ኪታ 25

ጳዉሎስ ሮመ ካትያኮ ባረ የዉዋ አኪደ ባናዉ ኦቼዳ

1ፕስጾስ አዉራጃ ገሌዳ ሄዘንያ ጋላሳፐ ጉይያን፥ ቂሳርያፐ የሩሳላመ ቤዳ። 2ያን ቄሳቱዋ ካፓቱነ አይሁዳቱዋ ካለያዋንቱ ጳዉሎሳ ሞቴድኖ። 3ኡንቱንቱ ጳዉሎሳ ዎናዉ ኦግያን ቆሰት ኡታናዉ፥ ባረንቶ ሎኦባ ኦደ አ የሩሳላመ አሀና ማላ፥ ፕስጾሳ ዎሴድኖ። 4ፕስጾስ ኡንቱንቶ፥ “ጳዉሎስ ቂሳርያን ቃሸት ኡቴዳ፤ ታን ታ ሁጰዉካ ኤለካ ያ ጉየ ስማናዉ ቆፓ ኡታድ። 5ሄዋ ድራዉ፥ እ አየንቶ ባይዜዳዌ ደኦፐ፥ ህንተንቱ ግዶን አዎትያዋንቱ ታናና ቂሳርያ ቢደ፥ አ ሞትኖ” ያጊደ ዛሬዳ።

6ፕስጾስ የሩሳላመን ሆስፑን ዎይ ታሙ ጋላሳፐ አናን ኡቲደ፥ ቂሳርያ ቤዳ፤ ዎንትሳ ጋላስ ፕርድያሳን ኡቲደ፥ ጳዉሎሳ አሀና ማላ አዛዜዳ። 7እ ጋኬዳ ዎደ፥ የሩሳላመፐ ዬዳ አይሁዳቱ አ ማታን ዩይ አ ኤቂደ፥ ባረንቶ ሻትማናዉ ዳንዳየተና ዳሮ ዴጾ ሞቱዋ አ ቦላ ዎድኖ። 8ጳዉሎስ ሞተቲደ፥ “ታን አይሁዳቱዋ ህግያካ ጌሻ ጎልያካ ሮመ ካትያ ቄሳራካ አይነ ናቃበይከ” ያጌዳ።

9ፕስጾስ አይሁዳቱዋ ናሸቻናዉ ኮዪደ ጳዉሎሳ፥ “ፑደ የሩሳላመ ከሳደ፥ ሀ የዉዋባ ያን ታ ስንን ኦሸታናዉ ኮያይ?” ያጊደ ኦቼዳ።

10ሽን ጳዉሎስ፥ “ታን ኦሸታናዉ በስያ ቄሳራ ፕርዳ ጎለን ኤቃድ። ኔንካ ሎይ ኤርያዋዳን፥ ታን አይሁዳቱዋ አይነ ናቃበይከ። 11ስም ታን ናቄዳዋ ዎይ ሀይቃናዉ በስያዋ ኦዳዋ ግዶፐ፥ ሀይቁዋፐ አታና ጊከ፤ ሽን ኡንቱንቱ ታና ሞትያ ሞቱ መላ ግዴዳዋፐ ህን ባጋን፥ ኦንነ ታና ኡንቱንቶ አደ እማናዉ ዳንዳየና፤ ቄሳረ ታባ ፕርዶ ጋደ ኦቻይ” ያጌዳ።

12ሄዋፐ ጉይያን፥ ፕስጾስ ባረናና ዞረትያዋንቱና ዞረት ስሚደ አ፥ “ኔን ቄሳረ ታባ ፕርዶ ጋደ ኦቻዳ፤ ቄሳራኮ ባናሳ” ያጊደ ዛሬዳ።

ፕስጾስ ጳዉሎሳባ አግርጳና ማቀቴዳ

13አማሬዳ ጋላሳፐ ጉይያን፥ ካትያ አግሪጳይነ ባርኒቀ ፕስጾሳ ሳሮታናዉ ቂሳርያ ቤድኖ። 14ያን ኡንቱንቱ ጮራ ጋላሳ ኡት ደእሽን፥ ፕስጾስ ካትያዉ ጳዉሎሳባ ሀዋዳን ያጊደ ኦዴዳ፤ “ሀዋን ፍልክሰ ቃቺደ ባሽ ቤዳ እት ብታኒ ደኤ። 15ታን የሩሳላመን ደእሽን፥ ቄሳቱዋ ካፓቱነ አይሁዳ ጭማቱ አ ቦላ ፕርዳና ማላ፥ ታና ዎሲደ፥ አባ ታዉ ኦዴድኖ። 16ታን፥ ‘ሞተቴዳ ኡራይ ባረና ሞትያዋንቱና እትፐ ኤቀናንነ ባረና ሞቴዳ የዎ ዛሩዋ እመናን፥ ኦና ግዶፐነ አደ እምያዌ ሮመ አሳዉ ዎጋ ግደና’ ያጋደ ኡንቱንቶ ዛራድ።

