ኪታ 27

ጳዉሎስ ሮመ ቤዳ

1ኑን ማርካብያን ጻልያ ባናዉ ቆፕ ኡቴዳ ዎደ፥ ጳዉሎሳነ ሀራ አማሬዳ ቃሸቴዳ አሳቱዋ አዉግስጾሳ ዎታዳራቱዋ ግያዋንቱፐ እት ዩልዮሳ ግያ ጼታቱዋ ካፖ አደ እሜድኖ። 2ኢስያ ጋጻን ደእያ ጋዳቱዋ ብያ አድራምጽዮና ማርካብያን ገሊደ ቤዶ፤ ማቅዶንያ አሳ ግድያ ተሰሎንቀ አርስጽሮኮስ ኑናና ደኤ።

3ዎንትሳ ጋላስ ኑን ሲዶና ጋክሽን፥ ዩልዮስ ጳዉሎሳዉ ዳሮፐ አ፥ “ነ ዳባቱ ኔና ኮሽያባ ማዳና ማላ፥ ኔን ኡንቱንቱኮ ባናዉ ዳንዳያ” ያጌዳ። 4ሄዋፐ ደንዲደ፥ ስንና ኑ ቦላ ጫርክያ ድራዉ፥ ቆጲሮሳ ሃን ዶደቴዳ ሳኣን ጫርከና ባጋ ቤዶ። 5ክልቂያ ማታንነ ጵንፍልያ ማታን ደእያ አባ ፕኒደ፥ ልቅያን ደእያ ሙራ ጋኬዶ። 6ሄዋን ጼታቱዋ ካፑ ጻልያ ብያ እስክንድርያ ማርካብያ ደሚደ፥ አን ኑና ገልሴዳ።

7ኑን ጮራ ዎድያ ሎዳን ቢደ፥ ዳሮ መቱዋን ቀንዶሳ ካታማ ጋኬዶ፤ ሄዋና ባናዉ ኑና ጫርኩ ድግና ሳልሞናና አደ፥ ሃን ዶደቴዳ ቃርጼሳን ጫርኩዋፐ ተኤቲደ ቤዶ። 8ቃይካ ዳሮ መቱዋን ጋጻና ጋጻና አደ፥ ላስያ ካታማ ማታን ደእያ አባ ዶናን ማርካቢ ዎፑ ጊደ ሸምፕያ ሳ ጌተትያሳ ዬዶ።

9ኑን ሄዋን ጮራ ዎድያ ጋምኤዳዋፐ ጉይያን፥ ጾማይ ብለት ድጌዳ ድራዉ፥ ማርካብያን ብያዌካ ህርግሽን ጳዉሎስ ኡንቱንታ ዞሪደ፥ 10“አሳዉ፥ ኑ ቡሳን ዎልቃማ ቦሻይነ ዳሮ ባሻይ ደአናዌ ታዉ ቤቴ፤ ባሻይ ይያዌ ጫና ቦላነ ማርካብያ ቦላ ጻላላን ግደና፤ ኑ ሸምፑዋ ቦላካ ያናዋ” ያጌዳ። 11ሽን ጼታቱዋ ካፑ ጳዉሎስ ጌዳዋፐ አደ፥ ማርካብያን ደእያዋንታ አዛዝያዌነ ማርካብያ ጎዳይ ግያዋ አማኔ። 12ሄ አባ ማታ ካታማይ ባልጉዋ ሻጫናዉ ኡንቱንቶ ሚከና ካታማ፤ ሄዋ ድራዉ፥ ጮራ አሳቱ ባረንቶ ዳንዳየቶፐ፥ ፕንቀ ግያ ካታማ ጋኪደ፥ ባልጉዋ ያን ሻጫና ማላ፥ ያፐ ደንዳናዉ ዞረቴድኖ፤ ፕንቀን ደእያ ማርካቢ ሸምፕያ ሚኮ ሳአይ ዶየቴዳዌ፥ አዋይ ዉልያሳፐነ ኡሸቻ ባጋፐ ግዱዋን፥ ቃይ ዉልያሳፐነ ሀድርሳፐ ግዱዋና።

አባ ቦላን ጎቱ ደንዴዳ

13አዋይ ከስያሳ ጼልያ ዎደ ኡሸቻ ዱገሃ ባጋ ጫርኩ ሎዳን ጫርኬዳ ዎደ፥ ባረንቱ ቆፔዳዋዳን ሀኔዳዋ ኡንቱንቶ ማላትና ደንዴድኖ፤ ማርካቢ ቤና ማላ ኦይቂያ ብራታ ፑደ ዳፊደ፥ ቃርጼሳ ማታቲደ፥ ላንቂያና አድኖ። 14ሽን ዳሪ ጋምኤናን፥ “አዉራቂስ”#27:14 “አዉራቂስ” ጌተትያ ዎልቃማ ጎቱ ክል ፑደሃፐ ዉላሃ ባጋ ጫርክያዋ ግድያዋ በሴ። ግያ ዳሮ ዎልቃማ ጎቱ ሃ ግዶን ደእያ ሳኣፐ ዱገ ኡንቱንቱ ቦላ ደንዴዳ። 15ሄ ጎቱ ማርካብያ ደቺደ አናን ድግና፥ ባናዉ ኑዉ ዳንዳየተናን እጼዳ ድራዉ፥ ማርካብያ እ አፍያሳ አጊደ ቤዶ።

