ኪታ 23

1ጳዉሎስ ሄዋን ሺቄዳ አሳ ጫድ ጼሊደ፥ “ታናዳን አማንያዋንቶ፥ ታን ሀቼ ጋካናዉካ ጾሳ ስንን ታ ደኡዋ ኡባን ትላ ዎዛናን ደኣድ” ያጌዳ። 2ቄሳቱዋ ኡባቱዋ ካፑ ሀናኒ፥ ጳዉሎሳ ዶና ባቃና ማላ፥ አ ማታን ኤቄዳዋንታ አዛዜዳ። 3ጳዉሎስ ሄ ዎደ አ፥ “ላ ሀ ቦሽንቻን ኦኬዳ#23:3 ቦሽንቻን ኦኬዳ፦ እት ኡራይ ሎአ ማላታና ማላ ኦሱሳ፥ ሽን ግደና። ጎዳዉ፥ ጾሳይ ኔና ባቃና። ኔን ታ ቦላ ህግያን ፕርዳናዉ ኡታደ፥ ዎጋይ ባይናን ታና ባቃና ማላ አዛዛይ?” ያጌዳ።

4ጳዉሎሳ ማታን ኤቄዳዋንቱ አ፥ “ኔን ጾሳ ቄሳቱዋ ኡባቱዋ ካፑዋ ቦራይ?” ያጌድኖ።

5ሄዋፐ ጉየ ጳዉሎስ፥ “ታናዳን አማንያዋንቶ፥ እ ቄሳቱዋ ኡባቱዋ ካፑዋ ግዴዳዋ ታን ኤራበይከ፤ አያዉ ጎፐ፥ ‘ነ ጋድያ ሞድያዋ ቦላ ኢታ ቃላ ሃሳዮፓ’ ጌተቲደ ጾሳ ማጻፋን ጻፈቴዳ” ያጌዳ።#ከሳ 22:28

6ሽን ጳዉሎስ ባጋቱ ሳዱቃዋናቱዋ፤ ባጋቱ ፓርሳዋቱዋ ግዴዳዋ በኢደ፥ “ታናዳን አማንያዋንቶ፥ ታን ፓርሳዊያነ ፓርሳዊያ ናኣ፤ ‘ሀይቄዳዋንቱ ሀይቁዋፐ ደንዳናዋንታ’ ጋደ ታን ናሸቻን ናግያ ድራዉ፥ ኡንቱንቱ ታ ቦላ ፕርዲኖ” ያጊደ፥ ቁ ኦደ ሃሳዬዳ።

7ጳዉሎስ ሄዋ ያግና፥ ፓርሳዋቱዋ ግዶንነ ሳዱቃዋናቱዋ ግዶን ዋላሳይ ከስና፥ ሺቄዳ አሳይ ላለቴዳ። 8አያዉ ጎፐ፥ ሳዱቃዋናቱ፥ “ሀይቄዳ አሳይ ደንደና፤ ኪታንቻይካ አያናይካ ባዋ” ያጌድኖ፤ ፓርሳዋቱ ቃይ ላኡካ ደእያዋ አማኒኖ። 9ዎልቃማ ዋላሳይ ደንዴዳ፤ ፓርሳዋቱዋ ባጋፐ ሙሴ ህግያ ታማርስያዋንቱ ደንድ ኤቂደ፥ “ሀ ብታንያ ቦላ አይነ ባላ ደምበይኮ፤ አዉ አያናይ ዎይ ኪታንቻይ ሃሳየናን አገና” ያጊደ ፓሉመቴድኖ።

10ዋላሳይ ዳርና፥ ኦላ ካፑ ጳዉሎሳ ኡንቱንቱ መንሬነንቶነ ግ ያዪደ፥ ባረ ዎታዳራቱ ዎደ፥ ኡንቱንቱ ግዶፐ አ ኤለካ ከሲደ፥ ባረንቱ ደኢያሳ አፋና ማላ አዛዜዳ።

11ሄ ቃማ ጎዳይ ጳዉሎሳ ማታን ኤቂደ፥ “ጳዉሎሳ፥ ኔን ታዉ የሩሳላመን ማርካቴዳዋዳን፥ ሮመንካ ማርካታናዉ በሴ፤ ምና፤ አይነ ባዋ” ያጌዳ።

ጳዉሎሳ ዎናዉ ኦሰቴዳ ማቁዋ

12ዎንትሳ ጋላስ፥ አይሁዳቱ ጳዉሎሳ ዎና ጋካናዉ፥ ሜናዳንነ ኡሸናዳን፥ ጫቀቲደ ጊገቴድኖ። 13ጳዉሎሳ ቦላ ሄዋ ማቀቴዳ አሳቱ ኦይታሙዋፐ ዳሪኖ። 14ኡንቱንቱ ቄሳቱዋ ካፓቱዋኮነ ጭማቱዋኮ ዪደ፥ “ኑን ጳዉሎሳ ዎና ጋካናዉ፥ አይነ ባረናዳን፥ ጊገት ኡቴዶ። 15ሄዋ ድራዉ፥ ህንተንቱነ ሺቄዳ አሳይ ጳዉሎሳባ ጌሺደ ብድያዋ ማላቲደ፥ ኦላ ካፑ አ ህንተንቱኮ ዱገ ዎና ማላ ኦችተ፤ ኑን እ ሃ ሺቃናፐ ካሰና አ ዎናዉ ጊግ ኡቴዶ” ያጌድኖ።