17“ሄዋ ድራዉ፥ ኡንቱንቱ ሀዋን ሺቄዳ ዎደ፥ ታን ጋምኤናን ዎንትሳ ጋላስ፥ ፕርዳ ጎለ ገላደ ጳዉሎሳ አሀና ማላ አዛዛድ። 18አ ሞትያዋንቱ ኤቂደ፥ ኢታባን አ ሞተናን አግክኖ ጋደ ታን ቆፔዳዋዳን፥ አይነ አ ሞትበይክኖ። 19ሽን ኡንቱንቱ ባረንቱ አማኔዳባንቱባነ ጳዉሎስ፥ ‘ፓጻ ደኤ’ ግያ ሀይቄዳ እት የሱሳ ጌተትያ ብታንያባ አናና ፓሉመቴድኖ። 20ታን ሀ የዉዋ ዎታደ ብዳ ደማንታንቶ፥ ቆፋ ቃቼናን ደኣደ፥ ጳዉሎስ የሩሳላመ ቢደ፥ ሀ የዉዋ ያን ኦሸታናዉ ኮይንቶነ ጋደ አ ኦቻድ፤ 21ሽን ጳዉሎስ ባረ የዉዋ አዉግስጾሰ ቄሳረ ኦግያ ኦይና ጋካናዉ ናገታናዳን ኦችና፥ ታን አ ቄሳራኮ የዳና ጋካናዉ፥ እ ቃሸታና ማላ አዛዛድ” ያጌዳ።

22ሄዋፐ ጉየ አግሪጳይ ፕስጾሳ፥ “ታን ታ ሁጰዉካ ቃይ ሄ ብታኒ ግያዋ ስሳና ኮያይ” ያጌዳ።

ፕስጾስ አ፥ “ኔን ዎንት እ ግያዋ ስሳናሳ” ያጌዳ።

23ዎንትሳ ጋላስ፥ አግሪጳይነ ባርኒቀ ዳሮ ቦንቹዋን ኦላ ካፓቱዋናነ ካታማን ደእያ ዎልቃማ አሳና ዪደ፥ ፕርዳ ጎለ ገሌድኖ፤ ፕስጾስ ጳዉሎሳ አሀና ማላ አዛዝና አሄድኖ። 24ፕስጾስ ሀዋዳን ያጌዳ፤ “ካትያ አግሪጳ፥ ሀዋን ኑናና ደእያ አሳ ኡባዉ፥ አይሁዳ አሳይ ኡባይ የሩሳላመንካ ሀዋንካ ዋሲደ፥ ‘እ ሀዋፐ ስንዉ ፓጻ ደአናዉ በሰና’ ያጊደ፥ ታና ዎሴዳ ብታንያ ሀዋ በኢታ። 25ሽን እ አይነ ሀይቃናዉ በስያዋ ኦዳዋ ታን ደማበይከ፤ እ ባረ ሁጰዉ፥ ‘አዉግስጾሰ ቄሳረ ታባ ፕርዶ ያጋደ ኦቻድ’ ጌዳ ድራዉ፥ ቄሳራኮ አ የዳናዉ ታን ቆፓድ። 26ታን አባ ታ ጎዳ አዉግስጾሰ ቄሳረዉ ጻፋናዉ ቱሙ የዉ ታዉ አይነ ባዋ፤ ሄዋ ድራዉ፥ እ ሎይ ኦሸቶዋፐ ጉይያን፥ ታን ጻፍያባ ደማና ማላ፥ ህንተንቱ ስን፥ ካትያ አግሪጳ፥ ኡባ ነ ስን አ አሃድ። 27አያዉ ጎፐ፥ ቃሸቴዳ ኡራ ኪትያ ዎደ፥ አ አያዉ ሞቴደንቶ፥ ኤርሰናን ጮኡ ግ ባሽያዌ ታዉ ኤያተ ማላቴ” ያጌዳ።

Currently Selected:

ኪታ 25: DFBE

Highlight

Compare

Copy