2 ሳሜላ 14
14
አበሴሎም የሩሳላመ ስሜዳ
1ጻሩይ ናአይ እዮኣበ ካቲ ዳዊተ አበሰሎማ ላሞቴዳዋ ኤሬዳ። 2ሄዋ ድራዉ፥ ዮኣበ ታቆአ ካታማ ኪቲደ፥ ያፐ እት ኤራንቻ ምሽራቶ አህሲደ እዞ፥ “ኔን ካዮትያ አሳዳን ሀና፤ ካዩዋ ማዩዋ ማያ፤ ሽጭስያዋ ኦከቶፓ፤ ዳሮ ዎደፐ ዶሚደ፥ ሀይቄዳ አሳዉ ካዮትያ ማጫ አሳዳን ሀና። 3ያታደ ካትያኮ ባደ ሀ ቃላቱዋ አዉ ኦዳ” ያጌዳ። እዮኣበ አ ካትያዉ ኦዳናዋ እዝዉ ኦዴዳ።
4ታቆአ ካታማ ምሽራታ ካትያኮ ቤዳ ዎደ፥ ቢታን ግሳ ጉፋናደ፥ “ካትያዉ፥ ታና ማዳርኪ!” ያጋዱ።
5ካቲ እዞ፥ “ኔና አዬ መቴዳዌ?” ያጊደ ኦቼዳ።
እዛ፥ “ታን አስናይ ሀይቄዳ ማጫ አሳ። 6ታዉ ነ ቆማትዉ ላኡ አቱማ ናናይ ደኢኖ። ኡንቱንቱ እቱ እቱዋና ደምባን ዋቴድኖ፤ ኡንቱንታ ሻካናዉ እት አሳይነ ይና፥ እቱ የንኩዋ ሾጪደ ዎዳ። 7ሀእ ታ ዳቦቱ ኡባይ ታ ቦላ ደንዲደ፥ ‘ባረ እሻ እ ዎዳ ድራዉ፥ ኑን አ ዎናዳን ባረ እሻ ዎዳዋ ኑዉ ሀማ፤ ያቲደ ኑን ላትያዋ ይሳና ያጌድኖ።’ ያቶፐ፥ ኡንቱንቱ ታዉ ላታዉ አቴዳ እት ጺፋ ቶይሲኖ፤ ታ አስና ሱንካ አ ዘረ ቢታፐ ይሲኖ” ያጋዱ።
8ካቲ ሄ ምሽራቶ፥ “ነ ሶ ባ፤ ታን ነዉ አዛዛና” ያጌዳ።
9ሽን ታቆአ ካታማ ምሽራታ ካትያ፥ “ታ ጎዳዉ ካትያዉ፥ ጎሚ ታናነ ታ አዉዋ ጎልያ አሳ ኦይቆ፤ ሽን ካቲነ አ ካዉተ አራታይ ጌሻ ግዶ” ያጋዱ።
10ካቲ ምሽራቶ፥ “ነ ቦላ ቃላ ቃትያ ኦናነ ታኮ አሀ፤ እ ኔና ላኤን ቦቼና” ያጌዳ።
11ምሽራታ ካትያ፥ “ሱ አችያዌ ባሻ ቦላ ባሻ ጉጀናዳንነ ታ ናኣካ ዎናዳን ካቲ መና ጎዳ ባረ ጾሳ ሱንን ታዉ ጫቆ” ያጋዱ።
ካቲ እዞ፥ “መና ጎዳይ ኤሮ! ነ ናኣ ሁጲያ ብናናፐ እቱካ ቢታን ዎና” ያጌዳ።
12ሄዋፐ ጉይያን፥ ምሽራታ ካትያ፥ “ታ ጎዳ ካትያዉ ታን እት ቃላ ሃሳያይ” ያጋዱ።
ካቲ፥ “ሃሳያ” ያጌዳ።