16ሽን ጳዉሎሳ ምቻት ናአይ ሄ ማቁዋ ስሴዳ ዎደ፥ ቢደ ዎታዳራቱ ደኢያሳ ገሊደ፥ ጳዉሎሳዉ ኦዴዳ። 17ጳዉሎስ ጼታቱዋ ካፓቱዋፐ እቱዋ ጼሲደ፥ “ሀ ናኣ ኦላ ካፑዋኮ አፋ፤ አያዉ ጎፐ፥ ኦላ ካፖ እ ኦድያዌ ደኤ” ያጌዳ።

18ሄዋ ድራዉ፥ ጼታቱዋ ካፑ ናኣ ኦላ ካፑዋኮ አፊደ፥ “ቃሾ ጎለን ደእያ ጳዉሎስ፥ ሀ ናአይ ነዉ አየንቶ ኦድያባይ ደእያ ድራዉ፥ ታና ባረኮ ጼሲደ፥ አ ኔኮ አሀናዳን፥ ታና ዎሴዳ” ያጌዳ።

19ኦላ ካፑ ናኣ ኩሽያ ኦይቂደ፥ ዱማ ጋጻ ከሲደ፥ “ኔን ታዉ ኦዳናባይ አዬ?” ያጊደ ኦቼዳ።

20ናአይ ኦላ ካፖ፥ “አይሁዳቱ ጳዉሎሳባ ካሰፐ ምንስ ኦችያዋ ማላቲደ፥ ኔን ሺቁዋ አ ኡትሳናዳን፥ ኔና ዎንት ዎሳናዉ ዞረታ ቃቼድኖ። 21ሽን ኔን ኡንቱንቱ ግያዋ ስሶፓ፤ አያዉ ጎፐ፥ ኦይታሙዋፐ ዳርያ አሳቱ ጳዉሎሳ ዎና ጋካናዉ፥ ቁማ ሜናዳንነ ሃ ኡሸናዳን፥ ጫቀቲደ ጌመት ኡቲደ አ ናጊኖ፤ ኔን ግያዋ ስሳናዉ ሀእካ ጊገት ኡቲደ ናጊኖ” ያጌዳ።

22ሄዋ ድራዉ፥ ኦላ ካፑ ናኣ፥ “ሀ የዉዋ ኔን ታና ኤርሴዳዋ ኦስነ ኦዶፓ” ያጊደ አዛዜዳዋፐ ጉይያን፥ አ የዴዳ።

ጳዉሎስ ጋድያ ሞድያ ፍልክሳ ስን ሺቄዳ

23ኦላ ካፑ ጼታቱዋ ካፓቱዋፐ ላኡዋ ጼሲደ፥ “ቂሳርያ ባናዉ፥ ላኡ ጼቱ ዎታዳራቱዋ፥ ላፑን ታሙ ፓራ ኦይቄዳ አሳቱዋነ ላኡ ጼቱ ቶራንቻቱዋ ቃማፐ ሄዙ ሳትያን ጊግስተ፤ 24ጋድያ ሞድያ ፍልክሳኮ ጳዉሎሳ ሳሮተን ጋናዉ ቶግስያ መህያነ ጊግስተ” ያጊደ፥ ኡንቱንታ አዛዜዳ። 25ኦላ ካፑ ሀዋዳን ግያ ዳብዳቢያ ጻፌዳ።

26“ቃላዉደዮሳ ሉስዮሳፐ፤ ጋድያ ሞድያ ቦንቼቴዳ ፍልክሳ! ሳሮተይ ነዉ ግዶ። 27አይሁዳቱ ሀ ብታንያ ኦይቂደ ዎና ሀንሽን፥ ሮመ ካታማ አሳ እ ግዴዳዋ ኤራደ፥ ዎታዳራቱዋና ጋካደ አ አሻድ። 28ኡንቱንቱ አ አያዉ ሞቴድኖንቶ ኤራናዉ ኮያደ፥ ዱገ ኡንቱንቱ ሺቆ አ አፋድ። 29ኡንቱንቱ ባረንቱ ህግያባ እ ኦቼዳዎ አ ሞቴዳዋፐ አትን፥ አ ዎስያ ዎይ ቃሽስያ ሞቶ ግደና። 30ኡንቱንቱ ሀ ብታንያ ቦላ ማቀት ኡቴዳ ዝግርሳይ ታና ጋክና፥ ታን ሄ ማንእያን አ ኔኮ የዳ አጋድ፤ አ ሞትያዋንቱካ ቢደ፥ ነ ስንን ሞታና ማላ ኦዳድ፤ ሳሮ ደአ” ያጌዳ።

31ሄዋ ድራዉ፥ ዎታዳራቱ አዛዘቴዳዋዳንካ ጳዉሎሳ አኪደ፥ ቃማ አንትጳጽሪሳ ጋድኖ። 32ዎንትሳ ጋላስ አናና ባና ማላ ፓራ ቶጎ አሳቱዋ ዎደ፥ ገድያን ብያዋንቱ ጉየ ዎታዳራቱ ደኢያሳ ስሜድኖ። 33ፓራዋንቱ ቂሳርያ ገሊደ፥ ዳብዳቢያ ጋድያ ሞድያዎ እሚደ፥ ጳዉሎሳ አ ስን አድኖ። 34ጋድያ ሞድያዌ ዳብዳቢያ ናባቤዳዋፐ ጉይያን፥ ጳዉሎስ ሀቃ አዉራጃ አሰንቶ አ ኦቼዳ፤ ክልቂያ አሳ እ ግዴዳዋ ኤሬዳ ዎደ፥ 35“ታን ነባ ኔና ሞትያዋንቱ ይያ ዎደ ስሳና” ያጊደ፥ ዎታዳራቱ ሄሮድሳ ካዉተ ጎለን አ ናጋና ማላ አዛዜዳ።

Currently Selected:

ኪታ 23: DFBE

Highlight

Compare

Copy