ዛረዋ 24

ማቻቶ የድያዋነ ላኤን አኩዋ

1“እት አሳይ ማቼ አክ ስሚደ፥ እት ኢታባ እ ቦላ ደሚደ እዞ እጾፐ፥ እዝዉ ፓራማ ጻፍ እሚደ፥ ባረ ጎለፐ ከሲደ የዶፐ፥#ማቶሳ 5:31፤ 19:7፤ ማር. 10:4 2እዛ አ ጎለፐ ከሳደ፥ ሀራ አስና ገሎፐ፥ 3ሄ ላኤን አስናይካ እዞ ዶሰናን እጺደ፥ ፓራማ እዝዉ ጻፍ እሚደ፥ ባረ ጎለፐ እዞ ከሲደ የዶፐ፥ ዎይ እዞ አኬዳ ሄ ላኤን አስናይ ሀይቆፐ፥ 4አ ቱኔዳ ድራዉ፥ ኮይሮ ፓራሜዳ አስናይ ላኤን እዞ ዛሪደ አኮፖ። ሄዌ መና ጎዳ ማታን እጸቴዳዋ፤ ቃይ ህንተካ መና ጎዳይ ህንተ ጾሳይ ህንተንቶ እምያ ጋድያን ሀዋ ማላ ናጋራ ኦፕተ።

5“ኦራ ማቼ አኬዳ አሳይ ኦላዉ ቦፖ፤ ሀራ ዴጾ ኦሱዋካ አዉ እሞፕተ። እት ላይይ አና ጋካናዉ፥ ሀቃነ ቤናን ባረ አኬዳ ማቻቶ ናሸቾ።

ዱማ ዱማ ህገቱዋ

6“አይ አሳይነ አጮ ዎጻ ዎይ ማይድያ ኦይቆፓ፤ አያዉ ጎፐ፥ ሄዌ ጎልያ አሳይ ጋጭያባ ዪደ፥ ሀይቂኖ ግያዋ።

7“ባረ እሻ ግድያ እስራኤልያ አሳ ዉእ አፊደ፥ አይልያ ከስያ አሳይ ዎይ ሀራዉ ዛልእያ አይ አሳይነ ሀይቆ። ሄዋዳን ኦያዋን ህንተ ግዶፐ ኢታ ድጊታ።#ከሳ 21:16

8“ዎልቃማ ጋልባ ሀርግያን ሳከትያ አሳዉ ሌዊያ ዛረ ግድያ ቄሳቱ ህንተና ታማርሴዳዋዳን ኡባባ ፖልተ፤ ታ ኡንቱንታ አዛዜዳዋ ሄዋዳን ኦናዉ ናገትተ።#ዎጋ 13:1—14:54 9ህንተ ግብጼፐ ከሲደ ኦግያን ደእሽን፥ መና ጎዳይ ህንተ ጾሳይ ሚርያም ቦላ ኦዳዋ ሀሳይተ።#ፓይ. 12:10

10“ኔን ነ ሾሮ እትባ ታልኣደ፥ እ ኦይያዋ ኦቻናዉ አ ጎለ ገሎፓ።#ከሳ 22:26-27 11ኔን ካረን ኤቃ ደእሽን፥ ነ ታልኤዳ ብታኒ ኦይያዋ ባረ ጎለፐ ከሲደ ነዉ እሞ። 12እ ህዬሳ ግዶፐ፥ ነ አጮ ኦይቄዳ አ ማዩዋ ነ ሶን አይሶፓ። 13እ ማዪደ አቃናዳን፥ ኦማርስ ዎደ አዉ ጉየ ዛራ፤ እ ሄዋን ኔና ጋላታና። ሄዌ መና ጎዳ ነ ጾሳ ማታንካ ነዉ ጌሻተ ግዳናዋ።

14“ነ እሻ ግድያ እስራኤልያ አሳ ግድና፥ ዎይ ነ ቢታ ካታማፐ እቱዋን ደእያ ካረ ቢታ አሳ ህዬሳ ቃጻራደ ናቆፓ።#ዎጋ 19:13 15እ ሀች ኦዳዋ ሀች አካናዉ ምንሲደ ኮይያ ድራዉ፥ አዋይ ዉለናን ሀች ጭጋ። ሄዌ ዮፐ፥ መቶታንቻይ ኔፐ መና ጎዳዉ ዋስና፥ ነዉ ናጋራ ግዳናዋ።

16“ናናይ ኦዳ ናጋራ ድራዉ፥ አዎቱዋ ዎናዉ በሰና፤ ቃይ አዎቱ ኦዳ ናጋራ ድራዉካ፥ ናናቱዋ ዎናዉ በሰና። አሳይ ኡባይ ባረ ኦዳ ናጋራን ናጋራን ሀይቃናዉ በሰ።#2 ካታ. 14:6፤ 2 ኦዱዋ 25:4፤ ህዝ. 18:20

17“ካረ ቢታ አሳቱ ፕርዳነ አዉ አታ ባይናዋንቱ ፕርዳ ደሽሶፓ፤ አምአት ማዩዋ አ ታልኤዳዎ ጋደ ኦይቆፓ።#ከሳ 23:9፤ ዎጋ 19:33-34፤ ዛረ. 27:19 18ህንተካ ግብጼ ጋድያን አይልያ ግዴዳዋነ መና ጎዳይ ህንተ ጾሳይ ህንተና ያፐ ዎዚደ ከሴዳዋ ሀሳይተ። ታን ሀዋ ህንተና አዛዝያዌ ሄዋ ድራሳ።

19“ነ ሾይቃፐ ካ ጫክያ ዎደ፥ ነ ዶጌዳ ምርቂያ ቆራናዉ ጉየ ቦፓ። መና ጎዳይ ነ ጾሳይ ነ ኩሽያ ኦሶ ኡባን ኔና አንጃና ማላ፥ ሄዋ በትያዉ፥ አታ አዉ ባይና ናናቶነ አምኤቶ አጋ።#ዎጋ 19:9-10፤ 23:22 20ነ ዎጋራ አይፍያ ማጽያ ዎደ፥ እቱነ አተናን ዉርሳደ ማጻናዉ ላኤንዋ ጉየ ስሞፓ፤ አቴዳዋ በትያዉ፥ አታ አዉ ባይና ናናቶነ አምኤቶ አጋ። 21ነ ዎይንያ አይፍያ ማጽያ ዎደ፥ አቴዳዋ ቃርማናዉ ላኤንዋ ጉየ ቦፓ፤ ሄዋ በትያዉ፥ አታ አዉ ባይና ናናቶነ አምኤቶ አጋ። 22ህንተካ ግብጼ ጋድያን አይልያ ግዲደ ደኤዳዋ ዶጎፕተ። ታን ሀዋ ህንተና አዛዝያዌ ሄዋ ድራሳ።

Currently Selected:

ዛረዋ 24: DFBE

Highlight

Copy

Compare