16ኑን ቄዳ ግያ ሃን ዶደቴዳ ጫርኩዋፐ ጌሜዳ ሳና አያ ዎደ፥ ዳርስ መቶቲደ ማርካብያ ዎንግርያን ናግ አሻናዉ ዳንዳዬዶ። 17ኡንቱንቱ ዎንግርያ ፑደ ከሴዳዋፐ ጉይያን፥ ጋድያን ማርካብያ ጻጺደ፥ ምንስ ቃቼድኖ፤ ስርጽሳ ግያ ሻፊ ኩሜዳ ሳን ባረንታ ኩንድሳነንቶነ ጊደ ህርጊደ፥ ማርካብያ አፍያ ሻራ ዎደ፥ ጫርኩዋን ማርካብያ ጮ የድ አጌድኖ።

18ጎቱ ዎልቃሚደ ኑ ቦላን ዎልቃሜዳ ድራዉ፥ ዎንትሳ ጋላስ ጫናፐ አባን ኦሉዋ ዶሜድኖ። 19ሄዘንያ ጋላስካ ማርካብያን ደእያ ሚሻ ኡንቱንቱ ባረንቱ ኩሽያን ኦሌድኖ። 20ኑን ዳሮ ዎድያ አዋነ ጾልንትያ በኤናን፥ ዎልቃማ ኡሹ ኑ ቦላ ቡክሽን፥ ስንፐ የናን አቶኮ ጊደ ቆፔዶ።

21ኡንቱንቱ ዳሮ ዎድያ ቁማ ሜናን ጋምኤዳዋፐ ጉይያን፥ ጳዉሎስ ሄ ዎደ ኡንቱንቱ ግዶን ደንድ ኤቂደ፥ ሀዋዳን ያጌዳ፤ “አሳዉ፥ ህንተንቱ ታ ዞርያ አኬደንቶነ ቃርጼሳፐ ደንደናን አቴደንቶ፥ ሀዋ ማላ ባየይነ ቆሁ ኑና ጋከና። 22ሽን ሀእካ ታን ህንተንታ ያዮፕተ ጋደ ዞራይ፤ አያዉ ጎፐ፥ ሀ ማርካቢ ባያናፐ አትን፥ ህንተንቱፐ እት ኡራ ሸምፑካ ባየና። 23አያዉ ጎፐ፥ ጾሳ ኪታንቻይ፥ ታና ሞዴዳ ታን ጎይንያ ጾሳዌ፥ ዝኖ ቃማ ታ ማታን ኤቂደ፥ 24‘ጳዉሎሳ፥ ያዮፓ፤ ኔን ሮመ ጋድያ ካትያ ቄሳራ ስንን ኤቃናዉ በሴ፤ በአ፥ ጾሳይ ባረ ኬካተን ኔናና ብያ አሳ ኡባ ሸምፑዋ አሻና’ ያጌዳ። 25ሄዋ ድራዉ አሳዉ፥ ያዮፕተ። አያዉ ጎፐ፥ ሄ ኪታንቻይ ታዉ ኦዴዳዋዳን ሀናናዋ ታን ጾሳ አማናይ፤ 26ሽን ጫርኩ ኑና እት ሃን ዶደቴዳ ሳኣን አባ ዶናን ዶምእሳና” ያጌዳ።

27ታማነ ኦይደን ጋላስ ሜድትራንያ አባን ኑና ጫርኩ ያነ ሃነ ሱግሽን፥ ማርካብያን ኦያዋንቶ ቃማ ብላሂ ቢታኮ ማቴዳዋ ማላቴዳ። 28ኡንቱንቱ ልክያ ጋድያ ጼራን ዴጽያባ ቃቺደ፥ ሃን የግና፥ ሃይ ኦይታሙ ምትርያ ጪማቴዳዋ ኤሬድኖ። ጉ ጋምኢደ፥ ላኤንዋ የጊደ፥ ሀታሙ ምትርያ ጪማቴዳዋ ኤሬድኖ። 29ኡንቱንቱ ሹቻትያሳን ኩንደና ማላ ያዪደ፥ ማርካቢ ቤና ማላ ኦይቂያ ኦይዱ ብራታ ማርካብያፐ ጉየና አባን የጊደ፥ ሳአይ ዎንታና ማላ፥ ባረንቱ ጾሳቱዋ ዎሲኖ። 30ማርካብያን ኦያዋንቱ ማርካብያፐ ክቻናዉ ኮዪደ፥ ማርካቢ ቤና ማላ ኦይቂያ አማሬዳ ብራታቱዋ ማርካብያፐ ስን ባጋና አባን የግያዋ ማላቲደ፥ ዎንግርያ አባን ዎዳ ዎደ፥ 31ጳዉሎስ ጼታቱዋ ካፑዋነ ዎታዳራቱዋ፥ “ሀዋንቱ ማርካብያ ግዶን ደአና ዮፐ፥ ህንተንቱ አታናዉ ዳንዳይክታ” ያጌዳ። 32ሄዋፐ ጉይያን፥ ዎታዳራቱ ዎንግሪ ቃሸቴዳ ጋድያ ቃንጺደ፥ የድ አጌድኖ።

