ዶመ 43

ዮሴፎ እሻቱ ቢንያማና ስሚደ ግብጼ ቤድኖ

1ሀእነ ኮሻይ ካናነ ቢታን ዎልቃሜዳ። 2ያትና ኡንቱንቱ ግብጼፐ አሄዳ ካ ኡባ ም ዉርስ ድግና፥ ኡንቱንቱ አዉ፥ “ቃይካ ጉየ ቢደ ኑዉ አማሬዳ ካ ዎምተ” ያጌዳ።

3ሽን ይሁዳይ አ፥ “ሄ ብታኒ ኑና፥ ‘ህንተ እሻይ ህንተናና ያና ዮፐ፥ ታ ዴሙዋ ዛር በእክታ’ ያጊደ ሎይ ኦዴዳ። 4ኔን ኑ እሻ ኑናና የዶፐ፥ ኑን ዱገ ቢደ ነዉ ካ ሻማና። 5ሽን ኔን አ የደናዋ ግዶፐ፥ ኑን ዱገ ቦኮ፤ አያዉ ጎፐ፥ ሄ ብታኒ ኑና፥ ‘ህንተ እሻይ ህንተናና ያና ዮፐ፥ ህንተንቱ ታ ዴሙዋ ዛር በእክታ’ ጌዳ” ያጌዳ።

6እስራኤሊ፥ “ህንተንቱ፥ ‘ኑዉ ሀራ እሻይ ደኤ’ ጊደ ኦዲደ ሀ መቱዋ ታ ቦላ አያዉ አሄድቴ?” ያጌዳ።

7ኡንቱንቱ አ፥ “ሄ ብታኒ ኑባነ ኑ ሶ አሳባ ሎይ ኦቼዳ። እ ኑና፥ ‘ህንተ አዉ ሀእካ ፓጻ ደኢ? ህንተንቶ ሀራ እሻይ ደኢ?’ ያጊደ ኦቼዳ። ኑን እ ኦቼዳዋ አዉ ዛሬዶ። እ ኑና፥ ‘ህንተ እሻ ዱገ ሃ አህተ’ ጋናዋ ኑን አያን ኤራኔ?” ያጌድኖ።

8ይሁዳይ ባረ አዉዋ እስራኤልያ፥ “ኑንካ ኔንካ ኑ ናናይካ ፓጻ ደአና ማላነ ሀይቀናን አታና ማላ፥ ናኣ ታናና የዳ፤ ኑን ኤለካ ባና። 9ናኣ ታ ዋሰተን እማ፤ አባን ታና ኦቻ፤ ታን አ ነዉ ሳሮ ዛራደ አሀና ዮፐ፥ ታ ደኡዋ ኡባን ነ ሸቃይ ታና ጋኮ! 10ኑን ጋምእቤናዋ ግድንቶ፥ ሀኖደ ላኤንዋ ያ ጋኪደ ስማና ሽን” ያጌዳ።

11ሄዋፐ ጉየ ኡንቱንቱ አዉ እስራኤለ ኡንቱንታ፥ “ሄዋ ግዶፐ፥ ያትተ፤ ሄ ብታንያዉ ኩሽያ ገንያዋ ሀ ቢታን ዶሌዳዋ ኡባፐ ሎእያዋ ዶርተ፤ ሄዌነ ባላሳነ ግያ ልያ፥ ኤሳ፥ ሳዉዋ፥ ካርቢያነ ታምረ ላዉዝያ ግያ ምቱዋ ቴራ ህንተንቱ ኦጎሩዋን የጊደ አክ ቢተ። 12ህንተንቱ ኦጎሩዋ ዶናን ስሜዳ ብራይ ባለዳዋ ግዳናዉ ዳንዳይያ ድራዉ፥ ብራካ ላኡ ኩሸ ኦደ አክ ቢተ። 13ቃይ ህንተንቱ እሻነ አኪደ፥ ሄ ብታንያኮ ኤለካ ጉየ ቢተ። 14እ ህንኮ ህንተንቱ እሻ የዳና ማላ፥ ቢንያመነ ህንተናና ያና ማላ፥ ኡባ ዳንዳይያ ጾሳይ ሄ ብታኒ ህንተንቶ ቃረታናዳን ኦ። ታና ግዶፐ፥ ታ ናናቱዋፐ መላ አቶፐነ አታድ” ያጌዳ።

15ሄዋ ድራዉ ሄ አሳቱ እሞታነ ላኡ ኩሸ ብራነ ቃይ ቢንያማነ አኬድኖ። ኡንቱንቱ ዱገ ግብጼ ቢደ፥ ዮሴፎ ስን ሺቄድኖ። 16ዮሴፎ ቢንያማ ኡንቱንቱና በኤዳ ዎደ፥ ባረ ጎለ ካፑዋ፥ “ሄ አሳ ታ ሶ አካደ ባ፤ እት መህያ ሹካደ ጊግሳ፤ ኡንቱንቱ ሴታ ጋላሳን ላጻ ታናና ሚኖ” ያጊደ አዛዜዳ።

