ዛረዋ 10
10
ሙሴ ታሙ አዛዞቱዋ ላኤንዋ አኬዳ
(ከሳ 34:1-10)
1“ሄ ዎደ መና ጎዳይ ታና ሀዋዳን ያጌዳ፤ ‘ኮይሮዋንቱ ማላ ላኡ ማሰቴዳ ሹቻቱዋ ጊግሳ። ያታደ ታኮ ደርያ ሃ ፑደ ከሳ፤ ቃይ ም ታቦታካ መ። 2ካሰ ኔን መንዳ ማሰቴዳ ሹቻቱ ቦላ ደእያ ቃላቱዋ ሀ ማሰቴዳ ሹቻቱ ቦላ ታን ጻፋና፤ ኔንካ ኡንቱንታ ታቦታ ግዶን ዎሳ’ ያጌዳ።
3“ታን ኦዶሩዋፐ ታቦታ መድ። ካሰዋንቱ ማላ ላኡ ማሰቴዳ ሹቻቱዋካ ጊግሳድ፤ ያታደ ሄ ላኡ ማሰቴዳ ሹቻቱዋ ታ ኩሽያን ኦይቃደ፥ ደርያ ፑደ ከሳድ። 4ህንተ ሺቁዋ ኦዳ ጋላስ፥ ደርያ ቦላን ታማ ግዶፐ መና ጎዳይ ህንተንቶ ኦዴዳ ቃላቱዋ፥ ሄዋንቱካ ታሙ አዛዞቱዋ፥ ካሰ ጻፌዳዋዳንካ ሀ ማሰቴዳ ሹቻቱ ቦላ መና ጎዳይ ጻፌዳ፤ ያቲደ እ ኡንቱንታ ታዉ እሜዳ። 5ሄዋፐ ጉይያን፥ ታን ደርያፐ ዱገ ዎደ፥ መና ጎዳይ ታና አዛዜዳዋዳን፥ ሄ ማሰቴዳ ሹቻቱዋ ታን መዳ ታቦታ ግዶን ዎድ፤ ሀእካ ኡንቱንቱ ያን ደኢኖ።
6“እስራኤልያ አሳይ ያእቃና አሳቱ ሃ ኦላይ ደኢያሳፐ ደንዲደ፥ ሞሰር ቤድኖ። አሮን ያን ሀይቂደ ሞገቴዳ፤ አ ናአይ ኤልኣዛር አ ላቲደ፥ አ ሳኣን ቄስያ ከሴዳ።#ፓይ. 20:28፤ 33:38 7ኡንቱንቱ ሄዋፐ ጉድጎዳ ግያሳ ቤድኖ፤ ያፐ ቃይ ጎግያ ሃቱ ደእያ ቢታ ዮጽባታ ግያሳ ቤድኖ። 8ሄ ዎደ፥ መና ጎዳ ጫቁዋ ታቦታ ቶካና ማላ፥ መና ጎዳዉ ኦና ማላ፥ አ ስንን ኤቃና ማላነ፥ ሀች ጋካናዉካ ኡንቱንቱ ኦያዋዳን መና ጎዳ ሱንን አንጃና ማላ፥ ሌዊያ ዛራቱዋ መና ጎዳይ ባረዉ ዱማዬዳ።#ፓይ. 3:5-8 9ሄዋ ድራዉ፥ ኡንቱንቱ እሻቱዋና ሻክና፥ ኡንቱንታ ጋክያባይ ዎይ ላታይ ሌዊያ ዛረቶ ባዋ፤ መና ጎዳይ ህንተ ጾሳይ ኡንቱንቶ ኦዴዳዋዳንካ፥ ኡንቱንቱ ላታይ መና ጎዳ።
10“ታን ካሰዋዳንካ ኦይታሙ ጋላሳነ ኦይታሙ ቃማ ደርያ ቦላን ጋምኣድ፤ መና ጎዳይ ሀእካ ታ ዎሳ ስሲደ፥ ህንተና ይሳናዉ ኮይቤና።#ከሳ 34:28 11መና ጎዳይ ታና፥ ‘ታን እማና ጋደ ኡንቱንቱ አዋቶ ጫቃ ዎዳ ቢታ ኡንቱንቱ ገላናዳንነ ላታናዳን፥ ሀ አሳፐ ስንና ኡንቱንታ ካለ’ ያጌዳ።
