2 ካታቱዋ 22

ኢዮስያሳ አይሱዋ

(2 ካታ. 22:1—23:30)

1እዮስያሰ ካተትያ ዎደ፥ ላይይ አዉ ሆስፑና፤ እ የሩሳላመን ሀታማነ እት ላይ ካተቴዳ። አ ዳይ ሱንይ ይዲዶ፤ እዛ ቦጽቃታ ግያ ካታማን ደእያ አዳያ ናቶ።#ኤር. 3:6 2እዮስያሰ መና ጎዳ ስንን ሱረባ ኦዳ፤ ኡሸቻ ሀድርሳ ጌናን ባረ ማይዛ አዉዋ ዳዊታ ኦግያን ኡባን ሀመቴዳ።

ጾሳ ህግያ ማጻፋይ ቤቴዳ

(2 ኦዱዋ 34:8-28)

3ካቲ እዮስያሰ ባረ ካተቴዳ ታማነ ሆስፑን ላይን፥ ማሹላማ ናኣ ናኣ፥ አጻልያ ናኣ፥ ዋና ጻፍያ ሳፋና መና ጎዳ ጌሻ ጎልያ ሀዋዳን ያጊደ ኪቴዳ፤ 4“አሳይ መና ጎዳ ጌሻ ጎልያ አህና፥ ጌሻ ጎልያ ፐንግያ ናግያዋንቱ አሳፐ ሺሼዳ ሻሉዋ ፓይዳናዳን፥ ቄሳቱዋ ኡባቱዋ ካፑዋ ህልቂያኮ ባ። 5ቄስያ ኡባቱዋ ካፑ ሚሻ መና ጎዳ ጌሻ ጎልያ ኦራስያ ካፓቶ እማና ማላ ኦዳ። ኡንቱንቱካ ጌሻ ጎልያ ኦራያ ኦሳንቻቶ፥ 6አናጸቶ ግምቢያዋንቶነ ሹቻ ማስያዋንቶ ጭግኖ። ቃይ ጌሻ ጎልያ ኦራናዉ፥ ምነ ቆኤቴዳ ሹቻ ሻምያዋንቶ ጭግኖ። 7ሄ ኪታ ዎችያዋንቱ አማነትያ አሳ ግድያ ድራዉ፥ ኡንቱንቱ ኩሽያን ገሌዳ ሚሻን አያ አያ ኦደንቶ፥ ኡንቱንታ ኦቻናዉ ኮሸና” ያጌዳ።#2 ካታ. 12:15

8ሄዋፐ ጉይያን፥ ቄሳቱዋ ኡባቱዋ ካፑ ህልቂ ዋና ጻፍያ ሳፋና፥ “ህግያ ማጻፋ መና ጎዳ ጌሻ ጎልያን ደማድ” ያጌዳ። ማጻፋ ሳፋናዉ እሜዳ፤ ሳፋን አኪደ ናባቤዳ።

9ዋና ጻፊ ሳፋን ካትያኮ ስም ቢደ፥ “መና ጎዳ ጌሻ ጎልያን ደእያ ሻሉዋ ነ ኦሳንቻቱ ዉርስ አኪደ፥ ጌሻ ጎልያ ኦራስያ ካፓቶ እሜድኖ” ያጊደ ኦዴዳ። 10ቃይካ ዋና ጻፊ ሳፋን ካትያ፥ “ቄሲ ህልቂ ታዉ ማጻፋ እሜዳ” ያጊደ ካትያ ስንን ሄ ማጻፋ ናባቤዳ።

