ኪታ 5

ሀናንያነ አ ማቻት ሳጲሮ

1እት ሀናንያ ጌተትያ ብታኒ ባረ ማቻት ሳጲርና ጋድያ ዛልኤዳ። 2ሄ ዛልኤዳ ሚሻፐ ባረ ማቻታ ኤርሽን አሺደ፥ አቶዋ የሱስ ኪቴዳዋንቶ እሜዳ።

3ሽን ጰጽሮስ ሀናንያ፥ “ኔን ጌሻ አያና ጭማደ ነ ጋድያ ዛልኤዳ ሚሻፐ ሻካ አሻና ማላ፥ ጻላሂ ነ ዎዛናን አያዉ ገሌዴ? 4ኔን ዛልአናፐ ካሰ ጋዲ ነዋ ግደኔ? ቃይ ኔን ዛልአ ስምናካ ሚሻይ ኔሳ ግደኔ? ያትና፥ ሀዋ ማላባ ኦናዉ አያዉ ነ ዎዛናን ቆፓዲ? ኔን ጾሳዉ ዎርዶቶዋፐ አትን፥ አሳዉ ዎርዶታበይካ” ያጌዳ።

5ሀናኒ ሄ ቃላ ስሴዳ ኤለካ ኩንዲደ ሀይቂ አጌዳ፤ ሄዋ ስሴዳ ኡባይ ዳሮ ያዬዳ። 6ዎዳላ አሳቱ ሶይ ገሊደ፥ አ አሃ ጻጺደ፥ ካረዉ ከስ አ ሞጌድኖ።

7ሄዙ ሳተ ግዶዋፐ ጉይያን፥ ሀናንያ ማቻታ ሄዋ ኤረናን ደኣደ ገላዱ። 8ጰጽሮስ እዞ፥ “ህንተንቱ ጋድያ ሀን ኬና ሚሻን ዛልኤድቴ? አነ ታዉ ኦዳ” ያጌዳ።

እዛ፥ “ኤ ሀን ኬና ሚሻን ዛልኤዶ” ያጋዱ።

9ጰጽሮስ ምሽራቶ፥ “ኔንነ ነ አስናይ ጎዳ አያና ፓጫናዉ አያዉ ዞረቴድቴ? በአ፤ ነ አስና ሞጌዳ አሳቱ ካረን ደኢኖ፤ ነ አሃካ ኡንቱንቱ ካረ ከሳና” ያጌዳ።

10ምሽራታ ሄ ማንእያን ጰጽሮሳ ገድያ ማታን ኩንዳደ ሀይቃ አጋዱ፤ ዎዳላ አሳቱ ገልያ ዎደ ሀይቄዳዉኖ ደሚደ፥ ካረ ከሴዳዋፐ ጉየ፥ እዝ አስና ዱፉዋ ማታን ሞጌድኖ። 11አማንያ አሳ ኡባይነ ሄዋ ስሴዳ ሀራ አሳይ ኡባይ ዳሪ ያዬዳ።

የሱስ ኪቴዳዋንቱ ኩሽያን ኦሰቴዳ ኦራባቱዋነ ማላልስያዋንታ

12የሱስ ኪቴዳዋንቱ ዳሮ ማላታነ ኦራባ አሳ ግዶን ኦኖ፤ አማንያ ኡባቱ ሶሎሞነ ባራንዳን እትፐ ሺቂኖ። 13ሀራ አሳፐ ኡንቱንቱና ጋከታናዉ ሀራይ አቶ እቱነ ጻልቤና፤ ሽን አሳይ ኡንቱንታ ቦንቼ። 14አማንያ አቱማ አሳይነ ማጫ አሳይ ካሰዋፐ ጮራይ ጎዳዉ ጉጀቴ። 15ሄዋ ድራዉ፥ አሳይ ሀርጋንቻቱዋ ሻንቻማንነ ሳሌናን ቀር ቶኪደ፥ ጰጽሮስ ሄዋና አያ ዎደ ሀራይ አቶ፥ አዉ ኩዌንቶነ ኡንቱንቱፐ እቱዋ እቱዋ ቦላና አና ማላ፥ ካታማ ኦግያ ዶና ከሲደ ዎ። 16ቃይ ጮራ አሳይ የሩሳላመ ማታን ደእያ ካታማቱዋፐ ሀርጋንቻቱዋነ ኢታ አያናን ኦይቀቴዳ አሳቱዋ አክ ዬድኖ፤ ኡባቱካ ፓጼድኖ።

