አሞጻ 8

ቴራይ ኩሜዳ ኬሻ በስያ ሳፃ

1ኡባ ሞድያ መና ጎዳይ ታና ሀራ ሳፃ በሴዳ፤ ሄዌካ፥ ቴራይ ኩሜዳ ኬሻ። 2እ ታና፥ “አሞጻ፥ ሀ ኔን በእያዌ አዬ?” ያጊደ ኦቼዳ።

ታን፥ “ቴራይ ኩሜዳ ኬሻ በአይ” ያጋድ።

ያትና መና ጎዳይ ታዉ ሀዋዳን ያጌዳ፤ “ታ አሳ እስራኤላዉ ዉርሰይ#8:2 ዉርሰይ፦ ግያዌ እብራይስጸ ቃላን “ቴራ” ማላቴ። ጋኬዳ፤ ሀዋፐ ስንናዉ ታን ኡንቱንታ ሙረናን አከ” ያጌዳ።

3ኡባ ሞድያ መና ጎዳይ ሀዋዳን ያጌ፤ “ሄ ጋላስ ካትያ ጎልያን የጽያ የይ ዬኮ ላመታናዋ፤ ሀይቄዳ አሳ አሃይ ሙለ ሳኣን ዳራና፤ ቃይ ጮኡ ጊና፥ ያን ሃን ኦለታና” ያጌ።

እስራኤልያ ኩንደ

4ህንተኖ፥ መቶታንቻቱዋ የያዋንቶ፥ ጋድያን ደእያ ህዬሳቱዋካ ይሳናዉ ኮይያዋንቶ፥ ሀዋ ስስተ! 5ህንተ ሀዋዳን ያጊታ፤ “ኑን ካ ዛልአናዉ አግናይ ጼርያ ባላይ አዉደ አኔ! ቃይ ኑን ኑ ዛልእያ ዶማናዉ ሳምባታይ አዉደ አንዴሻ! ያትንቶ ኑን ካ ጉባን ማክ ማኪደ፥ ዳሮ ሚሻ አኪደ ባይዛና። ቃይ ዎርዶ ሚዛናን ልኪ ልኪደ፥ አሳ ጭማና። 6ኑን ህዬሳ ብራን፥ መቶታንቻካ መጽ ላኡ ገድያ ጫማን ሻማና፤ ቃይ ዛርጋ ሀርቁዋ ሙሩታ ዛርጋ ጋትያን ባይዛና” ያጊታ።

7መና ጎዳይ ያቆብ ጬቀትያ ባረ ሱንን ሀዋዳን ያጊደ ጫቄዳ፤ “ታን ኡንቱንቱ ኦዳ ኢታ ኦሱዋ ሙለካ ዶግከ። 8ቢታይ ቃጽያዌነ ጋድያን ደእያ አሳይ ኡባይ ዬክያዌ ሄዋ ጋሱዋና ግደኔየ? ኤ ናይለ ሻፋይ ኩንደ ቃጽያዋዳን፥ ቢታ ኡባይ ቃጺደ ባልቡቀታና፤ ቃይ ሄ ኩን ዎያዋዳን ዎና” ያጌዳ።

9ኡባ ሞድያ መና ጎዳይ ሀዋዳን ያጌ፤ “ሄ ጋላስ ታን አዋ ሴታ ጋላስ ዉልሳና፤ ሳኣካ ጋላስ ምሳና። 10ታን ህንተ ባላ ናሸቻ ካዮ፥ ህንተ የካ ዬኮ ላማና። መጽ እት ናአይ ሀይቂና ዬክያ አሳዳን፥ ህንተ ህንተ ሁጲያ ሜደቲደ ዋሩዋ ማያናዳን፥ ታን ህንተና ኦና። ሄ ጋላሳ ዉርሰይ ዳሮ ጫሞ ግዳናዋ” ያጌ።

11ኡባ ሞድያ መና ጎዳይ ሀዋዳን ያጌ፤ “በእተ፥ ታን ቢታ ኡባ ቦላን ኮሻ የድያ ጋላሳቱ ዪኖ። ታን ኮሻ የድያ ጋላስ፥ አሳይ ስሳናዉ መና ጎዳ ቃላ ዪደ ኮሻታናፐ አትና፥ ካ ዪደ ኮሻተና ዎይ ሃ ዪደ ሳመተና። 12አሳይ አዋይ ዉልያ ባጋ አባፐ አዋይ ዶልያ ባጋ አባ ጋካናዉነ ሁጲሳፐ ገድሳ ጋካናዉ ብቻራና። ኡንቱንቱ መና ጎዳ ቃላ ኮያናዉ ያነ ሃነ ዎጻና፥ ሽን ደምክኖ። 13ሄ ጋላስ ማላ ሎኦ ዎዶራቱነ ዎዳላቱ ሳሙዋን ዚል አጋና። 14ሳማርያ ኤቃቱዋን ጫቂያዋንቱ፥ ‘ዳና ጾሳይ ኤሮ!’ ያግያዋንቱነ፥ ‘በርሳቤሀ ጾሳይ ኤሮ’ ያግያዋንቱ ኩንዳና። ኡንቱንቱ ላኤን ሙለካ ደንድክኖ” ያጌ።

Currently Selected:

አሞጻ 8: DFBE

Highlight

Copy

Compare