2 ካታቱዋ 4
4
ኤልሳእ እት ህዬሳ አምአቶ ማዴዳ
1ትምቢትያ ኦድያዋንቱፐ እቱዋ ማቻታ ኤልሳአኮ ባደ፥ “ነ ቆማይ ታ አስናይ ሀይቄዳ። እ መና ጎዳዉ ያይያ አሳ ግድያዋ ኔን ኤራሳ። ሽን ሀእ አ አጮ ታ ናና ላኡዋ ባረዉ አይለ ከሳናዉ ዬዳ” ያጋደ አዉ ዋሳዱ።
2ኤልሳእ እዝዉ፥ “ያትና ታን ነዉ አይ ኦ? ነ ሶን አያይ ደኢ? አነ ታዉ ኦዳ” ያጌዳ።
ምሽራታ፥ “ታዉ ነ ቆማትዉ እት ኦቱዋን ዛይቲ ደእያዋፐ አትና፥ ሀራባይ አያይነ ባዋ” ያጋዱ።
3ኤልሳእ እዞ፥ “ባ፤ ነ ሾሮቱዋ ኡባፐ መላ ኦቶቱዋ ጋርጻ። ላፋ ጋርጾፓ። 4ሄዋፐ ጉይያን፥ ሶ ገላደ፥ ነ ቦላነ ነ ናናቱዋ ቦላ እፍ ጎርዳ። ኦቶቱዋ ኡባን ዛይትያ ትጋ፤ ዛይቲ ኩሜዳ ኦቱዋ ኦቱዋ እት ባጋ ዛራ” ያጌዳ።
5ምሽራታ ባደ፥ ካርያ ባረ ቦላነ ባረ ናናቱዋ ቦላ ጎርዳዱ። ኡንቱንቱ እዝዉ ኦቶቱዋ ሺሽና፥ አ ዛይትያ ትገ ኦይቃዱ። 6ኦቱዋ ኡባይ ኩሜዳ ዎደ፥ ምሽራታ ባረ ናኣ፥ “አነ ታዉ ሀራ ኦቱዋ አካደ ያ” ያጋዱ።
ሽን ናአይ ዛሪደ፥ “ሀር እት ኦቱነ አትቤና” ያጌዳ። ሄዋፐ ጉይያን፥ ዛይቲ ጎግያዋ አግ ባሼዳ።
7ምሽራታ ስማደ ባደ፥ ኤልሳኤዉ ኦዳዱ። እ፥ “ባደ ዛይትያ ዛልኣደ፥ ነ አጩዋ ጭጋ። አቴዳዋን ኔንነ ነ ናናይነ ጎኤቲደ ደአናዉ ዳንዳዪታ” ያጌዳ።
ኤልሳአነ ሹኔማ ካታማን ደእያ ምሽራቶነ
8እት ጋላስ ኤልሳእ እት ዱረ ምሽራታ ደእያ ሹኔማ ጌተትያ ካታማ ቤዳ። ምሽራታ አ ሾባደ፥ ቁማ ምዛዱ። ሄ ጋላሳፐ ዶሚደ፥ እ ሄዋና አያ ዎደ ኡባን፥ ቁማ ማናዉ እ ሶ ገሌ። 9አ ባረ አስና፥ “ሀ ኡባ ዎደ ኑ ማታና አያ ብታኒ ጾሳ አሳ ግድያዋ ታን ኤራይ። 10ሄዋ ድራዉ፥ አነ እት ጉ ክፍልያ ቦላ ፖቅያን አዉ ኬጾይተ፤ አ ግዱዋን ግሱዋ፥ አራታ፥ ጻራጴዛነ ጾምፕያ ዎይተ። ሄዋፐ ጉይያን፥ እ ኑኮ ዬዳ ዎደ ኡባን፥ ሄዋን ገላና ዳንዳዬ” ያጋዱ።
11እት ጋላስ ኤልሳእ ሹኔማ ካታማ ዪደ፥ ባረ ክፍልያ ፑደ ከሲደ፥ ያን ሸምፔዳ። 12ሄዋፐ ጉይያን፥ ባረ ቆማ ግያዛ፥ “ባ፤ ሄ ምሽራቶ ጼሳ” ያጌዳ፤ ግያዝ ጼስና፥ አ ያደ ኤልሳአ ስንን ኤቃዱ። 13ኤልሳእ ግያዛ፥ “ሀ ምሽራቴ ‘ኔን ኑ ድራዉ፥ ሀዋ ኡባ መቶታዳ። ያትና ኑን ነዉ አይ ኦነ? ነዉ ኑን ቢደ፥ ካትያ ዎይ ኦላ ጋዳዋ ሃሳይስያብ ደኢ?’ ያጋደ እዞ ኦቻ” ያጌዳ።
ምሽራታ፥ “ታን ሀዋን ታ አሳ ግዶን ደእሽን፥ ታና መትያባይ ባዋ” ያጋዱ።
14ሄዋፐ ጉይያን፥ ኤልሳእ ግያዛ፥ “ያትና ኑን እዝዉ አይ ኦኔ?” ያጊደ ኦቼዳ።