የሱስ ኪቴዳዋንቱ ቦላ የደሳይ ደንዴዳ

17ሄዋፐ ስምና ቄሳቱዋ ካፑነ አናና ደእያ ሳዱቃዋናቱ ኡባቱ የሱስ ኪቴዳዋንታ ዳሮ ቃናቲደ፥ ኡንቱንቱ ቦላ ደንዴድኖ። 18ቃይ የሱስ ኪቴዳዋንታ ኦይቂደ፥ ኡባ አሳ ቃችያ ጎልያን የጌድኖ። 19ሽን ጎዳ ኪታንቻይ ቃማ ቃሾ ጎለ ፐንግያ ዶዪደ፥ የሱስ ኪቴዳዋንታ ካረ ከሲደ፥ 20“ህንተንቱ ቢደ፥ ጌሻ ጎልያን ኤቂደ፥ ሀ ኦራ ደኡዋ ቃላ ኡባ አሳዉ ኦድተ” ያጌዳ። 21የሱስ ኪቴዳዋንቱ ሄዋ ስሴዳ ዎደ፥ ዎንቱማን ጌሻ ጎልያ ገሊደ፥ ታማርሳናዉ ዶሜድኖ።

ቃይ ቄሳቱዋ ካፑነ አናና ደእያዋንቱ ዪደ፥ ሺቄዳ አሳና እስራኤልያ ጭማቱዋ ኡባቱዋ እትፐ ጼሲደ፥ የሱስ ኪቴዳዋንታ ባረንቱ ስን አሀና ማላ፥ ዎታዳራቱዋ ቃሾ ጎለ ኪቴድኖ። 22-23ሽን ዎታዳራቱ ቃሾ ጎለ ቢደ፥ የሱስ ኪቴዳዋንታ ደምበይክኖ፤ ጉየ ስሚደ ሺቄዳ አሳዉ፥ “ኑን ብያ ዎደ ቃሾ ጎለ ካርያ ዳሮ ምንስ ቃችና፥ ናግያዋንቱካ ፐንግያን ኤቄዳዋንታ ደሜዶ፤ ሽን ኑን ቃሾ ጎልያ ዶይያ ዎደ፥ ጎለ ጋርሳን ሀራይ አቶ እት አሳይነ ባዋ” ያጌድኖ። 24ጌሻ ጎልያ ዎታዳራቱዋ ኪትያዌነ ቄሳቱዋ ካፓቱ ሄዋ ስሴዳ ዎደ፥ “ሀዌ ዋኑዋሻ? ቃይ ግድን አዬ ሀናንዴሻ?” ያጊደ ህርጌድኖ።

25ሄዋፐ ጉይያን፥ እት ብታኒ ኡንቱንቱኮ ዪደ፥ “በእተ፤ ቃሾ ጎልያን ህንተ ቃቼዳ አሳቱ ጌሻ ጎልያን ኤቂደ፥ አሳ ታማርሲኖ” ያጊደ ኡንቱንቶ ኦዴዳ። 26ጌሻ ጎልያ ዎታዳራቱዋ አዛዝያዌ ዎታዳራቱዋና ቢደ፥ የሱስ ኪቴዳዋንታ አሄዳ፤ ሽን ኡንቱንቱ ባረንታ አሳይ ሹቻን ጫዳናዋንታ ጊደ ያዬዳ ድራዉ፥ ኡንቱንታ ሎዳን አሄድኖ።

27ኡንቱንቱ የሱስ ኪቴዳዋንታ አሂደ፥ ሄዋ ሺቄዳ ሻንጉዋ ስንን ኤስና፥ ቄሳቱዋ ካፑ ኡንቱንታ፥ 28“ህንተንታ ኑን ሄ ብታንያ ሱንን ታማርሰና ማላ ምንሲደ አዛዝበይኮ? በእተ፤ ህንተ ትምርትያ የሩሳላመ ካታማ ኡባ ጋድታ፤ ቃይ ሄ ብታንያ ሸምፑዋን ኑና ኦይናዉ ቆፒታ!” ያጊደ ኦቼዳ።

