ዛረዋ 33

ሙሴ እስራኤልያ ዛራቱዋ ኡባ አንጄዳ

1ጾሳ አሳ ግድያ ሙሴ ሀይቃናፐ ካሰቲደ፥ እስራኤልያ አሳ አንጄዳ አንጁዋ ቃላይ ሀዋ። 2እ ሀዋዳን ያጌዳ፤ “መና ጎዳይ ሲና ደርያፐ ዬዳ፤ ኤዶማፐ ኑ ቦላን ሃ ፖኤዳ፤ ፓራና ደርያፐ ባረ አሳዉ ፖኤዳ። ሻአን ፓይደትያ ኪታንቻቱ አናና ደኢኖ። አ ኡሸቻ ባጋና ታማ ላጩ ደኤ። 3ጾሳዉ ኔን ነ አሳ ሲቃዳ። ጌሻቱ ኡባይ ነ ኩሽያን ደኢኖ፤ ነ ገድያ ጻጱዋን ጉልባቲደ ጎይኒኖ፤ ያቲደ ኔፐ አዛዙዋ አኪኖ። 4ሙሴ እሜዳ ህጊ ያቆባ አሳዉ ላታ። 5እስራኤልያ ዛራቱ ኡባይነ ይሹሩና ዛርያ ካፓቱ ሺቄዳ ዎደ፥ ጾሳይ ባረ አሳ፥ እስራኤልያ ቦላ ካተቴዳ።

6“ሮቤል ሀይቆፖ፤ እ ፓጻ ደኦ። አ አሳይካ ፓይዱዋን ጮራቶ” ያጌዳ።

7ሙሴ ይሁዳ ዛርያባ ሀዋዳን ያጌዳ፤ “አቤት መና ጎዳዉ፥ ይሁዳ ዋሱዋ ስሳ፤ ሀራ ባረ ዳቦቱዋና ኡንቱንቱ ጋከታናዳን ኦ። ኡንቱንቱ ኩሽያ ምን፤ ኡንቱንቱ ባረንቱ ሞርክያና ኦለትያ ዎደ፥ ኔን ኡንቱንታ ማዳ!” ያጌዳ።

8ሙሴ ሌዊያ ዛርያባ ሀዋዳን ያጌዳ፤#ከሳ 17:7፤ 28:30፤ ፓይ. 20:13 “ነ ቱሚምነ ኡሪሚ ነ ዶሴዳ አሳሳ። ኔን ማሳሀን ፓጬዳ፥ ማሪባ ሃን ፓሉመቴዳ አሳሳ። 9ባረና የሌዳዋንቱፐ፥ ባረ እሻቱዋፐነ ባረንቱ ናናቱዋፐ አደ፥ ኡንቱንቱ ነዉ አማነቴዳዌ አ፤ ነ ጫቁዋ ቃላዉ ኡንቱንቱ አማነቴድኖ። 10ኡንቱንቱ ነ ዎጋ ያቆባ፥ ነ ህግያካ እስራኤልያ ታማርሲኖ። ነ ስንን እጻና ጩዋዪኖ፤ ነዉ ያርሽያሳን ኡባና ጹግያ ያርሹዋ ያርሺኖ። 11አቤት መና ጎዳዉ ኡንቱንቱ ኩሺ ኦዳዋ አንጃ፤ ኡንቱንቱ ኦያ ኡባባን ነ ናሸትያዋ ኡንቱንቶ ቆንጭሳ። ኡንቱንቱ ቦላ ደንድያዋ መንሬ ኦላ፤ ኡንቱንቱ ሞርከቱዋ ላኤን ደንፓ” ያጌዳ።

12ቢንያማ ዛርያባ ሀዋዳን ያጌዳ፤ “መና ጎዳይ ሲቄዳ አሳይ አን አማነቲደ ደኤ። ጋላሳ ኩመንን ኡንቱንታ መና ጎዳይ ናጌ፤ ባረ ሀሽያን ቶኪደ ሸምፕሴ” ያጌዳ።