ግያዝ፥ “እዝዉ ናእ ባዋ፤ እ አስናይካ ጭሜዳ” ያጌዳ።
15ኤልሳእ፥ “ምሽራቶ ቃይካ ጼሳ” ያጌዳ። እዞ ጼሴዳ፤ እዛ ያደ፥ ፐንግያን ኤቃዱ። 16ኤልሳእ ምሽራቶ፥ “ላይ ሀኖደ ኔን አቱማ ናኣ እድማና” ያጌዳ።
ምሽራታ፥ “ሀይ ታ ጎዳዉ፥ ኔን ጾሳ አሳ ግድኪ፥ ታዉ ዎርዶቶፓ!” ያጋዱ።#ዶመ 18:14
17ሽን ምሽራታ ሻሃራዱ፤ ኤልሳእ እዝዉ ኦዴዳዋዳን ላይን ሄ ዎደ አቱማ ናኣ የላዱ።
18ሄ ናአይ ድጬዳ፤ እት ጋላስ ካ ጫክያ አሳቱዋና ደእያ ባረ አዉዋኮ ቤዳ። 19ባረ አዎ፥ “ዎ ታ ሁጲያዉ! ዎ ታ ሁጲያዉ!” ያጌዳ።
አ አዉ እት ቆማዉ፥ “ቶካደ አ ዳይኮ አፋ” ያጊደ ኦዴዳ።
20ቆማይ ናኣ አኪደ፥ አትኮ አፍና ጋላሳ ሴታይ ጋካናዉ ናአይ ባረ ዳይ ክዉዋን ኡቴዳ፤ ሄዋፐ ጉይያን፥ ናአይ ሀይቂ አጌዳ። 21ምሽራታ ናኣ ፑደ አፋደ፥ ጾሳ አሳ አርሳን ግስሳዱ። ያታደ አ ቦላ እፍ ጎርዳደ ባዱ።
22ሄዋፐ ጉይያን፥ ባረ አስና ጼሳደ፥ “ታን ጾሳ አሳኮ ኤለካ ባደ ያና ማላ፥ ቆማቱዋፐ እቱዋነ ሀረቱዋፐ እቱዋነ ታዉ የዳ” ያጋዱ።
23እ፥ “ሀቼ አግና ጼሩዋ ጋላሳ ዎይ ሳምባታ ግደናባ፥ አዬ ኔና አኮ አፍያዌ?” ያጌዳ።
አ፥ “አያይነ ባዋ” ያጋዱ። 24ሄዋፐ ጉይያን፥ ሀርያ ኮራደ፥ ባረ ቆማዉ፥ “ሀርያ ላጋ! ታን ነዉ ኦዳና ጋካናዉ፥ ሎዳን ላጎፓ” ያጋዱ። 25ምሽራታ ሄዋፐ ደንዳደ፥ ቃርመሎሳ ደርያን ደእያ ጾሳ አሳኮ ባዱ።
ኤልሳእ ምሽራታ ይያኖ ሃኩዋን በኢደ፥ ባረ ቆማ ግያዛዉ፥ “በአ፥ ሹኔማ ካታማን ደእያ ምሽራታ ያዉ። 26ኦ ሞካናዉ ዎጻ ባደ፥ ‘ኔን ሳሬ? ነ አስናይ ሳሬ? ነ ናአይ ሳሬ?’ ያጋደ ኦቻ” ያጌዳ።
ምሽራታ፥ “ኑን ኡባይካ ሳራ” ያጋዱ።
27ምሽራታ ደርያ ቦላን ደእያ መና ጎዳ አሳኮ ጋኬዳ ዎደ፥ ሆካደ አ ገድያ ኦይቃዱ።
ግያዝ ምሽራቶ ድጋናዉ ሺቄዳ፤ ሽን ጾሳ ብታኒ አ፥ “አጋ! አ ዎልቃማ መቱዋን ደአዉ፤ ሽን መና ጎዳይ ታፐ ሄዋ ገንዳ። እ መቱዋ ታዉ ኦድቤና” ያጌዳ።
28ሄዋፐ ጉይያን ምሽራታ፥ “ታ ጎዳዉ፥ ኔን ታዉ ናኣ እማናዳን ታን ኔና ኦቻድታ? ታን ኔና፥ ‘ታና ጮ መላ ቃቃዮፓ’ ያጋበይክታ?” ያጋዱ።
29ኤልሳእ ግያዛ፥ “ነ አዱሳ ማዩዋ ነ ሳቂያን ስርቃ፤ ያታደ ታ ጋትማ አካደ ኤሌላ፥ ኦግያን ኦናናነ ጋከቶፐ፥ ሳሮቶፓ፤ ኦንነ ኔና ሳሮቶፐ፥ ዛራደ ሳሮቶፓ። ታ ጋትማ ናኣ ዴሙዋን ዎ” ያጌዳ።