13ሄ ምሽራታ ካትያ፥ “ያትና፥ ኔን ጾሳ አሳ ቦላ ሀዋ ማላ አያዉ ኦዲ? ካቲ የደርሰዳ ባረ ናኣ ጉየ ዛርቤና ድራዉ፥ ባረ ሃሳዬዳ ቃላዉ ካቲ ባይዛንቻ ግደኔ? 14ኑን ኡባይ ሀይቃና፤ ቢታን ጉኬዳ ሃይ ስመናዋዳን፥ ኑን ላኤን ስሞኮ። ሽን ጾሳይ ቦሄቴዳ አሳይ ኡባካ የና ማላ፥ አዉ ኦግያ ጊግሴፐ አትና፥ እ ጮ ያናዳን ኮየና።
15“ታና አሳይ ያሽስያ ድራዉ፥ ታ ጎዳዉ ካትያዉ ታን ሀዋ ኦዳናዉ ሀእ ያድ። ታን ነ ቆማታ፥ ‘ታን ካትያዉ ሃሳያና፤ ኦን ኤሪ፥ ታን አ ቆማታ ኦችያዋ ካቲ ፖላነንቶነ፤ 16ጾሳይ ኑዉ እሜዳ ላታፐ ታናነ ታ ናኣ ይሳናዉ ኮይያ አሳ ኩሽያፐ ካቲ ስሲደ አሻነንቶነ’ ያጋደ ቆፓይ። 17ቃይካ ታን ነ ቆማ፥ ‘ሎኡዋነ ኢታ ሻካናዉ ታ ጎዳይ ካቲ ጾሳ ኪታንቻ ማላ ግድያ ድራዉ፥ ታ ጎዳ ካትያ ቃላይ ታና ዎፕሶ። መና ጎዳይ ነ ጾሳይ ኔናና ግዶ’ ያጋይ” ያጋዱ።#2 ሳሜላ 19:27
18ካቲ ምሽራትዉ፥ “ታን ኔና ኦቻና ሀንያባ ዛሩዋ ኔን ታፐ ቆሶፓ” ያጌዳ።
ምሽራታ፥ “ታ ጎዳይ ካቲ ሃሳዮ” ያጋዱ።
19ካቲ ምሽራቶ፥ “ሄዋን ኡባን እዮኣባ ኩሺ ኔናና ደኢ?” ያጊደ ኦቼዳ።
ምሽራታ፥ “ታ ጎዳዉ ካትያዉ፥ ነ ሸምፑ ኤሮ! ኔን ታ ጎዳይ ካቲ ሃሳዬዳ ኡባባፐ ኡሸቻ ዎይ ሀድርሳ ጋናዉ ዳንዳይያ እት አስካ ባዋ። ኤ፤ ሀዋ ታና አዛዜዳዌ፥ ታ ዶናን፥ ነ ቆማት ዶናን ሀዋ ዎዳዌ ነ ቆማ እዮኣባ። 20ሀእ ደእያ ሀኖታ ላማናዉ ነ ቆማይ እዮኣበ ሀዋ ኦዳ። ጾሳ ኪታንቻዉ ደእያ አዳ ኤራ ማላይ ታ ጎዳዉ ደኤ፤ ቢታን ሀንያዋ ኡባባ እ ኤሬዳ” ያጋዱ።
21ካቲ እዮኣባ፥ “ዳሮ ሎአ! ታን ሀዋ ኦና! ባ፤ ሄ ያላጋ ብታንያ አበሰሎማ አካደ ያ” ያጌዳ።
22እዮኣበ ካትያ ስንን ግስ ጉፋኒደ፥ ካትያ ሀዋዳን ያጊደ አንጄዳ፤ “ታ ጎዳዉ ካትያዉ፥ ነ ስንን ናሸቴዳዋ ነ ቆማይ ሀቼ ኤሬዳ፤ አያዉ ጎፐ፥ ካቲ ባረ ቆማይ ኦቼዳዋ ስሴዳ” ያጌዳ።
