሀ ኡዱፑን አገናን ላታማነ ኦይደን ጋላሳፐ ዶሚደ፥ አነ አኬክተ፤ ቃይ መና ጎዳ ጌሻ ጎልያ ባሱ ባሰቴዳ ጋላሳፐ ዶሚደ ቆፕተ። 19ሀእ ዘረዉ ሀንያ ካይ ህንተ ዬስያን ዮፐ፥ ቃይ ዎይንያ ቱራይ፥ ባላስያ ጌተትያ ም፥ ሮማንያ ጌተትያ ምነ ዎጋራ ዛይትያ ምይካ ሀቼ ጋካናዉ አይፍያ አይፋና ዮፐ፥ ሀቼፐ ዶማደ ታን ህንተና አንጃና” ያጌ።

ጾሳይ ዛሩባቤላዉ እሜዳ ህዶታ

(2:20-23)

20ሄ አገናን ላታማነ ኦይደን ጋላሳን መና ጎዳ ቃላይ ላኤንዋ ሃገኮ ሀዋዳን ያጊድ ዬዳ፤ 21“ይሁዳ ሞድያ ዛሩባቤላዉ ሀዋዳን ያጋደ ኦዳ፤ ‘ታን ሳሎቱዋነ ሳኣ ቃና፤ 22ካዉተቱዋ አራታቱዋ አ የጋና፤ ኡንቱንቱ ዎልቃ ይሳና። ፓራ ጋረቱዋ ኡንቱንቱ ላግያዋንቱና አ የጋና፤ ፓራቱነ ፓራ አሳቱካ ኡባይ ባረንቱ ግዶን ሀይቀታና። 23ታ ቆማዉ፥ ሳላትያላ ናአዉ ዘሩባቤላ፥ ታን ኡባፐ ዎልቃማ መና ጎዳይ ኔና ሄ ጋላስ አካደ ታ ማታፋ ምግዱዋ ማላ ኦና። አያዉ ጎፐ፥ ታን ኔና ዶራድ’ ያጋደ ኦዳ” ያጌ ኡባፐ ዎልቃማ መና ጎዳይ።

Currently Selected:

ሃገ 2: DFBE

Highlight

Copy

Compare