ዶመ 50

1ዮሴፎ ባረ አዉዋ አሃ ቦላ ኩንዲደ፥ ዬኬዳነ አ የሬዳ። 2ሄዋፐ ጉየ፥ ዮሴፎ ልያ ሺሽያ ባረ ኦሳንቻቱዋ ባረ አዉዋ እስራኤልያ አሃ ሳዊያ ሽቱዋ ኦኪደ መልሳና ማላ አዛዜዳ፤ ኡንቱንቱ ኦኪደ መልሴድኖ። 3ሽቱዋ ኦክያዌ ኦይታሙ ጋላሳ ኩመን ዉርሴዳ፤ አያዉ ጎፐ፥ ሄዌ ጋድያ ዎጋን ኦይታሙ ጋላሳ አኬዳ። ግብጼ አሳቱ አዉ ላፑን ታሙ ጋላሳ ዬኬድኖ።

4ዬኩዋ ጋላሳቱ አዳ ዎደ፥ ዮሴፎ ግብጼ ካትያ ጎለ አሳ፥ “ታን ህንተንቱ ስንን ናሸቴዳዋ ግዶፐ፥ ህንተንቱ ካትያዉ ሀዋዳን ያጊደ ኦድተ፤ 5‘ታ አዉ ታና እት ጫቁዋ ጫቂሴዳ፤ እ ታና፥ “ታን ሀያና ሀናይ፤ ታን ታዉ ካናነ ቢታን ቦኬዳ ጎንጎሎ ዱፉዋን ታና ሞጋ” ያጌዳ። ሄዋ ድራዉ ሀእ ታን ፑደ ባደ ታ አዉዋ ሞጋና ማላ የዳርኪ! ሄዋፐ ጉየ ታን ስማና’ ያግተ” ያጌዳ።#ዶመ 47:29-31

6ካቲ፥ “እ ኔና ጫቂሴዳዋዳን ፑደ ባደ ነ አዉዋ ሞጋ” ያጌዳ።

7ዮሴፎ ባረ አዉዋ ሞጋናዉ ፑደ ቤዳ። ካትያ ኦሳንቻቱ ኡባይ፥ አ ካትያ ጎለን ደእያ ዎልቃማ አሳይ ኡባይነ ግብጼ ቢታን ደእያ ዎልቃማ አሳይ ኡባይ ዮሴፋ ካሊደ ቤድኖ። 8ቃይ ዮሴፎ ሶ አሳይ ኡባይ፥ አ እሻቱዋነ አ አዉዋ ሶ አሳይ ቤድኖ፤ ኡንቱንቱ ናናይ፥ ኡንቱንቱ ሚዛይነ ኡንቱንቱ ዶርሳ ዉዲ ጻላላይ ገሴመን አቴዳ። 9ፓራ ጋረቱካ ፓራ አሳቱካ አናና ፑደ ቤድኖ፤ አ ካሊደ ቤዳ አሳይ ሎይ ዳራ።

10ኡንቱንቱ ዮርዳኖሳ ሻፋ ማታን ደእያ አጻደ ግያ ኡዱማ ጋኪደ፥ ባረንቱ ቃላ ቁ ኦደ፥ አዉ ዝላሌድኖነ ዬኬድኖ፤ ያን ዮሴፎ ባረ አዉዋ ዬኩዋን ላፑን ጋላሳ ኡቴዳ። 11ሄ ቢታን ደእያ ካናነ አሳቱ አጻደ ግያ ኡዱማን ሄ ዬኩዋ በኤዳ ዎደ፥ “ግብጼቱ አያ ይባታ ዬኩዋ ዬክኖ!” ያጌድኖ። ሄዋ ድራዉ ዮርዳኖሳ ማታን ደእያ ሄ ሳአይ፥ አቤል-ምጽራይማ ጌተቴዳ።

12ያቆባ ናናይ ባረንቱ አዉ ኡንቱንታ አዛዜዳዋዳን ኦድኖ፤ 13ኡንቱንቱ አ አሃ ካናነ ጋድያ አፊደ፥ ማምረ ማታን ደእያ ማክጴላ ግያ ጎንጎሉዋን፥ አብራሃመ ሂትያ ኤፍሮናፐ ሞጎ ሻሜዳ ጋድያን አ ሞጌድኖ።#ኪታ 7:16 14ዮሴፎ ባረ አዉዋ ሞጌዳዋፐ ጉየ፥ ባረ እሻቱዋናነ አ አዉዋ ሞጋናዉ አናና ቤዳ ሀራ አሳቱዋ ኡባቱዋና ግብጼ ስሜዳ።