17ያትና እ ዮሴፎ አዉ ኦዴዳዋዳን ሄ አሳ ዮሴፎ ሶ አፌዳ። 18አሳቱ ዮሴፎ ሶ ቤዳ ድራዉ፥ ያዬድኖ፤ ኡንቱንቱ፥ “ኑን ሀዋ ዬዳዌ ኮይሮ ኦጎሩዋና ስሚደ ቤዳ ብራ ድራሳ፤ እ ኑና ዋናዉ፥ አይለተን ሞዳናዉነ ኑ ሀረቱዋ አካናዉ ሀኔዳ” ያጊደ ቆፔድኖ።

19ሄዋ ድራዉ ኡንቱንቱ ዮሴፎ ጎለ ፐንግያ ጋኪደ፥ ጎልያ ካፑዋ ሃሳይሴድኖ፤ 20“ታ ጎዳዉ፥ ኑን ኮይሮ ካ ዎማናዉ ሀዋ ዬዶ፤ 21ስሚደ ኑን ቃማ አቅያ ሳኣን ኦጎሩዋ ብሊደ፥ ሁጲያን ሁጲያን ኑ ብራይ ፓጨናን ኑ ኦጎሩዋ ዶናን ደእያዋ ደሜዶ፤ ሄዋ ድራዉ ሀእ ኑን አ ጉየ አኪደ ዬዶ። 22ቃይ ኑን ካ ዎማናዉ ሀራ ብራካ አሄዶ። ኑ ብራ ኑ ኦጎሩዋ ኦጎሩዋ ዶናን ኦን ዎደንቶነ ኤሮኮ” ያጌድኖ።

23እ ኡንቱንታ፥ “ሄዌ አይነ ባዋ፤ ያዮፕተ! ህንተንቱ ጾሳይ፥ ህንተንቱ አዉዋ ጾሳይ፥ ህንተንቱ ኦጎሩዋ ግዶን ህንተንቶ ብራ እሜዳ፤ ታን ህንተንቱ ብራ አካድ” ያጌዳ። ሄዋፐ ጉየ፥ እ ስሞና ኡንቱንቱኮ ከሴዳ።

24ሄ ብታኒ ሄ አሳ ዮሴፎ ሶ አፊደ፥ ኡንቱንቱ ገድያዉ ሃ አይና፥ ባረንቱ ገድያ ሜጨቴድኖ። ኡንቱንቱ ሀረቶ ሀርቁዋ የጌዳ። 25ዮሴፎ ሴታ ጋላስ ዪና እማናዉ፥ ኡንቱንቱ ባረንቱ እሞታ አዉ ጊግሴድኖ፤ አያዉ ጎፐ፥ ኡንቱንቱ ያን ማናዋ ስስ ኡቴድኖ።

26ዮሴፎ ባረ ሶ ገሌዳ ዎደ፥ ኡንቱንቱ ሶ አሄዳ ባረንቱ እምያዋ ሶን አዉ እሜድኖ፤ ኡንቱንቱ አ ስንን ሳኣ ጋኪደ ጎይኔድኖ። 27እ ኡንቱንቱ ሳሮተ ኦች ስሚደ፥ “ህንተንቱ ታዉ ኦዴዳ ህንተንቱ አዉ ጭማይ ሎኤ? ሀእካ እ ፓጻ ደኢ?” ያጌዳ።

28ኡንቱንቱ፥ “ኤ፥ ነ ቆማይ፥ ኑ አዉ ሀእካ ፓጻ ደኤ፤ እ ሎአ” ያጊደ ሆኪደ አዉ ጎይኔድኖ።

29እ ባረ አት ናኣ ቢንያማ በኤዳ ዎደ ኡንቱንታ፥ “ህንተንቱ ኦዴዳ ዉርሰ ቴፋ ህንተንቱ እሻይ ሀዌ?” ያጌዳ። ቃይ እ ቢንያማ፥ “ታ ናአዉ፥ ኔና ጾሳይ አንጆ” ያጌዳ። 30ዮሴፎ አ እሻይ አዉ ጎምፓይ ምሸቴዳ ድራዉ፥ ዬካናዉ እት ሳኣ ላዉሁ ጌዳ። እ ባረ ዱማ ቆልኡዋ ገሊደ ያን ዬኬዳ።

31እ ባረ ዴሙዋ ሜጨቶዋፐ ጉየ ከሲደ፥ ባረና ምንደ፥ “ቁማ አተ” ያጌዳ።

32ኡንቱንቱ አዉ ዱማ፥ ሄ እሻቶ ዱማ፥ ሄዋን አናና ምያ ግብጼ አሳቶ ዱማ አድኖ፤ አያዉ ጎፐ፥ ግብጼ አሳቱ እብራዌ አሳቱዋና እትፐ ሚክኖ። ሄዌ ግብጼ ቢታ አሳ ሸነይያዋ። 33ኡንቱንቱ ዮሴፎ ስንን ባይራይ ባረ ባይራተዳን፥ ቴፋይ ባረ ቴፋተዳን ማራን ኡቴድኖ። ኡንቱንቱ እቱ እቱዋ ጼሊደ፥ ኡንቱንታ ዎት ኡትሴድኖንቶ በኢደ ማላለቴድኖ። 34ዮሴፎ ማዳፐ ኡንቱንቶ ቁማ ግሽያ ዎደ፥ ቢንያመዉ ጋኬዳዌ ሀራቱዋፐ እቼሹ ኩሽያ ዳሬ፤ ያትና ኡንቱንቱ ናሸቲደ አናና ሜድኖነ ኡሼድኖ።

Currently Selected:

ዶመ 43: DFBE

Highlight

Compare

Copy