33ሳአይ ዎንታና ሀንሽን፥ ጳዉሎስ ኡባይ ቁማ ማና ማላ፥ ሀዋዳን ያጊደ ዎሴዳ፤ “ህንተንቱ ሀቼና ታማነ ኦይዱ ጋላሳ ናጌድታ፤ ቃይ ሄ ኡባንካ ቁማ ምበይክታ። 34ሄዋ ድራዉ፥ ጉ ቁማ ህንተንቱ ማና ማላ፥ ታን ህንተንታ ዎሳይ፤ አያዉ ጎፐ፥ ህንተንቱ ፓጻ ደአናዉ ጉ ቁማ ማና ኮሼ፤ ሀራይ አቶ ህንተንቱ ሁጲያ ብናናፐ እቱካ ባየና” ያጌዳ። 35ጳዉሎስ ሀዋ ጊደ፥ ኡክ አኪደ፥ ኡባ ስንን ጾሳ ጋላቴዳ፤ መን ሙሳ ዶሜዳ። 36ሄዋፐ ጉይያን ኡባይ ሎይ፥ ባረንቶ ቃይ ቁማ ሜድኖ። 37ኑን ማርካብያን ደእያዋንቱ ላኡ ጼታነ ላፑን ታማነ ኡሱፑና። 38ኡንቱንቱ ሚደ ካሌዳ ዎደ፥ ጫና ዛርጋ አባን ኦሊደ ማርካብያ ዴጹዋ ካዉሽሴድኖ።

ማርካብያ መኡሳ

39ሳአይ ዎንቴዳ ዎደ፥ ማርካብያን ኦያዋንቱ ጋድያ ኤርበይክኖ፤ ሽን ሃይ ጎጊደ አባን ገሌዳሳ ምይያን ደእያ ሻፍያ አኬካን ጼሌድኖ። ባረንቶ ዳንዳየትንቶ፥ ማርካብያ ሄ ሻፍያኮ ላጋናዉ ባረንቱ ቆፋ ቃቼድኖ። 40ያቲደ ማርካቢ ቤና ማላ ኦይቂያ ብራታቱዋ ብሊደ፥ አባ ግዶ የጌድኖ፤ ሄ ዎደ፥ ማርካብያ ኮዬዳሳ ዛሪደ ላግያ ም ቃቼዳ ጋድያ ብሌድኖ፤ ሄዋፐ ጉይያን፥ ጫርኩ ማርካብያ ስንዉ ሱጋና ማላ፥ ማርካብያ አፍያ ሻራ ስን ባጋና ቁ ኦደ፥ ቡሳ ዶሜድኖ። 41ሽን ማርካቢ ጪሙ ደኢያሳፐ አደ ሃን ዶደቴዳ ሳኣ ማታን ደእያ ደሳን ዶምኤት ኤቄዳ፤ ማርካብያዉ ጉየ ባጋይ ቤታ ሱገን መኤረትሽን፥ ስን ባጋይ ዱገ ሸቲደ፥ ቃጸናን እጽ አጌዳ።

42ዎታዳራቱ ቃሸቴዳ አሳፐ እቱነ ሃ ዋደ ከስ አክቤና ማላ፥ ኡንቱንታ ዎናዉ ዞረቴድኖ። 43ሽን ጼታቱዋ ካፑ ጳዉሎሳ አሻናዉ ኮዪደ፥ ዎታዳራቱዋ ማቁዋ እጼዳ፤ ሃ ዋ ኤርያ ኡባይ ማርካብያፐ ሃን ጉፕ ጉፒደ ካሰቲደ ጋጻ ከሳና ማላ አዛዜዳ። 44አቴዳዋንቱፐ አማሬዳዋንቱ ሳንቃን፥ አማሬዳዋንቱ ቃይ ማርካብያ መኡዋን ከሳና ማላ አዛዜዳ፤ ሄዋዳን ኡባቱካ ጋጻ ሳሮተን ከሴድኖ።

Currently Selected:

ኪታ 27: DFBE

Highlight

Compare

Copy