13ዮሴፎ ዛርያባ ሀዋዳን ያጌዳ፤ “መና ጎዳይ እራ እምያዋን፥ ጋድያፐ ሃ ፑልትስያዋን፥ ኡንቱንቱ ቢታ አንጆ። 14አዋይ ካያ ዶረቴዳ አይፍያንነ ዎድያን ዎድያን ካእያ አይፍያን አንጀቶ። 15በንፐ ደእያ ኡንቱንቱ ደረቱነ ዞዜቱ ሎኦ አይፍያን አንጀትኖ። 16ኡንቱንቱ ቢታይ ሎኦባ ጻላላ ኩሜዳዋ ግዶ፤ ቡራን ኤጽያ ታማ ግዶን ሃሳዬዳ፥ ጾሳፐ ቤትያ አንጆ ጻላላን ኩሜዳዋ ግዶ። ሀ አንጆቱ ኡባይ ዮሴፎ ዛርያ ጋክኖ፤ አያዉ ጎፐ፥ እ ባረ እሻንቱ ግዶን ካፑዋ። 17ዮሴፎ ኮይሮ የለቴዳ ኮሩማዳን ምኖ፤ አ ካጨቱ መን ካጭያዳን ምኖ። አ ካጨቱ ሻአን ፓይደትያ ምናሰ ዛራቱዋ፤ ታሙ ሻአን ፓይደትያ ኤፍሬማ ዛራቱዋ። ሄ ካጨቱዋን እ ካዉተቱዋ ቃይጫና፤ ቢታ ጋጻ ጋካናዉ ኡንቱንታ እ ሱጋና” ያጌዳ።

18ዛብሎና ዛርያባ ሀዋዳን ያጌዳ፤ “ኔኖ ዛብሎና፥ ኔን ነ ከሳን ናሸታ፤ ይሳኮራ፥ ኔንካ ነ ዱንካንያን ናሸታ። 19ኡንቱንቱ ካረ ጋደ አሳ ባረንቱ ደርያኮ ጼሳና፤ ሄዋን ኡንቱንቱ ጌሻተ ያርሹዋ ያርሻና። ባረ አቁዋነ ባረንቱ ዱረተ፥ አባፐነ አባ ማታ ሻፍያፐ ደማና” ያጌዳ።

20ጋዳ ዛርያባ ሀዋዳን ያጌዳ፤ “ኡንቱንቱ ቢታ አሴዳ ጾሳይ ጋላተቶ፤ ጋድ ሞርክያ ሶምኡዋ መንናዉ፥ ጋሙዋዳን ሻንካቴ። 21ካፓቶ ጌዳ ሎኦ ቢታ ኡንቱንቱ አኬድኖ፤ እስራኤልያ ካፓቱ ሺቄዳ ዎደ፥ ኡንቱንቱ መና ጎዳ ሸንያን ጌሻ ፕርዳ ፕርዴድኖ” ያጌዳ።

22ዳነ ዛርያባ ሀዋዳን ያጌዳ፤ “ዳን ዎዳላ ጋሙዋ ማላ፤ እ ባሳነፐ ጉፒደ ከሳና” ያጌዳ።

23ንፍታሌማ ዛርያባ ሀዋዳን ያጌዳ፤ “ንፍታሌም መና ጎዳ አ ኬካተንነ አንጁዋን ዱረቴዳ፤ ኡንቱንቱ ቢታይ ጋሊላ አባፐ ቢደ ገድሳ ባጋ ጋኬ” ያጌዳ።

24አሴራ ዛርያባ ሀዋዳን ያጌዳ፤ “አሴር ሀራ ዛራቱ ኡባፐ አደ አንጀቴዳዋ። ባረ እሻቱዋንካ ዶሰቴዳዋ ግዶ። አ ቢታይ ዛይትያን ዱረቶ። 25ኡንቱንቱ ካታማቱካ ብራታ ካርያን ጎርደቲደ ናገትኖ፤ ባረ ላይ ኡባን እ ዎልቃማ ግድኖ።

26“ኔኖ ይሽሩና፥ ሳሉዋፐ ህንተና ማዳናዉ፥ ባረ ግታተን ሻራን ሀመትያ ህንተ ጾሳ ማላ ጾስ ባዋ። 27መና ጾሳይ ህንተንቶ ደኡዋ፤ አ መና ኩሸቱ ህንተፐ ጋርሳና ደኢኖ። እ ህንተ ስንፐ ህንተ ሞርከቱዋ የደርሴዳ፤ ህንተ ኡንቱንታ ዉርስ ይሳናዳን ህንተንቶ ኦዴዳ። 28ሄዋ ድራዉ፥ እስራኤልያ አሳይ፥ ቦችያዌ ባይናን ሳሮተን ደአና፤ ያቆባ ፑልቱ ቁማይነ ዎይንያ ኤሳይ ኩሜዳ ጋድያን ደአና፥ ሳሉዋ እራይ ቡክያሳን ደአና። 29ህንተኖ እስራኤልያ አሳዉ! ህንተ ዎት አንጀቴድቴ! መና ጎዳይ አሼዳ ህንተ ማላይ ኦኔ? እ ህንተንቶ ጎንዳለነ ህንተና ማድያዋ፤ አን ህንተ ጾንያ ማሻ። ህንተ ሞርከቱ ህንተ ስንን ጉፋናና፤ ህንተካ ኡንቱንቱ ጌሱዋ ላላና” ያጌዳ።

Currently Selected:

ዛረዋ 33: DFBE

Highlight

Copy

Compare