ዮሴፎ ባረ እሻቱዋ ዎፕሴዳ

15ኡንቱንቱ አዉ ሀይቂ ድጌዳዋ በኢደ፥ ዮሴፎ እሻቱ ባረንቱ ግዱዋን፥ “ኦን ኤሪ ዮሴፎ ኑና ባረ ኡሉዋን ሞርኮፐነ ኑን አዉ ኦዳ ኢታባ ኡባዉ ሀሉዋ ከሳና ኮዮፐ፥ ኑን ዋናኔ?” ያጌድኖ። 16ሄዋ ድራዉ ዮሴፎኮ ሀዋ ማላ ኪታ ኪቴድኖ፤ “ነ አዉ ሀይቃናፐ ካሰ፤ 17‘ህንተ ዮሴፎ፥ “ኔን ነ እሻቱዋ ናጋራነ ኡንቱንቱ ኔና ናቄዳ ኢታ ናቁዋ ሀያና አቶ ያጋ” ያጌዳ ጊደ ኦድተ’ ያጌዳ። ሄዋ ድራዉ ሀእ ሀያና፥ ኑ ናጋራ፥ ነ አዉዋ ጾሳ ቆማቱዋ ናጋራ አቶ ያጋ” ያጌድኖ። ኪታይ ባረኮ ጋኬዳ ዎደ፥ ዮሴፎ ዬኬዳ።

18ሄዋፐ ጉየ አ እሻቱ ባረንቱ ሁጲያዉ አኮ ዪደ፥ አ ስንን ጉፋኒደ፥ “ኑን ነ አይለቱዋ” ያጌድኖ።

19ሽን ዮሴፎ ኡንቱንታ፥ “ያዮፕተ፤ ታና ህንተንቶ ጾሳ ጌድተየ? 20ህንተንቱ ታዉ ኢታናዉ ኦድታ፤ ሽን ሀቼዋዳን ዳሮ አሳይ ሀይቀናን አታና ማላ፥ ጾሳይ ሎኦተዉ ሀዋ ኦዳ። 21ሄዋ ድራዉ ስም ህንተንቱ ያዮፕተ፤ ታን ህንተናነ ህንተንቱ ናና ምዛና” ያጊደ፥ እ ኡንቱንታ ምንደ ሎኦ ቃላ ሃሳዬዳ።

ዮሴፎ ሀይቁዋ

22ዮሴፎ ባረ አዉዋ ሶ አሳ ኡባና ግብጼን ጋምኤዳ፤ እ ጼታነ ታሙ ላይ ደኤዳ፤ 23ኤፍሬማ ናና፥ ሄዘን የለታ በኤዳ፤ ቃይ ምናሰ ናኣ ማኪና ናናነ እ ባረ ናና ኦዳ።

24ሄዋፐ ጉየ ዮሴፎ ባረ እሻቱዋ፥ “ታን ሀያና ሀናይ፤ ሽን ጾሳይ ህንተንታ ማዳናዉ ቱሙ ጾሞሳና፤ እ ህንተንታ ሀ ቢታፐ ከሲደ፥ አብራሃመዉ፥ ይሳቃዉነ ያቆባዉ እማና ጊደ ጫቄዳ ቢታ አፋና” ያጌዳ። 25ዮሴፎ እስራኤልያ ናና፥ “ጾሳይ ህንተንታ ማዳናዉ ቱሙ ጾሞስያ ዎደ፥ ህንተንቱ ታ መቀ ሀ ቢታፐ ፑደ አኪደ ቢተ” ያጊደ ጫቂሴዳ።#ከሳ 13:19፤ ኢያሳ 24:32፤ እብራ. 11:22

26ዮሴፎ ጼታነ ታሙ ላይ ደኢደ ሀይቄዳ፤ ኡንቱንቱ ሽቱዋን አ አሃ ኦኪደ መልሴዳዋፐ ጉየ፥ ግብጼ ቢታን ሳጽንያን የጌድኖ።

Currently Selected:

ዶመ 50: DFBE

Highlight

Compare

Copy