ጾሳይ ኮይያዌ አዛዘትያዋ
12“እስራኤልያ አሳዉ፥ መና ጎዳ ህንተ ጾሳይ ህንተፐ ኮይያዌ ሀዋ: መና ጎዳዉ፥ ህንተ ጾሳዉ፥ ያይተ፤ አ ኦግያን ኡባን ሀመትተ፤ አ ሲቅተ፤ ህንተ ኩመን ዎዛናፐነ ኩመን ሸምፑዋፐ መና ጎዳዉ፥ ህንተ ጾሳዉ ኦተ። 13ህንተዉ ሎአናዳን፥ ታን ሀች ህንተንቶ እምያ መና ጎዳ አዛዞቱዋነ አዋዮቱዋ ናግተ።
14“ሳሉነ ሳሉዋፐ ቦላና ደእያ ሳሎቱ፥ ቃይ ሳአይነ ሳኣን ደእያ ኡባባቱ ጾሳ ህንተ መና ጎዳባቱዋ። 15ግዶፐነ መና ጎዳይ ህንተ ማይዛ አዎቱዋን ናሸቲደ፥ ኡንቱንታ ሲቄዳ፤ ቃይ ሀች ህንተ በእያዋዳን፥ ኡንቱንቱፐ ጉይያን ኡንቱንቱ ዘረቱዋ ግድያ ህንተና ካዉተቱዋ ኡባፐ ዶሬዳ። 16ሄዋ ድራዉ፥ ህንተ ዎዛና ሾኩዋ ቃጻርተ፤ ቃይ ሀዋፐ ስንናዉ ሞርግያ ዞዛ ግዶፕተ። 17አያዉ ጎፐ፥ መና ጎዳይ ህንተ ጾሳይ ጾሳቱዋ ጾሳነ ጎዳቱዋ ጎዳ። እ ዎልቃማ ጾሳ፤ እ ዎልቃማነ ያሽያ ጾሳ። እ ዴሙዋ ጼል ፕርደናዋነ ማጋንጻ አከናዋ።#1 ጽሞ. 6:15፤ ሳፃ 17:14፤ 19:16፤ ኪታ 10:34፤ ሮመ 2:11፤ ጋላ. 2:6፤ ኤፈ. 6:9 18እ አዉ ባይና ናናቶነ አምኤቶ ኡንቱንቱ ፕርዳ ከሴ፤ በትያካ ሲቂደ፥ ቁማነ ማዩዋ አዉ እሜ። 19ህንተካ በተቱዋ ሲቅተ፤ አያዉ ጎፐ፥ ህንተ ህንተ ሁጲያዉካ በተ ግዲደ ግብጼን ደኤድታ። 20መና ጎዳዉ፥ ህንተ ጾሳዉ፥ ያይተ፤ አዉ ኦተ፤ አናና ኦይቀትተ፤ አ ሱንንካ ጫቂተ። 21ህንተ ህንተ አይፍያን በኤዳ ሄ ግታነ ያሽያ ማላልስያባቱዋ፥ ህንተንቶ ኦዳዌ እ ህንተ ጋላታቴ፤ ቃይ ህንተ ጾሳ። 22ግብጼ ቢታ ዎዳ ህንተ ማይዛ አዎቱ ኡባና ላፑን ታማ፤ ሀእ መና ጎዳይ ህንተ ጾሳይ ህንተና ሳሉዋ ጾልንተቱዋዳን ጮራዬዳ።#ዶመ 15:5፤ 22:17፤ 46:27
Currently Selected:
ዛረዋ 10: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