23ሄዋፐ ጉይያን፥ ዮኣበ ደንዲደ ጋሹራ ጋድያ ቢደ አበሰሎማ የሩሳላመ አክ ዬዳ። 24ሽን ካቲ፥ “እ ባረ ሶ ባናዉ በሰ፤ እ ታ ዴሙዋ በኦፖ” ያጌዳ፤ አበሴሎም ባረ ሶ ቤዳ፤ ካትያ ዴሙዋካ በእቤና።
ዳዊተ አበሴሎማና ስገቴዳ
25እስራኤልያ ኡባ ግዶን ማላ ሎኡነ አበሴሎማዳን ሳበቴዳ እት አሳይነ ባዋ። አ ሁጲያፐ ቢደ ገድያ ጹጉንይ ጋካናዉካ አን ካያባይ ባዋ። 26እ ባረና ዴጽያ ዎደ ባረ ሁጲያ ብናና ቃንጽሴ፤ ባረ ሁጲያ ብናና ቃንጽስያ ዎደ ኡባን ሚዛንያን ዎደ ማዛኔ፤ ካትያ ሚዛና ልክያን ላኡ ክሎነ ሄዙ ጼቱ ግራምያ ዴጼ። 27አበሰሎማዉ ሄዙ አቱማ ናናይነ እት ማጫ ናታ የለቴድኖ፤ ማጫ ናት ሱንይ ታማሮ፤ ሄ ናታ ማላ ሎኦ ማጫ አሳ ግዳዱ።
28አበሴሎም ላኡ ላይ ኩመን ካትያ ዴሙዋ በኤናን የሩሳላመን ደኤዳ። 29“ታን ኔና ካትያኮ ኪታና ማላ፥ ታኮ ሃያ” ያጊደ አበሴሎም እዮኣባዉ ኪቴዳ፤ ሽን እዮኣበ ዬናን እጼዳ። ላኤንዋካ ኪቴዳ፤ ሽን እዮኣበ አኮ ዬናን እጼዳ። 30ሄዋፐ ጉይያን፥ አበሴሎም ባረ ቆማቱዋ፥ “ስስተ! ታ ጎሻ ማታን እዮኣባዉ ጎሻይ ደኤ፤ አዉ ሄዋን ባንጋይ ደኤ። ቢደ ታማ ኦይተ” ያጌዳ። አበሰሎማ ቆማቱ እዮኣባ ባንጋ ታማ ኦይድኖ።
31ያትና፥ እዮኣበ ደንዲደ፥ አበሰሎማ ሶ ቢደ “ነ ቆማቱ ታ ባንጋ አያዉ ታማ ኦይድኖ?” ያጌዳ።
32አበሴሎም እዮኣባ፥ “ኔን ታን ኪትና ዬናን እጼዳ ድራሳ። ኔን ካትያኮ ባደ፥ ‘አበሰሎም ሀዋዳን ያጌ፤ “ታን ጋሹራ ጋድያፐ አያዉ ያድታ? ታን ሀኖ ጋካናስካ ያን ደኤዳዋ ግድንቶ ታዉ ሎአ ሽን” ያጌ’ ጋደ ታዉ ኦቻናዳን ኮያድ። ሀእካ ታን ካትያ ዴሙዋ በአናዉ ኮያድ፤ ታን ባይዛንቻ ግዶፐ፥ እ ታና ዎ” ያጌዳ።
33እዮኣበ ካትያኮ ቢደ፥ አበሴሎም ጌዳዋ ኦዴዳ። ካቲ አበሰሎማ ጼስስና አበሴሎም ሶ ገሊደ፥ ካትያ ስንን ሳኣን ግሲደ ጎይኔዳ፤ ያትና፥ ካቲ አበሰሎማ የሬዳ።
Currently Selected:
2 ሳሜላ 14: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