30ሽን ናኣ ዳያ፥ “መና ጎዳይ ኤሮ! ነ ሸምፑ ኤሮ! ታን ኔና የጋደ ቢከ” ያጋዱ። ኤልሳእ ደንዲደ፥ እዞ ካሌዳ። 31ግያዝ ኡንቱቱፐ ስንቲደ ቢደ ጋትማ ናኣ ዴሙዋን ዎዳ፤ ሽን ኮሻይ ዎይ ሸምፑ ባዋ። ያትና ግያዝ ኤልሳኤና ጋከታናዉ ስም ዪደ፥ “ናአይ ቤጎትቤና” ያጊደ ኦዴዳ።
32ኤልሳእ ሶ ገሊደ፥ ሄ ናኣ አሃይ አ አርሳን ግሴዳዋ በኤዳ። 33ባረ ቦላነ ናኣ ቦላነ ካርያ ጎርዲደ፥ መና ጎዳ ዎሴዳ። 34ሄዋፐ ጉይያን፥ ናኣ አሃ ቦላ ከሲደ፥ ባረ ዶና አ ዶናን፥ ባረ አይፍያ አ አይፍያን፥ ባረ ኩሸቱዋካ አ ኩሸቱዋን ጋ ዎደ ግሴዳ። ናኣ ቦላይ ሆኤዳ።#1 ካታ. 17:21 35ኤልሳእ ደንዲደ፥ ሶ ግዶን ያነ ሃነ ስመረቴዳ። ላኤንዋካ ስሚደ፥ ናኣ ቦላ ጮጎቲደ ግሴዳ። ያትና ናአይ ላፑ ገደ ሄሼዳዋፐ ጉይያን ጼሌዳ።
36ያትና ኤልሳእ ግያዛ ጼሲደ፥ “አነ ሀ ሹኔማቶ ጼሳ” ያጌዳ። ግያዝ እዞ ጼሴዳ። እዛ ዬዳ ዎደ፥ ኤልሳእ እዞ፥ “ነ ናኣ አካ” ያጌዳ። 37ሄዋፐ ጉይያን፥ ምሽራታ ኤልሳአ ገድያን ኩንዳደ፥ ቢታን ጉፋናዱ። ያታደ ባረ ናኣ አካደ ካረ ከሳዱ።
ሀራ ላኡ ማላልስያባቱዋ
38ኤልሳእ ገልጋላ ስሚደ ዬዳ ዎደ፥ ቢታይ ኮሻት ኡቴዳ። ትምቢትያ ኦድያዋንቱ ጭታይ አ ስንን ኡት ደእሽን፥ እ ባረ ቆማ፥ “ዎጋ ከርያ ታማን ዎደ፥ ሀ አሳቶ ዎጽያ ካ” ያጌዳ። 39ኡንቱንቱፐ እቱ ሳን ማላትያ ቦንጨቱዋ ማጺደ አሀናዉ ጋደ ቤዳ። ዶልያ ጎስያ ቱራ ደሜዳ፤ ቶካናዉ ዳንዳይያዋ ኬሻ ዳሮ ጎስያ አኪደ ዬዳ። እ አየንቶ ኤረናን አንጬዳ፥ ከርያን የጌዳ። 40አሳቱ ማና ማላ፥ ዎጽያ ትጌድኖ። ኡንቱንቱ ዎጽያ ቱሽ አ ም በኤዳ ዎደ፥ “ጾሳ አሶ፥ ሀ ከርያን ዎያባይ ደኤ!” ያጊደ ዋሴድኖ። አሳቱ ማናዉ ዳንዳይበይክኖ።
41ኤልሳእ፥ “ያቶፐ ታዉ ልያ አኪደ ዪተ” ያጌዳ። ሄ ልያ ከርያን ቆሊደ፥ “አሳይ ማናዳን ዎጽያ ትግተ” ያጌዳ። ሄዋፐ ስሚደ፥ ከርያን ኢታባይ ቤትቤና።
42ኮይሮ ጋኬዳ ካፐ ኡከቴዳ ላታሙ፥ ባንጋ ኮምፑዋ፥ ትሻ ካና እትፐ ባረ ኦጎሩዋን የግ አኪደ፥ ጾሳ አሳዉ አህያ እት ብታኒ ባኣል-ሻሊሻ ግያ ሳኣፐ ዬዳ። ኤልሳእ ባረ ቆማ፥ “ማናዉ አሳዉ አ” ያጌዳ።
43አ ቆማይ፥ “ታን ጼቱ አሳ ስን ሀዋ ዋታ አ?” ያጊደ ኦቼዳ።
ሽን ኤልሳእ፥ “ማናዉ አሳዉ አ፤ አያዉ ጎፐ፥ መና ጎዳይ ኡንቱንቱ ሚና ዶካይካ አታናዋ ያጌ” ያጌዳ። 44ሄዋ ድራዉ፥ ቆማይ ኡንቱንቱ ስን አና፥ ኡንቱንቱ ሜድኖ። መና ጎዳይ ጌዳዋዳን፥ ዶካይ አቴዳ።
Currently Selected:
2 ካታቱዋ 4: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