11ካቲ ህግያ ማጻፋን ደእያ ቃላ ስሴዳ ዎደ፥ ካዮቲደ ባረ ማዩዋ ፔዳ። 12ሄዋፐ ጉይያን፥ ካቲ ቄስያ ህልቂያ፥ ሳፋና ናኣ አህቃማ፥ ምካያ ናኣ አክቦራ፥ ዋና ጻፍያ ሳፋናነ ካትያ ኦሳንቻ አሳያ ሀዋዳን ያጊደ አዛዜዳ፤ 13“ቢተ፤ ታ ድራዉ፥ ሀ አሳ ድራውነ ይሁዳ ኡባ ድራዉ፥ ሀ በቴዳ ማጻፋ ቃላዋ አነ መና ጎዳ ኦችተ። አያዉ ጎፐ፥ ኑዉ ጻፈቴዳ ኡባባ ኦናዉ፥ ኑ ማይዛ አዎቱ ሀ ማጻፋ ቃላዉ አዛዘትቤና ድራዉ፥ ኑ ቦላ ሱሌዳ መና ጎዳ ሀንቁ ሎይ ዳራ” ያጌዳ።

14ቄሲ ህልቂ፥ አህቃም፥ አክቦር፥ ሳፋንነ አሳይ ትምቢትያ ኦድያ ሁልዶ ግያ ምሽራቶ ኦቻናዉ ቤድኖ። ሁልዳ ሀርሃሳ ናኣ ቲቅዋ ናኣ፥ ጌሻ ጎልያ ማዩዋ ናግያ ሻሉማ ምሽራቶ። አ የሩሳላመን ላኤን ሹቻን ደአዉ። ሄ ቤዳ አሳቱ እዝና ሃሳዬድኖ።

15ሁልዳ ኡንቱንታ፥ “መና ጎዳይ እስራኤልያ ጾሳይ፥ ‘ህንተና ታኮ ኪቴዳ ብታንያዉ ኦድተ ያጌ።’ 16መና ጎዳይ ሀዋዳን ያጌ፤ ‘በእተ፥ ይሁዳ ካቲ ናባቤዳ ማጻፋን ጻፈቴዳ ኢታ ቃላ ኡባ ታን ሀ ሳኣ ቦላነ ሀ ሳኣን ደእያ አሳ ቦላ አሀና ሀናይ። 17ኡንቱንቱ ታና አጊደ፥ ሀራ ጾሳቶ እጻና ጩዋዬድኖ፤ ያቲደ ኡንቱንቱ ባረንቱ ኩሽያን ኦዳዋን ኡባን ታና ሀንቀድኖ። ሄዋ ድራዉ፥ ታ ሀንቁ ሀ ሳኣ ቦላ ኤጽ ከሴዳ፤ ቶአናዉ ዳንዳየና’ ያጌ።

18“መና ጎዳ ኦቻናዉ ህንተንታ ኪቴዳ ካትያ ሀዋዳን ያግተ፤ ‘መና ጎዳይ እስራኤልያ ጾሳይ ኔን ስሴዳ ቃላ ሀዋዳን ያጌ፤’ 19ታን ሀ ሳኣ ቦላነ ሀ ሳኣን ደእያ አሳ ቦላ፥ ‘ታን ህንተንታ ይሳናነ ባይዛ ከሳና’ ጋደ ሃሳዬዳዋ ኔን ስሴዳ ዎደ፥ ነ ዎዛናይ ሹግና፥ መና ጎዳ ስንን ነ ሁጲያ ካዉሼዳ ድራዉነ ነ ማዩዋ ፔደ፥ ታ ስንን ዬኬዳ ድራዉ፥ ታን ነ ዎሳ ስሳድ ያጌ መና ጎዳይ። 20ሄዋ ድራዉ፥ ታን ኔና ሳሩዋን ነ ማይዛን ጋና፤ ኔን ሳሮ ሞገታና። ታን ሀ ሳኣ ቦላነ ሀ ሳኣን ደእያ አሳ ቦላ አሀና ኢታባ ነ አይፊ በኤና ያጌ ያግተ” ያጋዱ። ሄዋፐ ጉየ ኡንቱንቱ ቢደ፥ ሀ ሃሳየቴዳባ ካትያዉ ኦዴድኖ።

Currently Selected:

2 ካታቱዋ 22: DFBE

Highlight

Copy

Compare