አሞጻ 2

ሞኣባ

1መና ጎዳይ ሀዋዳን ያጌ፤ “ሞኣባ ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ኤዶማ ጋድያ ካትያ መቀ ብድን ከሳና ጋካናዉ ጹጌድኖ።#ኢሳ. 15:1—16:14፤ 25:10-12፤ ኤር. 48:1-47፤ ህዝ. 25:8-11፤ ሶፎ. 2:8-11 2ሄዋ ድራዉ፥ ታን ሞኣባ ጋድያን ታማ የዳና፤ ሄ ታማይ ቅርዮታ ካታማ ጌሶቱዋ ማና። ሞኣባ ጋድያ አሳይ ሻቢርሳ ግዶን፥ ኦላ ዋሱዋ ግዱዋንነ ማላካታ ፑኑዋ ግዶን ሀይቂ ዉራና። 3ታን ሞኣባ ጋድያ ሞድያዋ ይሳና፤ ቃይ ካፓቱዋ ኡባካ አናና እትፐ ዎና” ያጌ መና ጎዳይ።

4መና ጎዳይ ሀዋዳን ያጌ፤ “ይሁዳ ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ መና ጎዳ ህግያ እጼድኖ፤ አ አዛዙዋካ ናግበይክኖ። ኡንቱንቱ አዎቱ ካሌዳ ዎርዶ ጾሳቱ ኡንቱንታካ ባለድኖ። 5ሄዋ ድራዉ፥ ታን ይሁዳ ጋድያ ቦላ ታማ የዳና፤ ሄ ታማይ የሩሳላመ ጌሶቱዋ ማና” ያጌ።

እስራኤልያ ቦላን ጾሳይ ፕርድያ ፕርዳ

6መና ጎዳይ ሀዋዳን ያጌ፤ “እስራኤልያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ሚሻ አካና ድራዉ፥ ጽሉዋ ዛልኢኖ፤ ቃይ ጫማ አጩዋ አካና ግሻዉካ ህዬሳ ዛልኢኖ። 7ማንቆቱዋ ጋድያ ባናን ኩንድሲደ፥ ኡንቱንቱ ሁጲያ የኖ፤ ናቀቴዳዋንቱ ፕርዳካ ጌላዪኖ። ቃይ አዉነ ናአይ ላኡ እት ምሽራቶ ዎሹምያዋን ታ ጌሻ ሱን ሎይ ቱንሲኖ። 8ኡንቱንቱ አሳፐ አጮ ኦይቄዳ ማዩዋ ያርሽያ ሳኣን ኡባ ማታን ሂጺደ፥ አን ግሲኖ፤ ቃይ አሳፐ ማቃጮ ኦደ አኬዳ ዎይንያ ኤሳ ባረንቱ ጾሳ ጎልያን ኡሺኖ።

9“ግዶፐነ፥ ዝጋዳን አዱቂደ፥ ዎላዳን ምኔዳ አሞረ ጋድያ አሳቱዋ ኡንቱንቱ ስንፐ ይሴዳዌ ታና። ታን ኡንቱንቶ ቦላ አይፍያናካ ጋርሳ ጻጱዋናካ ኡባ ይሳድ።#ዛረ. 3:8-11 10ታን ህንተና ግብጼ ጋድያፐ ከሳደ፥ ባዙዋን ኦይታሙ ላይ ካለድ፤ ቃይ አሞረቱ ቢታካ ህንተንቶ ላታ ኦደ እማድ።

11“ህንተ አቱማ ናናቱ ግዶፐ ትምቢትያ ኦድያዋንታ፥ ህንተ ያላጋ አሳ ግዶፐካ ባረና ጾሳዉ ዱማዬዳ ናዝራዌቱዋ ደንድ። ህንተኖ፥ እስራኤልያ አሳቶ፥ ሀዌ ቱማ ግደኔ? ሀዋ ታን ጾሳይ ኦዳድ።#ፓይ. 6:1-8 12ሽን ህንተ ሄ ናዝራዌቱዋ ጫቁዋ ኮልሲደ፥ ዎይንያ ኤሳ ኡሼድታ፤ ትምቢትያ ኦድያዋንታካ፥ ‘ትምቢትያ ኦዶፕተ’ ያጊደ አዛዜድታ።

13“በእተ፥ ካ ዳርሲደ ጫኔዳ ጋሪ መእያዋዳን፥ ታን ህንተና መንና። 14ፓላ ዎጽያዌ ባቃቲደ ከስ አከና፤ ምኖ ዎልቃይ እጻና፤ ኦላንቻይካ ባረ ሸምፑዋ አሸና። 15ዎንዳፍያን ዱክያዌ ባረ ሳኣን ኤቃናዉ ዳንዳየና፤ ገድያ ኤሱካ ከስ አከና፤ ፓራዉካ ባረ ሸምፑዋ አሸና። 16ሄ ጋላስ ሀራይ አቶ ኦላንቻቱዋ ግዶን ሎይ ጻላንቻ ግያዋንቱካ ካሎ ጺራ ባቃታና” ያጌ መና ጎዳይ።

Currently Selected:

አሞጻ 2: DFBE

Highlight

Copy

Compare