29ጰጽሮስነ የሱስ ኪቴዳ ሀራንቱ ዛሪደ ያጌድኖ፤ “ኑን አሳዉ አዛዘታናፐ ጾሳዉ አዛዘታናዉ በሴ። 30ማስቃልያ ቦላ ምስማርያን ሽ ካቂደ፥ ህንተ ዎዳ የሱሳ ኑ አዎቱዋ ጾሳይ ሀይቁዋፐ ደንዳ፤ 31እስራኤላቶ ናጋራፐ ስማነ ናጋራ አቶ ጉሳ የሱስ እማና ማላ፥ ጾሳይ ሞድያዋነ አሽያዋ አ ኦደ፥ ባረፐ ኡሸቻ ባጋን ቁ ቁ ኦዳ። 32ሄዎ ኑን ማርካ፤ ቃይ ጾሳይ ባረዉ አዛዘትያዋንቶ እሜዳ ጌሻ አያናይካ ማርካ” ያጌድኖ።

33ሺቄዳ አሳይ ሄዋ ስሴዳ ዎደ፥ ዳሮ ይሎቲደ፥ የሱስ ኪቴዳዋንታ ዎናዉ ቆፔድኖ። 34ሽን አሳ ኡባን ዳሮ ቦንቼቴዳ ጋማልያላ ጌተትያ፥ ህግያ ታማርስያ እት ፓርሳዊ፥ ሺቁዋን ደንድ ኤቂደ፥ የሱስ ኪቴዳዋንቱ ጉ ዎድያ ካረ ከሳና ማላ 35አዛዚደ ሄዋን ሺቄዳ አሳ ሀዋዳን ያጌዳ፤ “እስራኤልያ አሳቶ፥ ህንተ ሀ አሳቱዋ ኦና ቆፕያዋን ህንተንታ ናግተ። 36አያዉ ጎፐ፥ ሀዋፐ ካሰ ዎድያን ተዎዳሳ ጌተትያዌ ባረና ዎልቃማ ጊደ ደንዴዳ፤ ደንድና ኦይዱ ጼቱ ግድያ አሳቱ አናና ጋከቴድኖ፤ ሽን አ ዎና፥ አ ካሌዳ ኡባቱካ ላለቲደ፥ ማደና አሳ ግዲደ አቴድኖ። 37ሄዋፐ ጉይያን፥ አሳይ ፓይደትያ ዎደ፥ ጋሊላ ይሁዳይ ደንዲደ፥ ዳሮ አሳ ፓኑዋ ኦደ ካለዳ፤ ሽን አካ ዎና፥ አ ካሌዳ አሳይ ኡባይ ላለቴዳ።

38“ሀእካ ታን ህንተንቶ ኦዳይ፤ ሀ አሳቱዋፐ ሻከትተ፤ ኡንቱንታ ቦቾፕተ። አያዉ ጎፐ፥ ሀ ቆፋይነ ሀ ኦሱ አሳይ ኦዳዋ ግዶፐ ያና። 39ሽን ሀ ቆፋይነ ሀ ኦሱ ጾሳፐ ዬዳዋ ግዶፐ፥ ህንተ ኡንቱንታ ይሳናዉ ዳንዳይክታ፤ ኦን ኤር ሀዋ ሀኒደ ጾሳና ህንተ ኢተተናዳን” ያጌዳ።

40ሄዋፐ ጉየ ሺቄዳ አሳይ ጋማልያላ ዞርያ አኪደ፥ የሱስ ኪቴዳዋንታ ጼሲደ፥ ልሱዋን ሾጭሴድኖ፤ ሄዋፐ ጉይያን ኡንቱንታ፥ “የሱሳ ሱን ላኤንዋ ኡባካ ደንፕተ” ግ ብሊደ የዴድኖ። 41የሱሳ ሱን ድራዉ፥ ኡንቱንቱ ኡጋቲደ ዬላታናዉ በስያባ ቆፔዳ ድራዉ፥ ሻንጉዋ ስንፐ ናሸቲደ ከሴድኖ። 42ኡንቱንቱ ኡባ ጋላስ ጌሻ ጎልያንነ አሳ ሶይን የሱስ፥ ክርስቶሳ ግዴዳዋ ታማርስያዋነ ኦድያዋ ያ ጉጄድኖ።

Currently Selected:

ኪታ 5: DFBE

Highlight

Compare

Copy